Sukda ang Imong Nakat-onan 10: Ang Basahon ni Mormon; 1 Nephi–Moroni
“Sukda ang Imong Nakat-onan 10: Ang Basahon ni Mormon; 1 Nephi–Moroni,” Manwal sa Magtutudlo sa Basahon ni Mormon (2024)
“Sukda ang Imong Nakat-onan 10,” Manwal sa Magtutudlo sa Basahon ni Mormon
Sukda ang Imong Nakat-onan 10
Ang Basahon ni Mormon; 1 Nephi–Moroni
Imahe
tawo nga nagbasa sa Basahon ni Mormon
Ang pagpamalandong ug pagsukod sa imong espirituhanong pagkat-on makatabang kanimo nga mas maduol ngadto sa Manluluwas ug makapalig-on sa imong pagkakabig. Kini nga leksiyon gituyo aron sa pagtabang kanimo sa pagsukod sa pag-uswag ug pagtubo nga imong nasinati atol sa imong pagtuon sa Basahon ni Mormon karong tuiga.
Dapita ang mga estudyante sa pagrekord sa ilang mga pagbati ug mga impresyon.Pahinumdomi ang mga estudyante nga ang Espiritu Santo makatudlo kanila og mga butang atol sa klase nga wala ikasulti sa makusog. Samtang girekord sa mga estudyante kining espirituhanong mga impresyon, madugangan nila ang ilang abilidad sa pag-ila ug pagkat-on pinaagi sa Espiritu. Makatugot kini sa Ginoo sa pagpadayon sa paggiya sa ilang mga kinabuhi.
Pagpangandam sa estudyante: Mahimong mamalandong ang mga estudyante sa ilang pagtuon sa Basahon ni Mormon ug mangandam sa pagpakigbahin og panabot o kamatuoran nga ilang nakat-onan nga nakapadugang sa ilang gugma alang ni Jesukristo.
Mga Posibleng Kalihokan sa Pagkat-on
Niini nga leksiyon, adunay mga kahigayonan ang mga estudyante sa pagpamalandong kon sa unsang paagi ang Basahon ni Mormon nakatabang kanila sa pagpalambo og hugot nga pagtuo kang Jesukristo ug mahimong mas makabig ngadto Kaniya. Kon makatabang ang pagtutok sa piho nga mga kamatuoran nga gitun-an sa mga estudyante diha sa Basahon ni Mormon, mahimo nimong ipahiangay ang mga kalihokan sa paglakip niadto nga mga kamatuoran. Mahimong makompleto sa mga estudyante ang mga kalihokan sa bisan unsang pagkahan-ay.
Unsa man ang imong gibati kabahin sa Basahon ni Mormon?
Kini nga bahin sa leksiyon gituyo aron matabangan ang mga estudyante sa paghunahuna kon sa unsang paagi ang ilang pagtuon sa Basahon ni Mormon karong tuiga nakaimpluwensiya sa ilang mga pagbati ug pagpamatuod ni Jesukristo ug sa Iyang ebanghelyo. Mahimo nimong gamiton ang mosunod nga mga pangutana sa pagsugod og diskusyon uban sa imong mga estudyante.
Si Presidente Russell M. Nelson midapit kanato sa paghunahuna mahitungod sa tulo ka mga pangutana nga may kalabotan sa Basahon ni Mormon:
Mahimo nimong ipakita diha sa pisara ang tulo ka mga pangutana sa mosunod nga pamahayag.
Imahe
Presidente Russell M. Nelson
Una, unsa kaha ang inyong kinabuhi kon wala ang Basahon ni Mormon? Ikaduha, unsa kaha unta ang wala ninyo mahibaloi? Ug ikatulo, unsa kaha unta ang wala ninyo maangkon? (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 61-62)
Dapita ang mga estudyante sa paghisgot sa tulo ka mga pangutana sa pamahayag ni Presidente Nelson. Depende sa imong mga estudyante, mahimo nimong hatagan sila og panahon sa paghisgot niini diha sa gagmay nga mga grupo sa dili pa kini buhaton isip usa ka klase. Samtang motubag ang mga estudyante, paminaw og maayo, ug pangutana og follow-up nga mga pangutana aron matabangan sila nga mapahayag ang ilang mga hunahuna nga mas klaro ug lawom.
Unsa ang imong nasabtan mahitungod sa Langitnong Amahan ug ni Jesukristo?
Ang mosunod nga seksiyon makatabang sa mga estudyante sa pagpasabot sa nagkalainlaing mga pagtulun-an mahitungod sa Langitnong Amahan ug ni Jesukristo.
Si Presidente Russell M. Nelson mihulagway sa usa sa mahinungdanon nga tahas sa Basahon ni Mormon:
Imahe
Presidente Russell M. Nelson
Adunay impluwensyal kaayong panghitabo kon ang usa ka anak sa Dios magtinguha og dugang nga kahibalo bahin Kaniya ug sa Iyang Pinalangga nga Anak. Walay laing dapit diin kana nga mga kamatuoran mas tin-aw nga gitudlo ug sa impluwensyal nga paagi kay diha sa Basahon ni Mormon. (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 61)
Paggahin og panahon sa pagpamalandong sa unsay imong nakat-onan mahitungod sa Langitnong Amahan ug ni Jesukristo samtang imong gitun-an ang Basahon ni Mormon karong tuiga. Mahimo nimong irebyo ang imong mga kasulatan ug journal sa pagtuon alang sa mga kamatuoran mahitungod sa Langitnong Amahan ug ni Jesukristo nga tingali imong gimarkahan o gihimoan og mubo nga mga sulat sa tibuok tuig. Paglista og tulo o upat ka mga kamatuoran nga hilabihang kamakahuluganon kanimo diha sa imong journal sa pagtuon.
Human sa pagrebyo sa ilang mga journal sa pagtuon o mga kasulatan, mahimong ilista sa mga estudyante ang makahuluganon nga mga kamatuoran diha sa pisara. Mahimo usab nga maglakip ang mga estudyante og mga hunahuna gikan sa ilang pagpangandam sa klase.
Aron maaghat ang mga memorya sa mga estudyante o matabangan ang mga estudyante nga naglisod sa pagbasa, ikonsiderar ang pagpakita sa usa sa mga bidyo sa Basahon ni Mormon nga gilakip diha sa “Dugang nga mga Kalihokan sa Pagkat-on.”
Pangita og bisan usa ka tudling sa kasulatan nga nagsuporta sa matag kamatuoran nga imong gilista diha sa imong journal sa pagtuon. Isulat ang pakisayran sa kasulatan tapad sa matag kamatuoran, ug ipasabot kon unsaon nimo paggamit ang tudling sa kasulatan sa pagtudlo niana nga kamatuoran.
Kon nagkinahanglan ang mga estudyante og tabang sa pagpangita og mga tudling diha sa Basahon ni Mormon nga nagtudlo sa mga kamatuoran mahitungod sa Langitnong Amahan ug ni Jesukristo, mahimo nimong ipakigbahin kanila ang pipila sa mosunod. Pagmabinantayon ug mahimong andam sa pagtabang sa mga estudyante nga nagkinahanglan og dugang nga tabang.
Paggahin og panahon alang sa mga estudyante sa pagpakigbahin sa mga pagtulon-an sa Basahon ni Mormon nga ilang gipili diha sa klase. Mahimong mopakigbahin ang mga estudyante sa tibuok klase, o mahimo silang bahinon ngadto sa gagmay nga mga grupo.
Sa unsang paagi nga ang Basahon ni Mormon nakaimpluwensiya sa paagi sa imong pagpakabuhi?
Ang mosunod nga seksiyon makatabang sa mga estudyante sa pagpamalandong ug sa pagpahayag kon sa unsang paagi sila naningkamot sa pagsunod sa doktrina ug mga pagtulun-an sa Basahon ni Mormon.
Basaha ang mosunod nga pamahayag ni Propeta Joseph Smith (1805–44), mangita kon unsay iyang gitudlo mahitungod sa gahom sa Basahon ni Mormon:
Timan-i: Mahimong makit-an ug mabasa sa mga estudyante ang mosunod nga pamahayag diha sa ikaunom nga parapo sa pasiuna sa Basahon ni Mormon.
Gisultihan nako ang mga kaigsoonan nga ang Basahon ni Mormon mao ang labing tukma sa bisan unsang basahon dinhi sa kalibotan, ug ang sukaranang bato sa atong relihiyon, ug ang usa ka tawo mas maduol ngadto sa Dios pinaagi sa pagsunod sa mga lagda niini, kay sa bisan unsa nga basahon. (Pasiuna sa Basahon ni Mormon; tan-awa usab sa History of the Church, 4:461)
Ang “pagsunod sa mga lagda niini” nagpasabot sa pagsunod sa mga baroganan ug mga pagtulun-an nga anaa sa Basahon ni Mormon. Pamalandongi sa makadiyot kon sa unsang paagi ang imong mga hunahuna, mga kinaiya, o mga binuhatan naimpluwensiyahan tungod sa imong nakat-onan gikan sa Basahon ni Mormon.
Hatagi og panahon ang mga estudyante sa pagtubag sa usa sa mosunod nga mga pangutana diha sa ilang mga journal sa pagtuon. Dasiga sila nga magmahunahunaon ug sa pagdapit sa Espiritu Santo aron sa pagtabang kanila nga makakita kon sa unsang paagi ang ilang mga kinabuhi naapektohan pinaagi sa mga pagtulun-an sa Basahon ni Mormon.
Sa unsang paagi ang imong pagtuon sa Basahon ni Mormon nakatabang kanimo nga mobati nga mas duol sa Langitnong Amahan ug ni Jesukristo?
Unsa ang pipila ka piho nga mga pagtulun-an nga imong nagamit gikan sa imong pagtuon sa Basahon ni Mormon?
Unsa nga mga panalangin ang imong nasinati samtang ikaw kanunay nga nagtuon sa Basahon ni Mormon?
Dapita ang mga estudyante sa pagpakigbahin sa ilang mga tubag. Kon itugot sa panahon, ipakigbahin ang imong pagpamatuod mahitungod sa Basahon ni Mormon ug sa makahuloganong mga pagtulun-an nga nakaimpluwensiya diha sa imong kinabuhi.