« អេធើរ ៨ ៖ ‹ ដ្បិតព្រះអម្ចាស់ ទ្រង់ពុំធ្វើការដោយបក្សព័ន្ធសម្ងាត់ទាំងឡាយទេ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អេធើរ ៨ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អេធើរ ៨
« ដ្បិតព្រះអម្ចាស់ ទ្រង់ពុំធ្វើការដោយបក្សព័ន្ធសម្ងាត់ទាំងឡាយទេ »
បក្សព័ន្ធសម្ងាត់បានបង្កជាគ្រោះកាចដល់ក្រុមមនុស្សជាច្រើននៅពេញមួយព្រះគម្ពីរមរមន ។ លំនាំនេះបានកើតឡើងក្នុងចំណោមពួកសាសន៍យ៉ារេឌ ហើយនៅទីបំផុតបាននាំឲ្យពួកគេធ្លាក់ចូលទៅក្នុងការបំផ្លិចបំផ្លាញ ។ កាលព្យាការីមរ៉ូណៃបានសរសេរអំពីពួកសាសន៍យ៉ារេឌ លោកបានបន្ថែមសេចក្ដីពិតសំខាន់ៗ ដែលយើងអាចរៀនសូត្របានពីហេតុការណ៍បំផ្លិចបំផ្លាញដែលបានកើតឡើងទាំងនេះ ។ មេរៀននេះអាចជួយអ្នកឲ្យយល់ពីតម្រូវការក្នុងការបដិសេធបក្សព័ន្ធសម្ងាត់ដោយការធ្វើតាមព្រះយេស៊ូវគ្រីស្ទ ។
សូមជួយសិស្សឲ្យស្វែងរកភាពទាក់ទងគ្នា ។ នៅពេលសិស្សអាចភ្ជាប់អ្វីដែលពួកគេកំពុងសិក្សានៅក្នុងបទគម្ពីរទៅនឹងស្ថានភាព និងកាលៈទេសៈរបស់ពួកគេផ្ទាល់ នោះជាទូទៅ ពួកគេកាន់តែមានទឹកចិត្តរៀន និងអនុវត្តតាមការបង្រៀននៃដំណឹងល្អថែមទៀត ។ សូមអញ្ជើញសិស្សឲ្យរកមើលភាពទាក់ទងគ្នា តាមរយៈការសួរពួកគេនូវសំណួរដូចជា « តើព្រឹត្តិការណ៍ ឬការបង្រៀននេះអាចស្រដៀងនឹងបទពិសោធន៍របស់អ្នកយ៉ាងដូចម្តេច ? » ឬ « តើសេចក្តីពិតនេះអនុវត្តចំពោះជីវិតរបស់អ្នកយ៉ាងដូចម្តេច ? »
ការរៀបចំសិស្ស ៖ សូមអញ្ជើញសិស្សឲ្យអាន « បក្សព័ន្ធសម្ងាត់ » នៅក្នុងសេចក្ដីណែនាំដល់បទគម្ពីរទាំងឡាយ នៅលើគេហទំព័រ scriptures.ChurchofJesusChrist.org ។
សកម្មភាពរៀនសូត្រដែលអាចមាន
ធ្វើសកម្មភាពដោយសម្ងាត់
សូមសរសេរពាក្យ សម្ងាត់ នៅលើក្ដារខៀន បន្ទាប់មក សូមសួរសំណួរខាងក្រោម ៖
-
តើមានវិធីណាខ្លះដែលសាតាំងប្រើប្រាស់ការសម្ងាត់ដើម្បីសម្រេចគោលបំណងអាក្រក់របស់វា ?
-
តើការសម្ងាត់បែបនេះមានឥទ្ធិពលយ៉ាងណា ទៅលើទំនាក់ទំនងរបស់មនុស្សជាមួយនឹងព្រះយេស៊ូវគ្រីស្ទ ? ហេតុអ្វី ?
-
តើអ្នកចង់ឲ្យនរណាម្នាក់ដែលគិតថា ពួកគេអាចរួចផុតពីការប្រព្រឹត្តអាក្រក់បាន ដោយសារពួកគេរក្សាវាជាការសម្ងាត់ ដឹងពីអ្វីខ្លះ ?
នៅថ្ងៃនេះ អ្នកនឹងរៀនអំពីមនុស្សមួយក្រុមដែលបានចូលរួមក្នុងអំពើទុច្ចរិតដោយសម្ងាត់ដែលគេស្គាល់ថាជា បក្សព័ន្ធសម្ងាត់ ។ នៅពេលអ្នកសិក្សា សូមរកមើលការបង្រៀនទាំងឡាយណាដែលជួយអ្នកឲ្យយល់អំពីគ្រោះថ្នាក់នៃបក្សព័ន្ធសម្ងាត់ ។
សេចក្តីទុច្ចរិតនៅក្នុងចំណោមពួកសាសន៍យ៉ារេឌ
អ្នកប្រហែលជានៅចាំថា បន្ទាប់ពីពួកសាសន៍យ៉ារេឌបានទៅដល់ដែនដីសន្យា ពួកគេបានតែងតាំងស្ដេចមួយអង្គឲ្យគ្រប់គ្រងលើពួកគេ ទោះបីជាបងប្រុសរបស់យ៉ារេឌបានព្រមានថា ការធ្វើដូច្នេះនឹងនាំទៅរកការជាប់ឃុំឃាំងក៏ដោយ ( សូមមើល អេធើរ ៦:២២–២៣ ) ។ ជាច្រើនជំនាន់ក្រោយមក ស្ដេចអាក្រក់បានធ្វើឲ្យមានការបែកបាក់ និងការរងទុក្ខវេទនានៅក្នុងចំណោមប្រជាជននេះ ។
អ្នកអាចអញ្ជើញសិស្សពីរបីនាក់ដែលស្ម័គ្រចិត្តឲ្យប្តូរវេនគ្នាអានខគម្ពីរខាងក្រោមនេះឲ្យឮៗទៅកាន់សិស្សនៅក្នុងថ្នាក់រៀន ខណៈដែលសិស្សផ្សេងទៀតផ្ទៀងតាមក្នុងព្រះគម្ពីររបស់ពួកគេ ។
សូមអាន អេធើរ ៨:១–១០ ដោយរកមើលអ្វីដែលបានកើតឡើងនៅពេលដែលបុរសម្នាក់ឈ្មោះ អូមើរ បានឡើងសោយរាជ្យ ។
យ៉ារេឌ បានយល់ព្រមតាមផែនការអាក្រក់របស់កូនស្រីគាត់ ។ នៅពេលដែល អ័គីស បានសុំកូនស្រីរបស់យ៉ារេឌរៀបការ អ័គីស យ៉ារេឌ កូនស្រីរបស់គាត់ និងសមាជិកគ្រួសារផ្សេងទៀតបានចូលរួមគ្នានៅក្នុងបក្សព័ន្ធសម្ងាត់ដើម្បីសម្លាប់ អូមើរ ( សូមមើល អេធើរ ៨:១១–១៥ ) ។
គ្រោះថ្នាក់នៃបក្សព័ន្ធសម្ងាត់
បក្សព័ន្ធសម្ងាត់គឺជា « ជាអង្គការមួយដែលមនុស្សរួមគំនិតគ្នាដោយសម្បថ ដើម្បីធ្វើអំពើអាក្រក់ទាំងឡាយរបស់គេ » ( « បក្សព័ន្ធសម្ងាត់ » សេចក្ដីណែនាំដល់បទគម្ពីរទាំងឡាយ ដែលមាននៅលើគេហទំព័រ scriptures.ChurchofJesusChrist.org ) ។ អារក្សសាតាំងគឺជាប្រភពដើមនៃបក្សព័ន្ធសម្ងាត់ ( សូមមើល ហេលេមិន ៦:២៥–៣០ ) ។
ក្នុងនាមជាអ្នកនិទានពីដំណើររឿងនេះ ព្យាការីមរ៉ូណៃបានចែកចាយការបង្រៀន និងការព្រមានសំខាន់ៗជាច្រើនអំពីបក្សព័ន្ធសម្ងាត់ ។ សូមអាន អេធើរ ៨:១៨–២៥ ដោយរកមើលពីព្រះហឫទ័យរបស់ព្រះអម្ចាស់អំពីបក្សព័ន្ធសម្ងាត់ ។
សូមអញ្ជើញសិស្សឲ្យពិភាក្សាអំពីអ្វីដែលពួកគេបានរៀនមកពីខគម្ពីរទាំងនេះ ។ បន្ថែមពីលើសំណួរខាងក្រោមនេះ អ្នកក៏អាចពិចារណាសួរសំណួរថា « តើមរ៉ូណៃបានផ្ដល់ការព្រមានអ្វីខ្លះដល់អ្នកដែលចូលរួមក្នុងបក្សព័ន្ធសម្ងាត់ ? »
-
តើអ្នកបានរៀនអ្វីខ្លះអំពីបក្សព័ន្ធសម្ងាត់មកពីខគម្ពីរទាំងនេះ ?
សេចក្តីពិតមួយដែលយើងអាចរៀនសូត្របានពីខគម្ពីរទាំងនេះ គឺថា បក្សព័ន្ធសម្ងាត់គឺជាអំពើមួយដ៏គួរខ្ពើមឆ្អើមនៅចំពោះព្រះនេត្រព្រះ ( អេធើរ ៨:១៨ ) ។
ដើម្បីជួយឲ្យអ្នកយល់បន្ថែមទៀតអំពីមូលហេតុដែលបក្សព័ន្ធសម្ងាត់ គឺជាអំពើមួយដ៏គួរខ្ពើមឆ្អើមចំពោះព្រះអម្ចាស់ សូមអានបទគម្ពីរខាងក្រោម ដោយរកមើលពីអ្វីដែលអ្នកបានរៀនសូត្រអំពីព្រះយេស៊ូវគ្រីស្ទ ៖
សូមអញ្ជើញសិស្សឲ្យពិភាក្សាអំពីអ្វីដែលពួកគេបានរៀនមកពីខគម្ពីរទាំងនេះ ។ សំណួរខាងក្រោមនេះអាចយកមកប្រើប្រាស់បាន ។
-
តើអ្នកបានរៀនសូត្រអ្វីខ្លះមកពីខគម្ពីរទាំងនេះ ដែលអាចជួយដល់មនុស្ស ដែលអ្នកបានសិក្សានៅក្នុង អេធើរ ៨ ?
-
តើខគម្ពីរទាំងនេះបានបង្រៀនអ្នកអ្វីខ្លះអំពីព្រះអម្ចាស់ ?
-
តើការបង្រៀនទាំងនេះអាចជួយដល់យុវវ័យនាពេលសព្វថ្ងៃនេះដោយរបៀបណា ?
មរ៉ូណៃបានបញ្ចប់ការបង្រៀនរបស់លោកអំពីបក្សព័ន្ធសម្ងាត់ដោយការពន្យល់ពីមូលហេតុ ដែលលោកបានបញ្ចូលការព្រមានទាំងនេះ ។ សូមអាន អេធើរ ៨:២៦ ដោយរកមើលអ្វីដែលមរ៉ូណៃចង់ឲ្យយើងដឹង ។
-
តើអ្នកបានរៀនសូត្រអ្វីខ្លះ អំពីមូលហេតុដែលមរ៉ូណៃបានបញ្ចូលការបង្រៀនទាំងនេះនៅក្នុងព្រះគម្ពីរមរមន ?
-
តើអ្នកបានរៀនអ្វីខ្លះនៅថ្ងៃនេះ ដែលអាចបញ្ចុះបញ្ចូលអ្នកឲ្យដើរតាមព្រះយេស៊ូវគ្រីស្ទកាន់តែពេញលេញទាំងស្រុងនោះ ?
សូមពិចារណាចែកចាយទីបន្ទាល់របស់អ្នកអំពីរបៀបដែលសេចក្ដីពិតដែលបានបង្រៀននៅក្នុងមេរៀននេះ ជំរុញអ្នកឲ្យទុកចិត្តលើព្រះយេស៊ូវគ្រីស្ទ និងធ្វើតាមទ្រង់ ។