Si Jesukristo mitudlo nga kita kinahanglan “mahimo nga hingpit” ingon nga Siya ug ang atong Langitnong Amahan hingpit (3 Nephi 12:48). Samtang kini nga sugo mahimong mabati nga hilabihan, kini naghatag og makahuloganon nga mga pagsabot ngadto sa kinaiya sa atong Langitnong Amahan ug ni Jesukristo. Kini nagtudlo usab kanato nga kita mahimong mahisama Kanila. Kini nga leksiyon gituyo aron matabangan ka nga masabtan ang imong potensiyal nga mahimong hingpit sama sa atong Amahan sa Langit ug ni Jesukristo.
Pagpahayag sa gugma ug taas nga mga gilaoman. Kon ang mga magtutudlo tinud-anay nga naghigugma sa ilang mga estudyante, magpakabana sila pag-ayo sa ilang pag-uswag ug kalamposan nga matagbaw sa bisan gamay lang nga paningkamot sa bahin sa mga estudyante. Mahigugmaon nga dasiga ang imong mga estudyante sa pagkab-ot sa ilang potensiyal isip mga tigkat-on ug mga disipulo ni Jesukristo.
Pagpangandam sa estudyante: Dapita ang mga estudyante sa pagtuon sa unang parapo ubos sa entry nga “Hingpit” diha sa Giya ngadto sa mga Kasulatan ug motambong nga andam sa pagpakigbahin kon unsa ang ilang nakita nga labing makahuloganon mahitungod niini nga kahulogan ug kon ngano.
Mga Posibleng Kalihokan sa Pagkat-on
Timan-i: Bisan og kini nga leksiyon naghisgot sa pipila ka mga aspeto sa mas taas nga balaod nga gitudlo ni Jesus diha sa mga bersikulo 17–47, ang nag-unang katuyoan niini nga leksiyon mao ang pagtabang sa mga estudyante nga makasabot sa mga kamatuoran nga gitudlo diha sa tudling sa doktrinal nga kahanas sa 3 Nephi 12:48. Kon labing maayo kini alang sa imong mga estudyante nga mogahin og dugang nga panahon sa pagtuon sa mga bahin sa mas taas nga balaod, batia ang kagawasnon sa paggahin og duha ka adlaw sa pagtuon sa mga materyal niini nga leksiyon ug sa pagpuli sa usa ka umaabot nga leksiyon.
Adunay pipila ka mga ideya diha sa “Dugang nga mga Kalihokan sa Pagkat-on” nga bahin nga mahimong makatabang sa pagtudlo sa ubang mga aspeto sa mas taas nga balaod.
Imong potensiyal
Ipakita ang mosunod nga mga hulagway o ang uban nga nagpakita sa usa ka butang nga wala pa hingpit nga molambo.
Imahe
binhi sa yuta, tabunon [brown] nga itoy
Imahe
malipayon nga masuso [baby] sulod sa basket
Unsa ang mahimo sa matag usa niini kon sila hingpit na nga motubo?
Unsay gikinahanglan nila aron makab-ot ang ilang potensiyal?
Unsa ang potensiyal sa matag bata sa plano sa Langitnong Amahan?
Sa unsang paagi ang pagsabot sa imong balaang potensiyal nakaapekto sa imong mga desisyon? Sa unsang paagi kini nakaapekto sa imong gibati mahitungod sa imong kaugalingon?
Samtang magtuon ka sa leksiyon karon, hunahunaa kon unsa na ka dako ang imong pagtubo ug nakat-onan sa dagan sa imong kinabuhi ug kon unsa pa ang imong mahimo sa tabang sa Dios.
Ang pagdapit sa Manluluwas sa pagkab-ot sa atong potensiyal
Sa 3 Nephi 12:17–47, si Jesus mipakigbahin og pipila ka mga ehemplo gikan sa balaod ni Moises ngadto sa mga katawhan sa Basahon ni Mormon. Iyang gisundan ang matag ehemplo og pagpasabot kabahin sa mas taas nga balaod o usa ka pagdapit sa pagpuyo og mas taas nga ang-ang sa pagkamatarong nga makatabang kanato nga mas makasabot sa unsay gusto Niya ug sa atong Langitnong Amahan nga kita mamahimo.
Alang sa mga estudyante aron makakita og mga ehemplo sa mas taas nga balaod nga gitudlo ni Jesus, mahimo nimong bahinon ang klase ngadto sa tulo ka grupo ug tahasi ang matag grupo og usa sa mosunod nga mga bloke sa kasulatan aron basahon: 3 Nephi 12:21–22, 27–29, ug 38–42, mangita og mga paagi nga ang Manluluwas nagdapit kanato sa pag-uswag ngadto sa atong potensiyal. Dapita ang mga estudyante sa pagpakigbahin kon sa unsang paagi ang Manluluwas nagdapit kanato niini nga mga bersikulo sa pagkinabuhi og mas taas nga ang-ang sa pagkamatarong. Mahimo kang motabang sa mga estudyante sa paghunahuna og mga ehemplo kon unsaon sa pagtuman niini nga mga balaod sa atong panahon.
Sa unsa nga mga paagi kini nga mga pagtulun-an makatabang kanato nga mahimong mas sama sa Langitnong Amahan ug ni Jesukristo?
Basaha ang 3 Nephi 12:48, mangita sa hingpit nga potensiyal nga si Jesukristo nasayod nga anaa sa matag usa kanato.
Ang 3 Nephi 12:48 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Kini nga bersikulo nagtudlo nga si Jesukristo gusto nga kita mahimong hingpit sama Kaniya ug sa atong Amahan sa Langit.
Ikonsiderar ang pagpasulat sa mga tubag sa mga estudyante sa unang pangutana sa ubos diha sa mga piraso sa papel ug dayon ipasa ang mga papel. Mahimo nimong basahon ang pipila sa ilang mga pangutana o mga kabalaka diha sa kataposan sa leksiyon ug tugoti nga ang mga estudyante motubag gamit ang unsay ilang nakat-onan.
Unsa nga mga pangutana o mga kabalaka ang tingali anaa sa mga tawo mahitungod niini nga pagtulun-an? Ngano man?
Unsay naghatag kanimo og paglaom o pagsalig nga posible ang pagkahimong mahisama sa Langitnong Amahan ug ni Jesukristo?
Sa unsang paagi kaha kini nga kamatuoran may kalabuoan sa mga hulagway gikan sa sinugdanan sa leksiyon?
Ang hingpit nga gugma sa Langitnong Amahan ug ni Jesukristo
Ang pagkahimong hingpit mao ang pagkahimong sama sa Langitnong Amahan ug ni Jesukristo. Ang mas taas nga balaod nga gitudlo ni Jesus niini nga kapitulo makatabang kanato nga makasabot sa kinaiya ug mga hiyas sa Langitnong Amahan ug ni Jesukristo. Samtang mas masabtan nato kon kinsa Sila, kita makapaningkamot nga mahimong sama Kanila ug makabaton og paglaom nga Sila mapailobon nga motabang kanato samtang kita naningkamot sa pag-uswag.
Basaha ang 3 Nephi 12:43–45 ug ang mosunod nga pamahayag ni Elder Jeffrey R. Holland sa Korum sa Napulog Duha ka Apostoles, mangita sa unsay ilang gitudlo mahitungod sa gugma sa Langitnong Amahan ug ni Jesukristo.
Imahe
Elder Jeffrey R. Holland
Sa bisan unsang kahimtang, mapasalamaton ko nga masayod nga bisan pa sa akong mga kasaypanan, maayo gani kay hingpit ang Dios—nga maayo gani kay Siya, sama pananglit, makahimo sa paghigugma sa Iyang mga kaaway, tungod kay sa kasagaran, tungod sa “kinaiyanhon nga tawo” sulod kanato, kamo ug ako usahay mao kana nga kaaway. Mapasalamaton kaayo ko nga maayo gani kay ang Dios makapanalangin niadtong nag-amung-among Kaniya tungod kay, bisan dili tuyo nga mobuhat sa ingon, usahay kitang tanan nag-amung-among Kaniya. (Jeffrey R. Holland, “Busa Kamo Kinahanglan Magmahingpit—sa Kataposan,” Liahona, Nob. 2017, 41)
Nganong makahupay ang pagkahibalo nga ang Langitnong Amahan ug si Jesukristo naghigugma sa ilang mga kaaway ug nagpanalangin niadtonh kinsa nag-amung-among Kanila?
Sa unsang paagi ang ilang gugma, tabang, ug pailob naghatag kanimo og paglaom nga usa ka adlaw makab-ot ang kahingpitan?
Ang kahingpitan usa ka proseso nga posible lamang pinaagi ni Jesukristo
Natural lang nga maghunahuna kon posible ba nga mahimong hingpit. Kon kinahanglan nato nga kab-oton ang kahingpitan sa ato lamang kaugalingon, o kon kini kinahanglan nga makab-ot sa atong mortal nga mga kinabuhi, kini imposible.
Unsa ang nakapahimo niini nga posible alang sa tanan kinsa sa kataposan mahimong hingpit sa pagbuhat sa ingon?
Kon ang mga estudyante naglisod sa pagtubag sa milabay nga pangutana, seguroha nga ipasabot nga pinaagi lamang ni Jesukristo kita mahimong hingpit. Kini imposible kon wala Siya. Samtang kita naghinulsol matag adlaw, ug kanunay nga nagtinguha nga molambo sa espirituhanon nga paagi, niana kita nahingpit diha ni Kristo.
Basaha ang Doktrina ug mga Pakigsaad 93:11–13 ug pangitaa kon unsay madugang niadto nga mga bersikulo sa atong pagsabot sa kahingpitan ni Jesukristo.
Nganong importante nga masabtan nga bisan ang kahingpitan ni Jesukristo usa ka proseso?
Gitudlo ni Presidente Russell M. Nelson ang mosunod mahitungod sa kahulogan ug proseso sa kahingpitan:
Imahe
Presidente Russell M. Nelson
Palihog timan-i nga ang pulong nga [hingpit] wala magpasabot og “kagawasan gikan sa sayop.” …
Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon mura og makapaluya [lisod] ug walay kataposan. Ang pagkahingpit naghulat. Moabot kini sa ka hingpit human lamang sa Pagkabanhaw ug pinaagi lamang sa Ginoo. Kini nagpaabot sa tanan kinsa nahigugma kaniya ug nagsunod sa iyang mga sugo. (Russell M. Nelson, “Perfection Pending,” Ensign, Nob. 1995, 86, 88)
Unsa ang nadugang niini nga pamahayag sa imong pagsabot sa kahingpitan?
Ang kataposang bahin sa leksiyon naghatag sa mga estudyante og kahigayonan sa pagpahayag sa ilang pagsabot sa atong potensiyal nga mahimong hingpit sama sa Dios.
Usa ka paagi sa pagbuhat niini mao ang pagbasa sa pipila ka mga pangutana ug mga kabalaka nga gisulat sa mga estudyante sa sayo pa sa leksiyon. Tugoti ang mga estudyante nga ipakigbahin kon sa unsang paagi ang unsay ilang nakat-onan mahimong magamit sa matag pangutana o kabalaka.
Hunahunaa nga gihangyo ka sa paghatag og duha ngadto sa tulo ka minuto nga espirituhanong panghunahuna sa sunod nimo nga kalihokan sa kabatan-onan [youth activity]. Ang imong mga lider naghangyo kanimo sa pagpakigbahin sa imong mga hunahuna kon nganong ang pagtulon-an sa 3 Nephi 12:48 kinahanglan maghatag kanato og paglaom. Isulat ang imong mga hunahuna. Paglakip og mga tubag sa mosunod nga mga pangutana:
Unsay buot ipasabot nga mahimong hingpit? Unsa may wala gipasabot niini?
Sa unsang paagi ang imong nahibaloan mahitungod sa Langitnong Amahan ug ni Jesukristo nakahatag kanimo og paglaom nga mahisama Kanila?
Ikonsiderar ang pagpakigbahin sa imong pagpamatuod sa pagkatawo sa matag estudyante isip anak sa Dios ug sa potensiyal nga sila mahimong sama sa atong Langitnong Amahan ug ni Jesukristo sa paglabay sa panahon ug sa Ilang tabang.