era kania tiko na tamata na vuanikau ni vunikau ni bula

Na Loloma ni Kalou, mai vei Sabrina Squires

22–28 ni Janueri: “Vakaiyaragi Tu ena iValavala Dodonu kei na Kaukauwa ni Kalou”

1 Nifai 11–15

Ni sa tu vua na Kalou na cakacaka bibi sara me vakayacora na Nona parofita, e dau solia o Koya vua na parofita o ya na raivotu e bibi sara. O Mosese, Joni, Liai, kei Josefa Simici era a raica kece na raivotu vaka o ya—na raivotu eso a vakarabailevutaka na nodratou vakasama ka vukei iratou me ratou raica na cecere kei na veivakauqeti ni cakacaka ni Kalou.

A yaco talega vei Nifai na mataqali raivotu veisautaki bula vakaoqo. A raica o koya na cakacaka ni iVakabula, na veisiga ni mataka ni kawa i Liai ena vanua yalataki, kei na icavacava ni cakacaka ni Kalou ena iotioti ni gauna. Ni oti na raivotu oqo, sa vakarautaki vakavinaka cake o Nifai ki na cakacaka sa tu mai liu. Ni o wilika na raivotu oqo ena rawa ni vukei iko talega me vakarautaki iko—ni sa tiko talega vua na Kalou na cakacaka mo cakava ena Nona matanitu. Ni o sa wili kei ira “na yalododonu ni lotu ni Lami” ka raica o Nifai, “ka ra sa veiseyaki tu e delai vuravura; ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere” (1 Nifai 14:14).

Raica talega na “Nephi Sees a Vision of Future Events” (vidio), Gospel Library.

Vakasama eso ni Vuli ena iTikotiko kei na Lotu

1 Nifai 11

A talai Jisu Karisito mai na Kalou me ivakaraitaki ni Nona loloma.

Ni taroga o Nifai na agilosi me baleta na ibalebale ni vunikau ena tadra nei Liai, a rawa sara ga vua na agilosi me kaya, “E matataka tiko na loloma ni Kalou.” Ia, a vakaraitaka vei Nifai e vica na ivakatakarakara kei na veika a yaco ena bula ni iVakabula. Vakaraica na ivakatakarakara kei na veika e yaco oqo ni o wilika ka vakasamataka na 1 Nifai 11. Na cava o raica e vukei iko mo kila na vuna e ivakaraitaki cecere duadua ni loloma ni Kalou o Jisu Karisito?

Sa rawa talega mo sarava na vidio ni iVolatabu ena Gospel Library ka salavata kei na veika a raica o Nifai. Sa vukei iko vakacava na iVakabula mo vakila na loloma ni Tamamu Vakalomalagi?

Raica talega na Susan H. Porter, “Loloma ni Kalou: Sa Ka Rekitaki Duadua ki na Yaloda,” Liaona, Nove. 2021, 33–35.

1 Nifai 12–14

Au sa rawa ni “vakaiyaragi ena ivalavala dodonu” kei na kaukauwa.

E sega ni rawa vei Nifai me bula donuya ka vakadinadinataka e levu na veika a raica ena nona raivotu. Na cava o nanuma kina ni yaga bibi sara me kila o Nifai na veika oqo? Na cava e yaga bibi kina vei iko mo kila na ka oqo? Taroga na taro oqo ena veigauna yadua o wilika kina e dua na ka a raica o Nifai ena nona raivotu (raica na 1 Nifai 12–14). Na veivakauqeti cava o sa ciqoma me baleta na nomu ilesilesi ena cakacaka ni Turaga e “levu ka … talei”? (1 Nifai 14:7) Na cava eso na ka levu ka talei sa cakava o Koya kivei iko?

Vakasamataka vakabibi na yalayala ena 1 Nifai 14:14. Sa vakayacora vakacava na iVakabula na yalayala oqo ena nomu bula? (Me vakataka oqo, raica na David A. Bednar, “Ena Kaukauwa ni Kaloui ena Lagilagi Cecere,” Liaona, Nove. 2021, 28–30, vakabibi na iotioti ni rua na wase.)

1 Nifai 13:1–9; 14:9–11

Na cava na “lotu vakaitamera ka vakasisila” ka raica o Nifai?

E vakamacalataka o Peresitedi Dallin H. Oaks ni “lotu vakaitamera ka vakasisila” e vakamacalataka o Nifai e matataka na “vakasama vakavuli se soqosoqo e veisaqasaqa kei na vakavuvuli ni Kalou. Na ‘veivesu’ e veikau mai kina na ‘lotu’ oqo e saga me kua ni vakaiyalayalataka na veiyasana vakayago vei ira na yalododonu me vaka na veivesuki ni so na vakasama lasutaki” (“Stand as Witnesses of God,” Ensign, Maj. 2015,32. E vukei iko vakacava na iVakabula mo levea—ka dro tani mai—na vesuki ni vakasama lasu?

1 Nifai 15:1–11

Ena sauma mai na Kalou kevaka au kerekere ena vakabauta.

O sa bau vakila ni o sega ni ciqoma tiko na ivakatakila yadua—ni sega ni vosa tiko vei iko na Kalou? Na ivakasala cava e solia o Nifai vei ira na tuakana ena gauna eratou vakila kina na veika oqo? (Raica na 1 Nifai 15:1–11.) O na rawa vakacava ni vakayagataka na vosa vakaibalebale oqo nei Nifai ena nomu bula?

ivakatakilakila ni semineri

1 Nifai 15:23–25

Niu tautauri matua ki na vosa ni Kalou e vukei au meu vorata na veivakayarayarataki nei Setani.

E dau cakava o Nifai na veika bibi me tukuna vei iratou na tuakana. Ia e dau taleitaka vakalevu o koya na veika a tukuna vei ira ena 1 Nifai 15:23–25. Na cava na itukutuku nei Nifai, na cava na vuna o nanuma ni sa rui kaukauwa sara na nona nanuma kina?

E vakatavulica o Elder David A. Bednar ni “vosa ni Kalou” e rawa ni vakanamata ki na ivolanikalou, ki na nodra vosa na parofita bula, vakakina vei Jisu Karisito Vakaikoya. Na cava o nanuma e kena ibalebale meda “tautauri matua” ki na ivolanikalou kei na nodra vosa na parofita bula? Na cava e rawa ni kena ibalebale meda “tautauri matua” ki vei Jisu Karisito? Sa rawa mo vakasaqara na isau ni taro donu ki na veitaro oqo ena itukutuku nei Elder Bednar “Ia Keimami a Sega Ga ni Kauwaitaki Ira” (Liaona, Me 2022, 14–16).

Ena vukei iko vakacava na nomu tautauri matua ki na vosa ni Kalou mo vorata kina na meca? Na kena vakaleweni e dua na ituvatuva vakaoqo ena rawa ni vukea na kena tuvai na nomu vakanananu:

	… vukei au meu ulabaleta rawa na butobuto ni veitemaki? (raica na 1 Nifai 12:17)	… vukei au meu “kakua ni kauwaitaka” na veika wale kei na dokadoka ni vuravura? (1 Nifai 12:18)
E rawa vakacava na tauri matua ni ivolanikalou kei na nodra vosa na parofita bula …
E rawa vakacava na tautauri matua vua na iVakabula …

Raica talega “Na iTitoko Kaukamea,” Serenilotu, naba 167; Jorge F. Zeballos, “Taracake na Bula nI Tataqomaki mai na Vunica,” Liaona, Nove. 2022, 50–52.

era wili ivolanikalou tiko na matavuvale

Na ivolanikalou era sa vaka e dua na itautauri kaukamea ka na kauti keda ki na vunikau ni bula.

Me baleta na ikuri ni vakasama, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama baleta Nodra Tuberi na Gonelalai

1 Nifai 11:16–33

A talai Jisu Karisito mai ki vuravura na Tamada Vakalomalagi baleta ni lomani au.

• Me vakavulici Nifai me baleta na loloma ni Kalou, a vakaraitaka e dua na agilosi vei Nifai na veika a yaco ena bula ni iVakabula. Sa rawa ni o cakava talega oqo vei ira na luvemu—solia vei ira na iyaloyalo ni veika a yaco a raica o Nifai ena 1 Nifai 11:20, 24, 27, 31, kei na 33 (raica na Gospel Art Book, naba 30, 35, 39, 42, 57). Ni o wilika na veitikina oqo, vukei ira na luvemu me ra raica na iyaloyalo e veisotari vata. Na cava eda sa vulica baleti Jisu Karisito mai na veitikina kei na iyaloyalo oqo?

• Lagata e dua na sere me vaka na “He Sent His Son” (Nodra Sere na Lalai, 34–35) e rawa ni vukei ira na luvemu me ra vakila na loloma ni Kalou. Ni o lagata oti, tarogi ira na luvemu na veika era sa vulica mai na sere. Na cava tale eda sa vulica me baleta na loloma ni Kalou mai na 1 Nifai 11:22–23?

Vakayagataka na cakacakaniliga me vukei ira na gone me ra vuli. Ni o vakavulica vei ira na gone e dua na italanoa ni ivolanikalou, vukei ira me ra raitayalotaka. E rawa ni o vakayagataka na iyaloyalo, vidio, matakau isulu, isulu, kei na so tale.

1 Nifai 13:26–29, 35–36,40

Na iVola i Momani e vakavuvulitaka na veidina vakamareqeti.

• Me vukei ira na luvemu me ra vakamareqeta na dina “macala vinaka ka talei” ena iVola i Momani, sa rawa mo droinitaka e dua na iyaloyalo ka sureti ira na luvemu me ra veisau se vagalalataka na veitiki ni iyaloyalo eso me rairai duatani kina. E rawa ni o vakayagataka oqo mo vakavulica kina ni veika ena iVola Tabu a veisautaki ka tauri laivi ni toso tiko na gauna. Wilika vata na 1 Nifai 13:40 ka veivosakitaka na sala e vukei keda kina na iVola i Momani (“na ivola e muri oqo”) me da kila na “veika macala vinaka ka talei” ka ra yali mai na iVolatabu (na “imatai” ni ivola). Na dina ni “veika macala vinaka ka talei” cava o sa vulica mai na iVola i Momani?

• Na vidio “The Book of Mormon—a Book from God” (Gospel Library) e rawa ni vukei ira na luvemu me ra raica na vuna e bibi kina me tiko ruarua vei keda na iVolatabu kei na iVola i Momani. Era na marautaka na gone mera cakava tale na ivakaraitaki mai na vidio.

ilavelave ni Vola i Momani ena veivosa duidui eso

Na iVola i Momani e vakalesuya mai na dina vakosipeli era yali ena gauna ni Lutu Tani.

1 Nifai 15:23–24

Niu ququmi matua tiko ena vosa ni Kalou ena vukea meu vorata na veitemaki.

• Solia vei ira na luvemu e dua na gauna me ra wasea na veika era nanuma me baleta na raivotu nei Liai. Ena rawa ni veivuke me vakayagataki e dua na iyaloyalo, me vaka na kena ena ituvatuva ni macawa sa oti. Na cava a tarovi ira na tamata mera yacova na vunikau? Na cava a vukei ira me ra yacova rawa? Sa rawa mo kerei ira mera raica na itautauri kaukamea ena iyaloyalo. Ni wilika vata na 1 Nifai 15:23–24 me kilai kina na cava e matataka na itautauri kaukamea kei na sala e rawa ni vukei keda kina.

Me baleta na vakasama tale eso, raica na ilavelave ni vula oqo ni mekasini iTokani .

Na raivotu nei Nifai baleti Meri kei na gonelailai o Jisu

Na Raivotu nei Nifai baleti Meri, mai vei James Johnson

tabana ni itaviqaravi: Na vosa ni Kalou e solia vei au na kaukauwa meu vorata na veitemaki.