Ալմա 18

Ամմոնը ծառայում և ուսուցանում է Լամոնի թագավորին

Ամմոնը ուսուցանում է Լամոնի թագավորին

Մենք չգիտենք, թե Լամոնի թագավորն առաջին իսկ հանդիպմանն ինչու այդքան բարձր գնահատեց Ամմոնին։ Գուցե պատճառը Ամմոնի ծառայելու պատրաստակամությունն էր կամ Քրիստոսի լույսը, որ նա արտացոլում էր, կամ որ նա Մոսիա թագավորի որդին էր։ Ինչ էլ որ լինի Ամմոնից առաջին դրական տպավորության պատճառը, Լամոնին խորապես զգացված էր, թե ինչ նվիրվածությամբ էր Ամմոնը հաջորդ երեք օրերին ծառայում իրեն։ Իր այդ զգացողության շնորհիվ էր, որ Լամոնին պատրաստ էր հավատալ Ամմոնի բոլոր խոսքերին։ Այս դասը նախատեսված է օգնելու ձեզ գտնել եղանակներ, որոնցով ձեր քրիստոսանման սիրո և ծառայության միջոցով կօգնեք ուրիշներին ավելի մոտենալ Աստծուն։

Արդյունավետ օգտագործեք Եկեղեցու կողմից հաստատված դիտողական նյութերը։ Դիտողական նյութերի նպատակաուղղված օգտագործումը կընդլայնի ուսանողների հասկացողությունը և կօգնի նրանց կառուցել իրենց վկայությունները։ Կարող եք երկար տեսանյութերն ավելի կարճ հատվածների բաժանել։ Ուսանողներին առաջարկեք փնտրել վարդապետությունը և սկզբունքները և քննարկել, թե դրանք ինչպես են լուսաբանված։

Ուսանողի նախապատրաստում․ ուսանողներին առաջարկեք, որ ընկերոջը կամ ընտանիքի անդամին խնդրեն պատմել ծանոթ մարդկանց մասին, որոնք իրենց Քրիստոսանման սիրո և ծառայության միջոցով օգնել են ուրիշներին ավելի մոտենալ Աստծուն։

Հնարավոր ուսումնական վարժություններ

Քարոզեք ավետարանը

Կիսվեք հետևյալ խոսքերով կամ ցուցադրեք դրանք և ուսանողներին առաջարկեք քննարկել, թե իրենց կարծիքով, ինչ են դրանք նշանակում։ Կարող եք օգտագործել հայտարարությանը հաջորդող հարցերը, որպեսզի օգնեք զարգացնել այս քննարկումը:

Նախկինում Առաջին Նախագահությունից նախագահ Դիտեր Ֆ․ Ուխդորֆն ուսուցանել է.

Նախագահ Դիտեր Ֆ. Ուխդորֆ

Մեծագույն քարոզներից մեկը, որ երբևէ հնչել է միսիոներական աշխատանքի մասին, այս պարզ միտքն է, որը վերագրվում է Սուրբ Ֆրանցիսկ Ասսիզեցուն․ «Քարոզեք ավետարանը բոլոր ժամանակներում և, անհրաժեշտության դեպքում, օգտագործեք բառեր»: (Դիտեր Ֆ․ Ուխդորֆ, «Սպասելով Դամասկոս տանող ճանապարհին», Ensign կամ Լիահոնա, մայիս 2011 թ․, 77)։

• Ինչպե՞ս կարող ենք քարոզել ավետարանն առանց խոսքեր օգտագործելու:

• Ինչո՞ւ է այն քարոզելու այդքան հզոր միջոց հանդիսանում։

Հիսուս Քրիստոսն ավետարանի ուսուցման հիանալի օրինակ էր։

• Կարո՞ղ եք հիշել պատմություններ, որոնցում Հիսուսն օգնում է մարդկանց իմանալ Երկնային Հոր մասին, թեև շատ բան չի ասում։

Կարող եք ուսանողներին առաջարկել կիսվել օրինակներով, թե Փրկիչն ինչպես Իր օրինակով, հրաշքներով կամ ուրիշներին ծառայելու միջոցով օգնեց մարդկանց ավելի մոտենալ Երկնային Հորը։ Այդպիսի օրինակներ են Հովհաննես 11.41–45, 13.4–5, 13–15 հատվածների պատմությունները։

Ամմոնը պաշտպանում է հոտերը

Գուցե հիշեք, որ երբ Ամմոնն Իսմայելի երկրում սկսեց իր միսիան լամանացիների շրջանում, նա չսկսեց միանգամից ավետարանն ուսուցանել։ Փոխարենը նա խոստացավ թագավորին․ «ես կլինեմ քո ծառան» (Ալմա 17.25)։ Ամմոնին հանձնարարեցին հսկել թագավորի հոտերը։ Աստծո զորությամբ նա հոտերն ու այլ ծառաներին պաշտպանեց այն լամանացիներից, որոնք փորձում էին ցրել ոչխարներին։

Այսօր Ալմա 18 գլուխն ուսումնասիրելիս ուշադրություն դարձրեք, թե Ամմոնի հավատարիմ ծառայությունն ինչ ազդեցություն ունեցավ Լամոնի թագավորի վրա։ Մտածեք, թե ինչ եղանակներով կարող եք օգնել ուրիշներին ավելի մոտենալ Աստծուն՝ սիրելով և ծառայելով նրանց Քրիստոսանման ուղիներով։

Ամմոնի քրիստոսանման սիրո և ծառայության ազդեցությունը

Հետևյալ հատվածները կարելի է դասարանով միասին ուսումնասիրել, կամ ուսանողները կարող են ուսումնասիրել դրանք որևէ դասընկերոջ հետ։

Կարդացեք Ալմա 18.1–11 հատվածները և փնտրեք, թե ինչ ազդեցություն ունեցան Ամմոնի գործողությունները Լամոնի թագավորի վրա։ Կարող եք դիտել նաև «Ամմոնը պաշտպանում է թագավորի հոտերը» տեսանյութի 2:57-5:24 հատվածը՝ զուգահեռ հետևելով սուրբ գրությունների տեքստին։ Այս տեսանյութը հասանելի է ChurchofJesusChrist.org կայքում:

• Այս հատվածներից ի՞նչ տպավորություն ունեցաք Ամմոնի գործողությունների վերաբերյալ։

• Ամմոնի գործողություններն ի՞նչ ազդեցություն ունեցան թագավորի վրա։

Երբ Ամմոնն ավարտեց թագավորի ձիերի և կառքերի նախապատրաստումը, եկավ թագավորի մոտ և նկատեց, որ Լամոնիի դեմքի արտահայտությունը փոխվել էր։ Հոգու միջոցով Ամմոնը հասկացավ թագավորի մտքերը և իմացավ, որ Լամոնին հիանում էր, թե ինքն ինչպես է զարմանահրաշ կերպով պաշտպանել թագավորի հոտերը (տես Ալմա 18.12–19)։

Կարդացեք Ալմա 18.20–23 հատվածները և գտեք, թե ինչ էր ցանկանում Լամոնին։ Ձեր սուրբ գրքերին հետևելուն զուգընթաց կարող եք դիտել նաև «Ամմոնը Լամոնի թագավորին ուսուցանում է Հիսուս Քրիստոսի ավետարանը» տեսանյութի 0:23-1:56 հատվածը։ Այս տեսանյութը հասանելի է ChurchofJesusChrist.org կայքում:

• Ըստ ձեզ՝ Ամմոնի քրիստոսանման սերն ու ծառայությունը ի՞նչ դեր խաղացին, որ թագավորը պատրաստակամություն ունեցավ հավատալու Ամմոնի խոսքերին։

Ճշմարտություններից մեկը, որ կարող ենք սովորել այս պատմությունից, այն է, որ մեր քրիստոսանման սիրո և ծառայության միջոցով Աստված մեր ծառայությունն ունեցող մարդկանց սրտերը կարող է պատրաստել ավետարանի ճշմարտությունները ստանալուն։

Կարող եք ուսանողներին առաջարկել փոքր խմբով քննարկել հետևյալ հարցը։ Այնուհետև, յուրաքանչյուր խմբի անդամները կարող են դասարանի հետ կիսվել իրենց պատասխաններից մի քանիսով։

• Ի՞նչ եղանակներով կարող ենք մեր քրիստոսանման սիրո և ծառայության միջոցով օգնել ուրիշներին ավելի մոտենալ Աստծուն։

Հնարավորության դեպքում կիսվեք մի օրինակով, երբ տեսել եք, որ ինչ-որ մեկի քրիստոսանման սիրո և ծառայության շնորհիվ մարդիկ ավելի են մոտեցել Աստծուն։ Կարող եք ուսանողներին խնդրել նաև, որպեսզի մտածեն և կիսվեն իրենց տեսած օրինակներով։

Ամմոնը Լամոնիին ուսուցանում է ավետարանի ճշմարտությունները

Ելնելով ձեր ուսանողների կարիքներից և ունակություններից՝ որոշեք, թե արդյոք ուսանողների համար լավագույնը կլինի ուսումնասիրել հետևյալ հատվածները՝ դասարանով, դասընկերոջ հետ, թե ինքնուրույն։

Կարդացեք Ալմա 18.24–43 հատվածները և գտեք, թե Ամմոնն ինչ էր ուսուցանում Լամոնիին։ Կարող եք թվարկել գտածը՝ ուշադրություն դարձնելով «պատմեց», «մեկնաբանեց» և «ասաց» բառերին։ Ձեր սուրբ գրքերում հետևելուն զուգընթաց կարող եք դիտել նաև «Ամմոնը Լամոնի թագավորին ուսուցանում է Հիսուս Քրիստոսի ավետարանը» տեսանյութի 1:56-5:41 հատվածը, որը հասանելի է ChurchofJesusChrist.org կայքում։

• Ամմոնն ի՞նչ կարևոր ճշմարտություններ օգնեց Լամոնիին հասկանալ։

  Կարող եք ուսանողներին հանձնարարել գրատախտակին թվարկել նախորդ հարցի իրենց պատասխանները։ Ուսանողները կարող են միսիոներների կողմից այսօր ուսուցանվող ճշմարտությունները նշել աստղանիշով։

• Այդ ճշմարտություններն ի՞նչ ազդեցություն ունեցան Լամոնիի վրա։

• Ինչո՞ւ է կարևոր, որ մենք այսօր հասկանանք այդ ճշմարտությունները։

«Լրացուցիչ ուսումնական վարժություններ» բաժնում կան առաջարկներ, որոնք կարող են օգնել ուսանողներին հասկանալ այն ճշմարտությունների կարևորությունը, որոնք Ամմոնն ուսուցանում էր թագավորին այդ հատվածներում։

Չնայած լամանացիներից շատերը կարծում էին, որ գետնին ընկնելով Լամոնին մահացել էր, բայց Ամմոնը օգնեց նրանց հասկանալ, որ թագավորն «Աստծո զորության ներքո էր» կամ «տարված էր Աստծով» (Ալմա 19.6)։ Լամոնիի դարձի գալու մասին կիմանաք ավելին, երբ ուսումնասիրեք Ալմա 19 գլուխը։

Կիրառեք ձեր սովորածը

Ուսանողներին ժամանակ տվեք մտածելու, թե ինչպես կարող են կիրառել այսօր ուսումնասիրած ճշմարտությունները։ Օգտակար կլինի ցուցադրել ստորև ներկայացվող ցուցումները և առաջարկել ուսանողներին օրագրերում գրել իրենց պատասխանները։ Հետո կարող եք մի քանի ուսանողի առաջարկել կիսվել իրենց նպատակներից կամ ծրագրերից մի քանիսով՝ առանց նշելու այն մարդկանց անունները, որոնց մասին մտածել են։

Մտածեք մեկի մասին, որին, կարծում եք, որ կարող եք օգնել ավելի մոտենալ Աստծուն Քրիստոսանման սիրո և ծառայության միջոցով։

• Ինչպե՞ս կարող եք ծառայել այդ մարդուն կամ քրիստոսանման սեր տածել նրա հանդեպ։

• Ձեր ջանքերն ինչպե՞ս կարող են օգնել այդ մարդուն ավելի մոտենալ Աստծուն։

• Ի՞նչ խոչընդոտներ եք տեսնում, որոնք կարող են դժվարություն ստեղծել այդ մարդուն մաքուր սիրով ծառայելու հարցում։ Ինչպե՞ս կարող եք հաղթահարել այդ խոչընդոտները:

Բացատրական և պատմական տեղեկություններ

Ուրիշներին ծառայելն ինչո՞ւ կարող է ավետարանով կիսվելու արդյունավետ միջոց լինել։

Առաջին նախագահությունից նախագահ Հենրի Բ. Այրինգը խոսել է այն մասին, թե ինչու էր կարևոր Ամմոնի կողմից թագավորի ձիերի նախապատրաստումը՝ նրա հոտերը հաջողությամբ պաշտպանելուց հետո։ Նախագահ Այրինգն ասել է․

Նախագահ Հենրի Բ. Այրինգ

Մի՞թե տարօրինակ չէ։ Նրան կանչել էին փրկության վարդապետությունն ուսուցանելու, իսկ նա ախոռում էր։ Չե՞ք կարծում, որ նա պետք է աղոթեր ու ծոմ պահեր և իր ուսուցման ծրագիրը մշակեր։ Ոչ, նա ախոռում էր։ …

… Երբեք, երբեք մի թերագնահատեք ժամանակավոր բաները լավ անելու հոգևոր արժեքը, երբ ծառայում եք ինչ-որ մեկին։

… Եղեք նրանց ծառաները և կսիրեք նրանց։ Եվ նրանք կզգան ձեր սերը։ Եվ որ ավելի կարևոր է, նրանք կզգան Աստծո սերը: (Հենրի Բ. Այրինգ, «Մորմոնի Գիրքը կփոխի ձեր կյանքը», Ensign, փետրվար 2004 թ․, 13–14)

Արդյո՞ք ես պետք է միայն ծառայեմ ուրիշներին, որպեսզի նրանք ընդունեն ավետարանը։

Այն ժամանակ Առաջին նախագահության նախագահ Դիտեր Ֆ․ Ուխդորֆն ասել է․

Նախագահ Դիտեր Ֆ. Ուխդորֆ

Փրկիչը սիրում է Աստծո բոլոր զավակներին՝ անկախ նրանց սոցիալ-տնտեսական պայմաններից, ռասայից, կրոնական պատկանելությունից, լեզվից, քաղաքական կողմնորոշումից, ազգությունից կամ ցանկացած այլ խմբավորմանը պատկանելուց։ Եվ մենք նույնպես պետք է այդպես անենք։

Աստծո ամենամեծ պարգևը տրվում է նրանց, ովքեր ծառայում են առանց հատուցում ակնկալելու։ Այն տրվում է նրանց, ովքեր ծառայում են առանց աղաղակելու, ովքեր լուռ ուրիշներին օգնելու միջոցներ են փնտրում, ովքեր ծառայում են ուրիշներին պարզապես այն պատճառով, որ սիրում են Աստծուն և Աստծո զավակներին: (Դիտեր Ֆ. Ուխդորֆ, «Ամենամեծը ձեզնից», Ensign կամ Լիահոնա, մայիս 2017 թ․, 79–80)

Մեր օրերում ի՞նչ օրինակներ կան, երբ մարդիկ ուրիշների Քրիստոսանման սիրո միջոցով ավելի են մոտեցել Աստծուն։

Դիտեք «Սիրո փոխակերպիչ ուժը» տեսանյութը (5:08), որտեղ երեք երիտասարդի օրինակով կտեսնեք, թե նրանք ուրիշներից զգացած սիրո շնորհիվ ինչպես ներքաշվեցին Եկեղեցու կյանք, տեսանյութը հասանելի է ChurchofJesusChrist.org կայքում։

Օժանդակ ուսումնական վարժություններ

Հիմնվեք ընդհանուր համոզմունքների վրա

Ուսանողները կարող են ուսումնասիրել Ալմա 18.24–32 հատվածները և փնտրել, թե Ամմոնն ինչպես օգտագործեց Լամոնի թագավորի համոզմունքները՝ ավետարանի ճշմարտություններն ուսուցանելու համար։ Կարող եք օգտագործել Քևինի պատմությունը, որը Երիտասարդ կանանց գերագույն նախագահ Բոննի Հ․ Քորդոնը պատմել էր իր «Որ նրանք կարողանան տեսնել» ելույթում (Ensign կամ Լիահոնա, մայիս, 2020 թ․, 79–80)։

Ուսանողները կարող են քննարկել ընդհանուր համոզմունքների վրա հիմնվելու արժեքը։ Հետո նրանք կարող են մտածել, թե ինչ նմանություններ կան իրենց և ընտանիքի անդամների կամ այլ հավատք ունեցող ընկերների համոզմունքների միջև։ Նրանք ինչպե՞ս կարող են հիմնվել այդ համոզմունքների վրա, որպեսզի օգնեն իրենց ընտանիքի անդամներին կամ ընկերներին հասկանալ Հիսուս Քրիստոսի վերականգնված ավետարանի ճշմարտությունները։

Ալմա 18.36–43 Մենք Փրկչի կարիք ունենք

Բացատրեք, որ Ալմա 18.36–39 հատվածներում Ամմոնի մոտեցումն օրինաչափություն է, որը միսիոներներն այսօր օգտագործում են, որպեսզի ուսուցանեն, որ երբ մենք հասկանում ենք, որ ունենք Փրկչի կարիքը, մենք ցանկանում ենք ապաշխարել։ 36–43 հատվածները կարդալուց հետո ուսանողները կարող են բացահայտել և քննարկել հետևյալ գաղափարներից մի քանիսը․

• Փրկագնման ծրագրի ի՞նչ տարրեր է ուսուցանում Ամմոնը։

• Ի՞նչ ազդեցություն ունեցան այս ուսմունքները Լամոնիի վրա։ Ի՞նչ էր նա պատրաստ անել ուսմունքները ստանալուց հետո։

• Ի՞նչ եք կարծում, ինչո՞ւ է կարևոր ուսուցանել Արարման և Անկման մասին, երբ ուսուցանում ենք Հիսուս Քրիստոսի Քավության մասին:

Նախագահ Ռասսել Մ. Նելսոնն ուսուցանել է․

Նախագահ Ռասսել Մ. Նելսոն

Նախքան մենք կկարողանանք ըմբռնել Քրիստոսի Քավությունը, … մենք պետք է նախ հասկանանք Ադամի անկումը։ Եվ նախքան մենք կկարողանանք հասկանալ Ադամի անկումը, մենք պետք է նախ հասկանանք Արարումը։ Փրկության ծրագրի այս երեք կարևոր բաղադրիչները փոխկապակցված են (Ռասսել Մ. Նելսոն, «Քավությունը», Ensign, նոյեմբեր 1996 թ․, 33)։