“ʻAlamā 31:12–38: Ko ʻEtau Moihū ki he Tamai Hēvaní mo Sīsū Kalaisí,” Tohi ʻa Molomoná – Tohi Lēsoni ʻa e Faiakó (2024)
“ʻAlamā 31:12–38,” Tohi ʻa Molomoná – Tohi Lēsoni ʻa e Faiakó
ʻAlamā 31:12–38
Ko ʻEtau Moihū ki he Tamai Hēvaní mo Sīsū Kalaisí
ʻOku fakataumuʻa ʻa e moihū ki he Tamai Hēvaní mo Sīsū Kalaisí ke ʻomi kitautolu ke tau ofi ange kiate Kinaua. Kae fēfē kapau ʻe ngalo ʻiate kitautolu ʻa e ʻuhinga totonu ʻo e lotú? Naʻe kamata ke tui ʻa e kakai Sōlamí, ʻa ia naʻa nau kau kimuʻa ki he Siasi moʻoni ʻo e ʻOtuá, ki he ngaahi akonaki halá. Naʻe tohoakiʻi ʻe he faʻahinga lotu kākā ko ʻení honau lotó mei he ʻOtuá pea tataki kinautolu ke fakamaauʻi taʻemāʻoniʻoni mo ngaohikovia ʻa e niʻihi kehé. ʻE lava ke tokoniʻi koe ʻe he lēsoni ko ʻení ke toe lelei ange ho vā fetuʻutaki mo e Tamai Hēvaní mo Sīsū Kalaisí ʻi hoʻo vakavakaiʻi ʻa e founga ʻoku tākiekina ai ʻe he hīkisiá mo e loto-fakatōkilaló ho vā fetuʻutaki mo Kinauá pea mo e niʻihi kehé.
Fakafehoanakí mo e fakafaikehekeheʻi. ʻI he folofolá, ʻoku faʻa fakamahinoʻi ha tokāteline pe tefitoʻi moʻoni ʻi hono fakafehoanaki pe fakafaikehekeheʻi ia mo ha meʻa kehé. ʻE lava ke toe ʻata lelei ange ʻa e ngaahi moʻoni ʻo e ongoongoleleí ʻi he taimi ʻoku fakatokangaʻi ai ʻa e ngaahi meʻa ʻoku faitatau mo kehekehe ai ʻa e ngaahi akonakí, kakaí pe ngaahi meʻa naʻe hokó. Feinga ke fakamamafaʻi ʻa e ngaahi sīpingá ʻi he taimi ʻoku fakakau ai ʻe he kau faʻu tohi ueʻi fakalaumālié ha ngaahi fakafehoanaki peheé.
Teuteu ʻa e tokotaha akó: ʻI hoʻo teuteu ke ako ʻa e ʻAlamā 31, fakaafeʻi e kau akó ke nau lotu, ʻo tokanga taha ki he ngaahi fiemaʻu ʻa e niʻihi kehé.
Ngaahi ʻEkitivitī Ako ʻOku Ala Fakahokó
Ko hono vakaiʻi e ngaahi ola ʻo ʻetau moihuú
Ke tokoni ke fakakaukau e kau akó ki he lotú ko ha founga ia ke fakahaaʻi ai ʻa e ʻofa mo e līʻoa ki he ʻOtuá, fakakaukau ke fakaʻaliʻali ʻa e ngaahi ʻata ko ʻení pe ko ha ngaahi ʻata kehe te ke fili. Fakaafeʻi e kau akó ke nau fakalaulauloto ki he founga ʻe ala liliu ai ʻe he moihū ʻi he ngaahi founga ko ʻení honau vā fetuʻutaki mo e ʻOtuá.
ʻE lava ke kole ki he kau akó ke nau fakalaulauloto ki he ongo fehuʻi ko ʻení pea hiki ha faʻahinga fakakaukau ʻi heʻenau tohinoa akó fekauʻaki mo hono fakatupulaki honau vā fetuʻutaki fakafoʻituitui mo e ʻOtuá ʻi he moihuú. ʻOua naʻá ke fakaafeʻi ʻa e kau akó ke vahevahe ʻenau ngaahi talí.
-
Ko e hā hono tuʻo lahi hoʻo ongoʻi ʻokú ke feinga fakamātoato ke fakahaaʻi hoʻo ʻofa ki he ʻOtuá ʻo fakafou ʻi he mōihuú?
-
Ko e hā ha ngaahi founga, kapau ʻoku ʻi ai, ʻokú ke ongoʻi ai ʻoku ʻikai fuʻu fakamātoato hoʻo moihuú pe ʻoku fakatefito ʻi he ngaahi meʻa halá?
Ko e moihū ʻa e kakai Sōlamí ʻi he Lameiumitomí
ʻI he taimi naʻe ʻilo ai ʻe ʻAlamā mo hono kāingá naʻe fakakoviʻi ʻe he kakai Sōlamí ʻa e ngaahi hala ʻo e ʻEikí, naʻa nau fononga ki ʻAniteonumi. Naʻa nau ʻilo ai ʻoku lotu ʻa e kakai Sōlamí ʻi ha founga kuo teʻeki ai ke nau mamata ai kimuʻa (vakai, ʻAlamā 31:12).
Fakakaukau ke fakaʻaliʻali e laʻiʻata ko ʻení pea fakaafeʻi e kau akó ke fakamatalaʻi ʻa e meʻa naʻe fai ʻe he kakaí. ʻE lava ke lau ʻe he kau akó ʻa e ʻAlamā 31:21 ke nau sio ki he hingoa ʻo e tuʻunga malanga naʻa nau lotu aí.
Tokoni ke fakatupulaki ʻe he kau akó ʻa e taukei ako folofola ʻo e fakafehoanakí mo e fakafaikehekeheʻí. ʻE lava ke vahevahe e kau akó ki ha ngaahi kulupu pea fakaafeʻi ke nau fakafehoanaki e ngaahi lotu ʻa e kau Sōlamí mo e lotu naʻe fai ʻe ʻAlamaá. Te ke lava ʻo faʻu ha saati ʻi he palakipoé hangē ko ʻení pea fakaafeʻi e kau akó ke hiki e meʻa ʻoku nau ʻilo lolotonga e lēsoní. Tokoni ke nau fai ha fakafehoanaki ʻi he (1) meʻa naʻe fakatefito ai e ngaahi lotú, (2) meʻa naʻe lea ʻakí, mo e (3) ʻuhingá.
|
Ko e lotu ʻa e kakau Sōlamí |
Lotu ʻa ʻAlamaá |
|---|---|
Lau ʻa e ʻAlamā 31:13–23, pea fakafonu ʻa e kōlomu toʻohema ʻo e sātí ʻaki e meʻa ʻoku makehe kiate koe fekauʻaki mo e founga moihū ʻa e kakai Sōlamí. Te ke lava foki ʻo mamata ʻi he foʻi vitiō “ʻOku Malanga ʻaki ʻe ʻAlamā mo Hono Ngaahi Tokouá ʻa e Folofola ʻa e ʻOtuá ʻi he lotolotonga ʻo e Kau Sōlamí” mei he taimi 0:22 ki he 3:58, ʻoku maʻu ʻi he ChurchofJesusChrist.org.
-
Ko e hā naʻá ke fakatokangaʻi fekauʻaki mo e founga moihū ʻa e kau Sōlamí? ʻOkú ke pehē naʻe uesia fēfē ʻe he meʻá ni honau vā fetuʻutaki mo e ʻOtuá?
Ko e lotua ʻe ʻAlamā ʻa e kakai Sōlamí
ʻI he mamata ʻa ʻAlamā ki he faihala ʻi he kakai Sōlamí, naʻá ne lotua kinautolu.
Lau ʻa e ʻAlamā 31:24–38, ʻo kumi ʻa e meʻa naʻe tokanga taha ki ai ʻa ʻAlamaá, ko ʻene ngaahi ongó, mo e ngaahi holi ʻo hono lotó ʻi heʻene lotú. Fakafonu ʻa e kōlomu toʻomataʻu ʻo e sātí ʻo fakatatau mo e meʻa ʻokú ke maʻú. ʻE lava ke tokoni ʻeni ke ke fakafaikehekeheʻi ʻa e lotu ʻa ʻAlamaá mo e lotu ʻa e kakai Sōlamí.
Te ke lava ʻo mamata ʻi he foʻi vitiō “ʻOku Malanga ʻaki ʻe ʻAlamā mo Hono Ngaahi Tokouá ʻa e Folofola ʻa e ʻOtuá ʻi he lotolotonga ʻo e Kau Sōlamí” mei he taimi 4:03 ki he 5:55, ʻoku maʻu ʻi he ChurchofJesusChrist.org. Te ke fanongo ʻi he konga ko ʻeni ʻo e vitioó ki he lotu ʻa ʻAlamaá lolotonga hoʻo mamata ki he feinga ʻa ʻAlamā mo hono ngaahi hoa-ngāué ke akoʻi ʻa e kakai Sōlamí.
Fakakaukau ke fakaafeʻi e kau akó ke nau fakaʻaongaʻi e sātí ke vahevahe ʻa e meʻa ʻoku nau akó ʻaki hono fakafaikehekeheʻi e lotu ʻa ʻAlamaá mo e lotu ʻa e kakai Sōlamí.
Te ke lava ʻo teuteuʻi e kau akó ke nau ako mei he lea ko ʻeni ʻa Palesiteni ʻUkitofá ʻaki hono fai ha fehuʻi hangē ko e “Naʻe uesia fēfē ʻe he loto-hīkisiá ʻa e kakai Sōlamí?” mo e “Ko e hā ʻa e meʻa naʻe kehe fekauʻaki mo e tōʻonga ʻa ʻAlamaá?”
Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:
ʻI he taimi ʻoku fonu ai hotau lotó he hīkisiá, ʻoku tau fai ai ha angahala lahi, he ʻoku tau maumauʻi e ongo fekau lalahí. He kuo ʻikai ke tau hū ki he ʻOtuá mo ʻofa hotau kaungāʻapí, ka ʻoku mahino e meʻa ʻoku tau hū mo ʻofa aí—ʻa ia ko e ʻīmisi ʻoku tau sio ki ai ʻi he sioʻatá. Ko e hīkisiá ʻa e angahala lahi ʻo e sanitunguá. Ki he tokolahi, ko ha Lameiumitomi fakataautaha, ko ha tuʻunga toputapu ʻokú ne fakatonuhiaʻi e meheká, manumanú, mo e laukaú. (Dieter F. Uchtdorf, “Hīkisiá mo e Lakanga Fakataulaʻeikí,” Ensign pe Liahona, Nōvema 2010, 56)
Lau ʻa e ʻAlamā 32:1–5, ʻo kumi e founga naʻe feohi ai ʻa e kakai Sōlamí mo e kakaí.
-
Naʻe fēfē fakafeangai ʻa e kau Sōlamí ki he niʻihi kehé?
-
Ko e hā e ongo naʻe maʻu ʻe ʻAlamā ki he niʻihi kehé pea mo e founga ʻo ʻene feohi mo e niʻihi kehé? (vakai, ʻAlamā 31:1–2, 24–25, 34–35).
-
Ko e hā ha ngaahi tefitoʻi moʻoni te tau lava ʻo ako fekauʻaki mo e ngaahi nunuʻa ʻo e hīkisiá pe ola ʻo e loto-fakatōkilaló?
Ko e tefitoʻi moʻoni ʻe taha te tau lava ʻo akó ʻoku liliu ʻe heʻetau hīkisiá pe loto-fakatōkilaló hotau vā fetuʻutaki mo e ʻOtuá pea mo e niʻihi kehé.
-
ʻOkú ke pehē ʻe lava fēfē ʻe heʻetau hīkisiá pe loto-fakatōkilaló ʻo tākiekina e founga ʻoku tau moihū ai ki he Tamai Hēvaní mo Sīsū Kalaisí?
-
ʻOkú ke pehē ʻoku tākiekina fēfē ʻe heʻetau hīkisiá pe loto-fakatōkilaló ʻetau founga feohi mo e niʻihi kehé?
-
Ko e hā ʻokú ke ako meia ʻAlamā fekauʻaki mo e loto-fakatōkilaló? Ko e hā kuo akoʻi atu ʻe Sīsū Kalaisi fekauʻaki mo e loto-fakatōkilaló?
Fili ha founga ʻe ua pe tolu ʻe lava ke tau fakahaaʻi ai e loto-fakatōkilaló ʻi heʻetau founga moihū ki he ʻOtuá. Hiki ʻa e founga takitaha ʻi hoʻo tohinoa akó.
Fakaafeʻi e kau akó ke fakalaulauloto ki he ngaahi meʻá ni. ʻE lava ke ke poupouʻi kinautolu ke tohi ʻi heʻenau tohinoa akó pe tānaki ha kiʻi fakamatala ʻi heʻenau ngaahi folofola fakaʻilekitulōniká.
Fakaʻaongaʻi ha kiʻi taimi ke ke vakaiʻi ai e founga ʻokú ke lotu fakataautaha ai ki he Tamai Hēvaní mo Sīsū Kalaisí pea mo e founga ʻoku tākiekina ai ʻe hoʻo moihuú ho vā fetuʻutaki mo Kinauá. Fakakaukau foki ki he founga ʻoku liliu ai ʻe he hīkisiá mo e loto-fakatōkilaló ʻa e anga hoʻo feohi mo e niʻihi kehé. Fakakaukau pe ʻoku ʻi ai nai ha ngaahi liliu ʻokú ke loto ke fakahoko.
Fakakaukau ke vahevahe ha fakamoʻoni ki he founga kuo tākiekina ai ʻe hoʻo mōihuú ʻa e ongo ʻokú ke maʻu ki he ʻOtuá mo e anga hoʻo feohi mo e niʻihi kehé.