Doktrinal nga Kahanas: Mosiah 18:8–10

“Kamo Nakasulod ngadto sa usa ka Pakigsaad uban Kaniya”

Alma nagbunyag diha sa mga tubig sa Mormon

Sa miaging leksiyon, imong nakat-onan kon sa unsang paagi ang atong pakigsaad sa bunyag uban sa Manluluwas makaapekto sa paagi sa atong pagpuyo sa atong kinabuhi. Kini nga leksiyon makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Mosiah 18:8–10, mapasabot ang doktrina nga gitudlo niadto nga mga bersikulo, ug magamit ang mga baroganan sa pag-angkon og espirituhanong kahibalo sa tinud-anay nga mga senaryo gamit niini nga tudling sa kasulatan.

Pagtudlo sa mga estudyante sa mga baroganan sa pag-angkon og espirituhanong kahibalo.Mas makab-ot sa mga estudyante ang mga katuyoan sa doktrinal nga kahanas kon ilang mahibaloan ug masabtan ang mga baroganan sa pag-angkon og espirituhanong kahibalo. Seguradoha nga matabangan ang mga estudyante nga makasabot niini nga mga baroganan ug kanunay nga magrebyo niini.

Pagpangandam sa estudyante: Ikonsiderar ang pagdapit sa mga estudyante sa pagsulay sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Mosiah 18:8–10.

Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Mosiah 18,” nga mao ang pangkonteksto nga leksiyon alang sa tudling sa doktrinal nga kahanas sa Mosiah 18:8–10. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Gamita ang bisan unsa nga epektibong paagi aron matabangan ang mga estudyante nga makasag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan sa Mosiah 18:8–10 ug sa pagpasabot sa mga kamatuoran nga makita niini nga tudling. Ang mosunod nga mga kalihokan mao ang mga sugyot kon unsaon sa pagbuhat niini.

Sa dili pa magklase, isulat ang mga pulong sa mahinungdanon nga hugpong sa mga pulong sa kasulatan sa Mosiah 18:8–10 diha sa pisara nga nagkasagol-sagol ang paghan-ay. Hangyoa ang mga estudyante sa paghan-ay sa hugpong sa mga pulong diha sa ilang mga journal sa pagtuon ug dayon paghangyo og boluntaryo sa pagsulat niini sa hustong pagkahan-ay diha sa pisara apil ang pakisayran sa kasulatan. Kon gikinahanglan, dapita ang mga miyembro sa klase nga motabang.

Ang mahinungdanon nga hugpong sa mga pulong sa Mosiah 18:8–10 mao ang “‘Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.’”

Ang laing kapilian mao ang pagsulat og mga bahin sa mahinungdanon nga hugpong sa mga pulong sa kasulatan sa lain-lain nga mga piraso sa papel ug ibutang ang mga papel diha sa pisara sa gisagol-sagol nga pagkahan-ay. Dayon ang mga estudyante mahimong moduol sa pisara ug ihan-ay pag-usab ang mga papel sa saktong pagkasunod-sunod.

Han-aya ang pakisayran ug mahinungdanon nga hugpong sa mga pulong sa kasulatan sa ubos alang sa Mosiah 18:8–10 pinaagi sa pagsulat niini sa imong journal sa pagtuon sa saktong pagkasunod-sunod. Kon gikinahanglan, susiha ang imong pagkatukma pinaagi sa pagtan-aw sa lista sa mga pakisayran sa doktrinal nga kahanas ug sa mahinungdanon nga mga hugpong sa mga pulong sa kasulatan diha sa kataposan sa Mahinungdanon nga Dokumento sa Doktrinal nga Kahanas (2022).

Human nimo masulat ang husto nga hugpong sa mga pulong, paggahin sa makadiyot sa pagsulay sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan pinaagi sa pagsulti niini sa pipila ka mga higayon.

Sa miaging leksiyon, imong nakat-onan nga kon kita bunyagan, kita mosulod ngadto sa usa ka pakigsaad uban sa Dios nga kita moserbisyo Kaniya ug maghupot sa Iyang mga sugo. Handurawa nga gihangyo ka nga mamulong diha sa bunyag sa otso anyos nga bata mahitungod sa pakigsaad nga iyang gihimo. Irekord kon sa unsang paagi ang Mosiah 18:8–10 makatabang kanimo sa pagpasabot sa pakigsaad ug sa unsang paagi ang pagtuman sa pakigsaad makatabang sa bata nga mahimong mas mahisama ni Jesukristo.

Kon mahuman na ang mga estudyante sa pagsulat, dapita sila nga ipaambit ngadto sa usa ka klasmeyt ang ilang gisulat. Dayon pagdapit og pipila ka mga boluntaryo sa pagpaambit diha sa klase sa unsay ilang nakat-onan o sa ilang pagpamatuod sa pakigsaad sa bunyag ngadto sa klase.

Pagbansay sa paggamit

Ikonsiderar ang pagsulat sa tulo ka mga baroganan sa pag-angkon og espirituhanong kahibalo diha sa pisara. Makit-an kini sa mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Aron matabangan ang mga estudyante sa pagrebyo niini nga mga baroganan, dapita sila sa pagduol diha sa pisara ug sa pagsulat ubos sa mga ulohan kutob sa ilang mahinumdoman mahitungod sa matag baroganan.

Dayon ipakita ang mosunod nga senaryo o hatagi ang mga estudyante og kopya nga matan-aw sa tibuok nahibilin sa leksiyon. Mahimo nimong ipahiangay ang senaryo aron mas malambigit sa mga panginahanglan sa mga estudyante o hangyoa ang mga estudyante sa paghimo og ilang kaugalingon nga mga senaryo bahin sa pagtuman sa pakigsaad sa bunyag.

Namatikdan ni Anna nga si Paula, usa ka babaye sa iyang klase sa simbahan, nanlimbasog nga magmalipayon o makighigala. Si Anna nakadungog nga si Paula usahay mopili nga dili motambong sa mga kalihokan sa kabatan-onan o mga miting sa simbahan tungod kay gibati niya nga dili siya apil sa grupo ug wala gidawat sa ubang mga babaye. Gusto ni Anna nga tabangan si Paula nga mobati nga mas gihangop, apan wala pa gyod siya sukad nakaistorya ni Paula ug nabalaka nga tingali kiwaw o lisod nga makig-istorya kaniya.

Ikonsiderar ang pagdapit sa mga estudyante sa pagtinabangay diha sa ginagmay nga mga grupo sa pagtubag sa mosunod nga pangutana ug sa pag-andam og mga sugyot nga mahimo nilang mapaambit kang Anna. Mahimo nimong hatagan ang matag grupo og usa sa mga baroganan sa pag-angkon og espirituhanong kahibalo nga pagapokusan. Dayon dapita ang mga estudyante sa pagpaambit sa ilang mga tubag ngadto sa klase.

• Unsaon nimo paggamit ang matag usa sa tulo ka mga baroganan sa pag-angkon og espirituhanong kahibalo ug ang mga pagtulun-an sa Mosiah 18:8–10 aron matabangan si Anna sa iyang sitwasyon?

Dasiga ang mga estudyante sa paghisgot sa miaging pangutana gamit ang Mosiah 18:8–10 ug unsay ilang nahinumdoman gikan sa pagtuon sa mga baroganan sa pag-angkon og espirituhanong kahibalo niini nga semester. Kon nagkinahanglan pa sila og tabang, mahimo nimong ipakita o hatagan ang mga estudyante og kopya sa mosunod nga mga pangutana ubos sa matag baroganan. Kon imong gipahiuyon ang senaryo aron mas matubag ang mga panginahanglan sa mga estudyante, ipahiuyon usab ang mga pangutana.

Tinguhaa ang dugang nga panabot pinaagi sa balaanong gitudlo nga mga tinubdan

• Unsa ang pipila ka mga tudling sa kasulatan o mga pamahayag sa mga lider sa Simbahan nga imong nahibaloan nga makatabang ni Anna? Sa unsang paagi nga ang mga pagtulun-an sa Mosiah 18:8–10 makatabang?

• Sa unsang paagi nga ang pagpakig-istorya sa kapangulohan sa klase sa Young Women makahatag ni Anna og dugang nga pagsabot mahitungod sa sitwasyon ni Paula?

Susihon ang mga konsepto ug mga pangutana inubanan sa mahangtorong panglantaw

• Unsa ang kinahanglang masabtan ni Anna kon sa unsang paagi nakita sa Ginoo ang mga pakigsaad sa bunyag nga makatabang niya sa pagbuntog sa iyang mga pagbati sa pagduha-duha?

• Sa unsang paagi ang paghinumdom sa gibati sa Ginoo mahitungod ni Paula makatabang ni Anna?

• Sa unsang paagi ang pagdasig ni Paula makatabang ni Anna nga mahimong mas mahisama sa Langitnong Amahan ug ni Jesukristo?

Lihokon inubanan sa hugot nga pagtuo

• Unsa ang mahimo ni Anna aron matuman ang piho nga mga saad sa bunyag nga gitudlo ni Alma sa Mosiah 18:8–10?

  Ikonsiderar ang pagdapit sa mga estudyante sa pagrebyo sa ilang mga mubo nga sulat mahitungod sa unsay ilang nakat-onan sa Mosiah 18, mangita og dugang nga mga panabot kon sa unsang paagi si Anna makabangotan, makahupay, o makatambayayong sa mga alantoson ni Paula. Dayon dapita sila sa pagpaambit sa unsay ilang napalgan ug unsay ilang isugyot kang Anna.

• Unsa nga mga ehemplo ni Jesukristo sa pagtabang sa uban ang imong ipaambit kang Anna aron sa pagtabang kaniya nga molihok uban sa hugot nga pagtuo?

Rebyo sa doktrinal nga kahanas

Ang mosunod nga kalihokan sa pagrebyo kinahanglang gamiton sa usa ka leksiyon nga itudlo sa umaabot nga panahon.

I-rebyo ang pakisayran sa kasulatan ug ang mahinungdanon nga hugpong sa mga pulong sa kasulatan sa Mosiah 18:8–10 pinaagi sa pagdapit sa mga estudyante sa pagsulti niini sa pipila ka higayon isip usa ka klase. Dayon ikonsiderar ang pagrebyo sa mga pakisayran sa kasulatan ug sa mahinungdanon nga hugpong sa mga pulong sa kasulatan alang sa ubang mga tudling sa doktrinal nga kahanas nga ila nang natun-an sa pagkakaron pinaagi sa pagsulti usab niini.

Ang mahinungdanon nga hugpong sa mga pulong sa Mosiah 18:8–10 mao ang “‘Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.’”

Mahimo usab nimong ikonsiderar ang paggamit pag-usab sa kalihokan sa pagpahan-ay nga gisugyot sa sinugdanan niini nga leksiyon.

Dugang nga mga Kalihokan sa Pagkat-on

Alternatibo nga senaryo

Kon mas makatabang sa imong mga estudyante nga mag-focus sa pagbarog “ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9), ikonsiderar ang paggamit og senaryo sama niini alang sa pagbansay sa paggamit: