Dagiti Miting itiMaikadua ken Maikatlo a Domingo
Kadagiti maikadua ken maikatlo a Domingo iti tunggal bulan, masursuruanto dagiti elders quorum ken Relief Society manipud kadagiti pannursuro dagiti lider ti Simbaan manipud iti kaudian a sapasap a komperensia. Nasken a maited ti panangyunay-unay kadagiti mensahe manipud kadagiti miembro ti Umuna a Panguluen ken ti Korum dagiti Sangapulo-ket- dua nga Apostol. Nupay kasta, maibatay kadagiti lokal a kasapulan ken pammaregta manipud iti Espiritu, mabalin a paglilinnawagan ti ania man a mensahe manipud iti kaudian a komperensia.
Iti kaaduan a kasasaad, pumilinto ti panguluen ti elders quorum wenno Relief Society iti maysa a mensahe iti komperensia nga adalen a maibatay kadagiti kasapulan dagiti miembro, nupay mabalin a mangted ti bishop wenno stake president. Mabalin dagiti lider ti pumili iti mensahe a mainaig iti topiko a nailawlawag iti miting iti council iti umuna a Domingo, wenno mabalinda ti pumili iti mensahe iti sabali pay a topiko, a maibatay iti pammaregta manipud iti Espiritu.
Nasken a mangsapul dagiti lider ken mannursuro kadagiti wagas a mangallukoy kadagiti miembro a mangbasa iti napili a mensahe a nasapsapa ket umayda a nakasagana a mangibinglay kadagiti kinapudno ti ebanghelio ken kapanunotan maipapan iti no kasano ti agtignay kadagitoy. Dagiti naisingasing nga aktibidad iti panagsursuro iti baba, a maibatay kadagiti prinsipio iti Panangisuro iti Wagas ti Mangisalakan, ket makatulong kadagiti miembro a makasursuro manipud kadagiti mensahe iti sapasap a komperensia.
M. Russell Ballard, “Precious Gifts from God,” 9–11
Nailawlawag iti mensahe ni Presidente Ballard ti nadumaduma a topiko—agraman dagiti propeta, pammati ken ni Cristo, ti sakramento, ken serbisio — ken mabalin a masarakan dagiti miembro ti korum wenno Relief Society ti nadumaduma a topiko a naisangsangayan a napnuan kaipapanan. Mangawis kadagiti miembro a mangibinglay iti maysa a banag manipud iti daytoy a mensahe a mangparegta kadakuada. Ania dagiti pangawis wenno naikari a bendision a masarakantayo iti mensahe ni Presidente Ballard? Ibilang ti panangawis kadagiti miembro nga utobenda iti sumagmamano a minuto no ania ti mariknada a makaparegta nga aramidenda kas bunga daytoy panaglilinnawag.
Gary E. Stevenson, “The Heart of a Prophet,” 17–20
Tapno matulongan dagiti miembro a “maawatanda ti kinadakkel” ti panangawag iti maysa a baro a propeta, mabalinmo nga awisen dagiti miembro a mangsukisok iti mensahe ni Elder Stevenson, a mangsapsapul kadagiti kinapudno ken nauneg a pannakaammo ken pannakaawat [insights] a makatulong kadakuada a makaawat iti kinapateg ken kinasagrado daytoy nadiosan a proseso. Ibilang ti panangawis kadagiti miembro a mangibinglay no ania ti nariknada kabayatan ti sagrado a panagtitipon a nangkanunongan ken ni Presidente Nelson a kas Presidente ti Simbaan. Mabalinyo pay ti mangidrowing iti sinan-puso iti pisarra ket kiddawem kadagiti miembro a mangisuratda ditoy kadagiti balikas wenno ragup dagiti balikas a mangiladawan iti puso ken kababalin ni Presidente Nelson. Ania ti insurona a nangbendision kadatayo?
Neil L. Andersen, “The Prophet of God,” 24–27
Ti panangilawlawag iti mensahe ni Elder Andersen ket mabalin a mangpapigsa iti pammati dagiti miembro kadagiti sibibiag a propeta. Mabalinmo nga awisen ida a mangsukisok iti mensahena para iti maysa a banag a makatulong kadakuada a makaawat no apay nga addaan ti Dios kadagiti propeta iti daga ken no apay a sumurottayo kadakuada. Kasano a naparaburantayo gapu ta addaantayo iti maysa a propeta? Mabalin dagiti miembro ti mangibinglay no kasano a nakagun-odda iti pammaneknek a ni Presidente Russell M. Nelson ti propeta ti Apo ken ti Presidente ti Ti Simbaan ni Jesucristo dagiti Santo iti Ud-udina nga Aldaw.
David A. Bednar, “Meek and Lowly of Heart,” 30–33
Tapno maparegta ti panaglilinnawag maipapan iti mensahe ni Elder Bednar, mabalinmo nga isurat iti pisarra ti Ti kinapakumbaba ket … ken Ti kinapakumbaba ket saan a … Kalpasanna mabalin a sukisoken dagiti miembro ti mensahe ni Elder Bednar ket isuratmo iti pisarra dagiti ragup ti balikas a nasarakanda kadagitoy a palawag. Ania ti masursurotayo manipud iti daytoy a mensahe a mangparegta kadatayo nga agbalin a napakpakumbaba pay? Ania dagiti pagarigan ti kinapakumbaba a mapanunottayo? Kasano a mayaplikartayo ti balakad ni Elder Bednar nga agbalin a napakpakumbaba pay?
Bonnie L. Oscarson, “Young Women in the Work,” 36–38
Dagiti saludsod ket maysa a wagas a mangyawis iti panagutob. Ibilang ti panangisurat iti pisarra ti sumagmamano a saludsod a masungbatan iti mensahe ni Sister Oscarson, a kas iti Kasano a mairamantayo dagiti agtutubo a babbai iti aramid ti Apo? Mangawis kadagiti miembro a mangsukisok iti mensahena para kadagiti sungbat kadagitoy a saludsod ket paglilinnawagan no ania ti masursuroda. Ania dagiti bendision nga umay no makiraman dagiti agtutubo a babbai iti panagserbi? Nalabit a mabalin nga ibinglay dagiti miembro ti klase dagiti padasda iti panagserbi kadagiti agtutubo a babbai. Batay iti panaglilinnawagtayo, ania ti mariknatayo a makaparegta nga aramiden?
Dale G. Renlund, “Family History and Temple Work: Sealing and Healing,” 46–49
Insarita ni Elder Renlund maipapan iti parmata ni Ezequiel maipanggep iti maysa a templo nga adda danum nga agay-ayus ditoy (kitaen iti Ezekiel 47:8–9). Nalabit a mabalin nga idrowing dagiti miembro ti korum wenno Relief Society ti ladawan daytoy a parmata iti pisarra. Kasano a mayarig dagiti bendision ti aramid iti templo ken family history iti danum iti parmata ni Ezequiel? Mabalinmo nga awisen dagiti miembro ti klase a mangibinglay kadagiti bendision ti aramid iti templo ken family history a napadasandan. Ania ti maaramidtayo tapno mapagbalintayo ti aramid iti family history ken templo nga ad-adda pay a kadawyan a paset ti panagbiagtayo?
D. Todd Christofferson, “The Elders Quorum,” 55–58
Iti elders quorum, mabalinmo nga awisen dagiti miembro ti korum a mangbasa iti benneg ti mensahe ni Elder Christofferson a napauluan iti “Ti Panggep Dagitoy a Pannakabalbaliw.” Ania ti maaramidtayo tapno masigurado a maipatungpaltayo dagitoy a panggep? Iti Relief Society, mabalinmo nga idawat iti maysa a tao a manggupgop kadagiti pannakabalbaliw dagiti korum iti Melchizedek Priesthood nga inladawan ni Elder Christofferson. Kalpasanna mabalin nga ilasin dagiti kakabsat a babbai dagiti pagbatayan a naipaawat kadagitoy a pannakabalbaliw a mabalin a mayaplikar ti aramid ti Relief Society. Iti elders quorum wenno Relief Society, mabalin nga ilawlawag dagiti miembro no ania ti masursuroda manipud iti estoria ni Brother Goates ken no kasano a mayaplikar daytoy iti aramidda.
Ronald A. Rasband, “Adtoy! Ti Naarian a Buyot,” 58–61
Nalabit nga iti panagkanta, panangdengngeg, wenno panagbasa kadagiti balikas ti “Behold! A Royal Army” (Hymns, no. 251) nga aggigiddan mabalin a mangparegta ti panaglilinnawag maipapan iti mensahe ni Elder Rasband. Kasano a mayarig dagiti korum ti priesthood ken Relief Society iti naarian a buyot? Mabalin pay a sapulen ken paglilinnawagan dagiti miembro ti “nawadwad a bendision” a dinakamat ni Elder Rasband ket aggapunto iti maulit a pannakabukel dagiti korum iti priesthood. Ania dagiti dadduma pay a bendision nga inawattayo—wenno namnamaentayo nga awaten—manipud iti pannakaipatungpal dagitoy a pannakabalbaliw? Kasano a naan-anay nga awaten dagiti Relief Society dagiti bendision kas “panagduduma dagiti sagsagut” ken “panangisuro”?
Henry B. Eyring, “Inspired Ministering,” 61–64
Imbaga ni Presidente Eyring maipapan iti dua a panagsarita iti miting sakramento maipapan iti ministering a nakaawis iti riknana. Nalabit a mabalinmo nga idawat iti kagudua ti korum wenno kadagiti miembro ti Relief Society a mangrebyu kadagiti balikas ti agtawen iti 14 nga agtutubo a lalaki ken iti sabali a pay a kagudua a mangrebyu iti estoria maipapan iti home teacher. Bayat ti panagbasada, mabalin nga agpanunot dagiti miembro iti balakad a mabalinda nga ited iti agtutubo a lalaki wenno agtutubo a babai a kabarbaro a nadutokan nga agserbi iti maysa a tao. Kasano a “makapagbalintayo nga ad-adda pay a naparegta ken manangngaasi … iti serbisiotayo iti ministering”?
Dallin H. Oaks, “The Powers of the Priesthood,” 65–68
Tapno mangirugi iti panaglilinnawag, mabalinmo nga isurat dagiti paulo ti uppat a benneg ti mensahe ni Presidente Oaks iti pisarra. Kalpasanna awisem ti tunggal miembro a mangbasa a siuulimek iti maysa a benneg ket kalpasanna isurat iti pisarra ti maysa a binatog a manggupgop iti kangrunaan a mensahe dayta a benneg. Kalpasanna mabalin nga ibinglay dagiti miembro no ania ti mariknada a makaparegta nga aramiden gapu iti nabasada. Kasano a mapadur-as ti panagserbitayo kas priesthood holder wenno kakabsat iti Relief Society bayat ti panangyaplikartayo kadagiti pannursuro iti mensahe ni Presidente Oaks?
Russell M. Nelson, “Ministering with the Power and Authority of God,” 68–75
Awisen ti Presidente Nelson dagiti priesthood holder a “tumakder’ ken mangusar iti priesthood a mangbendision kadagiti annak ti Nailangitan nga Ama. Mangawis kadagiti miembro ti korummo wenno Relief Society a mangsukisok kadagiti pagarigan nga intedna ket paglilinnawagan no kasano a makatulong kadatayo a makaawat no kasano a mausar ti priesthood a mangbendision kadagiti pamiliada, ken dadduma pay. Ania dagiti padas a maibinglaytayo idi naparaburantayo iti bileg ti priesthood? Kasano a matulongantayo dagiti dadduma wenno ti bagbagitayo a maaddaan iti pammati a mangusar iti priesthood ti Dios nga “agminister iti naganna”?
Reyna I. Aburto, “With One Accord,” 78–80
Mangted ti mensahe ni Sister Aburto iti gundaway iti korummo wenno Relief Society a mangamiris no kumustan ti panagtrabahoyo nga agkaykaysa iti aramid ti Apo. Tapno matulongan dagiti miembro a mangaramid iti daytoy, mabalinmo nga ipakita dagiti ladawan dagiti reyna ti kulibangbang, ti isasarungkar ti Mangisalakan kadagiti Nephite (kitaen iti Libro ti Arte ti Ebanghelio, 82, 83, 84), ken ti aramid ti Simbaan nga agpaay iti tao (kitaen iti LDS.org). Mabalin a sukisoken dagiti miembro ti mensahe ket takuaten no kasano nga inusar ni Sister Aburto dagitoy a pagarigan a pangisuro maipapan kadagiti panggep ken bendision ti panagtrabaho nga agkaykaysa. Ania ti maaramidtayo tapno agtrabaho “iti maymaysa a tunos”?
Henry B. Eyring, “His Spirit to Be with You,” 86–89
Tapno mangpatibker iti tarigagay ken kabaelan nga umawat iti Espiritu Santo, ibinglay ni Presidente Eyring ti sumagmamano a bukod a padpadas ken mangted iti masinuno a pangiturong. Kalpasan ti panangrebyuna kadagiti padasna, ania dagiti maipada a lagip a maibinglay dagiti miembro ti korummo wenno Relief Society idi sinagid ti Espiritu Santo ti puspusoda wenno pinasingkedanna iti kinapudno? Nalabit a mabalin nga ilista dagiti miembro iti pisarra ti pannarabay nga ibinglay ni Presidente Eyring a makatulong a “manglukat iti puspusoda nga umawat iti panagpapaay ti Espiritu.” Kasano a ti panangsurot ti panangiturongna ket tulongannatayo iti bukodtayo a biag ken kadagiti pamiliatayo? iti korumtayo wenno Relief Society?
Dallin H. Oaks, “Dagiti Babassit ken Gagangay a Banag,” 89–92
Naglaon ti mensahe ni Presidente Oaks kadagiti metapora a mangisuro no kasano nga addaan dagiti babassit ken gagangay a banag iti nabileg nga epekto para iti naimbag wenno dakes. Iraman dagitoy a metapora ti tallo a ramut ti kayo, maysa a bunggoy dagiti aggagaod, dagiti nginabras ti tali, wenno agtedtedted a danum. Mabalin a basaen dagiti miembro dagitoy a metapora ket panglilinnawagan no ania ti isuroda maipapan iti bileg ti panangaramid kadagiti babassit ken gagangay a banag a saan nga agbalbaliw. Ania dagiti babassit ken gagangay a banag a mangisangbay iti impluensia ti Espiritu Santo iti biagtayo? Mangawis kadagiti miembro nga agutob no ania ti nakaawisan ti riknada a mangsurot iti balakad ni Presidente Oaks.
Russell M. Nelson, “Revelation for the Church, Revelation for Our Lives,” 93–96
Iti mensahena, agpakaasi kadatayo ni Presidente Nelson a mangpadur-as iti “naespirituan a kabaelantayo nga umawat iti paltiing.” Tapno matulongan dagiti miembro a mangsurot iti panangiturongna, mabalinmo nga isurat dagiti saludsod kas iti sumaganad iti pisarra: Apay a kasapulantayo ti paltiing? Kasano a mapadur-astayo ti kabaelantayo nga umawat iti paltiing—kas indibidual ken bayat ti panaggiinnumantayo? Ania dagiti bendision nga inkari ni Presidente Nelson no agkalikagumtayo a manggun-od iti paltiing? Bingayen dagiti miembro iti kada grupo, ket awisen ti tunggal grupo a mangsarak ken mangibinglay kadagiti sungbat iti maysa kadagiti saludsod.
Gerrit W. Gong, “Christ the Lord Is Risen Today,” 97–98
Ania ti masursuro dagiti miembro ti korum wenno Relief Society manipud iti mensahe ni Elder Gong maipapan kadagiti katulagantayo ken ti Pannubbot ni Jesucristo? Mabalinmo nga awisen dagiti miembro a mangsukisok iti mensahe, a mangsapsapul kadagiti bendision nga idiaya ti Pannubbot ti Mangisalakan ken dagiti katulagantayo—panagtrabaho a sangkamaysa—kadatayo. Kalpasanna ibilang ti panagdamag kadagiti saludsod kas iti sumaganad maipapan iti no ania ti nasarakanda: Kasano nga agkaykaysa nga agtrabaho dagiti katulagantayo ken ti Pannubbot tapno “mangpabael ken mangpatakneng” kadatayo? Ania ti maitulongda kadatayo a pagtalinaeden ken ikkaten?
Ulisses Soares, “Prophets Speak by the Power of the Holy Spirit,” 98–99
Ti mensahe ni Elder Soares ket makaparegta kadatayo nga agtignay iti pammati no mariknatayo ti pagkurangan iti panangaramid iti pagayatan ti Apo. Kasano nga inawat ni Elder Soares ti liwliwa ken pammatalged idi inawatna ti baro a takemna kas maysa nga Apostol? Ania ti nasursurona manipud iti padasna iti pannakaawagna kas maysa a mission president? Ania ti masursurotayo manipud kadagiti padasna? Mangted kadagiti miembro iti gundaway a mangibinglay kadagiti padas idi nariknada a saanda a sigurado maipapan iti maysa a banag a kayat ti Apo nga aramidenda. Ania ti inaramidda a nangsapul iti pammati nga agtultuloy?
Jeffrey R. Holland, “Be With and Strengthen Them,” 101–3
No naammuan dagiti miembro ti korummo wenno Relief Society maipapan kadagiti panagbalbaliw iti “konsepto iti ministering iti priesthood ken Relief Society,” ania dagiti saludsod nga adda kadakuada? Ti mensahe ni Elder Holland ti makaited kadagiti sungbat. Mabalin dagiti miembro ti mangsapul kadagiti pagbatayan ti ebanghelio nga isuro ni Elder Holland ket ti pundasion dagitoy a pannakabalbaliw. Ania dagiti awis a masarakantayo iti mensahena? Ania dagiti bendision a naikari? Kasano a makatulong kadatayo nga agbalin a “pudno a disipulo ni Cristo” dagitoy baro a wagas ti ministering?
Jean B. Bingham, “Ministering as the Savior Does,” 104–7
Iti mensahena, awisennatayo ni Sister Bingham a mangdamag iti bagbagitayo dagiti saludsod a mabalin a mangtarabay kadagiti panagkagumaantayo iti ministering. Mabalin a paglilinnawagan dagiti miembro no kasano a matarabay dagitoy a saludsod dagiti panagkagumaanda ket kalpasanna mangsarak kadagiti sungbat iti saludsod ni Sister Bingham, “Ngarud, ania ti langa ti [ministering]?” Mabalin a mangbuboska iti panawen a mangrebyu iti sumagmamano kadagiti pagwadan nga ibinglay ni Sister Bingham iti ministering dagiti indibidual ket awisem dagiti miembro a mangibinglay kadagiti bukodda a pagwadan. Ania ti masarakantayo iti mensahe ni Sister Bingham a mangnayon iti pannakaawattayo no apay ken no kasano nga agministertayo?
Dieter F. Uchtdorf, “Behold the Man!,” 107–10
Kasano a matulongantayo ti maysa a tao a makaawat a ti pangsubbot a sakripisio ken Panagungar ni Jesucristo ket ti kapatgan a pasamak iti pakasaritaan ti lubong? Awisem dagiti miembro a mangutob iti daytoy a saludsod bayat ti panagbasada kadagiti paset ti mensahe ni Elder Uchtdorf. Ania ti nasarakanda a makatulong a mangilawlawag kadagitoy a pasamak a napateg unay kadakuada? Kalpasan daytoy a panangilawlawag, mabalin a pagsasaritaan dagiti miembro ti klase maipapan no ania ti kaipapanan kadakuada ti “adtoy ti tao.” Kasano ti pannakasursurotayo iti “adtoy ti tao”?
Quentin L. Cook, “Prepare to Meet God,” 114–17
Mabalinmo a rugian ti panangilawlawagmo iti mensahe ni Elder Cook babaen ti panangawis iti maysa a miembro tapno manggupgop iti pannakaisubli dagiti tulbek ti priesthood iti Templo ti Kirtland. Segun iti mensahe ni Elder Cook, ania dagiti adda a pagrebbengan ti Simbaan a mainaig kadagitoy a tulbek? Kasano a maiparangarang dagitoy a pagrebbengan iti Simbaan iti agdama? Isuratmo dagiti balikas a kinalinteg, panagkaykaysa, ken panagpapada iti pisarra, ket idawat kadagiti miembro a mangibinglay kadagiti nauneg a pannakaammo ken pannakaawat [insights] a magun-odda maipapan iti tunggal maysa kadagitoy a pagbatayan manipud iti mensahe ni Elder Cook. Kasano a matulongandatayo dagitoy a pagbatayan a mangipatungpal kadagiti sagrado a pagrebbengan iti Simbaan?