li Jesus na’el chaq sa’ li muqleb’aal

Waklijenaq, xb’aan laj Del Parson

5–11 agosto: “Li nimla k’uub’anb’il na’leb’ re sahil ch’oolejil”

Alma 39–42

Naq anihaq li naqara naxb’aanu li maak q’axal nim, wan naq ch’a’aj xnawb’al chan ru xtenq’ankil. Jwal nim xwankil Alma 39–42 xb’aan naq naxk’ut chan ru naq laj Alma—jun xtzolom li Kristo li kiraj ru xjalb’al xk’a’uxl chirixeb’ lix maak q’axal raheb’—kiru chixb’aanunkil a’an. Laj Korianton, li ralal laj Alma, kixb’aanu li ko’b’eetak, ut laj Alma, jo’ kixtzol xb’aanunkil sa’ lix k’anjel, kixpaab’ lix wankil li yaalil tzol’leb’ re xtenq’ankil li ralal chixk’oxlankil li junelik q’e kutan ut chixjalb’al xk’a’uxl (chi’ilmanq Alma 4:19; 31:5). Sa’eb’ li ch’ol a’in, naqil lix kawil li raatin laj Alma sa’ xjitb’al li maak ut li ruxtaan ut xrahom choq’ re laj Korianton. Jo’kan ajwi’, naqeek’a lix kawilal xch’ool laj Alma naq li Kolonel “taachalq chi yaal re risinkil li maak [ut] xch’olob’ankil li sahil esilal re li kolb’a-ib’ chiru lix tenamit” (Alma 39:15). Rik’in naq laj Korianton kixjal xk’a’uxl moqon kisutq’i sa’ li k’anjel re jultikank aatin (chi’ilmanq Alma 49:30) naru taqak’ul qayo’onihom naq te’kuye’q qamaak ut taatoje’q qix sa’ li hoonal naq ch’a’ajkilanb’ilo chirix li qamaak malaj lix maak junaq li raaro qab’aan (chi’ilmanq Alma 42:29).

Chi’ilmanq ajwi’ “Alma aconseja a sus hijos” (video), Biblioteca del Evangelio.

Li na’leb’ re tzolok sa’ li ochoch ut sa’ li iglees

Alma 39

seminary icon

Naru nintz’eqtaana li tz’ejwalejil maak.

Lix na’leb’ laj Alma choq’ re laj Korianton, li ralal, sa’ Alma 39 naru nakatxtenq’a chi tzolok chirix xxuwajelil li tz’ejwalejil maak, jo’ ajwi’ li pornografia. Jo’kan ajwi’, naru nakatxtenq’a chixtawb’al ru li kuyuk maak ut k’irtesiik naxq’axtesi li Kolonel reheb’ li neke’xjal xk’a’uxl. Eb’ li patz’om ut kok’ k’anjel a’in naru neke’tenq’an:

• Chan ru naq kik’ame’ laj Korianton chixq’etb’al li chaq’rab’ re saq ru ch’oolej? (chi’ilmanq Alma 39:2–4, 8–9). K’a’ru xq’ajkamunkil li kixb’aanu? (che’ilmanq li raqal 5–13). K’a’ru naxk’ut xyaalal naq laj Korianton kixjal xk’a’uxl? (chi’ilmanq Alma 42:31; 49:30; 48:18). K’a’ru nakatzol chirix li Kolonel rik’in li kixk’ul laj Korianton?

• Ileb’ li perel 19–20 sa’ Choq’ re Xkawilaleb’ li Saaj: Jun tenq’ re xsik’b’al ru laa b’e. Chirix a’an tz’iib’a rik’in laa na’leb’ laa’at k’a’ru li pornografia, k’a’ut naq moko us ta, ut k’a’ru taab’aanu naq taak’e reetal. (Chi’ilmanq ajwi’ Mateo 5:27–28 and Tzol’leb’ ut Sumwank 63:16.)

• Chan raj ru taach’olob’ chiru junaq laa wamiiw k’a’ut naq ink’a’ nakawil li pornografia ut k’a’ut naq nakapaab’ li ch’aqrab’ re saq ruhil ch’oolej. K’a’ru truuq raj taawotz re li ch’ol “Loq’ laa junxaqalil” sa’ Choq’ re Xkawilaleb’ li Saaj: Jun tenq’ re xsik’b’al ru laa b’e (perel 22-29)?

• Naru nakawil li video “Volcar la mirada” (Biblioteca del Evangelio). Xaqab’ li video rajlal sut naq laj David kiru raj chixsik’b’al ru jalan chik xb’e. Chan ru naq li kixk’ul laj David chanchan li maare taak’ul laa’at?

K’oxlak chiru jun k’amok. Naq nakawil jun video, naq yookat chi k’utuk malaj tzolok aajunes, xaqab’ li video chi jo’q’ehaq re xpatz’b’al, “K’a’ru yookin chixtzolb’al?” Xb’aanunkil a’in naru tixb’oq aamusiq’ankil xb’aan li Santil Musiq’ej.

Chi’ilmanq ajwi’ Bradley R. Wilcox, “Li wank chi k’ulub’ej moko naraj ta naxye naq tz’aqal qe qu,” Jolomil ch’utub’aj-ib’ re octubre 2021; “Pornografía” sa’ li perel “Ayuda para la vida” wan sa’ li Biblioteca del Evangelio.

Alma 40–41

K’a’ru tink’ul chirix naq tinkamq?

Ke’wan xpatz’om laj Korianton chirix li nak’ulman chirix naq nokokam. Xb’aan lix patz’om naq laj Alma kixk’ut li na’leb’ li natawman sa’ Alma 40–41. Naq yooqat chi tzolok, tz’iib’a chixjunileb’ li na’leb’ nakataw chirix li ruchich’och’ reheb’ li musiq’ej, li wakliik chi yo’yo, li raqb’a-aatin, ut wankeb’ xkomon chik li na’leb’. K’oxla rilb’aleb’ li ch’ol a’in jo’ taaril raj junaq li tento tixjal xk’a’uxl, jo’ laj Korianton—relik chi yaal, a’an yaal choq’ qe chiqajunilo.

Alma 40

Naru ninsik’ xsumenkileb’ inpatz’om rik’in paab’aal chirix li Jesukristo.

Wan naq maare naqak’oxla naq eb’ li profeet neke’xnaw lix sumenkileb’ chixjunileb’ li patz’om chirix li evangelio. A’b’an k’e reetaleb’ lix patz’om laj Alma sa’ li ch’ol 40 li maji’ sumenb’ileb’. K’a’ru kixb’aanu re xtawb’al xsumenkileb’? K’a’ru kixb’aanu naq maak’a’ lix sumenkileb’? Chan ru naq li kixb’aanu laj Alma naru tatxtenq’a?

jun ixq natijok

Rik’in li tijok naru taqataw xsumenkileb’ li patz’om chirix li evangelio.

Alma 42

Lix tojb’al rix li maak xb’aan li Jesukristo naxk’e chi uxmank li tojb’al-ix.

Laj Korianton kixk’oxla naq ink’a’ tiik ru naq taak’eemanq tojb’a-maak sa’ xk’ab’a’eb’ li maak (chi’ilmanq Alma 42:1). Jo’ naxye sa’ Alma 42, k’a’ru kixb’aanu laj Alma re xtenq’ankil? Naru nakatusub’eb’ li raqal re li ch’ol a’in sa’ wiib’ ch’uut: “Li Dios a’an tiik ru” ut “Li Dios a’an aj uxtaan.” Chan ru naq lix tojb’al rix li maak xb’aan li Kolonel naxk’e chi uxmank sa’ wiib’al li tiik ruhil na’leb’ jo’ ajwi’ li uxtaan? Sik’ xkomon chik aana’leb’ sa’ li video “El Mediador” (Biblioteca del Evangelio).

Chi’ilmanq ajwi’ “K’a’jo’ xrahom ut xchaab’ilal,” Eb’ li B’ich, 120.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Alma 39:1, 10–11

Li chaab’ilal nink’ut naru tixb’eresiheb’ li was wiitz’in rik’in li Kristo.

• Li na’leb’ kixk’e laj Alma re laj Korianton naru naxtenq’aheb’ laa kok’al chixtawb’al ru naq aajel ru li wank jo’ chaab’il eetalil. K’oxla rilb’al Alma 39:1 sa’ komonil. Chan ru naq laj Xiblon, li ras laj Korianton, kiwan jo’ jun chaab’il eetalil? Laa kok’al naru neke’xtaw xkomoneb’ xsumenkil li patz’om a’an sa’ Alma 38:2–4.

• Naru ajwi’ nekeb’aanu jun ch’ina b’atz’unk, b’ar wi’ teek’e eehoonal re xtaaqenkil malaj xb’aanunkil li neke’xb’aanu li jun siir chik. Oksi li b’atz’unk a’in re xk’utb’al xyaalal naq li qab’aanuhom naru tixtenq’aheb’ li qas qiitz’in chixsik’b’al ru li us. B’ichahomaq “Chanchanin laa’in jun chahim” (B’ichleb’aal choq’ reheb’ li Kok’al, 84), ut tenq’aheb’ laa kok’al chixk’oxlankil chan ru naq te’xk’ut li chaab’ilal chiruheb’ li ras riitz’in.

• Rik’in jun li pook malaj xjalam-uuch li saq’e, naru nakajuntaq’eeta li saqen rik’in lix wankil li chaab’il eetalil. Naru ajwi’ nekerileb’ xjalam-uuch li Jesus naq kixb’aanu li us, ut tex’aatinaq chirix li eetalil kixk’ut chiqu. Li video “Alumbren su luz para que otras personas puedan ver” ut “Lecciones que aprendí en la niñez” naru neke’xtenq’aheb’ laa kok’al chixtz’ilb’al rix chan ru naq lix b’aanuhomeb’ naru neke’xb’eresiheb’ li ras riitz’ineb’ rik’in li Kristo.

Alma 39:9–13

Sa’ xk’ab’a’ li Jesukristo, naru ninjal ink’a’uxl naq ninb’aanu li ink’a’ us.

• Naq nakat-aatinak chirix b’ar nachal chaq li maak, ch’olob’ naq laj Korianton kixsik’ ru xb’aanunkil li ink’a’ us. K’a’ raj ru taqaye re, re xtenq’ankil a’an? Naru nakayaab’asi Alma 39:9 choq’ reheb’ laa kok’al ut taatenq’aheb’ chixtawb’al ru k’a’ru naraj naxye jalb’a-k’a’uxlej ut xkanab’ankil li maak. Ch’olob’ xyaalal naq li jalb’a-k’a’uxlej naru chi uxmank sa’ xk’ab’a’ li Jesukristo ut lix tojb’al rix li maak xb’aan.

• A’in jun na’leb’ naru nakab’aanu li naxk’ut naq li jalb’a-k’a’uxlej nak’ehok sahil ch’oolej: K’e re jun li ch’ina al jun k’a’aq re ru aal li tixchap naq yooqat chixyeeb’al jun seraq’ chirix jun kristiaan li kixb’aanu li ink’a’ us ut naraho’ xch’ool chirix. Ye reheb’ laa kok’al naq li k’a’aq re ru a’an, chanchan chik li yib’ aj eek’ahom naru nawan qik’in naq naqab’aanu li ink’a’ us. Chap li k’a’aq re ru aal wan rik’in li ch’ina al naq yooqat chixch’olob’ankil xyaalal naq, wi naqajal qak’a’uxl, li qaChoxahil Yuwa’ ut li Jesukristo naru neke’risi li yib’ ut aalil aj eek’ahom ut naru nokohe’xtenq’a chi chaab’ilo’k.

Alma 40:6–7, 11–14, 21–23

Chirix naq nokokam, li qamusiq’ naxik sa’ li ruchich’och’ reheb’ li musiq’ej toj reetal naq nawulak xhoonalil li wakliik chi yo’yo ut li raqb’a-aatin.

• Ak re naq naqapatz’ qib’ k’a’ru nak’ulman chirix li kamk. K’a’ru naru nakab’aanu re xtenq’ankileb’ laa kok’al chixk’ulb’al xmusiq’anb’il sumenkil? Naru nakatz’iib’a kamk, ruchich’och’ reheb’ li musiq’ej (hilob’aal ut tz’alam reheb’ li musiq’ej), wakliik chi yo’yo, ut raqb’a-aatin chiruheb’ kok’ hu. Tenq’aheb’ laa kok’al chixtawb’al ru k’a’ru naraj neke’xye li aatin a’an. Naq yooqex chirilb’al Alma 40:6–7, 11–14, 21–23, laa kok’al naru neke’xtusub’eb’ li aatin a’ yaal jo’q’e neke’yeeman sa’eb’ li raqal.

• Eb’ li kok’al ak ninqeb’ naru neke’xtaw xna’leb’ rik’in xtawb’al xsumenkileb’ li patz’om sa’ Alma 40:6–7, 11–14, 21–23. Naru nakapatz’ reheb’ laa kok’al na’leb’ li sumenb’ileb’ sa’eb’ li raqal a’in; maare taapatz’, “Chan ruhaq lin junxaqalil chirix naq tinwakliiq chi yo’yo?” Patz’ reheb’ naq te’xsik’ xsumenkil sa’eb’ li raqal a’an.

  xMaria ut li Jesus

  Li xMaria ut li Qaawa’ waklijenaq chi yo’yo, xb’aan laj Harry Anderson

• Ma neke’xnaw lee kok’al ru jun kristiaan li ak xkam? Maare naru nakat-aatinak b’ayaq chirix li kristiaan a’an. Ch’olob’ xyaalal naq sa’ jun kutan li kristiaan a’an—ut chixjunileb’ li kristiaan—te’wakliiq chi yo’yo sa’ xk’ab’a’ li Jesukristo. Wi na’ajman ru, oksi li perel re kok’ k’anjel re li xamaan a’in re xch’olob’ankil k’a’ru naraj naxye li wakliik chi yo’yo.

Re xtawb’al xkomon chik li na’leb’, chi’ilmanq li hu Amigos re li po a’in.

laj Alma ut laj Korianton

A’in li walal, xb’aan li xElspeth Caitlin Young

perel re kok’ k’anjel: Tinwakliiq chi yo’yo