« 4–10 nō Māti : ‘Tē ’oa’oa nei tātou i te Mesia’. 2 Nephi 20–25, » Mai, pe’e mai—nō te ’utuāfare ’e te fare purera’a : Buka a Moromona 2024 (2024)
« 4–10 nō Māti. 2 Nephi 20–25, » Mai, pe’e mai—nō te ’utuāfare ’e te fare purera’a :2024 (2024)
4–10 nō Māti : « Tē ’oa’oa nei tātou i te Mesia »
2 Nephi 20–25
Tē vai ra i roto i te mau pāpa’ira’a a Isaia te mau fa’aarara’a pūai, terā rā, tē hōro’a ato’a nei rātou i te tīa’ira’a ’e te ’oa’oa. Teie te hō’ē tumu i tu’u ai Nephi i te reira i roto i tāna pāpa’a parau : « Tē pāpa’i nei au i te tahi mau parau a Isaia », ’ua nā ’ō ’oia, « ’o tei […] hi’o i teie nei mau parau, ’ia fa’ateitei mai i tō rātou ’ā’au ’e ’ia ’oa’oa » (2 Nephi 11:8). E nehenehe e parau ē, te anira’a ’ia tai’o i te mau parau a Isaia, e anira’a ’ia ’oa’oa. E ti’a ia ’outou ’ia au mai ia Nephi ra, i te mau parau tohu a Isaia nō ni’a i te putuputura’a o ’Īserā’ela, te taera’a mai o te Mesia a te ’āti Iuda ’e te hau o te tau mileniuma tei fafauhia i tō te parau ti’a. E nehenehe tā ’outou e ’oa’oa i te ora i te tau i tohuhia ra ē, ’ua « fa’ati’a te Fatu i te hō’ē reva nō te mau nūna’a, ’e ’ia putuputu mai i te mau ta’ata nō ’Īserā’ela i rāpae » (2 Nephi 21:12). Mai te mea ’ua poihā i te parau ti’a, e nehenehe ’outou « ma te ’oa’oa […] e huti i te pape nō roto mai i te mau ’āpo’o pape nō te fa’aorara’a » (2 Nephi 22:3). E nehenehe e parau ē, e ti’a ia ’outou ’ia « ’oa’oa i te Mesia » (2 Nephi 25:26).
Mana’o nō te ’apo i te ha’api’ira’a i te ’utuāfare ’e i te fare purera’a
E nehenehe au e fāri’i i te hau nā roto ia Iesu Mesia.
E fifi tō te mau tamari’i a Lehi i te mārōra’a. ’Ua rahi roa atu te fifi i roto i te mau u’i i muri mai, ma te arata’i atu i te ’āmahara’a, te tītīra’a, te ’oto ’e te ha’amoura’a. ’E tē tāmau noa nei ā te mārōra’a i te riro ’ei fifi i teie mahana.
Ma teie mau mea ato’a i roto i te ferurira’a, ’a feruri i te mau tohura’a i roto i te 2 Nephi 21–22. ’A feruri nāhea te Fa’aora i te fa’atupura’a i teie mau parau tohu. E aha te aura’a nō ’outou te parau tohu ē, « e pārahi te luto i pīha’i iho i te ’ārenio » ? (2 Nephi 21:6). ’A feruri māite i te ’ohipa tā ’outou e nehenehe e rave nō te riro mai ’ei ta’ata nō te hau.
Hi’o Dale G. Renlund, « E fa’a’ore te hau o te Mesia i te au ’ore », Liahona, Novema 2021, 83–85.
E ha’aputuputu te Fatu i tōna mau ta’ata.
’Ua riro Nephi e tōna ’utuāfare ’ei ’ite nō te ha’amoura’a o ’Īserā’ela (hi’o 2 Nephi 25:10). I teienei e nehenehe ’outou e ’āmui atu i roto i te ha’aputuputura’a o ’Īserā’ela (hi’o 2 Nephi 21:12). ’Ia tai’o ’outou i te 2 Nephi 21:9–12, ’a feruri e nāhea ’outou e nehenehe ai e tauturu i te fa’atupura’a i te mau tohura’a i fa’a’itehia i roto i teie mau ’īrava.
’Ei hi’ora’a, ’a tai’o ai ’outou nō ni’a i te « reva » (reva) o te ti’a ’ia ha’aputuputu i te mau ta’ata o te Atua, ’a feruri nāhea tō ’outou ’itera’a i te Atua i te ha’aputuputura’a i tōna mau ta’ata, i te pae tino ’e i te pae vārua. E aha te mea e ’ume ra i te ta’ata i te Fatu ’e i tāna ’Ēkālesia ?
E aha tei fa’auruhia ia ’outou ’ia rave nō te tauturu i te putuputura’a i te mau ta’ata o te Atua ?
E topa te ao o Babulonia.
’Ua riro te bāsileia o Babulonia ’ei ha’amata’ura’a poritita ’e te ’āua fa’ehau rahi nō ’Īserā’ela i tahito ra. Nō te mau ta’ata rā o Nephi—’e nō tātou ato’a nei i teie mahana—te ha’amata’ura’a rahi a’e o te mea ïa tā Babulonia e fa’a’ite nei : te ao ’e te hara. ’A feruri nāhea te mau fa’aarara’a i roto i te 2 Nephi 23–24 i te ha’aputapū i te mau ta’ata tei mata’u ’aore rā tei fa’ahiahia ’aore rā tei ti’aturi i te tao’a ’e te mana o Babulonia (hi’o, ’ei hi’ora’a 23:6–9, 11, 19–22 ; 24:10–19). E aha te tahi mau mea mai te reira tā tātou e mata’u ’aore rā e fa’ahiahia ’aore rā e ti’aturi nei i teie mahana ? I tō ’outou mana’o, e aha te poro’i a te Fa’aora ia ’outou i roto i teie mau pene ? ’A feruri nāhea ’outou i te fa’a’ite ē, « tē oa’oa nei ’outou i te hanahana o te Fatu » (2 Nephi 23:3).
« Tē paraparau nei tātou nō ni’a i te Mesia…tē ʼoaʼoa nei tātou i te Mesia. »
’Ua ’īriti Nephi i te parau nō te fa’a’itera’a i tōna mau ti’aturira’a—tōna iho ā rā ’itera’a pāpū nō Iesu Mesia. I roto i tā ’outou tuatāpapara’a i te 2 Nephi 25, a feruri i te hina’aro o Nephi ia « ha’api’i atu i [tāna] mau tamari’i […] e ti’aturi i te Mesia, ’e ’ia fa’a’āfarohia ho’i i te Atua » (’īrava 23). E aha tā Nephi e hina’aro ’ia ’ite te mau ta’ata nō ni’a i te Fa’aora ? (hi’o i te mau ’īrava 12–13, 16). Nāhea Nephi i te tāmatara’a i te tāparu i te ta’ata ’ia ti’aturi iāna ? (hi’o i te mau ’īrava 19–29). ’A tāpa’o i te mau ’īrava i roto i teie pene e tāparu nei ia ’outou ’ia ti’aturi ’e ’ia pe’e ia Iesu Mesia.
E’ita paha te tahi pae o tātou e mana’o nei ē tē vai nei tō Nephi paraparaura’a nō ni’a i te Mesia. Penei a’e rā e nehenehe tā ’outou e ’ite mai i te hō’ē mea i roto i te mau ha’api’ira’a a Nephi i roto i te 2 Nephi 25:23–26 o tē fa’auru ia ’outou ’ia paraparau hua atu ā nō ni’a iāna e vetahi ’ē. ’Ei hi’ora’a, e nehenehe te parau a Nephi « tē oa’oa nei tātou i te Mesia » e tūra’i ia ’outou ’ia feruri nāhea te Fa’aora i te hōro’a mai i te ’oa’oa ia ’outou—’e nāhea ’outou ’ia fa’a’ite i te reira ’oa’oa ia vetahi ’ē.
I roto i tāna a’ora’a « Tē paraparau nei tātou nō ni’a i te Mesia » (Liahona, Novema 2020, 88–91), tē parau nei Elder Neil L. Andersen nāhea e nehenehe ai ia tātou ’ia paraparau ha’amaita’i atu ā nō ni’a i te Mesia i roto i te mau vāhi rau. E aha te mau mana’o tauturu tāna e fa’a’ite ra ia ’outou ? E aha te mau rāve’a tā ’outou e fāna’o nei nō te paraparau i te Mesia ia vetahi ’ē ?
E aha tā ’outou e mana’o ra e fa’auru ’ia parau ia vetahi ’ē nō ni’a ia Iesu Mesia ? Mai te mea e hina’aro ’outou i te tahi mau mana’o, e nehenehe ’outou e ’imi i roto i « Te Mesia Ora : Te ’itera’a pāpū o te mau ’āpōsetolo » (Vaira’a buka ’evanelia). E nehenehe te hīmene mai « Ti’aturi au i te Mesia » (Te mau Hīmene, No.66) e hōro’a mai ia ’outou i te tahi atu ā mau mana’o.
Nō te tahi atu ā mana’o, ’a hi’o i te mau ve’a Liahona nō teie ’āva’e ’e te buka Nō te Pūai o te Feiā ’Āpī.
Mana’o nō te ha’api’i i te tamari’i
E ha’avā Iesu Mesia ma te parau ti’a.
-
Nō te tauturu i tā ’outou mau tamari’i ’ia hi’o mana’o i teie mau ’īrava, ’a hi’o e nehenehe ānei tā ’outou e ’ite mai i te hō’ē tumu rā’au tei tāpūhia ’aore rā te hō’ē ’āma’a e tupu ra mai roto mai i te hō’ē tumu rā’au (’aore rā, e fa’a’ohipa i te hōho’a i raro nei). Mai te mea e fa’ahōho’a te « ’āma’a » i roto i te 2 Nephi 21:1 ia Iesu Mesia, e aha tā te mau ’īrava 2–5 e ha’api’i nei ia tātou nō ni’a iāna ?
E hōpoi mai Iesu Mesia i te hau ’e te ’oa’oa.
-
E aha tā te 2 Nephi 21:6–9 e ha’api’i nei nō ni’a i te mea e nehenehe e tupu ’ia pe’e ana’e te mau ta’ata ato’a i te Fa’aora ? (hi’o ato’a i te 4 Nephi 1:15–18). Nāhea tātou e nehenehe ai e fa’ariro atu ā i tō tātou fare mai te reira ? E au paha tā ’outou mau tamari’i ’ia hi’o i te mau hōho’a o te mau ’ānimara i fa’ahitihia i roto i te mau ’īrava 6–7—e mau ’ānimara mātauhia, e’ita rātou e ha’apēpē i te tahi e te tahi ’ia ho’i fa’ahou mai Iesu (hi’o i te ’api fa’a’ana’anataera’a nō teie hepetoma). E nehenehe ato’a tā ’outou mau tamari’i e pāpa’i hōho’a ia rātou iho ’e i teie mau ’ānimara e ora ra ma te hau ’e ’o Iesu.
E ha’aputuputu te Fatu i tōna mau ta’ata.
-
’Ua parau Isaia ē, e ha’amau te Fatu i te hō’ē « reva nō te mau nūna’a » nō te tauturu i te ta’ata ’ia ha’aputuputu mai iāna ra (hi’o 2 Nephi 21:11–12). ’A tauturu i tā ’outou mau tamari’i ’ia hāro’aro’a ē, e au te hō’ē tāpa’o mai te hō’ē reva. Penei a’e e au rātou e pāpa’i hōho’a i tā rātou iho reva. E nehenehe rātou e tu’u i roto i te mau hōho’a ’aore rā te mau ta’o e fa’ahōho’a i te mau tumu e haere mai ai rātou ia Iesu Mesia ra ’e i tāna ’Ēkālesia. ’A vaiiho ia rātou ’ia paraparau nō ni’a i tā rātou mau reva, ’e ’a tauturu ia rātou ’ia feruri e nāhea e ti’a ai ia rātou ’ia tauturu ia vetahi ’ē ’ia « ha’aputuputu » ia Iesu Mesia ra.
-
I muri a’e i te tai’o-’āmui-ra’a i te 2 Nephi 22:4–5 , e nehenehe ’outou e paraparau i tā ’outou mau tamari’i nō ni’a i te tahi o te mau « mea maita’i roa » tā te Fatu i rave. E aha te tahi o te mau « ohipa a te Fatu i rotopū ia [tātou] » tā tātou e nehenehe e parau ? Nō te tauturu i tā ’outou mau tamari’i ’ia feruri i teie uira’a, e nehenehe ’outou e hīmene ’āmui i te hō’ē hīmene nō ni’a i te Fa’aora, mai te « Ti’aturi au i te Mesia » (Te mau Hīmene, N°.66). E nehenehe ’outou e fa’ahope i te hō’ē parau mai teie te huru : « Ti’aturi au i te Mesia ; E . » Nāhea tātou e nehenehe ai e tauturu i te tahi atu mau ta’ata ’ia ’ite nō ni’a i te mea tā te Fa’aora i rave nō tātou ?
« Tē ’oa’oa nei tātou i te Mesia. »
-
Nāhea e ti’a ai ia ’outou ’ia tauturu i tā ’outou mau tamari’i ’ia « ’oa’oa i te Mesia » ? Penei a’e e nehenehe ’outou e fa’ati’a i te hō’ē ’ā’amu nō ni’a ia Iesu Mesia i te hōro’ara’a i te ’oa’oa ia vetahi ’ē, ’e ’aore rā, e nehenehe ’outou e fa’a’ite i te hō’ē video mai « Tē fa’aora nei Iesu i te hō’ē ta’ata i fānau-matapō-hia » ’e ’aore rā, « Vaiiho i te mau tamari’i ri’i ’ia haere mai iā’u nei » (Vaira’a buka ’Evanelia). E nehenehe tā ’outou mau tamari’i e fa’a’ite i te mau taime ’oa’oa i roto i te ’ā’amu ’e ’aore rā, te video. I muri iho, ’a tai’o ’āmui ai ’outou i te 2 Nephi 25:26, e paraparau nō te aha rātou e « ’oa’oa ai i te Mesia ».
Fa’a’ite pāpū nō te Mesia. ’Eiaha e mana’o ē, ’ua ’ite tō ’outou ’utuāfare i tō ’outou mana’o nō ni’a i te Fa’aora. ’A parau ia rātou, ’e ’a vaiiho i tō ’outou mau mana’o nō ni’a i te Fa’aora ’ia fa’auru i tō ’outou huru i ni’a ia rātou.
Nō te tahi atu ā mana’o, ’a hi’o i te ve’a Hoa nō teie ’āva’e.
E haere au i te vāhi tā ’oe e hina’aro ’ia haere au, nā Ramon Ely Garcia Rivas