25–31 nō Māti : « E ti’afa’ahou mai ai ’oia mai te pohe mai ma te ora. » Pāsa
« 25–31 nō Māti : ‘E ti’afa’ahou mai ai ’oia mai te pohe mai ma te ora.’ Pāsa, » Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
« 25–31 nō Māti. Pāsa, » Mai, pe’e mai—Nō te ’utuāfare ’e te fare purera’a : 2024 (2023)
Hōho’a
te Mesia tei ti’afa’ahou ’e tāna mau ’āpōsetolo
Christ and the Apostles [Te Mesia ’e te mau ’āpōsetolo], nā Del Parson
25–31 nō Māti : « E ti’afa’ahou mai ai ’oia mai te pohe mai ma te ora »
Pāsa
’Ua itoito maita’i te mau ’āpōsetolo tahito i roto i tō rātou ’itera’a pāpū nō Iesu Mesia ’e tōna ti’afa’ahoura’a (hi’o Te ’Ohipa 4:33). E rave rahi milioni ta’ata e ti’aturi nei ia Iesu Mesia ’e e tāmata nei ’ia pe’e iāna maoti tā rātou mau parau i roto i te Bibilia. Teie rā, e uiui paha tō vetahi mana’o ē, mai te peu pa’i ’o Iesu Mesia te Fa’aora o te ao tā’āto’a nei, nō te aha ïa tōna mau ’ite, e pupu ta’ata iti noa i roto i te hō’ē ārea na’ina’i ?
’Ua riro te Buka a Moromona te tahi fa’ahou ’ite e ha’apāpū nei ē, ’o Iesu Mesia te Fa’aora o te ao, « ’o tē fa’a’ite iāna iho i te mau fenua ato’a ra » (’api upo’o parau o te Buka a Moromona) ’e ’o tē pūpū nei i te fa’aorara’a i te mau ta’ata ato’a e haere mai iāna ra. Hau atu, tē ha’apāpū ato’a nei teie ’ite piti e aha te fa’aorara’a. Terā te tumu Nephi, Iakoba, Moromona ’e te mau peropheta ato’a i ha’a ai « ma te itoito ’ia ’ō’oti i teie nei mau parau i ni’a i te mau ’api »—nō te fa’a’ite i te mau u’i nō ananahi ē, « ’ua ’ite [ato’a rātou] i te parau nō te Mesia, ’e tē vai ra tō [rātou] ti’aturira’a nō ni’a i tōna ra hanahana » (Iakoba 4:3–4. I teie tau Pāsa, e feruri i te mau ’itera’a pāpū i roto i te Buka a Moromona e parau nei ē, nō te tā’āto’ara’a ’e nō te ta’ata hō’ē te mana o te Mesia—nō te fa’aora i te ao tā’āto’a nei ’e nō te fa’aora ia ’outou.
Mana’o nō te ’apo i te ha’api’ira’a i te ’utuāfare ’e i te fare purera’a
Hōho’a
ītona nō te séminaire
Maoti Iesu Mesia, e ti’afa’ahou ā vau.
E peu i te tau Pāsa, ’ia feruri i te ti’afa’ahoura’a o Iesu Mesia, e aha mau rā te aura’a o te ta’ata ’ia ti’afa’ahou ? E aha te nehenehe e ’apo mai nō ni’a i te ti’afa’ahoura’a i roto i te Buka a Moromona ? Penei a’e i teie tau Pāsa e nehenehe ’outou e tāpura i te mau parau mau nō ni’a i te ti’afa’ahoura’a tā ’outou e ’ite i roto i te 2 Nephi 9:6–15,22 ; Alama 11:42–45 ; 40:21–25 ; 3 Nephi 26:4–5.
E nehenehe ato’a ’outou e pāpa’i nāhea teie mau parau mau nō ni’a i te ti’afa’ahoura’a i te fa’auru i tā ’outou mau ’ohipa ’e i te huru o tō ’outou orara’a. ’Ei hi’ora’a, ’a feruri nāhea ’outou i te fa’aoti i teie mau parau : ’Āhani ’aita vau i ’ite i teie mau mea […] nō te mea ’ua ’ite au i teie mau mea…
E tauturu mai paha te hō’ē hīmene mai « ’Ua ’ite au tē ora nei tō’u Fatu » (Te mau Hīmene, N°69) ia ’outou ’ia feruri nō te aha e mea faufa’a te ti’afa’ahoura’a o te Fa’aora nō ’outou. ’A hīmene, ’a fa’aro’o, ’aore rā ’a tai’o ai ’outou i te hīmene, e ui paha ’outou ia ’outou iho ē, « E aha te ta’a-’ē-ra’a i roto i tō’u orara’a nō te mea ’ua ti’afa’ahou mai Iesu Mesia ? »
Tē vai ra tā te vaira’a buka ’Evanelia te hō’ē ha’aputura’a video nō Pāsa o tē nehenehe e riro ’ei tuha’a faufa’a roa nō tā ’outou tuatāpapara’a. Penei a’e e nehenehe tā ’outou e māta’ita’i hō’ē ’aore rā hau atu o teie mau video ’e e feruri i te mea tā rātou e tu’u atu i roto i tō ’outou māramaramara’a ’aore rā tō ’outou māuruuru nō te ti’afa’ahoura’a o te Fa’aora.
’Ua rave Iesu Mesia i ni’a iāna iho i tā’u mau hara, mau māuiui ’e mau paruparu.
Tē ha’api’i pāpū nei te Bibilia ē, ’ua ’aufau Iesu Mesia nō tā tātou mau hara. Tē fa’ananea nei te Buka a Moromona i tō tātou māramaramara’a i te tusia a te Mesia ’e i tōna mamae nā roto i te mau rāve’a faufa’a rahi. E nehenehe ’outou e ’ite i te tahi o teie mau ha’api’ira’a i roto i te Mosia 3:7 ; 15:5–9 ; Alama 7:11–13. I muri mai i tō ’outou tai’ora’a i teie mau ’īrava, e nehenehe e pāpa’i i tā ’outou e ’ite mai i roto i te hō’ē tāpura mai teie i muri nei :
E aha tā te Fa’aora i mamae ?
Nō te aha ’oia i mamae ai ?
E aha te aura’a o te reira nō’u ?
Teie te tahi atu rāve’a nō te tuatāpapa i teie mau ’īrava : ’A hi’o i te mau hīmene tā ’outou e mana’o ra e fa’atū’ati i te mau poro’i tā rātou e ha’api’i ra. E nehenehe te fa’ahorora’a « pāpa’ira’a mo’a » i muri i te buka hīmene e tauturu. E aha te mau pereota nō roto mai i teie mau hīmene ’e te mau pāpa’ira’a mo’a e tauturu nei ia ’outou ’ia māuruuru hōhonu atu ā i te tusia a te Fa’aora ?
E nehenehe Iesu Mesia e tāmā iā’u ’e e tauturu iā’u ’ia maita’i roa.
E ti’a ’ia parau ē, i te hō’ē pae rahi, e fa’ati’ara’a te Buka a Moromona nō te hō’ē nūna’a tei taui maoti te tāra’ehara a Iesu Mesia. E nehenehe ’outou e tai’o i te tahi o teie mau ’ohipa i tupu i roto i te Mosia 5:1–2 ; 27:8–28 ; Alama 15:3–12 ; 24:7–19. E nehenehe ’outou e feruri i te tahi atu mau hi’ora’a nō te tuatāpapa ato’a. E aha te tū’atira’a tā ’outou e ’ite ra i roto i teie mau ’ohipa ato’a ? E aha te mau ’ohipa ta’a ’ē tā ’outou e ’ite ra ? E aha tā teie mau fa’ati’ara’a e ha’api’i nei nō ni’a i te huru te tāra’ehara a te Fa’aora e nehenehe e taui ia ’outou ?
Nō te mea ’ua ti’afa’ahou ’oia, e ti’afa’ahou ato’a vau.
E nehenehe ’outou e fa’a’ohipa i te « Pene 53 : ’Ua fa’asātaurohia Iesu » ’e te « Pene 54 : ’Ua ti’afa’ahou Iesu » (i roto Te mau ’ā’amu o te Faufa’a ’Āpī, 136–38, 139–44) nō te fa’ati’a i tā ’outou mau tamari’i nō ni’a i te ti’afa’ahoura’a o Iesu Mesia. ’Aore rā, e vaiiho i tā ’outou mau tamari’i ’ia fa’ati’a ia ’outou i te ’ā’amu, ma te fa’a’ohipa i te mau hōho’a i roto i taua mau pene ra.
’Ua riro te tere o te Fa’aora tei ti’afa’ahou i Amerika ’ei ’itera’a pūai nō tōna ti’afa’ahoura’a. E parau i tā ’outou mau tamari’i nō ni’a i te reira, ma te fa’a’ohipa i te 3 Nephi 11 ; 17 ; te hīmene « Pāsa Hosana » ; ’aore rā te ’īrava hope’a o « Les Histoires du Livre de Mormon » (Chants pour les enfants, 68–69, 118–19). Fa’aitoito i tā ’outou mau tamari’i ’ia feruri ’āhani nā rātou i tāpe’a i tōna mau puta (hi’o 3 Nephi 11:14–15) ’aore rā ’āhani ’o rātou hō’ē o te mau tamari’i tāna i ha’amaita’i (hi’o 3 Nephi 17:21). ’A fa’a’ite i te tahi ’e te tahi i tō ’outou mau mana’o nō ni’a ia Iesu Mesia ’e tōna ti’afa’ahoura’a.
Nō te tauturu i tā ’outou mau tamari’i ’ia ’ite e aha tā te Buka a Moromona e ha’api’i nei nō ni’a i te ti’afa’ahoura’a, e nehenehe ’outou e ani ia rātou ’ia fa’ahua ē, ’aita ’outou i ’ite i te hō’ē mea nō ni’a i te reira ’e e ani ia rātou ’ia fa’ata’a mai i te reira ia ’outou. ’A tauturu ia rātou ’ia hi’o i roto i te 2 Nephi 9:10–15 ; Alama 11:41–45 ; ’e Alama 40:21–23 nō te mau pāhonora’a i te mau uira’a mai teie : E aha te aura’a nō te parau ra, ’ia ti’afa’ahou ? ’O vai tē ti’afa’ahou mai ? ’A ani ato’a ia rātou ’ia fa’a’ite mai i tō rātou ’itera’a pāpū nō ni’a i te ti’afa’ahoura’a o te Fa’aora, ’ei tuha’a nō tā rātou pāhonora’a.
’Ua ’ite Iesu Mesia nāhea ’ia tāmāhanahana iā’u.
Tē fa’ata’a nei te Mosia 3:7 ’e te Alama 7:11 i te mea tā te Fa’aora i ora ’ei tuha’a nō tāna tāra’ehara. E nehenehe ’outou e tai’o i te hō’ē o teie mau ’īrava i tā ’outou mau tamari’i ’e e ani ia rātou ’ia fa’aro’o i te mau ta’o ’o tē parau ia rātou e aha tā Iesu i mamae nō tātou. I muri iho e tai’o i te Alama 7:12 nō te ’ite mai nō te aha ’oia i mamae ai nō te reira. ’A fa’a’ite pāpū ē, ’ua ’ite Iesu Mesia i tō tātou mau māuiui ’e mau ma’i ato’a nō reira, e nehenehe ’oia e hāro’aro’a e nāhea ’ia tāmāhanahana ia tātou.
Tē vai ra ānei tā tā ’outou mau tamari’i hō’ē hīmene au-roa-a’e nō ni’a ia Iesu Mesia ’e tāna tāra’ehara ? E nehenehe ’outou e hīmene ’āmui i te reira—’aore rā e ha’api’i mai i te hō’ē mea ’āpī. E paraparau nō ni’a i te mau ta’o ’aore rā te mau pereota i roto i te mau pāpa’ira’a ’o tē ha’api’i nei ia ’outou nō ni’a i te tāmāhanahanara’a ’e te hau tā te Fa’aora e pūpū mai nei nō tātou.
E nehenehe Iesu Mesia e tāmā ’e e tauturu mai iā’u nō te taui.
Tē hōro’a nei te Buka a Moromona e rave rahi hi’ora’a nō te mau ta’ata tei tauihia nā roto i te tāra’ehara a te Fa’aora. Penei a’e e nehenehe tā ’outou mau tamari’i e mā’iti i te hō’ē nō te ha’api’i mai nō ni’a ia rātou mai ia Enosa (hi’o Enosa 1:2–8), Alama tamaiti (hi’o Mosia 27:8–24) ’e ’aore rā te mau Aneti-Nephi-Lehi (hi’o Alama 24:7–19). Nāhea teie ta’ata ’aore rā teie pupu i te tauira’a nā roto i te tāra’ehara a Iesu Mesia ? Nāhea tātou ’ia peʼe i tō rātou hiʼoraʼa ?
E nehenehe ato’a ’outou ’e tā ’outou mau tamari’i e fa’aau i te hō’ē mea mā ’e te hō’ē mea repo ’e e paraparau nō ni’a i te huru e tāmāhia ai te mau mea repo. ’A tai’o ’āmui i te Alama 13:11–13. E aha tā Iesu i rave ’ia nehenehe ia tātou ’ia tāmāhia i tā tātou mau hara ? E aha tā te reira mana’o i fa’atupu i roto ia tātou nō ni’a i te hara ? E aha te mana’o e tae mai nō ni’a i te Fa’aora ?
Nō te tahi atu mana’o, ’a hi’o i te ve’a Hoa nō teie ’āva’e.
’A ora ma te ti’a mā nō te arata’ira’a a te Vārua. ’O te Vārua te ’orometua mau. ’A ’imi ai ’outou i tāna arata’ira’a ’e ’ia ora ’outou ma te ti’a mā, e hōro’a mai ’oia ia ’outou te mau mana’o ’e te mau fa’a’itera’a e nāhea ’ia pāhono atu i te mau hina’aro o te feiā tā ’outou e ha’api’i ra.
