Eteru 3

“O Se Faatuatua Tele Faapea”

ua vaai le uso o Iareto i le tamatamai aao o le Alii

Pe na e mafaufau moni ea i le eseesega e mafai ona faia e le faatuatua ia Iesu Keriso i o tatou olaga? O se faataitaiga sili o le uso o Iareto, o le sa alu atu i le Alii ma se fuafuaga e foia ai ona faafitauli ma tatalo ma le lotomaualalo ma le “faatuatua tele faapea” (Eteru 3:9) e faapea “sa aveesea le veli mai [ona] mata” (Eteru 3:6) ma sa ia vaai ma talanoa ma le Alii. O lenei lesona ua faamoemoe e fesoasoani ia te oe e faatino ai ma le lotomaualalo le faatuatua ia Iesu Keriso.

Taulai atu ia Iesu Keriso a o e aoao atu tusitusiga paia. Faaalu se taimi e fesoasoani ai i tagata aoga ia iloa upumoni e uiga i le Faaola ma Lona mana togiola. Faasino atu i ai fuaitau o mau e ono faateleina ai lo latou faatuatua ia te Ia. Mafaufau e fai atu fesili o le a valaaulia ai tagata aoga e mafaufau loloto pe mafai faapefea e Iesu Keriso ona faamanuia, faamalolosia, ma taialaina i latou.

Sauniuniga a le tagata aoga: Valaaulia tagata aoga e mafaufau i ni tagata se toatolu latou te fiafia i ai mai le talafaasolopito o le Ekalesia po o tusitusiga paia ma pe na faapefea ona faaalia e nei tagata le faatuatua ia Iesu Keriso.

Gaoioiga e Ono Mafai Ona Aoao Ai

E faapefea ona e faaalia le faatuatua?

O le a fesoasoani mea nei e saunia ai tagata aoga e aoao atili e uiga i le faatuatua ia Iesu Keriso. Nai lo le tuu atu i tagata aoga e lisi ni faataitaiga, e mafai ona e sue i le faaiuga o le lesona e faaali atu ai se tasi o vitio pe faamatala le tala ia Jan Roothoff.

Fai se lisi o ni tagata se toatolu e te faamemelo i ai mai le talafaasolopito o le Ekalesia po o tusitusiga paia.

• O a nisi o auala na faaalia ai e nei tagata le faatuatua ia Iesu Keriso?

• E mafai faapefea ona e iloa pe o e faatinoina le faatuatua ia Iesu Keriso i lou olaga?

• Aisea o le a e manao ai e faatinoina le faatuatua?

Mafaufau e tusi tali a tagata aoga i le fesili lona lua i luga o le laupapa. Valaaulia tagata aoga e mafaufau loloto i nei tali ma iloilo lo latou lava faatuatua. Afai e aoga, faaopoopo nisi po o faamatalaga uma nei o le iloiloga faaletagata lava ia ma valaaulia tagata aoga e faamae’a i latou.

Ina ia fesoasoani ia te oe e mafaufau loloto i lou lava faatuatua ia Iesu Keriso, tusi pe o le a le moni o faamatalaga nei i se fuafaatatau o le 1–5 (1 = e lei aii lava; 2 = o nisi taimi; 3 = tele; 4 = toetoe lava o taimi uma; 5 = taimi uma):

• Ou te talitonu ia Keriso ma talia o Ia o lo’u Faaola.

• E ala i le tatalo faamaoni i le Tama Faalelagi, ou te saili atu ai mo se fesoasoani mai le Atua ma Iesu Keriso i o’u faafitauli ma talitonu i la La’ua taitaiga ma le fesoasoani.

• Ou te faia le faatinoga ma talitonu i le Alii e fesoasoani mai ia te a’u.

A o e suesueina lenei lesona, saili e aoao atili e uiga i le ala e mafai ai ona e faatino ma le lotomaualalo le faatuatua ia Iesu Keriso ma pe aisea atonu e te manao ai ia faia.

Faatinoina o le Faatuatua

I le lesona talu ai, sa e aoaoina ai na poloaiina e le Alii le uso o Iareto e fausia vaa ma sopoia le vasa i le laueleele folafolaina; peitai, sa leai se malamalama i totonu o vaa. Na poloaiina e le Alii le uso o Iareto e tuuina atu se fofo (tagai Eteru 2:23). A o faatino e le uso o Iareto le faatuatua ia Iesu Keriso, sa fesoasoani le Alii e foia lona faafitauli ma faamanuiaina o ia i auala e sili atu nai lo mea sa ia talosagaina.

Tuu atu le pepa e tufa atu lenei, ma valaaulia tagata aoga e faatumu taitoatasi pe i ni vaega toalaiti.

O le Faatuatua o le Uso o Iareto

Tusi Lesona a le Faiaoga o le Tusi a Mamona (2024)—“Eteru 3: ‘O Se Faatuatua Tele Faapea’”

Faitau fuaiupu i lalo ifo o ata taitasi nei ma tusi mea na faia e le uso o Iareto pe na fai atu ai e faaalia ai le faatuatua. (Ina ia malamalama i le Eteru 3:2–3, e taua le malamalama e faapea ona o le Pau o Atamu ma Eva, ua tatou ola ai i se lalolagi ua vavaeeseina ai i tatou faaletino mai le Atua ma tatou agasala uma ma vavaeese i tatou lava faaleagaga mai le Atua.)

Eteru 3:1

o le uso o Iareto o loo a’e i se mauga

Eteru 3:2–5

o le uso o Iareto o loo tatalo i luga o se mauga

Eteru 3:6–10

ua vaai le uso o Iareto i le tamatamai aao o le Alii

Eteru 3:11–16, 19–20

o le uso o Iareto o loo talanoa ma le Alii

• O le a se mea na e aoaoina mai le aafiaga o le uso o Iareto?

Valaaulia ni nai tagata aoga e faasoa mai a latou tali. Tusi mataupu faavae moni ua latou faamauina i luga o le laupapa.

O se tasi o mataupu faavae e mafai ona tatou aoaoina e faapea a o tatou faatinoina ma le lotomaualalo le faatuatua i le Alii, o le a tatou latalata atili atu ia te Ia.

Ina ia fesoasoani i tagata aoga ia malamalama atili i le faatuatua o le uso o Iareto, mafaufau e vaevae le vasega i ni vaega toalaiti e fai gaoioiga nei e fa. I se isi itu, valaaulia tagata aoga e galulue i ni vaega taitoafa, e fai ai e tagata aoga taitasi se tasi o nei gaoioiga. Ona mafai lea e tagata aoga ona faasoa mai mea na latou aoaoina ia latou vaega ma, afai e aoga, faasoa mai ni mea na faamamafa o se vasega.

1. O le uso o Iareto na ia “gaosi mai se papa ni maa laiti e sefulu ma le ono,” sa aveina atu i latou i “le tumutumu o le mauga, ma toe tagi atu i le Alii” (Eteru 3:1). Tusi pe aisea e te lagona ai le naunau e faatino ma fai mea tatou te mafaia e foia ai le faafitauli o se vaega taua o lo tatou faatuatua i le Alii.

2. A o tatalo le uso o Iareto, sa ia tautala e uiga i “ona vaivaiga i luma [o le Atua]” (Eteru 3:2) ma ole atu ma le lotomaualalo mo se fesoasoani. Tusi pe mafai faapefea e le malamalama ai i o tatou lava vaivaiga ma lo tatou faalagolago atoa atu i le Alii ona aafia ai a tatou tatalo ma lo tatou faatuatua ia te Ia.

3. A o ole atu le uso o Iareto i le Alii e pa’i atu i maa ina ia faasusulu atu, sa ia molimau atu, “Ua ou iloa, le Alii e, ua ia te oe le mana uma, ma e mafai ona e faia o soo se mea e te finagalo i ai mo le manuia o le tagata” (Eteru 3:4). Tusi pe na faapefea ona e iloa pe mafai foi ona iloa o loo i ai i le Alii le mana e fesoasoani ai ia i tatou i o tatou faafitauli. E mafai ona e faaaofia ai le auala e mafai ai e lena malamalama ona aafia ai lo tatou faatuatua ia te Ia.

4. Sa folafola atu e le uso o Iareto o le a ia talitonu i upu o le a fetalai mai ai le Alii i le lumanai (tagai Eteru 3:11–12). Tusi pe aisea e te manatu ai na faalagolago tele le uso o Iareto i le Alii lea na ia ioe ai i lenei mea.

Faalatalata Atu ai i le Alii

• O a auala eseese na faamanuiaina ai e le Alii le uso o Iareto ona o lona faatuatua?

• O a ni auala na latalata atili atu ai le uso o Iareto i le Alii e ala i lenei aafiaga?

Atonu e fesoasoani le faailoga o afioga a le Alii i le uso o Iareto: “Ua togiolaina oe mai le pau; o lea ua toe aumai ai oe i o’u luma” (Eteru 3:13). A o tatou faatinoina le faatuatua i le Alii i o tatou faafitauli taitoatasi, e mafai foi ona tatou maua Lana fesoasoani i la tatou sini e faavavau e faatoilalo lo tatou vavaeese mai ia te Ia ma toe foi atu e mau faatasi ma Ia.

Matamata pe faitau se tasi o faataitaiga nei o le faatinoina e le autalavou o lo latou faatuatua.

• Matamata i le “Faatuatua ma le Sini” (4:40). Ua faamatala mai e se tamaitai talavou taalo soka faapolofesa le auala na ia faatinoina ai le faatuatua i le Alii.

• Matamata i le “Toe Fausiaina o Lo’u Faatuatua Ina ua Ou Lagonaina le Leiloa” (6:25). Ina ua toe faafoi vave mai i se misiona, sa toe fausia e se alii talavou lona faatuatua ia Iesu Keriso.

• Faitau le tala ia Jan Roothoff, o se taulealea i Netherlands o le sa sailia le perofeta o Iosefa F. Samita e faamalolo ona mata mama’i (Saints: The Story of the Church of Jesus Christ in the Latter Days, vol. 3, Boldly, Nobly, and Independent, 1893–1955 [2022], 123–25).

Valaaulia tagata aoga e faasoa mai mea sa latou aoaoina mai le vitio poo le tala.

• O a ni aafiaga na e oo i ai poo ia i latou e te iloa ua faamalosia ai lou faatuatua ia Keriso?

Faaiu i le tusia o se auala se tasi e te manao e faatino atili ai le faatuatua ia Iesu Keriso ma pe aisea. O nisi nei o manatu lautele e fesoasoani ia te oe e faamaea ai lenei gaoioiga. O le a manaomia ona e faaopoopo i ai faamatalaga auiliili e faatatau ia te oe.

• Fai se faatinoga patino e foia ai se faafitauli ma saili atu i le fesoasoani a le Alii.

• Fai se sini e tatalo atili ma le lotomaualalo ma talitonu i le Alii.

• Ia faia ma le mataalia se mea se tasi e faalatalata atili atu ai oe lava i le Alii.

Vaavaai mo ni auala e te lagona ai le latalata atili i le Alii a o e galue ma le faatuatua.

O le a maua e tagata aoga se avanoa e faasoa mai ai pe na faapefea ona latou faatinoina le faatuatua ma po o a taunuuga na oo mai ai i se lesona iloilo o loo loma (“Iloilo Lou Aoaoina 9”).

Faaiu i le tuuina atu o le molimau e uiga i le Faaola ma faamanuiaga e oo mai i le faatinoina o le faatuatua ia te Ia.

Manatu ma Talaaga o Faamatalaga

Eteru 3:7, 9. Aisea e fesili mai ai le Alii ia i tatou i fesili e tusa lava pe Na te silafia ia tali?

Na aoao mai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

E “silafia e Ia mea uma, ma ua leai se mea ua le silafia e Ia” [2 Nifae 9:20]. … Ae ui i lea, e masani ona fesiligia soo e le Atua ia fesili o tagata soifua, e masani lava o se auala e tofotofoina ai lo latou faatuatua, fuaina ai lo latou faamaoni, pe atiae ai lo latou malamalama. (Jeffrey R. Holland, Christ and the New Covenant: The Messianic Message of the Book of Mormon [1997], 19–20)

Eteru 3:15. Pe lei faaalia ea e le Alii o Ia lava i se tasi a o lei faaali atu i le uso o Iareto?

O le fuaiupu 15 o se fuaitau faigata, ua tuuina mai ua tatou iloa ai sa faaali atu le Atua ia Atamu (tagai Mataupu Faavae ma Feagaiga 107:53–55), Enoka (tagai Mose 7:4), ma Noa (tagai Kenese 6:8–9), o i latou uma sa ola i luma atu o le uso o Iareto. Na ofoina mai e Elder Jeffrey R. Holland o le Korama a Aposetolo e Toasefululua ni nai faauigaga: (1) ua ta’u mai e le Alii e lei faaali muamua atu lava o ia i se sa Iareto; (2) o le faaaogaina o le upu “tagata” e ono tau mai ai e lei faaalia mai lava e le Alii o ia lava i tagata e lei togiolaina pe lei faapaiaina; (3) e lei faaalia mai lava e le Alii o ia lava i se ala atoa ma atoatoa e pei ona sa ia faia i le uso o Iareto; (4) atonu o le taimi muamua lea na faaali mai ai le Alii ma faailoa mai o Ia lava o Iesu Keriso, le Alo o le Atua; ma (5) sa le gata ina vaai le uso o Iareto i le tamatamaiaao o le Alii, ae “o ni isi foi o vaega e sili ona manino le faaalia o le tino o aano, toto, ma ivi o Keriso” (Tagai i le Christ and the New Covenant: The Messianic Message of the Book of Mormon [1997], 21–22).

Gaoioiga Faaopoopo e Aoao Ai

Eteru 3:11. Talitonu i mea “o le a fetalai mai ai” le Alii

Afai e aoga le talanoaina auiliili o le Eteru 3:11–12 mafaufau e faasoa atu le mea lenei: “…O le faatuatua togiola e ao ona masani ona faaaoga agai i aafiaga i le lumanai[.] … O le faatuatua o le malie lea i ai e aunoa ma ni tuutuuga—i luma mai poo a tuutuuga uma e ono manaomia e le Atua i le lumanai lata mai ma mamao” (Jeffery R. Holland, Christ and the New Covenant: The Messianic Message of the Book of Mormon [1997], 18–19).

Valaaulia tagata aoga e talanoaina tulaga faataitai e taua ai le vave filifili e talitonu i upu o le a fetalai mai ai le Alii ia i tatou, e pei o le saunia e maua se faamanuiaga faapeteriaka po o le faatalitali i se valaauga faamisiona.

O upumoni e uiga i le Alii o Iesu Keriso

Afai e aoga mo tagata aoga le malamalama atili i upumoni e uiga ia Iesu Keriso, valaaulia i latou e faitau le Eteru 3:14–20, ma vaavaai mo upumoni na aoaoina patino e le uso o Iareto e uiga i le Alii ona o lona faatuatua. O nisi o upumoni atonu latou te faailoa mai o Iesu Keriso na saunia mai le faavaega o le lalolagi e togiola i tatou (tagai i le Eteru 3:14); Na foafoaina i tatou e le Atua i Lona lava faatusa (tagai i le Eteru 3:15); Sa faaali atu e Iesu Keriso o Ia lava i le agaga a o lei soifua mai o Ia i la le tino (tagai i le Eteru 3:16); O le tino faaletino o Iesu Keriso ua o se faatusa o Lona tino agaga (tagai i le Eteru 3:16–17); ma ua auauna atu Iesu Keriso i tagata e fesoasoani ia latou iloa o Ia o le Atua (tagai i le Eteru 3:18).

Mafaufau e valaaulia tagata aoga e faasoa mai po o fea o nei upumoni e sili ona anoa ia i latou ma pe aisea. E mafai foi ona latou faasoa mai mea na latou aoaoina e uiga i le Alii a o latou faatinoina le faatuatua ia te Ia.

pepa e tufa atu o le faatuatua o le uso o Iareto