“Mosiah 21–24, Bahin 2: Pagdangop sa Ginoo alang sa Kaluwasan gikan sa mga Pagsulay,” Manwal sa Magtutudlo sa Basahon ni Mormon (2024)
“Mosiah 21–24, Part 2,” Manwal sa Magtutudlo sa Basahon ni Mormon
Mosiah 21–24, Bahin 2
Pagdangop sa Ginoo alang sa Kaluwasan gikan sa mga Pagsulay
Unsaon nimo pagsanong kon makasinati ka og mga pagsulay ug mga kalisdanan? Ngano kaha sa imong hunahuna nga ang ubang mga tawo mas napaduol ngadto sa Ginoo samtang ang uban miatras gikan Kaniya? Sa Mosiah 21–24, atong nahibaloan nga ang mga katawhan ni Limhi ug ang mga katawhan ni Alma midangop sa Ginoo alang sa kalig-on ug kaluwasan gikan sa pagkabihag. Kini nga leksiyon gituyo sa pagtabang kanimo nga mosalig sa Langitnong Amahan ug ni Jesukristo aron matabangan ka sa paglatas sa imong mga pagsulay.
Tabangi ang mga estudyante sa pag-ila sa impluwensiya sa Ginoo sa ilang mga kinabuhi.Samtang magkat-on ang mga estudyante kon sa unsang paagi gipanalanginan sa Manluluwas ang mga tawo diha sa mga kasulatan, tabangi sila nga makaila usab sa tahas nga Iyang gihimo sa ilang mga kinabuhi. Dapita ang mga estudyante sa pagpamalandong kon sa unsang paagi sila gitabangan sa Manluluwas pinaagi sa pagtanyag og pagkaayo ug paghatag kanila og kalig-on.
Pagpangandam sa estudyante: Mahimong makig-istorya ang mga estudyante sa usa ka sakop sa pamilya mahitungod sa usa ka pagsulay o kasakit nga nasinati sa sakop sa pamilya ug mga paagi nga ang Ginoo milig-on kaniya sa paglahutay niini.
Mga Posibleng Kalihokan sa Pagkat-on
Kini ang ikaduha sa duha ka mga leksiyon nga naghisgot sa Mosiah 21–24. Kon wala pa nimo kini mahimo, itudlo ang Bahin 1 sa dili pa kini nga leksiyon. Kon ang oras sa klase limitado ug usa lamang ka leksiyon sa Mosiah 21–24 ang matudlo, ikonsiderar kon sa unsang paagi ang duha ka leksiyon mahimong epektibong mahiusa.
Pagsanong sa mga pagsulay
Ang mosunod nga kalihokan gituyo aron sa pagtabang sa mga estudyante sa paghimo og pipila ka pagsukod sa kaugalingon mahitungod sa pagsulay nga ilang kasamtangang gisinati o nasinati na. Mahimo nimong iapil ang pipila ka mga aghat sa pagsulat o mga pangutana diha sa pisara aron sa paggiya sa mga estudyante samtang ilang irekord ang ilang mga hunahuna. Ang mga estudyante dili kinahanglan nga mopaambit sa ilang mga tubag niini nga higayon sa leksiyon.
Sa miaging leksiyon, gidapit ka sa paghunahuna mahitungod sa pagsulay nga imong kasamtangang gisinati o nasinati na. Tingali nakakat-on ka og pipila ka mga kamatuoran sa imong pagtuon sa Mosiah 21–24 nga nakatabang nimo nga masabtan kon nganong gitugotan ka sa Ginoo nga makasinati og mga pagsulay. Karon, hunahunaa pag-usab ang imong mga pagsulay, apan niining higayona hunahunaa kon giunsa nimo kini pagsanong. Mahimo nimong irekord ang mga babag o mga kalamposan nga imong nasinati ug ang mga paagi nga imong gibati ang impluwensiya o mga panalangin sa Ginoo.
Ang gahom sa Ginoo sa pagluwas
Ikonsiderar ang pagdapit og usa o daghang mga estudyante sa pagpamubo sa unsay ilang nahinumduman gikan sa miaging leksiyon mahitungod sa pagkabihag sa mga katawhan ni Limhi ug sa mga katawhan ni Alma. Kon gikinahanglan, ang mosunod nga pagpamubo mahimong magamit.
Mahimo nimong hinumduman ang pagtuon sa mga katawhan ni Limhi (sa yuta sa Nephi) ug sa mga katawhan ni Alma (sa yuta sa Helam). Silang duha nakasinati og lisod nga mga pagsulay samtang nabihag sa mga Lamanite. Kini nga hulagway nagpakita sa ilang mga panaw sa Mosiah 21–24.
Karong adlawa imong makat-onan kon sa unsang paagi giluwas sa Ginoo ang duha ka grupo sa mga tawo gikan sa pagkaulipon ug paingon ngadto sa yuta sa Zarahemla. Samtang magtuon ka, hinumdomi ang imong mga pagsulay ug pangitaa ang mga kamatuoran nga makatabang nimo sa pag-ila sa mga paagi nga gigamit sa Ginoo ang Iyang gahom sa pagluwas diha sa imong kinabuhi.
Ang mosunod nga kalihokan gituyo aron sa pagtabang sa mga estudyante nga makat-on mahitungod sa kaluwasan sa mga katawhan ni Limhi ug sa katawhan ni Alma. Mahimong makatabang nga bahinon ang klase ngadto sa gagmay nga mga grupo ug i-assign kini nga mga grupo sa pagtuon sa bisan hain sa mga katawhan ni Limhi o sa katawhan ni Alma. Mahimo dayon nga ipamubo sa mga estudyante ang ilang mga asoy ug ipaambit ang makahuluganon nga mga bersikulo o ang mga hugpong sa mga pulong ug ang mga baroganan nga mipatigbabaw diha kanila.
Himoa ang mosunod nga tsart diha sa imong journal sa pagtuon. Seguroha nga magbilin og dakong luna aron marekord ang daghang mga tubag sa matag kahon.
Mosiah 21–24: Kalig-on ug Kaluwasan
Manwal sa Magtutudlo sa Basahon ni Mormon (2024)—”Mosiah 21–24, Bahin 2: Modangop ngadto sa Ginoo alang sa Kaluwasan gikan sa mga Pagsulay”
|
Mga katawhan ni Limhi |
Mga katawhan ni Alma | |
|---|---|---|
|
Unsay gibuhat sa mga tawo aron makadawat sa tabang sa Ginoo? | ||
|
Sa unsang paagi nalambigit ang Ginoo sa ilang kaluwasan? | ||
|
Unsa ang pipila ka paborito nga mga hugpong sa mga pulong nga angay hinumdoman gikan niini nga mga bersikulo? |
© 2023 by Intellectual Reserve, Inc. All rights reserved.
Human ang mga estudyante adunay igong panahon sa pagtuon, dapita sila sa pagpaambit sa ilang mga tubag sa mga pangutana nga gilista diha sa tsart. Siguroha nga tugotan ang daghang mga estudyante sa pagpaambit sa ilang mga panabot.
-
Unsa ang pipila sa mga gibuhat sa mga tawo aron makadawat sa tabang sa Ginoo?
-
Unsa ang imong nakat-onan mahitungod sa Ginoo ug sa Iyang gahom samtang ikaw nagtuon niini nga mga asoy?
-
Unsa ang paborito nga hugpong sa mga pulong nga imong naila gikan sa usa sa mga bersikulo nga imong gitun-an?
Pag-ila ug pagmaya sa gahom sa Ginoo
Sa mga daghang mga kamatuoran nga atong makat-onan gikan niini nga mga bersikulo, tingali namatikdan nimo gikan sa imong mga pagtuon nga samtang kita modangop ngadto Kaniya, ang Langitnong Amahan mopaluyo kanato atol sa atong mga pagsulay ug moluwas kanato sa Iyang panahon (tan-awa sa Mosiah 21:14–16). Nakat-onan usab nato nga kon atong lahutayon ang atong mga pagsulay nga malipayon ug mapailubon, ang Ginoo makapalig-on kanato sa pagpas-an sa atong mga palas-anon nga may kasayon (tan-awa sa Mosiah 24:15).
-
Sa unsang paagi nga ang pagkahibalo niini nga mga butang mahitungod sa Ginoo makaimpluwensiya kon unsaon nimo pagsanong ang imong mga pagsulay?
-
Sa unsang paagi ang Ginoo misuporta ug milig-on kanimo o sa usa ka tawo nga imong nailhan sa paglahutay sa pagsulay o pagpas-an sa palas-anon? Sa unsang paagi kini nga kasinatian nakaapekto sa imong mga pagbati alang Kaniya?
Ikonsiderar ang pagpaambit og personal nga ehemplo isip kabahin sa panaghisgotan sa miaging pangutana.
ChurchofJesusChrist.org
Imong sunod nga mga lakang
Human sa paghatag sa mosunod nga mga instruksiyon, ikonsiderar ang pagpakita diha sa pisara sa mga pangutana nga tubagon sa mga estudyante aron ilang makita ang mga pangutana samtang sila magsulat.
Pamalandongi ang imong nakat-onan karon nga makatabang nimo sa mga pagsulay nga imong giatubang.
Pagdugang og bag-ong kolum sa tsart nga imong gihimo sa sayo pa sa leksiyon ug butangi og label ang ibabaw nga laray niini nga kolum og “Ako.” Dayon kompletoha ang imong bag-ong kolum pinaagi sa pagtubag sa mosunod nga mga pangutana. (Kon wala kay luna sa paghimo og bag-ong kolum, tubaga ang mga pangutana sa lain nga luna sa imong journal sa pagtuon.)
-
Unsay buhaton nimo aron makadawat og dugang nga tabang sa Ginoo sa imong mga pagsulay?
-
Unsa ang imong nakat-onan mahitungod sa Ginoo karon nga makatabang kanimo nga makasabot sa matang sa tabang o kalig-on nga Iyang mahatag kanimo?
-
Unsa nga mga pulong o mga hugpong sa mga pulong gikan sa mga bersikulo nga imong gitun-an ang imong gihunahuna nga may kalabotan sa imong mga kahimtang? Ngano man?
Ikonsiderar ang pagdapit og pipila ka mga boluntaryo sa pagpaambit sa ilang mga tubag sa miaging mga pangutana. Pagpamatuod sa mga kamatuoran nga inyong gihisgotan karon ug sa gahom sa Ginoo sa pagluwas kanato gikan sa atong mga kasakit.