“19–25 agosto: “Te’kole’q rix xb’aan lix sachb’a-ch’oolejil wankilal a’an.” Alma 53–63,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“19–25 agosto. Alma 53–63,” Kim, Taaqehin—Choq’ re li ochoch ut li iglees: 2024 (2023)
Naq ilb’il lix “ch’ina teep aj pleet” laj Helaman (Alma 56:33) re saaj winq chi junpak’aleb’ li teep chi aj pleet aj Lamanita, maajo’q’e raj te’ruuq chixq’axb’aleb’ ru. Moko k’iheb’ ta laj pleet re laj Helaman, ut “tz’aqal saajeb’,” ut “maajun wa ke’pleetik chaq” (Alma 56:46–47). Li wankeb’ wi’ a’an chanchan tana li wanko wi’ laa’o naq wan naq naqeek’a naq moko k’iho ta ut naq numtajenaq lix yalb’al qix ut li ch’a’ajkilal wanko wi’ sa’ roso’jikeb’ li kutan a’in, sa’ li qapleet rik’in laj Satanas ut lix wankilal li maa’usilal sa’ li ruchich’och’.
A’ut kiwan li wankilal rik’in lix teep laj Helaman li moko kiwan ta rik’ineb’ laj Lamanita, li maak’a’ rilom rik’in lix k’ihaleb’ ut lix seeb’aleb’ chi pleetik. Eb’ a’an ke’xsik’ ru laj Helaman, jun li profeet, re tixjolomiheb’ (chi’ilmanq Alma 53:19); ke’tzole’ chaq xb’aaneb’ lix na’, naq wi ink’a’ neke’wiib’an xch’ool, li Dios tixkoleb’” (Alma 56:47); ut kiwan “xnumtajenaqil lix paab’aaleb’ chirix li k’a’ru tzolb’ileb’ chaq chixpaab’ankil.” Xb’aan a’an, ke’kole’ rix xb’aan “lix sachb’a-ch’oolejil wankil li Dios” (Alma 57:26). Jo’kan ut, naq laa’o naqanumsiheb’ lix pleet li yu’am, naru taawanq xkawilal qach’ool. Lix teep aj pleet laj Heleman naxk’ut chiqu naq “wan jun li Dios tiik xnaʼlebʼ, ut li ani inkʼaʼ nekeʼwiibʼan xchʼool, … ebʼ aʼan teʼkoleʼq rix xbʼaan lix sachbʼa-chʼoolejil wankilal aʼan” (Alma 57:26).
Li na’leb’ re tzolok sa’ li ochoch ut sa’ li iglees
Xpaab’ankil li Dios nikinixtenq’a chixq’axb’al ru li xiw.
Wi maak’a’ raj xpaab’aaleb’ lix saaj aj pleet laj Helaman, wan rajb’al naq te’xuwaq. A’b’an sa’ xk’ab’a’ lix paab’aaleb’, wan rajb’al naq kawaqeb’ wi’chik xch’ool. Naq yooqat chirilb’al resileb’ a’an sa’ Alma 53–58, k’e reetal li k’a’ru nakatxtenq’a chixnumsinkil laa xiw rik’in paab’aal chirix li Kristo. Naru nakawileb’ tz’aqal li raqal a’in: Alma 53:10–22; 56:43–49, 55–56; 57:20–27; ut 58:39–40. Sa’ li kaaxukuut a’in naru nakatz’iib’a li na’leb’ nakataw.
Chan ru rilb’aleb’ lix saaj aj pleet laj Helaman:
K’a’ut naq kaweb’ xpaab’aal chirix li Kristo:
K’a’ru ke’xb’aanu re xk’anjelankil lix paab’aaleb’ chirix li Kristo:
Chan ru naq li Dios kirosob’tesiheb’:
Re tooq’axonq sa’eb’ li qamusiq’ejil pleet, naqaj ajwi’ ru lix wankil li Jesukristo. Chan ru naru taak’ul lix wankil? Sik’ lix sumenkil a’an sa’ li raatin li Awa’b’ej Russell M. Nelson, “Roksinkil lix wankil li Jesukristo sa’ li qayu’am” (Jolomil ch’utub’aj-ib’ re abril 2017). Naru nakajuntaq’eeta lix na’leb’ a’an rik’in lix b’aanuhomeb’ laj pleet re laj Helaman.
Chirix xtzolb’aleb’ li na’leb’ a’in, k’oxlaheb’ li musiq’ejil pleet wankat wi’. Tz’iib’a li eek’asinb’ilat chixb’aanunkil re xk’anjelankil laa paab’aal chirix li Jesukristo.
Eb’ lix tzolom li Jesukristo ink’a’ neke’ch’a’ajko’ xch’ool sa’ junpaat.
Laj Helaman ut laj Pahoran ke’ru raj chi ch’a’ajko’k xch’ooleb’ xb’aan li ke’xk’ul. Laj Helaman ink’a’ kixk’ul li tenq’ choq’ reheb’ lix teep aj pleet, ut laj Pahoran, us ta maak’a’ xmaak, kijite’ xb’aan laj Moroni li kixye naq ink’a’ yoo chixtaqlankil li tenq’ a’an (chi’ilmanq Alma 58:4–9, 31–32; 60). K’a’ru naxk’e xkawil aach’ool rik’in chan ru ke’xsume a’an sa’ Alma 58:1–12, 31–37 ut Alma 61? K’a’ut naq ke’sumen chi jo’kan?
Li Elder David A. Bednar kixye naq laj Pahoran kixk’ut chi chaab’il li tuulanil, ut kixk’ut naq “eb’ li reetalil li tuulanil q’axaleb’ loq’ ut ninqeb’ xwankil neke’chal sa’ xyu’am li Kolonel” (“Tuulan ut kub’enaq xch’ool,” Jolomil ch’utub’aj-ib’ re abril 2018). K’oxla chan ru naq li Kolonel kixk’ut li tuulanil. Chi’ilmanq, jo’ eetalil, Mateo 27:11–26; Lukas 22:41–42; Jwan 13:4–17. Chan ru naru nakataaqe lix b’aanuhom a’an?
Teneb’anb’il sa’ inb’een xwaklesinkileb’ li wankeb’ chinsutam.
Laj Moroni kixtz’iib’a naq taawanq xmaak laj Pahoran chiru li Dios wi ink’a’ tixk’e li ajb’il ru xb’aaneb’ li teep aj pleet aj Nefita. K’a’ru nakatzol sa’ Alma 60:7–14 chirix rilb’aleb’ li kristiaan li wankeb’ sa’ rajb’al ru? Kʼaʼru naru nakabʼaanu re naq taak’e reetal li neke’raj ru laa was aawiitz’in ut taatenq’aheb’?
Wi tuulan inch’ool, eb’ li ch’a’ajkilal re li yu’am a’in naru neke’xsutq’isi inch’ool rik’in li Dios.
K’e jun li mol ut jun li paaps sa’ li ha’ yoo chi woqxink re aatenq’ankil chixk’oxlankil naq naru nakasik’ ru “q’unaak” malaj “kawuuk” xb’aaneb’ laa ch’a’ajkilal. Naq yookeb’ chi chaq’ak li mol ut li paaps, il Alma 62:39–51, ut k’e reetal chan ru naq li tenamit ke’xk’ul lix k’anjel laj Helaman chirix xraqik li najtil pleet keʼwan wiʼ rik’ineb’ laj Lamanita. Naru nakajuntaq’eeta a’an rik’in chan ru naq ke’xk’ul lix k’utum 13 chihab’ chaq rub’elaj a’an (chi’ilmanq Alma 45:20–24). Chan ru naq eb’ laj Nefita jalan jalanq li ke’xk’ul us ta juntaq’eet li ch’a’ajkilal ke’wan wi’? Naq ak chaq’ chik li mol ut li paaps, jor li mol ut set li paaps. Chan ru naq jalan li ke’xk’ul xb’aan xtiqwal li ha’? K’a’ru yookat chixtzolb’al chirix li naru naqasik’ ru xk’ulb’al rik’ineb’ li qach’a’ajkilal? Chan ru naru nakasutq’isi aawib’ rik’in li Dios sa’ xyiheb’ laa ch’a’ajkilal?
Oksi li nak’ulman sa’ li junkab’al. Wi nakatk’utuk sa’ jun tzoleb’aal sa’ li Iglees, patz’ reheb’ li komon naq te’xwotz k’a’ru xe’xtzol sa’ rochocheb’. Qayehaq, patz’ reheb’ k’a’ru xe’xtzol chirix li ch’a’ajkilal ut li tuulanil naq xe’xchiq li mol ut li paaps.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Naru ninwan chi tiik chiru li Dios jo’ ke’wan lix saaj aj pleet laj Helaman.
Wankeb’ naab’al li k’anjeleb’aal naru nakawoksi re xwotzb’al li seraq’ chirix lix pleet laj Helaman, jo’eb’ li jalam-uuch sa’ li tusleb’ aatin a’in ut sa’ “Ch’ol 34: Laj Helaman ut li wiib’ mil chi saaj aj pleet” (Eb’ li Esilal sa’ lix Hu laj Mormon, 93–94). Li perel re kok’ k’anjel re li xamaan a’in naru naxtenq’aheb’ laa kok’al chixk’oxlankil chan ru naru neke’wan jo’ lix teep aj pleet laj Helaman. Re xtenq’ankileb’ xtikib’ankil a’an, naru nakawotz chan ruheb’ li saaj aj pleet a’in jo’ naxye sa’ Alma 53:20–21. Naru ajwi’ nekeb’icha “Taqak’am raatin li Qaawa’” (B’ichleb’aal choq’ reheb’ li Kok’al, 92–93).