Eteru 1–5

Vaaiga Aoao

Ina ua taumafai tagata amioleaga e fausia se olo e oo atu ai i le lagi, sa faaeseeseina e le Alii la latou gagana (tagai Kenese 11:1–9). Sa tagi atu le uso o Iareto i le Alii, ma aioi atu e faapea o le a Ia faasaoina lona aiga ma uo i lenei fenumiai (tagai Eteru 1:34–37), ma sa tali mai le Alii ma le agaalofa. A o fausia e le uso o Iareto ma lona nuu vaa e sopoia ai le vasa, sa latou fetaiai ma ni faafitauli ogaoga. Sa alu atu le uso o Iareto i le Alii ma se fuafuaga e foia ai ona faafitauli ma tatalo ma le lotomaualalo atoa ma se “faatuatua tele faapea” (Eteru 3:9) sa ia vaaia ma talanoa ma le Alii. Na poloaiina e le Alii ia Moronae e faamaufaailogaina faamaumauga o faaaliga o le uso o Iareto, ma faamalamalama atu o nei tusitusiga o le a faaalia pe a maua e tagata le faatuatua e pei o le uso o Iareto.

Saunia e Aoao Atu

O le faamatalaga lenei ua tuuina atu ai i faiaoga ni manatu o mea atonu e manaomia ona muai saunia mo lesona taitasi.

Eteru 1

Faamoemoega o le lesona: O lenei lesona ua faamoemoe e musuia ai tagata aoga ia tatalo ma le faamaoni atili ma le faifai pea.

Sauniuniga a le tagata aoga: Valaaulia tagata aoga e faitau le Eteru 1:34–37 ma maka le fasifuaitau “tagi atu i le Alii.” Fai atu ia i latou e o mai saunia e faasoa mai po o le a le uiga o lenei fasifuaitau ia i latou ma pe faapefea ona ese mai auala tatou te tatalo ai i nisi taimi.
Vitio: “O Le Olo o Papelu” (0:58); “Tali i Tatalo” (12:39; matamata mai le faailo taimi 2:16 i le 4:31)
Fautuaga faafaiaoga faavitio: Pe a faafoliga tagata aoga ua talosagaina i latou e avea o se vaega o se aufautua i le faaleleia atili o a latou tatalo, mafaufau e valaaulia i latou e mafaufau loloto i fesili mo se minute pe lua a o lei faasoaina atu. Ina ia fesoasoani ia lagona atili le gaoioiga e faapei o se aufautua, mafaufau e valaaulia matua po o isi talavou e auai i le vaega mulimuli lenei o le vasega.

Eteru 2

Faamoemoega o le lesona: O lenei lesona e mafai ona fesoasoani i tagata aoga ia iloa le auala e saili ai le fesoasoani a le Alii i le foiaina o o latou faafitauli.

Sauniuniga a le tagata aoga: Valaaulia tagata aoga e o mai saunia e faasoa mai ni aafiaga na latou maua ai po o isi latou te iloa le fesoasoani a le Alii e foia ai faafitauli.
Fautuaga faafaiaoga faavitio: Mafaufau e imeli atu i tagata aoga le siata mo le suesueina o le Eteru 2. A o lei tuuina tagata aoga i ni potu vaevae, mafaufau e tofi se tagata aoga i vaega taitasi e avea ma tusiupu ma faasoa mai a latou lau ina ia mafai ona faatumu faatasi e a latou vaega le siata. A uma ona faia e vaega, valaaulia se vaega se tasi pe lua e faasoa mai a latou lau i le vasega ma faaali mai la latou siata ua maea.

Eteru 3

Faamoemoega o le lesona: O lenei lesona ua faamoemoe e fesoasoani ai i tagata aoga e faatino ma le lotomaualalo le faatuatua ia Iesu Keriso.

Sauniuniga a le tagata aoga: Valaaulia tagata aoga e mafaufau i ni tagata se toatolu latou te fiafia i ai mai le talafaasolopito o le Ekalesia po o tusitusiga paia ma pe na faapefea ona faaalia e nei tagata le faatuatua ia Iesu Keriso.
Pepa e tufa atu: “O le faatuatua o le uso o Iareto”
Vitio: “Faatuatua ma le Sini” (4:40); “Toe Fausiaina o Lo’u Faatuatua Ina ua Ou Lagona le Leiloa” (6:26)
Fautuaga faafaiaoga faavitio: Mafaufau e vaevae tagata aoga i ni potu vaevae i ni vaega taitoafa e fai ai gaoioiga A, E, I, ma le O. Fai atu i se tagata se toatasi o vaega taitasi e avea ma taitai ma filifili po o ai o le a faia lea tofiga ma pe o le fea faatulagaga e tatau ona latou faasoa mai ai. Afai e le lava tagata aoga mo vaega tonu e taitoafa, mafaufau e fai ni nai vaega taitoatolu. E le taua tele le fai i vaega taitasi e faamaea gaoioiga uma e fa.

Eteru 4–5

Faamoemoega o le lesona: O lenei lesona ua faamoemoe e fesoasoani i tagata aoga ia malamalama i mea e mafai ona latou faia e maua ai nisi faaaliga faaopoopo.

Sauniuniga a le tagata aoga: Valaaulia tagata aoga e faitau le Eteru 4 o se vaega o a latou suesuega o tusitusiga paia i aso taitasi, ma vaavaai mo upumoni e mafai ona fesoasoani ia i latou e maua ai faaaliga faaopoopo mai le Alii.
Aitema: O se mea faitino e taua ia te oe po o lou aiga
Fautuaga faafaiaoga faavitio: Mafaufau e auina atu se savali a o lei amataina le vasega e fai atu i ni nai tagata aoga e faaali mai se mea e taua ia i latou po o o latou aiga i le taimi o le lesona.

Iloiloga 24 o le Atamai i Aoaoga Faavae

Faamoemoega o le lesona: O lenei lesona o le a tuu atu ai i tagata aoga se avanoa e faaloloto ai lo latou malamalama ma faamatala upumoni o loo maua i fuaitau eseesee o le atamai i aoaoga faavae mai le Tusi a Mamona.

Sauniuniga a le tagata aoga: Mafaufau e valaaulia tagata aoga e filifili ma le agaga tatalo se fuaitau o le atamai i aoaoga faavae o le Tusi a Mamona latou te fia malamalama atili i ai. Fai atu ia i latou e talanoaina le fuaitau ma se tagata o le aiga, uo mamae, po o se taitai o le Ekalesia ma o mai saunia e faasoa mai mea ua latou aoaoina e uiga i le fuaitau mai la latou talanoaga.
Fautuaga faafaiaoga faavitio: Mafaufau e tofi tagata aoga taitasi e auina mai ni fesili e uiga i se fuaitau o le atamai i aoaoga faavae i se isi tagata aoga. E mafai ona e faia lenei mea e ala i le atofaina atu i tagata aoga uma o se numera ma fai atu ia i latou e auina atu a latou fesili i le tagata o i ai lena numera faaopoopo le tasi (o le a auina atu e le tagata aoga e aupito maualuga lana numera ia fesili i le numera tasi). Ona taumafai lea o tagata aoga e tali ia fesili ma toe auina atu i le faaiuga o le lesona.