“Doktrinal nga Kahanas: Moroni 10:4–5—‘Pinaagi sa Gahom sa Espiritu Santo Kamo Mahimo nga Masayod sa Kamatuoran sa Tanan nga mga Butang,’” Manwal sa Magtutudlo sa Basahon ni Mormon (2024)
“Doktrinal nga Kahanas: Moroni 10:4–5,” Manwal sa Magtutudlo sa Basahon ni Mormon
Doktrinal nga Kahanas: Moroni 10:4–5
“Pinaagi sa Gahom sa Espiritu Santo Kamo Mahimo nga Masayod sa Kamatuoran sa Tanan nga mga Butang”
Sa imong pagtuon sa Moroni 10:1–7, imong nakat-onan nga kon kita mangutana sa Dios sa kinasingkasing, tinuod nga katuyoan, ug hugot nga pagtuo kang Kristo, kita makahibalo nga ang Basahon ni Mormon tinuod pinaagi sa gahom sa Espiritu Santo. Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa Moroni 10:4–5, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.
Tabangi ang mga estudyante nga makasabot nga ang pag-angkon og espirituhanong kahibalo usa ka balaan nga sumbanan. Diha sa mga kasulatan, ang Ginoo makanunayong nagdapit sa Iyang mga anak sa pagpangutana, pagpangita, ug sa pagtuktok (alang sa mga ehemplo, tan-awa sa Mateo 7:7–8; 1 Nephi 15:11; Doktrina ug mga Pakigsaad 18:18, 42:61). Samtang gipraktis sa mga estudyante ang mga baroganan sa pag-angkon og espirituhanong kahibalo, pahinumdomi sila nga magmatinud-anon ug mapailobon sa pagpangita og mga tubag. Ipamatuod nga kita makasalig sa Langitnong Amahan sa pagpadayag sa kamatuoran sa atong mga hunahuna ug mga kasingkasing pinaagi sa gahom sa Espiritu Santo.
Pagpangandam sa estudyante: Dapita ang mga estudyante sa pagsag-ulo sa pakisayran sa kasulatan ug sa mahinungdanon nga tudling sa kasulatan sa Moroni 10:4–5: “Mangutana sa kinasingkasing, uban sa tinuod nga katuyoan, nga may hugot nga pagtuo kang Kristo. … Ug pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”
Mga Posibleng Kalihokan sa Pagkat-on
Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Moroni 10:1–7,” nga mao ang pangkonteksto nga leksiyon alang sa tudling sa doktrinal nga kahanas sa Moroni 10:4–5. Kon kini nga leksiyon sa tudling sa doktrinal nga kahanas kinahanglang ibalhin ngadto sa laing semana, seguroha usab nga itudlo ang katugbang nga pangkonteksto nga leksiyon nianang semanaha.
Isag-ulo ug ipasabot
Mahimo nimong sugdan pinaagi sa pagdapit niadtong nakakompleto sa kalihokan sa pagpangandam sa estudyante sa pagsaysay gikan sa memorya sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa Moroni 10:4–5.
Ang mosunod nga kalihokan mahimong magamit sa pagtabang sa mga estudyante kon wala pa nila kini mahimo sa wala pa ang klase. Mahimong magpuli-puli ang mga estudyante sa pagsulti sa matag usa sa mosunod nga mga bahin uban sa usa ka kapares hangtod nga sila makahimo sa pagsaysay sa pakisayran ug sa tibuok mahinungdanon nga hugpong sa mga pulong sa kasulatan nga sila ra.
-
“Mangutana sa kinasingkasing,
-
Uban sa tinuod nga katuyoan, nga may hugot nga pagtuo kang Kristo. …
-
Ug pinaagi sa gahom sa Espiritu Santo
-
Kamo mahimo nga masayod sa kamatuoran sa tanan nga mga butang.”
Paminaw og maayo sa mga tubag sa mga estudyante sa mosunod nga pangutana aron matabangan ka nga mahibalo kon unsa ka maayo ang ilang pagsabot sa gitudlo ni Moroni niini nga tudling.
-
Unsa ang mahimo sa usa ka tawo aron makabaton og pagpamatuod nga ang Basahon ni Mormon tinuod?
Pagbansay sa paggamit
Hatagi ang mga estudyante og kahigayonan sa pagrebyo sa mga baroganan sa pag-angkon og espirituhanong kahibalo. Usa ka paagi sa pagbuhat niini mao ang paghangyo sa mga estudyante sa pagpili og usa sa mga baroganan sa pag-angkon og espirituhanong kahibalo ug sa pagpasabot kon sa unsang paagi kini makahuloganon ngadto kanila.
Ikonsiderar ang paggamit sa mosunod nga senaryo o usa nga mas may kalabotan sa imong mga estudyante aron matabangan sila nga makapraktis sa paggamit sa mga baroganan sa pag-angkon og espirituhanong kahibalo.
Ang ubang mga sugyot makita diha sa seksiyon sa “Dugang nga Kalihokan sa Pagkat-on” sa kataposan niini nga leksiyon.
Handurawa ang mosunod nga sitwasyon nga gi-post diha sa “Mga Pangutana ug mga Tubag” nga seksiyon sa Alang sa Kalig-on sa Kabatan-onan nga magasin. Aron makakita og usa ka ehemplo, tan-awa ang usa ka bag-o nga isyu nga anaa sa ChurchofJesusChrist.org.
-
“Ako usa ka miyembro sa Simbahan halos tibuok nakong kinabuhi. Naningkamot ko sa pagsunod sa mga sugo, pagbasa sa akong mga kasulatan, pag-ampo, ug pagsimba. Nakadungog ko sa ubang mga tawo nga mipakigbahin sa ilang mga kasinatian mahitungod sa pagkahibalo sa Basahon ni Mormon nga tinuod. Nganong wala man ako hatagi sa Dios sa samang matang sa kasinatian?”
Ikonsiderar ang pagbahin sa mga estudyante ngadto sa gagmay nga mga grupo. Mahimo nilang hisgotan kon sa unsang paagi ang paggamit sa mga baroganan sa pag-angkon og espirituhanong kahibalo makatabang sa usa ka tawo nga adunay kabalaka nga sama sa sitwasyon sa ibabaw.
-
Hain nga baroganan sa pag-angkon og espirituhanong kahibalo ang imong irekomendar nga hunahunaon og una niini nga tawo? Ngano man?
-
Sa unsang paagi ang doktrina nga gitudlo sa Moroni 10:4–5 makatabang kanimo sa paggamit sa mga baroganan sa pag-angkon og espirituhanong kahibalo niini nga sitwasyon?
Samtang mopakigbahin ang mga estudyante, seguroha nga nahibalo sila nga walay sakto o sayop nga mga tubag. Isip kabahin sa panaghisgotan, kon imong mamatikdan nga ang klase wala maghisgot sa tanang tulo ka mga baroganan sa pag-angkon og espirituhanong kahibalo, mahimo kang mangutana mahitungod sa mga baroganan nga wala nila hisgoti. Mahimo nimong gamiton ang pipila sa mosunod nga mga pangutana isip kabahin niini nga panaghisgotan.
Tinguhaa ang dugang nga panabot pinaagi sa balaanong gitudlo nga mga tinubdan
-
Unsa nga mga pulong o mga hugpong sa mga pulong sa Moroni 10:4–5 ang imong idasig niini nga tawo aron tun-an ug mas masabtan? Ngano man?
-
Unsa ang pipila sa balaanong gitudlo nga mga tinubdan ang makatabang niini nga tawo nga makabaton og personal nga pagsaksi sa katinuod sa Basahon ni Mormon?
Lihokon inubanan sa hugot nga pagtuo
-
Unsa kaha ang atong makita kon buhaton ang pipila sa mga pagdapit ni Moroni gikan sa Moroni 10:4–5 niini nga sitwasyon? Sa unsang paagi kini may pagkasusama sa paglihok inubanan sa hugot nga pagtuo?
Susihon ang mga konsepto ug mga pangutana inubanan sa mahangtorong panglantaw
-
Unsa nga mga kamatuoran mahitungod sa Dios, ang paagi sa Iyang pagpakigsulti sa Iyang mga anak, ug ang Iyang panglantaw nga makatabang sa usa ka tawo niini nga sitwasyon?
-
Unsaon nimo paggamit ang doktrina nga gitudlo sa Moroni 10:4–5 aron sa pagtabang sa ubang mga pangutana nga walay kalabotan sa Basahon ni Mormon?
Rebyo sa doktrinal nga kahanas
Usa ka kalihokan sa pagrebyo nga sama sa mosunod ang kinahanglan nga gamiton sa usa ka leksiyon nga itudlo dayon human niini.
Pahinumdomi ang mga estudyante sa kalihokan nga ilang gihimo sa pagsag-ulo sa tudling sa kasulatan ug sa mahinungdanon nga hugpong sa mga pulong sa kasulatan “Moroni 10:4–5: Mangutana sa kinasingkasing, uban sa tinuod nga katuyoan, nga may hugot nga pagtuo kang Kristo. … Ug pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.” Dapita ang bisan kinsa sa mga estudyante nga nakasag-ulo pa niini sa pagsaysay niini alang sa tibuok klase. Kon ang uban nagkinahanglan og tabang, ikonsiderar ang pagpakita sa pakisayran ug sa mahinungdanon nga hugpong sa mga pulong sa kasulatan diha sa pisara. Papasa ang pipila ka mga pulong matag higayon ug ipasaysay sa mga estudyante ang hugpong sa mga pulong hangtod nga ila kining masaligon nga mamemorya.