« អាលម៉ា ៣៦–៣៨ ៖ ទិដ្ឋភាពទូទៅ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អាលម៉ា ៣៦–៣៨ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អាលម៉ា ៣៦–៣៨
ទិដ្ឋភាពទូទៅ
នៅក្នុង អាលម៉ា ៣៦–៣៩ អាលម៉ា បានឲ្យដំបូន្មានដល់កូនប្រុសៗរបស់លោក ហេលេមិន ស៊ិបឡុន និងកូរីអានតុន ។ លោកបានរៀបរាប់ឡើងវិញពីបទពិសោធន៍របស់លោកពីការមើលឃើញទេវតាមួយអង្គ ការមានអារម្មណ៍រងទុក្ខដោយសារអំពើបាបរបស់លោក និងការស្វែងរកការរំដោះតាមរយៈព្រះយេស៊ូវគ្រីស្ទ ។ លោកបានបង្រៀនថា ជាញឹកញាប់ព្រះអម្ចាស់ប្រើប្រាស់កិច្ចការតូចតាច និងងាយដើម្បីធ្វើកិច្ចការដ៏ធំៗ ដូចជាការអនុញ្ញាតឲ្យបទគម្ពីរបង្ហាញ « ផ្លូវ ដែល [ យើង ] ត្រូវទៅ » នៅក្នុងជីវិតរបស់យើង ( អាលម៉ា ៣៧:៤៩ ) ។ លោកបានទូន្មានកូនៗរបស់លោកឲ្យគោរពព្រះបញ្ញត្តិនៃព្រះ ។ លោកបានទូន្មានកូនប្រុសរបស់លោក កូរីអានតុន ដោយក្ដីស្រឡាញ់ឲ្យបោះបង់ចោល ហើយប្រែចិត្តពីអំពើបាបរបស់គាត់ រួមទាំងការបំពានច្បាប់ព្រហ្មចារីភាពផងដែរ ។
រៀបចំខ្លួនបង្រៀន
ព័ត៌មានខាងក្រោមនេះផ្តល់ជាគំនិតដល់គ្រូបង្រៀនអំពីអ្វីដែលអាចត្រូវរៀបចំទុកជាមុនសម្រាប់មេរៀននីមួយៗ ។
អាលម៉ា ៣៦
គោលបំណងមេរៀន ៖ មេរៀននេះមានគោលបំណងជួយឲ្យសិស្សងាកទៅរកព្រះយេស៊ូវគ្រីស្ទដោយសេចក្តីជំនឿ ហើយទទួលអារម្មណ៍នៃសេចក្ដីអំណរពីការរំដោះរបស់ទ្រង់ ។
-
ការរៀបចំសិស្ស ៖ សូមអញ្ជើញសិស្សឲ្យមករៀនដោយបានរៀបចំខ្លួនដើម្បីចែកចាយពីឧទាហរណ៍នៃនរណាម្នាក់ ដែលបានរកឃើញសេចក្តីសុខសាន្តនៅក្នុងព្រះគ្រីស្ទបន្ទាប់ពីការរងទុក្ខមួយរយៈ ។ តើអ្វីទៅដែលបានជួយឲ្យបុគ្គលម្នាក់នេះរកឃើញសេចក្តីសុខសាន្ត ?
-
រូបភាពដែលត្រូវបង្ហាញ ៖ រូបភាពអាលម៉ាជាកូន និងទេវតា
-
យោបល់សម្រាប់ការបង្រៀនតាមសន្និសីទវីដេអូ ៖ ខណៈពេលដែលសិស្សអនុវត្តការគូសចំណាំពាក្យ និងឃ្លាតាមវិធីផ្សេងៗគ្នា អ្នកអាចអញ្ជើញអស់អ្នកដែលប្រើខគម្ពីរឌីជីថលឲ្យចែកចាយអេក្រង់ពួកគេ ដើម្បីបង្ហាញពីវិធីដ៏មានប្រសិទ្ធភាពដែលពួកគេបានរកឃើញដើម្បីគូសចំណាំព្រះគម្ពីរពួកគេ ។
អាលម៉ា ៣៧
គោលបំណងមេរៀន ៖ មេរៀននេះមានគោលបំណងជួយឲ្យសិស្សអនុវត្តសេចក្តីជំនឿលើព្រះយេស៊ូវគ្រីស្ទ នៅពេលដែលពួកគេសិក្សាព្រះបន្ទូលទ្រង់នៅក្នុងព្រះគម្ពីរ ។
-
ការរៀបចំសិស្ស ៖ សូមលើកទឹកចិត្តសិស្សនៅពេលពួកគេសិក្សាព្រះគម្ពីរប្រចាំថ្ងៃ ឲ្យគិតពិចារណាអំពីពរជ័យដែលវានាំមកក្នុងជីវិតរបស់ពួកគេ ជាពិសេសអំពីរបៀបដែលវាជួយឲ្យពួកគេចូលមករកព្រះគ្រីស្ទ ។
-
រូបភាពដែលត្រូវបង្ហាញ ៖ រូបភាពរបស់របរតូចៗ និងសាមញ្ញ ដូចជា ច្រាសដុសធ្មេញ សារជាអក្សរ លំហាត់ ឬសកម្មភាពការបម្រើធម្មតាៗ រូបថតរបស់ លីហៃ និង លីអាហូណា
-
វីដេអូ ៖ « Alma Counsels His Sons » ( ១៧:០៥ សូមមើលពីនាទីទី ៣:១៥ ដល់នាទីទី ៥:០៥ ); « Reflecting God’s Love—What Scripture Mean to Me » ( ៣:២៧ សូមមើលពីនាទីទី ២:៣៦ ដល់នាទីទី ៣:២៧ ); « Continuous Conversion—What Scriptures Mean to Me » ( ២:៤២ )
-
យោបល់សម្រាប់ការបង្រៀនតាមសន្និសីទវីដេអូ ៖ ដើម្បីចាប់ផ្ដើមមេរៀននេះ សូមពិចារណាបង្ហាញសិស្សនូវឧទាហរណ៍មួយ ឬពីរអំពីកិច្ចការដែលតូចតាច និងងាយ ដែលធ្វើឲ្យមានភាពខុសគ្នាយ៉ាងខ្លាំងនៅក្នុងជីវិតរបស់យើង ។ បន្ទាប់មក សូមទុកពេល ៣០ វិនាទីដល់សិស្ស ដើម្បីរកមើលឧទាហរណ៍មួយទៀតនៅផ្ទះពួកគេ ហើយយកវាមកបង្ហាញដល់សិស្សក្នុងថ្នាក់ ។
អាលម៉ា ៣៧–៣៨
គោលបំណងមេរៀន ៖ មេរៀននេះអាចជួយសិស្សឲ្យដឹងថា ការរស់នៅតាមបទបញ្ញត្តិនាពេលនេះនឹងផ្ដល់ពរជ័យដល់ពួកគេពេញមួយជីវិតពួកគេ ។
-
ការរៀបចំសិស្ស ៖ សូមអញ្ជើញសិស្សឲ្យអាន ឬទន្ទេញ អាលម៉ា ៣៧:៣៥ និងឲ្យមករៀនដោយត្រៀមខ្លួនចែកចាយពីមូលហេតុដែលពួកគេគិតថា វាមានសារៈសំខាន់ដើម្បី « រៀននៅក្នុងយុវវ័យ [ របស់ពួកគេ ] ឲ្យចេះកាន់តាមព្រះបញ្ញត្តិទាំងឡាយនៃព្រះ » ។
-
រូបភាព ដែលត្រូវបង្ហាញ ៖ រូបភាពកូនឈើមួយដើម
-
វីដេអូ ៖ « Standing by Our Promises and Covenants » ( ១៤:៣៩ សូមមើលចាប់ពីនាទីទី ៧:២៩ ដល់នាទីទី ៨:៣៥ )
-
យោបល់សម្រាប់ការបង្រៀនតាមសន្និសីទវីដេអូ ៖ នៅពេលសិស្សឆ្លើយនឹងសំណួរអំពីដំបូន្មានដ៏ល្អបំផុតដែលពួកគេបានទទួលពីឪពុកម្តាយ ឬថ្នាក់ដឹកនាំសាសនាចក្រ សូមពិចារណាអញ្ជើញពួកគេឲ្យចុះផ្សាយដំបូន្មាននោះនៅក្នុងឈែត ។ ការណ៍នេះនឹងអនុញ្ញាតឲ្យពួកគេមើលឡើងវិញនូវមតិយោបល់របស់គ្នាទៅវិញទៅមកបាន ។ បន្ទាប់មក អ្នកអាចនឹងអញ្ជើញពួកគេឲ្យចែកចាយថា តើពួកគេបានទទួលដំបូន្មាននេះមកពីនរណា និងរបៀបដែលវាបានផ្ដល់ពរជ័យដល់ពួកគេ ។
អាលម៉ា ៣៩
គោលបំណងមេរៀន ៖ មេរៀននេះអាចជួយសិស្សឲ្យយល់អំពីភាពធ្ងន់ធ្ងរនៃអំពើបាបខាងផ្លូវភេទ និងរបៀបទប់ទល់នឹងការល្បួងឲ្យបំពានលើច្បាប់ព្រហ្មចារីភាពនេះ ។
-
ការរៀបចំសិស្ស ៖ សូមអញ្ជើញសិស្សឲ្យគិតអំពីអ្វីដែលពួកគេដឹងអំពីច្បាប់ព្រហ្មចារីភាព ថាតើពួកគេមានអារម្មណ៍យ៉ាងណាអំពីច្បាប់នេះ និងសំណួរទាំងឡាយណាដែលពួកគេអាចមាន ។
-
វីដេអូ ៖ « I Choose to Be Pure » ( ៤:១៩ )
-
យោបល់សម្រាប់ការបង្រៀនតាមសន្និសីទវីដេអូ ៖ សូមឲ្យសិស្សប្រើមុខងារឈែតដើម្បីប្រមូលផ្ដុំគំនិតពីរបៀបដែលពួកយុវវ័យសព្វថ្ងៃនេះអាចអនុវត្តការគ្រប់គ្រងខ្លួនឯង និងយកឈ្នះលើការល្បួងបាន ។ អ្នកក៏អាចពិចារណាប្រើកម្មវិធីចល័តដែលអនុញ្ញាតឲ្យសិស្សអាចចែកចាយគំនិតរបស់ពួកគេបែបអាណាមិកបានផងដែរ ។
ចំណេះចំណានខាងគោលលទ្ធិ ៖ អាលម៉ា ៣៩:៩
គោលបំណងមេរៀន ៖ មេរៀននេះអាចជួយសិស្សឲ្យទន្ទេញវគ្គបទគម្ពីរចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ អាលម៉ា ៣៩:៩ ពន្យល់ពីគោលលទ្ធិដែលបានបង្រៀននៅក្នុងវគ្គបទគម្ពីរនេះ និងអនុវត្តគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតពិត ។
-
ការរៀបចំសិស្ស ៖ សូមអញ្ជើញសិស្សឲ្យចាប់ផ្ដើមទន្ទេញឃ្លាបទគម្ពីរគន្លឹះសម្រាប់ អាលម៉ា ៣៩:៩ ។ អ្នកក៏អាចលើកទឹកចិត្តពួកគេឲ្យព្យាយាមទន្ទេញខគម្ពីរទាំងមូលផងដែរ ។
-
យោបល់សម្រាប់ការបង្រៀនតាមសន្និសីទវីដេអូ ៖ សម្រាប់សកម្មភាពរៀនអនុវត្ត សូមពិចារណាដាក់សិស្សជាក្រុមនៅមុខងារបំបែកក្រុម ដើម្បីឲ្យពួកគេអាចពិភាក្សាពីរបៀបជួយ អ៊ីវ៉ាន បាន ។ សូមចុះផ្សាយសំណួរដូចខាងក្រោមនេះនៅក្នុងឈែត ៖ « តើវាមានសភាពបែបណាទៅសម្រាប់ អ៊ីវ៉ាន ដើម្បីដកពិសោធន៍ស្ថានភាពរបស់គាត់ជាមួយនឹងទស្សនវិស័យដ៏នៅអស់កល្បជានិច្ច ? តើមានឧទាហរណ៍អ្វីខ្លះ អំពីពួកអ្នកដែលព្រះចាត់មកដែលអាចនឹងជួយដល់ អ៊ីវ៉ាន បាន ? តើ អ៊ីវ៉ាន អាចធ្វើអ្វីខ្លះដើម្បីធ្វើសកម្មភាពដោយសេចក្តីជំនឿ ‹ កុំទៅតាមសេចក្ដីសម្រើបនៃភ្នែក [ របស់គាត់ ] ទៀតឡើយ › ( អាលម៉ា ៣៩:៩ ) ? » សូមពិចារណាចូលទៅមើលតាមមុខងារបំបែកក្រុមនីមួយៗ បើអាចធ្វើទៅបាន ។ តាមតម្រូវការ សូមពិចារណាចុះផ្សាយនៅក្នុងឈែតរាល់សំណួរបន្ថែមណាមួយដែលបានរាយបញ្ជីនៅក្នុងមេរៀននេះ ដែលអាចជួយដល់សិស្សបាន ។