laj Samuel aj Lamanita nak’utuk sa’ xb’een li xaqxookil tz’ak

Laj Samuel aj Lamanita sa’ xb’een li xaqxookil tz’ak, xb’aan laj Arnold Friberg

9–15 septiembre: “Sahil esilal re nimla sahil ch’oolejil”

Helaman 13–16

Li xb’een sut naq laj Samuel aj Lamanita kixyal xwotzb’al “sahil esilal” aran Tzarahemla (Helaman 13:7), kitz’eqtaanaak ut ki’isiik xb’aaneb’ laj Nefita kaweb’ raam. Naru raj xyeeb’al naq chanchan naq ke’xyiib’ jun xaqxookil tz’ak ink’a’ naru xt’anb’al chixsutameb’ li raam li kiramok reheb’ chixk’ulb’al li raatin laj Samuel. Laj Samuel kixtaw ru naq aajel ru li raatin, ut kixk’ut lix paab’aal rik’in xtaaqenkil lix taqlahom li Dios “naq taasutq’iiq wi’chik, ut taach’olob’anq jo’ profeet” (Helaman 13:3). Jo’ laj Samuel, chiqajunilo laa’o naqataweb’ li xaqxookil tz’ak sa’ “xkawresinkil xb’e li Qaawa’” (Helaman 14:9) ut sa’ xyalb’al qaq’e chixtaaqenkileb’ lix profeet. Ut jo’ laj Samuel, laa’o ajwi’ naqach’olob’ xyaalal li Jesukristo, “li taachalq chi yaal,” ut naqab’oq chixjunil “chixpaab’ankil lix k’ab’a’” (Helaman 13:6; 14:13). Moko chixjunil ta te’ab’inq, ut te’wanq ajwi’ li toohe’xka’pak’ali. A’b’anan, eb’ li neke’xpaab’ li esil a’in rik’in paab’aal chirix li Kristo neke’xtaw naq chi yaal a’an jun “sahil esilal re nimla sahil ch’oolejil” (Helaman 16:14).

Li na’leb’ re tzolok sa’ li ochoch ut sa’ li iglees

Helaman 13

Li Qaawa’ naxk’eheb’ tijom rik’in xtz’uumaleb’ reheb’ lix profeet.

Sa’eb’ li loq’laj hu, wan naq eb’ li profeet neke’juntaq’eetaman rik’ineb’ laj k’aak’alenel sa’ xb’een li xaxqookil tz’ak malaj najt xteramil kab’l, li neke’xye resil li xiwxiw (chi’ilmanq Isaias 62:6; Esekiel 33:1–7). Naq yooqat chixtzolb’al li raatin laj Samuel sa’ Helaman 13, k’e reetal chan ru naq a’an chanchan aj k’aak’alehom aawe. K’a’ru kixye li toj nak’anjelak sa’ li qakutankil? (che’ilmanq tz’aqal li raqal 8, 21–22, 26–29, 31, ut 38). K’a’ru kixk’ut laj Samuel chirix li jalb’a-k’a’uxlej? chirix li tuulanil ut li b’ihomal? chirix xsik’b’al xsahil qachʼool “rikʼin xbʼaanunkil maaʼusilal”?

Naru ajwi’ nakawil li aatin yeeb’il toje’ sa’ li jolomil ch’utub’aj-ib’ re xk’eeb’al reetaleb’ li tijom xk’e li Qaawa’ rik’in tz’uumaleb’ re lix profeet. K’a’ru eek’asinb’ilat chixb’aanunkil chirixeb’ li tijom a’in?

Sik’eb’ li eetalil neke’k’utun k’iila sut. Jun eetalil a’an jun k’uub’anb’il na’leb’ malaj k’utb’esink li naru taa’oksimanq jo’ aj k’amol b’e re xtz’aqob’resinkil ru k’a’ruhaq. Sa’eb’ li loq’laj hu, neke’qataw li eetalil li neke’xk’ut chan ru naq li Qaawa’ naxtz’aqob’resi ru lix k’anjel, jo’ xtaqlankileb’ lix moos re xtijb’aleb’ li tenamit.

jun junkab’al naril li jolomil ch’utub’aj-ib’

Naq neke’qab’i li profeet, toohe’xb’eresi rik’in li Jesukristo

Helaman 13–15

seminary icon

Li Dios nikinixb’oq chixjalb’al ink’a’uxl.

Sa’eb’ lix tijom laj Samuel chirix lix raqb’a-aatin li Dios kiwan ajwi’ li b’oqom aj uxtaan re li jalb’a-k’a’uxlej. Sik’eb’ li b’oqom a’an sa’ Helaman 13–15 (chi’ilmanq tz’aqal Helaman 13:6–11; 14:15–19; 15:7–8). K’a’ru nakatzol sa’eb’ li raqal a’in chirix li jalb’a-k’a’uxlej? Wankeb’ li neke’xk’oxla naq li jalb’a-k’a’uxlej a’an jun rahil tojb’a-maak—li ink’a’ naqaj xnumsinkil. Jo’ nakak’oxla laa’at, chan ru kiraj laj Samuel naq eb’ laj Nefita te’ril li jalb’a-k’a’uxlej?

Re xchaab’ilob’resinkil laa tzolb’al, naru nakawil li raatin li Awa’b’ej Russell M. Nelson, “Naru taqab’aanu li chaab’il wi’chik ut toowanq chi chaab’il wi’chik” (Jolomil ch’utub’aj-ib’ re abril 2019). K’a’ru kixye a’an chirix li jalb’a-k’a’uxlej? K’a’ruheb’ li osob’tesink re li jalok k’a’uxlej chi anchal ch’oolej li nakataw sa’ li raatin? Naru ajwi’ nakak’e reetaleb’ lix b’oqom li profeet choq’ qe chirix li jalaak. K’a’ru naxye li Santil Musiq’ej aawe naq tento taajal? Maare us naq taatz’iib’a li na’leb’ naxk’utb’esi chawu.

Chan ru naq li jalb’a-k’a’uxlej maawa’ ka’ajwi’ xjalb’al laa b’aanuhom? K’a’ut naq aajel ru xk’ulub’ankil lix b’oqom li Dios re xjalb’al qak’a’uxl? Naq yooqat chixk’oxlankil a’in, naru nakab’icha malaj nakawab’i jun li b’ich li nek’ehok li b’oqok a’in, maare “Chaabʼil xchaqʼrabʼ li Dios” (Eb’ li B’ich, 72).

Chi’ilmanq ajwi’ “Li Jesukristo tatxtenq’a,” Choq’ re Xkawilaleb’ li Saaj: Jun tenq’ re xsik’b’al ru laa b’e, 6–9; “El arrepentimiento: Una gozosa elección,” “Principios sobre la Paz: El arrepentimiento” (eb’ li video), Biblioteca del Evangelio; Temas del Evangelio “Arrepentimiento,” Biblioteca del Evangelio.

Helaman 14; 16:13–23

Li Dios kixtaqlaheb’ li eetalil ut li sachb’a-ch’oolej re xch’olob’ankil xyaalal lix yo’lajik ut lix kamik li Kolonel.

Sa’ Helaman 14, laj Samuel naxch’olob’ naq li Qaawa’ kixk’eheb’ reetalil lix yo’lajik ut lix kamik li Kolonel re naq li tenamit “te’xnaw chirix … lix k’ulunik” ut “te’ruuq chixpaabʼankil lix kʼabʼaʼ” (Helaman 14:12). Naq yooqat chirilb’al Helaman 14, k’e reetaleb’ li reetalil lix yo’lajik li Kolonel sa’eb’ li raqal 1–8 ut eb’ li reetalil lix kamik sa’eb’ li raqal 20–28. K’a’ut nakak’oxla naq eb’ li eetalil a’in chaab’ileb’ re reetalinkil lix yo’lajik ut lix kamik li Jesukristo?

Wankeb’ chik li kok’ eetalil k’eeb’ileb’ aawe li naru nakate’xtenq’a “chixpaab’ankil lix k’ab’a’ [li Kolonel].” K’a’ru xb’aanuhom a’an re xkawob’resinkil laa paab’aal chirix?

K’a’ru li tijom li k’eeb’il chirixeb’ li eetalil sa’ Helaman 16:13–23? K’a’ru naru taab’aanu re naq moko chanchanaqat ta li tenamit sa’eb’ li raqal a’in?

Chi’ilmanq ajwi’ Alma 30:43–52; Ronald A. Rasband, “Chi k’oxlanb’il xb’aan li Dios,” Jolomil ch’utub’aj-ib’ re octubre 2017.

Helaman 15:3

Li q’usuk xb’aan li Qaawa’ a’an reetalil lix rahom.

Li raatin laj Samuel nujenaq rik’in kawil q’usum, a’b’an Helaman 15:3 naxk’e jun na’leb’ chirix li q’usuk naxk’e li Qaawa’. Chan ru naq li q’usuk xb’aan li Qaawa’ naru taawanq choq’ reetalil lix rahom? K’a’ruheb’ li reetalil lix rahom ut li ruxtaan li Qaawa’ li nakawil sa’ lix profeetil aatin ut lix q’usum laj Samuel?

Naru nakawil li raatin li Elder D. Todd Christofferson, “Yo reprendo y disciplino a todos los que amo” (Liahona, mayo 2011, 97–100), re xk’eeb’al reetaleb’ li oxib’ chi rajb’al li choxahil q’usuk. Jo’q’e aawilom li Dios chi k’anjelak chi jo’kan sa’ laa yu’am?

Helaman 16

Eb’ li profeet neke’xk’am inb’e rik’in li Jesukristo.

Sa’ Helaman 16, k’a’ru nakatzol rik’ineb’ li ke’xk’ulub’a lix k’utum laj Samuel? K’a’ru nakatzol rik’ineb’ li ke’xtz’eqtaana? K’oxla chan ru naq xtaaqenkileb’ li yo’yookil profeet ak xatxtenq’a chi nach’ok rik’in li Jesukristo.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Helaman 13:2–5

Li Dios naru na’aatinak wik’in sa’ li waam.

• Chan ru naru nakak’ut chiruheb’ laa kok’al naq li Dios naru naraatina li qaam, jo’ kixb’aanu rik’in laj Samuel? Naru nakapatz’ reheb’ naq te’xk’ut chawu chan ru naru neke’k’ehok na’leb’ chi maajun aatin te’xye (maare reek’asinkileb’ li ruq’ malaj xnaq’ ru). A’in naru nekexxtenq’a chixtz’ilb’al rix chan ru naq li qaChoxahil Yuwa’ naxk’e lix na’leb’ qe. Jo’ xcha’al li aatinak a’in, naru nekeril lix jalam-uuch laj Samuel aj Lamanita (wankeb’ wiib’ sa’ li tusleb’ aatin a’in) ut taawil Helaman 13:2–5 naq eb’ laa kok’al yooqeb’ chixk’eeb’al reetal chan ru naq li Dios kixye re laj Samuel li tento tixye.

• Wankeb’ naab’aleb’—jo’eb’ ajwi’ li kok’al—li neke’raj xtenq’ re xk’eeb’al reetal chan ru ut jo’q’e li Dios na’aatinak qik’in. Naru nakaseraq’i reheb’ laa kok’al jun hoonal b’ar wi’ naq li Santil Musiq’ej xatxtenq’a chixnawb’al sa’ laa ch’ool k’a’ru kiraj li Dios naq taaye malaj taab’aanu. Ye chan ru xanaw naq li Dios yoo chaq chi aatinak aawik’in. Laa kok’al naru ajwi’ neke’xwotz xnumsihomeb’ chanchan a’an.

Helaman 14:2–7, 20–25

Eb’ li profeet neke’k’utuk chirix li Jesukristo.

• Chaab’il ajwi’ xwotzb’al “Ch’ol 40: Laj Samuel aj Lamanita naxye resil li Jesukristo” (Eb’ li Esilal sa’ lix Hu laj Mormon, 111–113). K’a’ru kixk’ut laj Samuel chirix li Kolonel? Naru nakak’ut k’a’ru neke’xye li profeet re li kutan a’in chirix li Kolonel. Chan ru naq li raatineb’ neke’xkawob’resi li qapaab’aal chirix?

Helaman 16:1–6

Osob’tesinb’ilin naq nintaaqe li profeet.

• Naru nakatenq’aheb’ laa kok’al chixpaab’ankil li profeet wi nakaye reheb’ resileb’ li kristiaan li tiikeb’ chaq chi paab’ank. Naru nakataw junjunqeb’ sa’ Helaman 16:1, 5. Naq yooqat chixyaab’asinkil, laa kok’al naru te’xaqliiq naq te’rab’i k’a’ru ke’xb’aanu li tenamit naq ke’xpaab’ li raatin laj Samuel. Chirix a’an, naq yooqat chixyaab’asinkil li raqal 2 ut 6, laa kok’al naru te’chunlaaq naq te’rab’i k’a’ru ke’xb’aanu li tenamit naq ink’a’ ke’paab’an. Chan ru naru naqak’ut naq naqapaab’ li raatin li yo’yookil profeet? Ye reheb’ laa kok’al chan ru naq osob’tesinb’ilat naq nakataaqe li na’leb’ naxk’e li Qaawa’ rik’in xtz’uumaleb’ re lix profeet.

Re xtawb’al xkomon chik li na’leb’, chi’ilmanq li hu Amigos re li po a’in.

laj Samuel aj Lamanita

Laj Samuel aj Lamanita, xb’aan laj Lester Yocum.

perel re kok’ k’anjel: Naru nintaaqe li profeet