E volavola tiko o Momani ena peleti koula

1–7 ni Janueri: E Dua Tale na iVakadinadina kei Jisu Karisito

Na Tabana ni iVakamacala Taumada ni iVola i Momani

Ni se bera ni o yacova yani na 1 Nifai wase 1, o na raica kina ni iVola i Momani e sega walega ni dua na ivola. Na tabana ni ivakamacala taumada e tukuni kina e dua na italanoa ka sega ni vakatale e dua—oka kina na veisiko ni agilosi, na itukutuku makawa ka buluti tu mai ena vica vata na drau na yabaki sa oti ena dua na delana, vakakina na italanoa ni dua na cauravou e vakadewataka na itukutuku ena kaukauwa ni Kalou. Na iVola i Momani e sega walega ni dua na itukutuku makawa me baleta e dua na kawa tamata ni gauna e liu sara kei Amerika. E saga me vakauqeta na tamata kecega “ni o Jisu na Karisito” (tabana ni ulutaga ni iVola i Momani), ka dusimaka kina na Kalou Vakataki Koya na kena sala a volai kina, maroroi, ka vakarautaki vei keda. Ena yabaki oqo, ni o wilika na iVola i Momani, masulaka, ka bulataka na kena ivakavuvuli, o na sureta na kaukauwa ni iVakabula ki na nomu bula. O na rairai vakila ni o yavalati mo kaya, me vaka e ratou a vakayacora na Lewe Tolu na iVakadinadina ena nodratou ivakadinadina, “Sa ka totoka dina e mataqu.”

Vakasama eso ni Vuli ena iTikotiko vakakina ena Lotu

Tabana ni iulutaga ni i Vola i Momani

Niu vulica na iVola i Momani ena rawa ni vaqaqacotaka na noqu vakabauti Jisu Karisito.

Na tabana ni ulutaga ni Vola i Momani ena vakarautaka e levu cake na ka mai na ulutaga walega. Mai na veika tale eso, e tuvai kina e vica na inaki ni tukutuku tabu oqo. Vakaraica na inaki eso oqo ena tabana ni ulutaga. Na taro vakaoqo ena rawa me vukei iko ni o vakasamataka vakatitobu: Na cava na vuna me tiko kina vei keda na iVola i Momani? E duidui vakacava na iVola i Momani mai na ivola tale eso?

Oqo e rawa ni dua na gauna vinaka me caka kina e dua na ituvatuva ni tamata yadua se vakamatavuvale me wiliki na iVola i Momani ena yabaki oqo. Na gauna kei na vanua cava o na wilika kina? O na sureta vakacava na Yalotabu ena nomu vulica? E tiko beka e dua na ka vakatabakidua mo na vakasaqara ena nomu vulica tiko? Me ivakaraitaki, e rawa ni o vaqara na veitikina e rawati kina na inaki o kunea ena tabana ni ulutaga. E rawa ni o maroroya e dua na lisi ni veitikina e tara cake nomu vakabauti Jisu Karisito.

Raica talega na 2 Nifai 25:26; Mosaia 3:5–8; Alama 5:48; 7:10–13; Ilamani 5:12; 3 Nifai 9:13–18; 11:6–14; Moronai 10:32–33.

E dua na yalayala vakaparofita. E kaya o Peresitedi Russell M. Nelson, “Au yalataka ena nomuni vakasamataka vakatitobu na veika o vulica [ena iVola i Momani], ena tadolavi na katubaleka ni lomalagi, o na ciqoma na isau ni nomu taro kei na idusidusi ena nomu bula” (“Na iVola i Momani: Ena Vakaivei Beka Nomu Bula Kevaka e Sega?, ” Liaona, Nove. 2017, 62–63).

ivakatakilakila ni semineri

iVakamacala Taumada ni iVola i Momani; “Nodratou iVakadinadina na Lewe Tolu”; “Nodratou iVakadinadina na Lewe Walu”

E rawa niu dua na ivakadinadina ni iVola i Momani.

E rawa ni vakadinadinataka vei iko na Yalo Tabu ni dina na iVola i Momani, kevaka madaga o sega ni se raica na peleti koula me vakataki iratou na Lewe Tolu kei na Lewe Walu na ivakadinadina. Ni o wilika na nodra vosa, vakasamataka na sala ena vaqaqacotaka kina na nomu, na nodra ivakadinadina.

Na cava e vakauqeti iko me baleta na sala era wasea kina na ivakadinadina bula oqo na nodra ivakadinadina me baleta na iVola i Momani? Vakasamataka vakatitobu na sala o rawa ni wasea kina na nomu ivakadinadina ni iVola i Momani—vakabibi na kena vakadinadinataki Jisu Karisito. Me ivakaraitaki, raitayaloyalotaka mada ni o vosa tiko vua e dua na itokani ka se bera vakadua ni bau rogoca na iVola i Momani. Na cava beka o na tukuna vua baleta na ivola? O na tovolea vakacava mo vakauqeta na nomu itokani me wilika? Sa rawa mo railesuva na iVakamacala Taumada ki na iVola i Momani. Sa rawa mo raica na veika matailalai e kea ka na yaga sara me wasei vei nomu itokani. Na vidio eso oqo e rawa talega ni solia vei iko eso na vakasama.

Vakasamataka mo cakava e dua na lisi ni veika o na wasea vua e dua na itokani me baleta na iVola i Momani. Tovolea mo wasea na iVola i Momani ena nomu vakayagataka na app ni iVola i Momani.

Raica talega na Ronald A. Rasband, “This Day,” Liaona, Nove. 2022, 25–28; Gospel Topics, “Book of Mormon,” Gospel Library; “An Angel from on High,” Serenilotu, naba 13.

E ratou sa masu vata o Josefa Simici kei iratou na iVakadinadina Lewe Tolu

E ratou sa vakadinadinataka na iVakadinadina Lewe Tolu na iVola i Momani.

“Na iVakadinadina nei Parofita Josefa Simici”

A dua na cakacaka mana ni kena tadu mai nai iVola i Momani.

Kevaka e tarogi iko e dua se lako mai vei na iVola i Momani, na cava o na kaya? Ena rawa ni o vakamacalataka beka vakacava na veika a cakava na Kalou ena kena kau mai na iVola i Momani? Ni o wilika na ivakadinadina i Josefa Simici, vakarogoca vakamalua na nona vakamacalataka. Yavutaki ena veika o wilika, na cava o nanuma na lewa ni Kalou me baleta na bibi ni iVola i Momani?

Raica talega na Ulisses Soares, “Na Tadu Mai ni iVola i Momani,” Liaona, Me 2020, 32–35; Saints, vol. 1, The Standard of Truth, 21–30; Gospel Topics Essays, “Book of Mormon Translation,” Gospel Library.

Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakatutu baleta Nodra Tuberi na Gonelalai

Tabana ni iulutaga ni i Vola i Momani

Niu wilika na iVola i Momani e rawa ni vukei au meu vakabauti Jisu Karisito.

• Me ra raica ka taura tu na luvemuni e dua na iVola i Momani. Vukei ira me ra dusia na kena ulutaga, E Dua Tale na iVakadinadina kei Jisu Karisito. E rawa talega ni o vukei ira me ra kunea, ena tabana ni ulutaga, na malanivosa “O Jisu na Karisito, na Kalou Tawamudu, ka sa vakaraitaki Koya vei ira na veimatanitu kecega.” Vukei ira me ra kila ni kena ibalebale oqo ni vakavulica vei keda na iVola i Momani me baleti Jisu Karisito. Tukuna vakalekaleka vei ira na gone se sa vakaukauwataka vakacava na iVola i Momani na nomu vakabauti Jisu Karisito. E rawa talega ni o tarogi ira me baleta na nodra italanoa taleitaki ena iVola i Momani. Na lagati ni “Book of Mormon Stories” (iVolanisere ni Lalai, 118–19) e rawa ni vakananumi ira ena so na italanoa oqo.

iVakamacala Taumada ni iVola i Momani.

Na iVola i Momani sa vatuivakadei ni noda Lotu.

• Na tabana ni itaviqaravi ena macawa oqo kei na iyaloyalo e ra e rawa ni vukei ira na luvemu me ra kila na veivosa oqo nei Josefa Simici ena ivakamacala taumada ni iVola i Momani: “Na iVola i Momani sa vatuivakadei ni noda Lotu.” E rawa talega ni lasa me tara se droinitaki e dua na icurucuru kei na vatuivakadei e cake. Na cava ena yaco kevaka e kautani mai na vatu ivakadei? Na cava e rawa ni yaco kevaka e sega vei keda na iVola i Momani? Sa rawa mo ni wilika vata na iotioti ni parakaravu ni ivakamacala taumada mo ni kila na cava tale eda sa vulica ni da ciqoma na dina ni iVola i Momani. Ena rawa ni da cakava vakacava me vatuivakadei ni noda vakabauti Jisu Karisito na iVola i Momani?

e dua na icurucuru vatu ka taura matua toka na kena vatu ivakadei

Na iVola i Momani sa vatuivakadei ni noda Lotu.

“Nodratou iVakadinadina na Lewe Tolu”; “Nodratou iVakadinadina na Lewe Walu”

E rawa niu dua na ivakadinadina bula ni iVola i Momani.

• Me vukei ira na luvemu me ra kila na ibalebale ni dua na ivakadinadina, e rawa ni o vakamacalataka vei ira e dua na ka o sa raica ka se bera ni ra raica. Me ra qai vakayacora vakakina vei iko. Oqo e rawa ni vakavuna e dua na veitalanoa me baleti ira na 11 na tamata era raica na peleti koula ka vakadewataki kina na iVola i Momani. Ni o ni wilika vata na ivakadinadina, e rawa ni o ni veivosakitaka na vuna era vinakata kina na ivakadinadina me ra kila na tamata tale eso me baleta na nodra ivakadinadina. O cei eda vinakata me da tukuna vei ira na iVola i Momani?

“Na iVakadinadina ni Parofita ko Josefa Simici”

A soli vei keda na iVola i Momani mai na kaukauwa ni Kalou.

• Me vukei ira na luvemu me ra vulica na ivakarau e solia kina vei keda na Kalou na iVola i Momani, e rawa ni o wilika vei ira na veitiki ni “Na iVakadinadina ni Parofita ko Josefa Simici” Sa rawa talega mo vakayagataka na “Wase 1: How We Got the Book of Mormon” (ena Book of Mormon Stories, 2–4). E rawa talega ni ra marautaka na luvemu me ra matanataka vakavica na italanoa.

Me baleta na vakasama tale eso, raica na ilavelave ni vula oqo ni i Tokani ena kena mekasini. .

Sa ciqoma tiko o Josefa mai vei Moronai na peleti koula.

Sa Solia na Peleti Koula o Moronai, mai vei Gary L. Kapp

tabana ni itaviqaravi: Na iVola i Momani sa vatu ivakadei ni noda lotu.