“3–9 Jun: ‘Oli Stanap Strong mo Oli No Muvmuv.’ Mosaea 29–Alma 4,” Kam Folem Mi—Blong Hom mo Jos: Buk blong Momon 2024 (2024)
“3–9 Jun. Mosaea 29–Alma 4,” Kam Folem Mi—Blong Hom mo Jos: 2024 (2024)
Yangfala Alma i stap prij, i kam long Gary L. Kapp
3–9 Jun: “Oli Stanap Strong mo Oli No Muvmuv”
Mosaea 29–Alma 4
Sam bae oli luk se tingting blong King Mosaea blong riplesem ol king wetem ol jaj we oli jusum olgeta, i olsem wan niu wei blong mekem politik. Be long Ol Man blong Nifae, speseli olgeta we oli stap laef anda long rabis King Noa, jenis ia i gat mining long saed blong spirit. Oli bin luk olsem wanem wan king we i no stret mo i no gud i bin mekem “rabis fasin” long medel blong ol pipol, mo i “prapa spolem gud” ol pipol, mo oli bin “wantem tumas” blong kam fri long kaen fasin olsem. Jenis ia, bae i letem olgeta oli responsibol blong lukaotem stret mo gud fasin blong olgeta, mo “ansa from sin blong [olgetawan]” (Mosaea 29:38).
Mo tu, en blong rul blong ol king i no minim en blong ol problem long sosaeti blong Ol Man blong Nifae. Ol pipol oli waes long giaman fasin, olsem Nehor mo Amlisae, oli bin stap tokbaot bigwan ol giaman tingting; olgeta we oli no biliv oli givim hadtaem long Ol Sent, mo plante memba blong Jos oli kam blong gat hae tingting mo oli foldaon. Be, “olgeta we tingting blong olgeta i stap daon we oli stap folem God,” oli gohed blong “stanap strong mo oli no muvmuv” i nomata wanem i stap hapen raon long olgeta (Alma 4:15; 1:25).
Ol tingting blong stap lan long Hom mo Jos
Mi save stap olsem wan gud paoa blong lidim man blong mekem gud insaed long ol komuniti blong mi.
Jes faef yia afta stat blong rul blong ol jaj, wan trabol i kam antap we bae i testem toktok blong Mosaea, se voes blong ol pipol, plante taem, bae i jusum wanem we i raet (luk long Mosaea 29:26). Stadi Alma 2:1–7 blong faenemaot wanem nao Jalenj mo wanem nao ol man blong Nifae i bin mekem. ?Wanem bae i hapen sapos “ol pipol blong jos” oli no toktok bigwan blong man i harem voes blong olgeta? Wanem moa yu bin lanem long stori ia abaot hao Lod i wantem yu blong stap mo mekem samting insaed long komuniti blong yu? (luk tu long Mosaea 29:26–27).
?Wanem ol impoten jalenj we komuniti blong yu i stap fesem? Tingting long hao yu, olsem Ol Man blong Nifae i save meksua se voes blong yu i stap insaed long “voes blong ol pipol.” Wanem ol narafala wei we yu save olsem wan we i stap folem Jisas Kraes i mekem blong jenisim komuniti blong mekem gud?
Luk tu long Dallin H. Oaks, “Lavem Ol Enemi blong Yu,” Liahona, Nov. 2020, 26–29.
Ol trutok blong gospel oli save helpem mi blong luksave ol giaman tijing.
Nomata we Nehor i bin konfes long en se wanem we hem i bin tijim, i no tru, ol tijing blong hem oli bin gohed blong lidim tingting blong Ol Man blong Nifae blong plante yia. ?From wanem yu ting se pipol i bin laekem wanem Nehor i bin tijim? Long Alma 1:2–6, lukaotem ol giaman tijing blong Nehor—mo ol trutok we hem i yusum blong kavremap ol giaman blong hem.
Gidion i stanap agensem Nehor “wetem ol toktok blong God” (Alma 1:7, 9). Hemia sam skripja we i pruf blong ol giaman blong Nehor: Matiu 7:21–23; 2 Nifae 26:29–31; Mosaea 18:24–26; mo Hileman 12:25–26. Traem blong putum long sot toktok wanwan skripja ia ?Wanem nao yu bin lanem aot long ol profet we oli stap laef tedei we i save stap olsem pruf agensem ol giaman tijing long taem blong yumi?
Ol tru disaepol blong Jisas Kraes, oli “ol man blong folem God we oli gat tingting i stap daon.”
Ol japta 1 mo 4 blong Alma, oli stap tokbaot ol taem we Jos i bin kam antap, be ol memba blong Jos oli lukluk long hem long wan defren wei. Eksampol, komperem Alma 1:19–30 wetem Alma 4:6–15 blong luk hao ol Jos memba oli jenis long sam yia nomo. Folem wanem we yu bin ridim, ?olsem wanem nao tru man blong folem Jisas Kraes oli filim abaot pipol we oli gat ol defren bilif? ?Wanem fasin nao ol tru man blong folem Kraes oli gat long saed blong ol rij samting mo fasin blong kam antap? ?Wanem nao yu filim insperesen long hem blong jenisim fasin blong yuwan?
Stap yusum ol skripja i kambak long laef blong yuwan. Tingting long hao nao ol stori mo ol tijing blong ol skripja, oli go stret wetem laef blong yu? Eksampol: yu save faenem samting i ron semsemmak bitwin wol blong tedei mo ol problem blong sosaeti we Ol Man blong Nifae oli bin fesem long Alma 1–4.
Eksampol mo testemoni blong mi i save jenisim ol hat.
Ating bae yu tokbaot harem nogud we Alma i bin filim taem hem i bin luk wanem we i hapen long ol pipol blong hem. Lukaotem ol problem we hem i bin luk long Alma 4:6–15. ?Yu no bin luksave sam problem we oli semmak? Ating yu wari long wan we yu lavem we i traehad blong wok wetem ol problem ia. ?Yu bin stap tingting long wanem yu save mekem blong save help?
Sam oli save talem se Alma, olsem jif jaj i bin wan top man blong stretem ol problem ia. Be Alma i filim se i gat wan wei we i gud moa. Taem yu ridim ol ves 16–20, wanem nao i kam long tingting blong yu abaot wei blong hem blong stap helpem ol pipol blong hem?
Alma i bin gat bigfala fet long toktok blong God mo “wan klin testemoni” (ves 19). ?Wanem eksampol nao yumi bin luk abaot paoa blong “klin testemoni”? Taem yu tingting hevi long ol wei we yu save serem testemoni blong yu abaot Jisas Kraes mo gospel blong Hem, ating bae yu wantem ridim bakegen Alma 4:6–14. Wanem nao ol aksen blong ol Jos memba long ves ia i soem abaot ol testemoni blong olgeta long Jisas Kraes mo ol tijing blong Hem? ?Wanem nao yu teknot long hem abaot paoa blong ol aksen blong olgeta—long olgetawan mo long ol narafala man? Maet yu tingting tu long ol wei we yu bin kasem blesing tru long klin testemoni blong ol pipol, hemia tru long ol toktok o tru long ol aksen.
Tingting long ol wei we yu save serem testemoni blong yu abaot Jisas Kraes—tru toktok o tru long ol aksen. ?Huia nao bae i kasem blesing from witnes blong yu?
Luk tu long Gary E. Stevenson, “Fidim mo Serem Testemoni blong Yu,” Liahona, Nov. 2022, 111–14; “Testimony,” Hymns, no. 137; “Alma the Younger Steps Down as Chief Judge” (video), Gospel Library; Gospel Topics, “Revelation,” Gospel Library.
Blong moa tingting, luk long namba blong manis ia long Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Lod i save helpem mi blong luksave ol giaman tijing.
-
Wan wei blong stadi Alma 1:2–4 wetem ol pikinini blong yu, i blong helpem olgeta i mekem wan tes blong tru mo rong, taem oli stap yusum toktok we Nehor wan giaman tija i bin tijim. Afta yu save tokbaot wetem olgeta se from wanem Setan oltaem i miksim ol trutok wetem ol giaman toktok. Helpem ol pikinini blong yu blong tingbaot sam eksampol. ?Long ol ves 7–9, Olsem wanem nao Gidion i save stanap strong agensem ol giaman blong Nehor? (Luk tu long “Japta 20: Alma mo Nehor,” Ol Stori long Buk blong Momon, 54–55.)
Olsem wan memba blong Jos blong Jisas Kraes, mi lavem mo givim seves long ol narafalawan.
-
Sam memba blong Jos blong Lod long taem blong Alma oli kaen mo save serem samting, mo sam nara memba oli no kaen mo oli gat hae tingting. Blong helpem ol pikinini blong yu blong lan aot long ol eksperiens ia, yufala save ridim tugeta Alma 1:27, 30 mo mekem wan lis blong ol defren kaen memba blong Jos blong Lod blong help. ?Huia nao yumi save we maet oli “stap long nid” (Alma 1:30) we oli nidim lav mo help blong yumi? Yufala i save singsing tugeta wan singsing abaot lav mo seves, olsem “Kindness Begins with Me” (Children’s Songbook, 145), mo helpem ol pikinini blong tingbaot sam aksen we oli save mekem wetem singsing ia.
-
?Wanem nao yumi mas mekem taem pipol oli no kaen long yumi? Tingting blong stap rid wetem ol pikinini blong yu abaot hao oli tritim ol man blong folem Kraes long Alma 1:19–20. Tokbaot olsem wanem oli bin ansabak long ol ves 22 mo 25. Ating yu save praktisim sam wei blong ansabak taem ol narafala wan oli no kaen.
Testemoni blong mi i save mekem narafala man i kam strong moa.
-
Plante taem “klin testemoni” (Alma 4:19) blong wan pikinini i save gat strong paoa long narafala man. Blong helpem ol pikinini blong yu i faenem hemia, yu save rid wetem olgeta long Alma 4:8–12, 15, blong helpem olgeta faenemaot ol problem we i bin stap hapen insaed long Jos. ?Wanem nao Alma i save mekem blong stretem ol problem ia? Helpem olgeta blong faenemaot wanem we Alma i disaed blong mekem long Alma 4:16–20. Ating yu save serem wetem wanwan long yufala olsem testemoni blong Kraes i mekem yu kam strong moa.
-
Sapos ol pikinini blong yu oli nidim ol eksampol blong wanem ia wan testemoni, tingting blong soem wan vidio klip blong wan spika long jeneral konfrens we i stap serem testemoni. Oli save yusum aktiviti pej blong wik ia o o singsing tugeta wan singsing olsem “Testimony” (Hymns, no. 137). ?Wanem nao yumi lanem abaot ol testemoni aot long ol samting ia? Letem ol pikinini blong yu oli praktis blong stap serem testemoni blong olgeta.
Blong moa tingting, luk long namba blong manis ia long Fren magasin.
Alma mo Amlisae, i kam long Scott M. Snow