Doktrinal nga Kahanas: 3 Nephi 11:10–11

“Ako Mituman sa Kabubut-on sa Amahan sa Tanan nga mga Butang gikan sa Sinugdanan”

Kristo namulong sa mga Nephite

Sa imong pagtuon sa 3 Nephi 11, imong nakat-onan ang mahitungod ni Jesukristo nga nagpakita ngadto sa mga Nephite. Iyang gisulti kanila nga Iyang natuman ang kabubut-on sa Langitnong Amahan pinaagi sa pagdala diha sa Iyang Kaugalingon sa mga sala sa kalibotan. Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan sa 3 Nephi 11:10–11, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Paghatag og mga kahigayonan sa mga estudyante aron makahatag og pagpamatuod.Seguroha nga ang mga estudyante nakasabot nga ang usa ka pagpamatuod dili kinahanglan nga magsugod gamit ang piho nga mga pulong o ipakigbahin lamang sa pormal nga mga panagtigom. Tabangi sila sa pag-ila nga sila nagpamatuod kon sila mopakigbahin sa yano, sinsero nga mga pagpahayag sa unsay ilang gituohan nga tinuod.

Pagpangandam sa estudyante: Dapita ang mga estudyante sa paghangyo og usa ka miyembro sa pamilya o lider sa Simbahan aron mopasabot kanila kon nganong gipili niya nga mosunod kang Jesukristo.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “3 Nephi 11:1–11,” nga mao ang pangkonteksto nga leksiyon alang sa tudling sa doktrinal nga kahanas sa 3 Nephi 11:10–11. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Ang mahinungdanon nga hugpong sa mga pulong sa kasulatan sa 3 Nephi 11:10–11 mao ang “Ako mituman sa kabubut-on sa Amahan sa tanan nga mga butang gikan sa sinugdanan.” Mahimo nimong markahan kini nga bahin diha sa bersikulo 11 sa lahi nga paagi aron kini daling mailhan gikan sa ubang bersikulo.

Tabangi ang mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan sa 3 Nephi 11:10–11. Usa ka paagi sa pagbuhat niini mao ang pagpakita sa mosunod nga mga hulagway ni Jesukristo, nga nagrepresentar kang Jesukristo nga nagtuman sa kabubut-on sa Amahan pinaagi sa pagdala diha sa Iyang Kaugalingon sa atong mga sala.

Dapita ang mga estudyante sa pagsaysay [recite] sa pakisayran sa kasulatan ug sa mahinungdanon nga hugpong sa mga pulong sa kasulatan sa makadaghang higayon. Samtang ang mga estudyante nagsag-ulo, awhaga sila sa pagtan-aw dili lamang sa mga pulong apan usab sa gipakita nga mga hulagway. Dapita sila sa pagpamalandong sa kahulogan sa mga pulong sa Manluluwas nga ilang gisag-ulo.

Si Kristo sa Getsemani ug si Kristo diha sa krus

Sa miaging leksiyon, inyong gihisgotan ang kamatuoran nga makita diha sa 3 Nephi 11:11 nga si Jesukristo mibuhat sa kabubut-on sa Amahan pinaagi sa pagdala diha sa Iyang Kaugalingon sa mga sala sa kalibotan.

Handurawa nga ang usa ka tawo kinsa gamay ra og nasayran mahitungod ni Jesukristo mihangyo kanimo sa pagtudlo sa unsay imong nahibaloan mahitungod Kaniya.

• Gamit ang pamahayag sa kamatuoran ug ang mahinungdanon nga hugpong sa mga pulong sa kasulatan, unsaon nimo sa pagpasabot sa unsay gibuhat ni Jesukristo alang kanato ug nganong mahinungdanon kini?

Pagbansay sa paggamit

Rebyoha sa daklit ang mga baroganan sa pag-angkon og espirituhanong kahibalo diha sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023).

Hatagi ang mga estudyante og oportunidad sa pagpakita sa ilang pagsabot sa mga baroganan sa pag-angkon og espirituhanong kahibalo. Usa ka paagi sa pagbuhat niini mao ang pagpakita sa tulo ka mga baroganan diha sa pisara ug sa pagdapit og pipila ka mga estudyante sa pagsulat o sa pagpasabot sa mga baroganan sa usa ka kapahayag [sentence].

Ang mosunod nga senaryo makatabang sa mga estudyante sa pagbansay sa paggamit sa mga baroganan sa pag-angkon sa espirituhanong kahibalo ug sa doktrina nga gitudlo sa 3 Nephi 11:10–11. Ikonsiderar ang pagpakita niini nga senaryo aron ang mga estudyante makatan-aw niini sa tibuok nahibilin sa leksiyon.

Si Jessica nagsugod sa paggahin og dugang nga panahon uban sa usa ka bag-ong grupo sa mga higala. Kini nga mga higala wala mosunod ni Jesukristo, apan iyang namatikdan nga sila daw malipayon nga wala nag-ila sa Dios diha sa ilang mga kinabuhi. Si Jessica natudloan nga motuo ug mosunod ni Jesukristo. Kanunay niyang gikonektar ang kalipay ngadto sa pagsunod kang Jesukristo, apan nagsugod na siya sa paghunahuna kon unsa ka mahinungdanon ang pagsunod Kaniya.

Ang mga baroganan sa pag-angkon og espirituhanong kahibalo mahimong makatabang sa usa ka sitwasyon sama sa kang Jessica.

Susihon ang mga konsepto ug mga pangutana inubanan sa mahangtorong panglantaw

Aron matabangan ka nga makakita kon sa unsang paagi masusi ni Jessica ang iyang kabalaka nga adunay mahangtorong panglantaw, kopyaha ang mosunod nga tsart nganha sa imong journal sa pagtuon. Pagkahuman kompletoha ang tsart pinaagi sa paglista sa tanan nga mga rason ug mga resulta nga imong mahunahunaan alang sa duha ka mga kolum. Seguroha nga maglakip og mga ideya gikan sa 3 Nephi 11:10–11 samtang imong tubagan ang kolum sa tuo nga bahin.

Mahimong magtinabangay ang mga estudyante sa gagmay nga mga grupo aron kompletohon ang mosunod nga tsart, o mahimo ninyong kompletohon ang tsart nga magkauban ingon nga usa ka klase.

Tabangi ang mga estudyante nga mobati nga luwas sa pagpahayag sa ilang mga panghunahuna. Kon ang mga estudyante nagkinahanglan og tabang sa pagtubag sa tsart, mahimo kang mangutana og mas piho nga mga pangutana, sama sa mosunod: Unsa kaha ang mga rason ni Jessica sa pag-gusto nga magpakabuhi nga sama sa iyang bag-ong grupo sa mga higala? Unsa ang mga mubo [short-term] ug taas nga termino [long-term] nga mga resulta niini nga pagpili? Unsa ang imong nahibaloan mahitungod kang Jesukristo nga makapahimong mapuslanon ang pagsunod Kaniya? Unsa nga mga panalangin ang masinati ni Jessica pinaagi sa pagpili nga mosunod kang Jesukristo?

	Pagsunod sa Uban	Pagsunod kang Jesukristo
Mga Rason:	Pagsunod sa Uban	Pagsunod kang Jesukristo
Mga Resulta:	Pagsunod sa Uban	Pagsunod kang Jesukristo

Human makompleto sa mga estudyante ang tsart, dapita sila sa pagpakigbahin kon unsay ilang nakat-onan. Ang mosunod nga pangutana mahimong gamiton isip kabahin niini nga panaghisgotan:

• Sa unsang paagi kini nakatabang ang paghunahuna sa mga kapilian ni Jessica niini nga paagiha?

  Ang mosunod nga mga pangutana makatabang sa mga estudyante nga makakita kon sa unsang paagi ang ubang mga baroganan sa pag-angkon og espirituhanong kahibalo makatabang usab sa sitwasyon ni Jessica.

• Dugang pa sa 3 Nephi 11:10–11, unsa ang uban pang balaanong gitudlo nga mga tinubdan ang makatabang kang Jessica nga makasabot sa kamahinungdanon sa pagsunod kang Jesukristo?

  Samtang gihisgotan sa mga estudyante ang miaging pangutana, mahimo nilang idugang ang ilang bag-ong mga panglantaw sa tukma nga seksiyon sa ikaduhang kolum sa ilang mga tsart. Kon nagkinahanglan og tabang ang mga estudyante sa pagpangita og may kalabotan nga balaanong gitudlo nga mga tinubdan, mahimo nimong idirekta sila ngadto sa mga kasulatan sama sa Juan 14:6; Mga Buhat 4:12; ug 2 Nephi 25:20.

• Unsa ang mahimo ni Jessica aron madugangan ang iyang hugot nga pagtuo kang Jesukristo ug mahimong mas andam nga mosunod Kaniya?

Hunahunaa kon sa unsang paagi ang unsay imong nakat-onan karon makapanalangin sa imong kinabuhi o sa kinabuhi sa tawo nga imong nailhan. Buhata ang espirituhanong mga pag-aghat nga tingali imong nabatonan atol sa leksiyon.

Rebyo sa doktrinal nga kahanas

Atol sa umaabot nga leksiyon, pagpakita og usa o duha ka hulagway sa pagpakita ni Jesukristo ngadto sa mga Nephite. Hangyoa ang mga estudyante sa pagsaysay [recite] sa pakisayran sa tudling sa doktrinal nga kahanas ug sa mahinungdanon nga hugpong sa mga pulong sa kasulatan nga may kalabotan niini nga paghulagway. Kon nagkinahanglan og tabang ang mga estudyante, pagsulat og pipila ka impormasyon sa pisara aron mapukaw ang ilang panumdoman. Pananglitan, mahimo nimong isulat ang 3 _________ 11:10– ____: “Ako _____________ sa kabubut-on sa ___________ sa _______ nga mga butang gikan sa _______________.”