16–22 nō Tetepa : « ’A fa’ateitei i tō ’outou upo’o i ni’a ’e ’a fa’aitoito. » 3 Nephi 1–7
« 16–22 nō Tetepa : ‘’A fa’ateitei i tō ’outou upo’o i ni’a ’e ’a fa’aitoito.’ 3 Nephi 1–7 », Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
« 16–22 nō Tetepa. 3 Nephi 1–7 », Mai, pe’e mai—Nō te ’utuāfare ’e te fare purera’a : 2024 (2023)
Hōho’a
Tē ’ite nei te ’āti Nephi i terā mahana ’aore e pō
One Day, One Night, and One Day [Hō’ē mahana, hō’ē pō, ’e hō’ē mahana], nā Jorge Cocco
16–22 nō Tetepa : « ’A fa’ateitei i tō ’outou upo’o i ni’a ’e ’a fa’aitoito »
E nehenehe e parau ē, e taime ’ana’anatae roa nō te rirora’a ’ei ta’ata fa’aro’o ia Iesu Mesia. Tē tupu ra te mau parau tohu—tē fa’a’ite ra te mau tāpa’o rahi ’e te mau temeio i rotopū i te mau ta’ata ē, ’ua fātata roa te Fa’aora i te fānauhia. I te tahi pae, e taime pe’ape’a ato’a nō te feiā fa’aro’o inaha, noa atu ā te mau temeio ato’a, ’ua onoono noa te feiā fa’aro’o ’ore i te parau ē « ’ua ma’iri te tau » nō te fānaura’a o te Fa’aora (3 Nephi 1:5). ’Ua fa’atupu teie mau ta’ata « te ti’arepu rahi i ni’a i te fenua ē ’ati noa a’e » (3 Nephi 1:7) ’e ’ua fa’ata’a ato’a rātou i te hō’ē tai’o mahana e taparahi-pohe-hia ai te feiā fa’aro’o ’ia ’ore noa atu te tāpa’o i tohuhia e Samuela te ’āti Lamana—hō’ē pō ’aita e pōiri—e tupu.
I roto i teie vaira’a fifi mau, ’ua « ti’aoro ’ū’ana atu ra [te peropheta Nephi] i tōna Atua nō tōna mau ta’ata » (3 Nephi 1:11). E mea fa’auru mau te pāhonora’a a te Fatu nō te ta’ata e fa’aruru i te hāmani-’ino-ra’a ’aore rā te fē’a’a ’e ’o tē tītauhia ’ia ’ite ē e upo’oti’a te māramarama i ni’a i te pōiri : « ’A fa’ateitei i tō ’outou upo’o i ni’a ’e ’a fa’aitoito […] e fa’atupu vau i te mau mea ato’a tā’u i fa’aue ’ia parauhia e te vaha o tō’u mau peropheta mo’a » (3 Nephi 1:13).
Mana’o nō te ’apo i te ha’api’ira’a i te ’utuāfare ’e i te fare purera’a
Nō te fa’afāriu ia tātou i te ’evanelia a Iesu Mesia tītauhia te fa’a’oroma’i ’e te tauto’ora’a.
Tē fa’ata’a nei te 3 Nephi 1–7 i te parau nō te mau ta’ata tei fa’afāriuhia i te Fatu ’e ’o rātou ato’a tei ’ore i fa’afāriuhia. E aha te mea i fa’atupu i te ta’a-’ē-ra’a i rotopū i teie mau pupu ? E nehenehe te hō’ē tāpura mai teie i muri nei e tauturu ia ’oe ’ia fa’anaho i tō ’oe mau mana’o :
’A ui i tā ’oe iho mau uira’a ’a tuatāpapa noa ai. ’Ei hi’ora’a, ’a fa’aoti ai ’oe i teie tāpura, e nehenehe tā ’oe e ui i te mau uira’a mai teie « E aha te ha’api’ira’a nō’u i’ō nei ? » E hōpoi mai te reira i te fa’aurura’a nō ’ō mai i te Vārua Maita’i ra.
Maoti ’o Iesu Mesia, e nehenehe au e « fa’aitoito. »
’Ua ’ite tō ’oe Metua i te ao ra ē, i roto i tō ’oe orara’a, tē vai ra te mau taime fifi, ’e te taiā ato’a. ’Ua hina’aro ato’a rā ’oia ’ia ’ite ’oe i te ’oa’oa. ’A tai’o i te 3 Nephi 1:1–23 nō te ha’api’i mai nō ni’a i te mau tumu i mata’u ai te mau ’āti Nephi ha’apa’o maita’i. E aha te tumu te Fatu i hōro’a ia rātou ’ia « fa’aitoito » ?
’Ua fa’a’ohipa te Fa’aora i te parau ra « ’a fa’aitoito » i te mau taime e rave rahi—’ei hi’ora’a, i roto i te Mataio 14:24–27 ; Ioane 16:33 ; Te Ha’api’ira’a Tumu ’e te mau Fafaura’a 61:36 ; 78:17–19. E aha tā ’oe e fa’ahiahia i te reira mau anira’a? E nehenehe ’oe e tai’o i te mau ’īrava ’ati a’e nō te hāro’aro’a i te vaira’a o te ta’ata i tō te Fa’aora paraura’a i teie mau parau. I roto i te hi’ora’a tāta’itahi, e aha te mau tumu tāna i hōro’a nō te tauturu i te ta’ata ’ia fa’aruru i tō rātou mau mata’u ? Mea nāhea tōna ravera’a i te reira nō ’oe ?
E nehenehe e tuatāpapa i te a’ora’a a te peresideni Russell M. Nelson « Te ’oa’oa ’e te oraora pae vārua » (Liahona, Novema 2016, 81–84). E aha tā te peresideni Nelson e ha’api’i nei ia ’oe nō ni’a i te ’itera’a i te ’oa’oa i roto i te mau huru taime ato’a ? ’A hi’o e hia taime tō te peresideni Nelson fa’a’ohipara’a i te ta’o rōtahi. Pēnei a’e e nehenehe tā ’oe e fa’aau i te fa’atanora’a i te pata hōhō’a i ni’a i te hō’ē mea mai te rōtahira’a i ni’a ia Iesu Mesia. Nāhea ’oe i te rōtahi atu ā i ni’a iāna ?
E fa’atupu te Fatu i tāna mau parau ato’a i tōna taime.
’A tai’o i te 3 Nephi 1:4–7 ’e ’a feruri e aha tō ’oe mana’o ’āhiri ’o ’oe te hō’ē o te mau pipi. E aha tā rātou i rave nō te tāpe’a pūai noa i tō rātou fa’aro’o ? (hi’o 3 Nephi 1:4–21 ’e 5:1–3). Nāhea te mau parau a Samuela i te fa’atupura’ahia ? (hi’o 3 Nephi 1:19–21). Mea nāhea tō te Fatu fa’atupura’a i tāna mau parau i roto i tō ’oe orara’a ?
’Ua nā ’ō Moromona ē : « Inaha, e pipi au nā Iesu Mesia » (3 Nephi 5:13). E aha te aura’a o teie parau nō ’oe ? E nehenehe e mā’imi i roto i te 3 Nephi 1:4–15 ; 5:12–26 ; 6:10–15 ; ’e 7:15–26, ma te ’imi i te mau huru maita’i, te mau ti’aturira’a ’e te mau ’ohipa a te mau pipi a te Mesia.
Hi’o ato’a « Jésus-Christ est mon modèle », Chants pour les enfants, 40–41.
’Ia fa’a’ohipa ana’e au i te fa’aro’o ia Iesu Mesia, ’aita e tītauhia iā’u ’ia mata’u.
Tē vai ra i roto i te ’ohipa i tupu i rotopū i te ’āti Nephi ’e te mau pupu ta’ata ’eiā, te mau ha’api’ira’a ’o tē nehenehe e tauturu ia ’oe i roto i te mau fifi pae vārua tā ’oe e fa’aruru nei. ’A ’imi i te reira mau ha’api’ira’a i roto i te 3 Nephi 2:11–12 ’e te 3:1–26. ’Ei hi’ora’a, e nehenehe ’oe e mā’imi i roto i te mau parau a Gidiani, i roto i te 3 Nephi 3:2–10, ’e ’ia fa’aau i te reira i te huru o Sātane e tāmata nei i te fa’ahema ia tātou. E aha tā ’oe i ha’api’i mai nā roto mai i te hi’ora’a o Lakoneusa ?
Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.
’Ua fā mai te hō’ē feti’a ’āpī i te taime ’a fānauhia ai Iesu Mesia.
E nehenehe te ’api fa’a’ana’anataera’a nō teie hepetoma e tauturu i tā ’oe mau tamari’i ’ia ha’api’i mai nō ni’a i te mau temeio tā te mau ’āti Nephi i ’ite i te taime ’a fānauhia ai Iesu. E nehenehe ato’a ’oe e fa’a’ohipa i te « Pene 41 : Te mau tāpa’o nō te fānaura’a o te Mesia » (Te mau ’ā’amu o te Buka a Moromona, 114–16) nō te ha’api’i ia rātou i teie ’ā’amu—’aore rā nō te tauturu ia rātou ’ia fa’ati’a mai i te reira ia ’oe.
’A tai’o ai ’oe ’e tā ’oe mau tamari’i i te 3 Nephi 1:4–10, ’a ani ia rātou ’ia paraparau mai e aha ra te huru te orara’a ’ei feiā fa’aro’o i taua taime ra. I muri iho, ’a tai’o ai rātou i te toe’a o te ’ā’amu i roto i te mau ’īrava 11–15, e nehenehe rātou e hōro’a mai i te mau rāve’a nō te fa’ahope i teie parau : « Te ha’api’ira’a o teie ’ā’amu nō’u ’oia ho’i … »
Pēnei a’e e nehenehe tā ’oe mau tamari’i e tauturu ia ’oe ’ia feruri i te tahi atu mau taime ’ua fa’atupu te Atua i tāna mau parau fafau tei hōro’ahia mai nā roto i tāna peropheta. E hina’aro paha rātou e ’imi i te mau hōho’a nō teie mau ’ā’amu i roto i te Buka hōho’a nō te ’evanelia (hi’o, ’ei hi’ora’a, mau nūmera 7–8 ’e 81). E vaiiho ia rātou ’ia fa’a’ite mai i te mea tā rātou i ’ite nō ni’a i teie mau ’ā’amu, mai te huru te mau parau a te Atua i te tupura’a. ’A tai’o ’āmui i te 3 Nephi 1:20, ’e ’a fa’a’ite i tō ’oe iho ’itera’a pāpū nō teie mau parau mau.
’A tauturu i tā ’oe mau tamari’i ’ia ’ite ē, nō te aha te mau ’āti Nephi i ha’aputuputu ’āmui ai, ’e te mau ha’amaita’ira’a tei tae mai i ni’a ia rātou i roto i te 3 Nephi 2:11–12 ’e te 3:13–14, 24–26. Nō te aha e mea faufa’a ai nō tātou ’ia ha’aputuputu i teie mahana i roto i tō tātou mau ’utuāfare ’e i te fare purera’a ?
’Ua ’ite ānei ’oe i te hō’ē ha’api’ira’a tao’a ’o tē ha’api’i nei nō ni’a i te pūai o te tāhō’ē ? Pēnei a’e e nehenehe tā ’oe mau tamari’i e tāmata i te ’ōfati i te hō’ē ’āma’a rā’au ’e i muri iho i te hō’ē ruru rā’au ’e ’aore rā, hō’ē ’api parau ’e i muri iho, hō’ē ’āpapara’a ’api parau. E aha te tū’atira’a i roto ia tātou ’e te mau rā’au ’e ’aore rā, te mau ’api parau ?
I muri iho i te tai’o-’āmui-ra’a i te 3 Nephi 5:13, ’a ani i tā ’oe mau tamari’i ’ia fa’ahiti fa’ahou i te pereota ra « E pipi au nā Iesu Mesia. » Nō te ha’api’i mai e aha te aura’a ’ia riro ’ei pipi nā Iesu Mesia, ’a tai’o ’āmui i te tahi o teie mau hi’ora’a : te mau ’āti Lamana fa’afāriuhia (hi’o 3 Nephi 6:14), Moromona (hi’o 3 Nephi 5:12–26), ’e Nephi (hi’o 3 Nephi 7:15–26). E nehenehe ato’a ’oe e ’ite mai i te mau mana’o i roto i te hō’ē hīmene mai « Jésus-Christ est mon modèle » (Chant pour les enfants, 40–41).
I ni’a i te hō’ē tuha’a ’api parau, ’a tauturu i te mau tamari’i ’ia pāpa’i i te hōho’a o tō rātou rima ’e ’ia tāpūpū i te reira. ’A pāpa’i « E pipi au nā Iesu Mesia » i ni’a i te hō’ē pae, ’e ’a ani ia rātou ’ia pāpa’i i te hōho’a o te hō’ē ’ohipa tā rātou e nehenehe e rave nō te riro ’ei pipi, i ni’a i te tahi pae.
Nō te tahi atu ā mana’o, ’a hi’o i te ve’a Hoa nō teie āva’e.
Hōho’a
Tē ’ite nei te ’āti Nephi i terā mahana ’aore e pō
A Day, a Night, and a Day [Te ao, te pō, ’e te ao], nā Walter Rane.