Toe Vakaiʻi Hono 11 ʻo e Fakataukei Fakatokāteliné

Ako Maʻuloto pea Mahino

tokotaha ako ʻoku hiki hono nimá ke fai ha fehuʻi

ʻE lava ke fakaafeʻi ʻe hono ako maʻuloto ʻo e ngaahi potufolofola fakataukei fakatokāteliné mo hono maʻu ha mahino ki he tokāteline ʻoku akoʻi aí, ʻa e Laumālie Māʻoniʻoní ki hoʻo moʻuí pea tokoniʻi koe ke ke hoko ʻo tatau ange mo Sīsū Kalaisí. ʻOku fakataumuʻa ʻa e lēsoni ko ʻení ke tokoni atu ke ke ako maʻuloto e ngaahi kupuʻi lea folofola mahuʻinga mei he fuofua potufolofola fakataukei fakatokāteline ʻe 12 ʻo e Tohi ʻa Molomoná pea fekumi ki ha mahino lahi ange ʻaki hano ʻeke mo tali ha ngaahi fehuʻi ʻoku ueʻi fakalaumālié.

Tokoniʻi e kau akó ke fakatupulaki ʻenau ngaahi taukei ako folofolá. Poupouʻi e kau akó ke nau ʻeke ha ngaahi fehuʻi ʻi he kalasí pea ʻi he lolotonga ʻenau ako fakatāutahá. ʻE lava ke fakatupulaki ʻe he ako ke ʻeke ha ngaahi fehuʻi mo fekumi ki ha ngaahi tali mei he folofolá ʻa e aʻusia fakaako ʻa ha tokotaha ako. Tokoni ke mahino ki he kau akó ʻoku kaunga ʻa e folofolá ki he ngaahi fehuʻi mo e ngaahi faingataʻa ʻoku nau lolotonga fehangahangai mo iá, ʻo tatau ai pē pe ʻoku lahi pe siʻisiʻi.

Teuteu ʻa e tokotaha akó: Fakaafeʻi ʻa e kau akó ke fili mei he ʻuluaki potufolofola fakataukei fakatokāteline ʻe 12 te nau fie ako lahi ange ki aí. Poupouʻi ke nau omi mateuteu ki he kalasí ke vahevahe ʻa e potufolofola naʻa nau filí pea mo ha fehuʻi ʻe taha ʻoku nau ongoʻi ʻe lava ʻo tokoni ke nau ako lahi ange fekauʻaki mo e potufolofola ko iá.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakavāhengá pe vahefonuá pe kouʻōtineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá ʻi he lele ʻa e seminelí.

Ako maʻuloto e ngaahi fakamoʻoni fakafolofolá mo e ngaahi kupuʻi lea mahuʻinga he folofolá

Fakakaukau ke fakaʻaliʻali pe ʻoange ki he kau akó ʻa e laʻipepa tufa ko ʻení pea fakaafeʻi ke nau toe vakaiʻi ʻa e ngaahi potufolofolá mo e ngaahi kupuʻi lea mahuʻinga ʻo e folofolá. Hili ha ngaahi miniti siʻi, vakai ki he tuʻunga lelei hono ako maʻuloto ʻe he kau akó ʻa e ngaahi potufolofolá ʻaki hano lau ha kupuʻi lea folofola mahuʻinga pea tuku ke nau kumi ʻa e potufolofolá ʻi heʻenau folofolá. Toutou fai ʻeni ki ha ngaahi potufolofola kehekehe. Hili iá te ke lava ʻo lau leʻolahi ha taha ʻo e ngaahi kupuʻi lea folofola mahuʻingá, pea toutou taʻofi fakataimi kae fakaʻatā ʻa e kau akó ke nau hiki ʻi heʻenau tohinoá ʻa e foʻi lea pe ngaahi foʻi lea hono hokó. Toutou fai ʻeni ʻaki hano fakaʻaongaʻi ha ngaahi kupuʻi lea mahuʻinga kehekehe mei he folofolá. Tuku ke fakaʻilongaʻi ʻe he kau akó ʻa e ngaahi potufolofola fakataukei fakatokāteline te nau loto ke toe fakamanatu lahi angé.

ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá

Tohi ʻa Molomoná – Tohi Lēsoni ʻa e Faiakó (2024)

Potufolofolá	Kupuʻi Lea Fakafolofola Mahuʻingá
Potufolofolá 1 Nīfai 3:7	Kupuʻi Lea Fakafolofola Mahuʻingá “Te u ʻalu ʻo fai ʻa e ngaahi meʻa kuo fekau ʻe he ʻEikí.”
Potufolofolá 2 Nīfai 2:25	Kupuʻi Lea Fakafolofola Mahuʻingá “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.”
Potufolofolá 2 Nīfai 2:27	Kupuʻi Lea Fakafolofola Mahuʻingá “ʻOku nau tauʻatāina ke fili ʻa e tauʻatāiná mo e moʻui taʻengatá … pe … pōpulá mo e maté.”
Potufolofolá 2 Nīfai 26:33	Kupuʻi Lea Fakafolofola Mahuʻingá “ʻOku tatau ʻa e kakai fulipē ʻi he ʻao ʻo e ʻOtuá.”
Potufolofolá 2 Nīfai 28:30	Kupuʻi Lea Fakafolofola Mahuʻingá ʻE foaki ʻe he ʻOtuá “ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
Potufolofolá 2 Nīfai 32:3	Kupuʻi Lea Fakafolofola Mahuʻingá “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.”
Potufolofolá 2 Nīfai 32:8–9	Kupuʻi Lea Fakafolofola Mahuʻingá “Kuo pau ke mou lotu maʻu ai pē.”
Potufolofolá Mōsaia 2:17	Kupuʻi Lea Fakafolofola Mahuʻingá “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
Potufolofolá Mōsaia 2:41	Kupuʻi Lea Fakafolofola Mahuʻingá “[Ko] kinautolu ʻoku tauhi ʻa e ngaahi fekau ʻa e ʻOtuá … ʻoku nau monūʻia ʻi he meʻa kotoa pē.”
Potufolofolá Mōsaia 3:19	Kupuʻi Lea Fakafolofola Mahuʻingá “Liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí.”
Potufolofolá Mōsaia 4:9	Kupuʻi Lea Fakafolofola Mahuʻingá “Tui pē ki he ʻOtuá; … tui ʻokú Ne maʻu ʻa e poto kotoa.”
Potufolofolá Mōsaia 18:8–10	Kupuʻi Lea Fakafolofola Mahuʻingá Ke “papitaiso ʻa kimoutolu ʻi he huafa ʻo e ʻEikí, ko e fakamoʻoni … kuo mou fai ha fuakava mo ia.”

Ko hono ʻeke ha ngaahi fehuʻi kuo ueʻi fakalaumālié

ʻOku hoko ʻa e ngaahi fehuʻi kuo ueʻi fakalaumālié ko ha konga mahuʻinga ʻo e founga akó. Lolotonga e ngāue fakafaifekau ʻa e Fakamoʻuí ʻi he māmaní, naʻá Ne faʻa ʻeke ha ngaahi fehuʻi naʻá ne fakaafeʻi ʻa e kau akó ke nau fakakaukau, ongoʻi, mo ngāueʻi e ngaahi moʻoni naʻá Ne akoʻí (vakai ki he Mātiu 16:13–16; Sione 6:66–69). Mahalo kuó ke fakatokangaʻi hano ʻekei atu ʻe ha mātuʻa, faiako, pe taki ʻo e Siasí ha ngaahi fehuʻi naʻá ne tokoniʻi koe ke ke maʻu ha mahino lelei ange ki he ongoongoleleí pe fakafelāveʻi ʻa e meʻa ʻokú ke akó ki hoʻo moʻuí. ʻE lava ʻe hono ʻeke mo tali ʻa e ngaahi fehuʻi ueʻi fakalaumālié ʻo ʻai e akó ke hoko ko ha aʻusia fakamānako mo ʻuhingamālie ange kiate koe.

Fakakaukau ke hiki ʻa e faʻahinga ʻe tolu ko ʻeni ʻo e fehuʻí ʻi he palakipoé. Ke teuteuʻi e kau akó ki he ʻekitivitií, fili ha taha ʻo e ʻuluaki potufolofola fakataukei fakatokāteline ʻe 12 pea faʻu ha fehuʻi mei he potufolofola ko iá ki he faʻahinga takitaha ʻo e ngaahi fehuʻí. Te ke lava foki ʻo fakaafeʻi ʻa e kau akó ke nau fokotuʻu mai ha ngaahi fehuʻi ki he faʻahinga takitaha. ʻOku ʻoatu ha ngaahi sīpinga fehuʻi ʻo fakaʻaongaʻi ʻa e 2 Nīfai 32:8–9.

Ko e ngaahi sīpinga ʻeni ʻo e faʻahinga fehuʻi kehekehe ʻe lava ke fakaʻaongaʻi ʻi hono ako ʻo e folofolá. ʻOku fekauʻaki ʻa e sīpinga fehuʻí mo e ngaahi moʻoni ʻoku akoʻi ʻi he 2 Nīfai 32:8–9.

Ngaahi fehuʻi ke tokoni ke mahino kiate koe ʻa e puipuituʻa ʻo e ngaahi folofolá

• Ko hai ʻoku lea ʻi he 2 Nīfai 32:8–9?

• Ko ʻene leá kia hai? Ko e hā hono ʻuhingá?

Ngaahi fehuʻi ke tokoni ke mahino kiate koe ʻa e kakano pe ʻuhinga ʻo e folofolá

ʻE lava ke tokoni ʻa e ngaahi fehuʻi ko ʻení ke tau ʻiloʻi ʻa e tokāteliné mo e ngaahi tefitoʻi moʻoní.

• Ko e hā e meʻa naʻe loto ʻa e tokotaha tohí ke tau akó?

• ʻOkú ke pehē ko e ʻuhinga ki he hā ke “lotu maʻu ai pē, pea ʻoua naʻa fiú”? (2 Nīfai 32:9).

Ngaahi fehuʻi ke tokoni ke mahino kiate koe ʻa e tokāteline mo e ngaahi tefitoʻi moʻoni ʻi he folofolá

• ʻOkú ke pehē ʻe lava fēfē ʻe he lotu maʻu peé ʻo tākiekina hotau vā fetuʻutaki mo e Tamai Hēvaní?

• Ko e hā ha meʻa ʻe ala tokoni ke tau manatuʻi ke lotu maʻu ai pē, ʻo aʻu ki he taimi ʻoku ʻikai ke tau ongoʻi ʻoku tau fie lotu aí?

Hili hono fakatātaaʻi ha ngaahi sīpinga ʻo ha ngaahi fehuʻi mo e kau akó, fakakaukau ke vahevahe kinautolu ke tautau toko ua pe fakakulupu iiki ki he ʻekitivitī ko ʻení:

Tuku ke fili ʻe he kau akó ʻi heʻenau kulupú ha taha ʻo e ngaahi ʻuluaki potufolofola fakataukei fakatokāteline ʻe 12 pea lau fakataha ʻa e potufolofolá kakato. Hili iá pea te nau lava ʻo faʻu ha fehuʻi ʻe taha pe lahi ange mei he faʻahinga takitaha ʻe tolu ʻi he palakipoé. ʻI he ʻosi hono faʻu ʻe he kau akó ʻenau fehuʻi ʻe tolú, ʻai ke nau fakataha mo ha hoa pe kulupu ʻe taha. Fakaafeʻi e hoa pe kulupu ʻuluakí ke vahevahe ʻenau potufolofola mo e ngaahi fehuʻi kuo filí, pea fakaafeʻi e hoa pe kulupu hono uá ke nau tali e fehuʻi takitaha. Hili iá pea ʻai ʻa e kau akó ke nau fetongi.

Kapau ʻoku toe lahi e taimí, toe fai ʻa e ʻekitivitií mo e kulupu takitaha ʻo fili ha potufolofola kehe.

Poupouʻi e kau akó ke nau fakaʻaongaʻi e taukei ʻo e ʻeke fehuʻí lolotonga ʻenau ako fakatāutahá pea ʻi he kalasí.