“3 Nifae 24: O le Tulafono a le Alii o le Sefuluai,” Tusi Lesona a le Faiaoga o le Tusi a Mamona (2024)
“3 Nifae 24,” Tusi Lesona a le Faiaoga o le Tusi a Mamona
3 Nifae 24
O Le Tulafono a le Alii o le Sefuluai
O le a le mea ua folafola mai e le Alii ia i tatou pe afai tatou te totogiina le sefuluai? Sa faaaoga e le Faaola upu a Malaki e aoao ai sa Nifaē e uiga i le tulafono o le sefuluai ma faamanuiaga o le ola ai i lenei poloaiga. O lenei lesona ua faamoemoe e fesoasoani ia te oe ina ia lagonaina le manao e totogi le sefuluai.
Aoaoina atu o tusitusiga paia ma le talitonuga maumaututu ma le faamoemoe. O nisi o upumoni o le talalelei e ono foliga faigata mo tagata aoga ona malamalama i ai ma faaaoga i o latou olaga. Fesoasoani i tagata aoga ia iloa le taua o nei aoaoga. Faasoa atu lau molimau i le moni o nei mataupu faavae ma faamanuiaga e faaee mai e le Alii i luga o i latou o e galulue i le faatuatua.
Sauniuniga a le tagata aoga: Valaaulia tagata aoga e faitau le 3 Nifae 24:8–10 ma mafaufau e uiga i aafiaga na maua e i latou po o isi i le tulafono a le Alii o le sefuluai.
Gaoioiga e Mafai Ona Aoao Ai
O ou aafiaga
O ata faataitai nei ua faamoemoe e fesoasoani i tagata aoga e mafaufau ai e uiga i o latou aafiaga i le tulafono a le Alii o le sefuluai. Ia saoloto e fetuunai pe afai o le a sili atu ona talafeagai isi i au tagata aoga.
I se isi itu, e mafai ona e faaali atu se fasipepa o le sefuluai po o tupe siliva ma fesili atu i tagata aoga e uiga i lo latou malamalama i ai, aafiaga i ai, ma fesili e uiga i le sefuluai.
Faitau ata faataitai nei, ma vaavaai mo tulaga e sili ona talafeagai ia te oe po o le autalavou i la outou eria:
-
O loo sefeina e Carlos se tupe mo se telefoni. E le o mafaufau o ia e totogi le sefuluai.
-
Sa totogi i taimi uma e Sita le sefuluai a o laitiiti o ia, ae o lea ua i ai sana galuega ma ua tele ana tupe maua, ua atili faigata ai ona fai.
-
Ua tuuina atu e Oneka tupe uma na te maua e fesoasoani ai i lona aiga. E mafaufau o ia pe manaomia ona ia totogiina le sefuluai pe a manaomia e lona aiga le tupe.
-
E le maua e Anjum se tupe, o lea na ia mafaufau ai pe faapefea pe e faatatau foi le tulafono o le sefuluai ia te ia.
-
O a tulaga e te lagona e sili ona talafeagai? Aisea?
Mafaufau e lisi i luga o le laupapa tali a tagata aoga i le fesilii o sosoo ai.
-
O a fesili po o ni atugaluga atonu o loo i ai i le autalavou e uiga i le sefuluai?
E mafai e tagata aoga ona mafaufau loloto i fesili nei pe tusi tali i a latou api faamaumau mo suesuega: Ona o le natura patino o nei fesili, aua nei fai atu i tagata aoga e faasoa mai a latou tali.
Mafaufau i ou lava aafiaga ma le malamalamaaga i le sefuluai. Pe o e totogia le sefuluai, po o e naunau e totogi le sefuluai? Aisea pe aisea foi e leai ai? O a ni mea ua e aoaoina mai i ou lava aafiaga i le sefuluai? A o e suesue i lenei lesona, saili le taitaiga a le Agaga Paia e fesoasoani ia te oe e usiusitai ai i lenei tulafono.
O le tulafono a le Alii o le sefuluai
A o aoao atu i a sa Nifaē, sa poloaiina i latou e Iesu e tusi upu na faamaumauina e Malaki pe tusa o le 400 tausaga na muamua atu. Na valoia e Malaki le Afio Mai Faalua o Iesu Keriso ma le matafaioi a le Faaola i le faamasinoina o e amioleaga (tagai i le 3 Nifae 24:1–6).
Faitau le 3 Nifae 24:7, ma vaavaai mo le faafitauli na feagai ma tagata i ona po o Malaki.
-
Pe mata na faapefea ona pei sa Nifaē o tagata i ona po o Malaki?
-
O le a le mea na folafola mai e le Alii i tagata pe a latou fo’i atu ia te Ia?
Ina ia uunaia tagata e toe foi atu i le Alii ma saunia mo Lona afio mai, o le Alii, e ala mai ia Malaki, na aoao mai e uiga i le sefuluai.
Faitau le 3 Nifae 24:8–12 ma mafaufau e faailoga mea na aoao mai e le Alii e uiga i le tulafono o le sefuluai. Ia matau “o le na te ’aina” (fuaiupu 11) e mafai ona faasino i manufaalafuā, lamala po o lologa, e oo lava ia Satani.
-
O le a se mea e tumatila ia te oe mai nei fuaiupu?
Faafetai i tagata aoga mo mea na latou faasoa mai. Mafaufau e fai atu ia i latou e faamatala mai pe aisea na tumatila ai mea na latou faasoa mai.
-
E mafai faapefea e le musu e totogi le sefuluai ona pei ua faoa mea a le Atua?
Mafaufau e faaali atu fuaiupu e le’i uma nei.
-
E mafai faapefea ona e faaumaina le fuaiupu lenei: “Afai tatou te usiusitai i le tulafono a le Alii o le sefuluai …”?
O se tasi lenei o auala atonu ua e faamaeaina ai le fuaiupu: Afai tatou te usiusitai i le tulafono a le Alii o le sefuluai, o le a Ia sasaa mai faamanuiaga i o tatou luga.
I ona po o Malaki ma i ona po o sa Nifaē, e foliga mai na totogi e le Au Paia sefuluai e ala i le tuuina atu o le tasi vaesefulu o a latou meaai po o oloa. I le asō “e tuuina atu e tagata o le Ekalesia le tasi vae sefulu o o latou tupe maua i le Alii e ala atu i Lana Ekalesia. O nei tupe e faaaoga e fausia ai le Ekalesia ma faaleleia ai le galuega a le Alii i le lalolagi atoa” (Autu o le Talalelei, “Sefuluai,” topics.ChurchofJesusChrist.org). Afai e leai se tupe maua a se tasi, e le manaomia ona latou totogiina le sefuluai, e ui e tatau ona latou naunau e fai i le lumanai.
Sa faaaoga e le Alii ia fasifuaitau mamana ma manino pe a talanoa e uiga i le sefuluai: “Tofotofo mai nei ia te a’u … pe ou te le tatala atu ia te outou pupuni o le lagi, ma sasaa atu ia te outou se manuia o le a leai se avanoa e lava e teu ai” (3 Nifae 24:10).
-
O le a sou manatu o le a le mea na faamamafa mai e le Alii e ala i le faaaogaina o upu ma fasifuaitau sa Ia faaaogaina? O le a se mea ua e aoaoina e uiga ia te Ia?
Mafaufau e tusi se faamalama tele i luga o le laupapa ma valaaulia tagata aoga e tusi ai i totonu faamanuiaga o le usiusitai i le tulafono o le sefuluai. E mafai e tagata aoga ona kopi le faamalama ma faamanuiaga o loo lisiina i totonu o a latou api talaaga. O mea nei e mafai ona fesoasoani i tagata aoga e mafaufau ai pe sue ai ni manatu:
-
Faitau le Mataupu Faavae ma Feagaiga 64:23.
-
Faitau le parakalafa i lalo o le ulutala “Lesona Numera 1 -- O Faamanuiaga Lemafaamatalaina ae Taua” i le lauga a Elder David A. Bednar “O Pupuni o le Lagi” (Ensign po o le Liahona, Nov. 2013, 17–20).
-
Mafaufau i ou lava aafiaga i le totogiina o le sefuluai ma aafiaga o tagata e te iloa.
-
Tesi atu i se matua po o se taitai o le Ekalesia e fesili i ai po o a faamanuiaga ua latou maua mai le totogiina o a latou sefuluai.
Afai e manaomia e tagata aoga se fesoasoani i le faailoaina o faamanuiaga, e mafai ona fesoasoani vaega o le “Manatu mo Talaaga o Faamatalaga” po o “Gaoioiga Faaopoopo e Aoao Ai” o lenei lesona.
Valaaulia ni nai tagata aoga e li’o i luga o le laupapa se faamanuiaga e taua ia i latou pe o le a latou mananao foi i ai i o latou olaga. Valaaulia i latou e faasoa mai pe aisea.
-
E faapefea e nei faamanuiaga ona aafia ai lou manao e totogi le sefuluai?
-
Aisea e te manatu ai ua poloaiina e le Alii Lona nuu e totogi sefuluai?
-
E faapefea e le usiusitai i le tulafono o le sefuluai ona fesoasoani ia i tatou e “toe foi atu ai” (3 Nifae 24:7) pe latalata atili ai i le Alii?
Faaaogaina patino
Mafaufau i mea ua e aoaoina ma lagonaina i le asō a o e faitauina le saunoaga lenei a Elder David A. Bednar o le Korama a Aposetolo e Toasefululua:
O le totogiina ma le faamaoni o le sefuluai ua le na o se tiute; o se laasaga taua lea i le faagasologa o le faapaiaina patino. Mo outou na e totogi a outou sefuluai, ou te faamalo atu.
Ae mo outou na e le o usitaia i le taimi nei le tulafono o le sefuluai, ou te valaaulia outou ia iloilo o outou ala ma salamo. Ou te molimau atu e ala i lou usiusitai i lenei tulafono a le Alii, o le a matala mai ai pupuni o le lagi ia te outou. (David A. Bednar, “O Pupuni o le Lagi,,” Ensign po o le Liahona, Nov. 2013, 20.
Faamanatu i tagata aoga le amataga o le lesona ma fesili e ono i ai a le autalavou e uiga i le sefuluai. Fesili atu i tagata aoga pe i ai se mea na latou suesueina e fesoasoani i fesili sa latou ta’ua. Pe e mafai foi ona e valaaulia tagata aoga e tusifaamaumau o latou lagona e uiga i le sefuluai.
Tusi i lau api faamaumau mo suesuega ou lagona e uiga i le sefuluai ma pe aisea. Afai e te lagona o le totogiina o le sefuluai o se tauiviga pe o le a avea o se tauiviga mo oe, ia aofia ai mea e mafai ona e faia e valaaulia ai le Alii e tali au fesili ma taulima ou atugaluga.