Dagiti Council Meeting itiUmuna a Domingo

Iti umuna a Domingo ti tunggal bulan, dagiti miting iti elders quorum ken Relief Society ket saan a mangiraman iti maysa nga adalen nga isuro ti mannursuro. Ngem ketdi, dagiti panguluen ti elders quorum ken Relief Society ti mangiturong kadagiti miting iti council. Kadagitoy a miting iti council iti umuna a Domingo, aggiinnuman ti tunggal elders quorum ken Relief Society maipapan kadagiti lokal a pagrebbengan, gundaway, ken karit; masursuruan manipud kadagiti nauneg a pannakaawat ken pannakaammo ken padas ti tunggal maysa; ken agplano kadagiti wagas a makapagtignay kadagiti impresion a naawat manipud iti Espiritu. Nasken a maibatay dagitoy panaglilinnawag xkadagiti mainaig a nasantuan a kasuratan ken pannursuro dagiti sibibiag a propeta.

Saanto nga agpapada ti amin a miting iti council. Dagitoy ti sumagmamano a pangiwanwan a mangtulong kadagiti panguluen a mangiturong iti naballigian a council.

Sakbay ti miting iti council

Aramiden:

Ilasin dagiti lokal a kasapulan, gundaway, ken karit.
Nainkararagan a pumili iti maysa a topiko a paglilinnawagan.
Mangawis kadagiti miembro ti korum wenno kakabsat a babbai iti Relief Society nga umay a nakasagana a mangibinglay kadagiti kapanunotan ken padasda.

Saan nga aramiden:

Mangisagana iti maysa nga adalen.
Umay nga addaan iti masinunuo a pangrisut wenno addan iti panunotna ti plano nga agtignay .

Kabayatan ti miting iti council

Aramiden:

Mangawis kadagiti lider a a mangibinglay kadagiti padas nga adda kadakuada nga agtigtignay kadagiti impresion manipud kadagiti kallabes a miting.
Mangyam-ammo kadagiti topiko iti miting ken mangparegta kadagiti miembro nga aggiinnuman maipapan iti daytoy, nga agkalikagum a manggun-od kadagiti pangrisut ken pannarabay manipud kadagiti nasantuan a kasuratan, balikas dagiti propeta, ken ti Espiritu Santo.
Mangplano nga agtignay iti no ania ti napaglilinnawagan. Mabalin nga iraman daytoy dagiti plano ti grupo wenno plano a bukod nga inaramid ti tunggal tao.

Saan nga aramiden:

Mangrimbaw kadagiti pagsasaritaan.
Mangpadas a manguyot iti dadduma kadagiti kapanunotam.
Paglilinnawagan dagiti sensitibo wenno kumpidensial nga isyu.
Mangisuro iti maysa a leksion.
Mangpilit iti asino man a makiraman.

Kalpasan ti miting iti council

Aramiden:

Mangsurnad [follow up] kadagiti plano ken naidutok nga aramiden a naaramid iti miting iti council.
Mangsapul kadagiti wagas a mangiraman kadagiti saan a makadar-ay iti miting gapu kadagiti takem [calling] wenno dadduma pay a rason. Ipakaammom kadakuada maipapan kadagiti plano a naaramid.
Mangted iti miembro kadagiti gundaway a mangibinglay iti padpadasda kadagiti masakbayan a miting.

Dagiti Topiko para kadagiti Miting iti Council iti Umuna a Domingo

Dagiti kapanunotan para kadagiti paglilinnawagan a topiko iti miting iti council ket aggapu kadagiti miting ti panguluen, miting iti ward council, ti plano ti area, dagiti impresion a naawat dagiti lider kabayatan ti panagserbida kadagiti miembro, ken dagiti parikna manipud iti Espiritu Santo. Singasing laeng dagiti topiko iti baba. Mabalin nga ammo dagiti lider ti dadduma pay a kasapulan a mariknada a naparegta a mangilawlawag kadagitoy.

Ania ti maaramidtayo a makapagserbi kadagiti adda iti aglawlawtayo? (kitaen iti Mosiah 23:18).
Kasano a maipangpangrunatayo dagiti nadumaduma a pagrebbengantayo?
Kasano a maibinglaytayonto ti ebanghelio kadagiti gagayyem ken padatayo a tattao? (kitaen iti Alma 17).
Kasano a masaluadantayo ti bagbagitayo ken dagiti pamiliatayo manipud iti saan a maikanatad a media ken pornograpia?
Anianto ti aramidentayo a mangisuro ken mangpapigsa kadagiti annaktayo ken dagiti agtutubo iti wardtayo?
Kasano nga ad-adda a makiramantayo iti family history work ken panagdaydayaw iti templo?
Kasano a maawistayo ti tulong ti Apo bayat ti panangkagumaantayo a manggun-od kadagiti sungbat dagiti saludsod iti ebanghelio ken panagkalikagum a manggun-od iti naun-uneg a pannakaawat iti ebanghelio?
Kasano a mapapigsatayo dagiti pammaneknektayo maipapan ti Apo ken ti ebangheliona ken makatulong kadagiti pamiliatayo nga agbalin a naespirituan nga agpannuray iti bagi?