Bisan tuod si Hari Noah andam sa pagpatay kaniya, si Abinadi nasayod nga ang Dios motugot kaniya sa paghuman sa mensahe nga siya gipadala aron sa pagpahayag. Si Noah ug ang iyang mga pari kinahanglang makadungog sa mensahe nga ang Dios nagtawag sa tanang mga propeta aron sa pagtudlo nga si Jesukristo mao ang atong Manunubos. Kini nga leksiyon makatabang kanimo sa pag-ila sa kamahinungdanon nga makaila ni Jesukristo isip ang bugtong makatubos kanato gikan sa sala ug kamatayon.
Naghisgot, naglipay, ug nagsangyaw mahitungod kang Kristo.Pangitaa ang mga kamatuoran mahitungod ni Jesukristo ug dapita ang mga estudyante sa pagpaambit og pagpamatuod bahin Kaniya. Kini nagtugot sa Espiritu Santo sa pagdala og pagsaksi sa Manluluwas “ngadto sa mga kasingkasing” sa mga estudyante (2 Nephi 33:1). Kini nga pagsaksi makatabang kanila sa pag-ila ni Jesukristo isip “tinubdan [diin] sila mahimo nga mangita alang sa kapasayloan sa ilang mga sala” ug makapalawom sa ilang pagkakabig ngadto Kaniya (2 Nephi 25:26).
Pagpangandam sa estudyante: Dapita ang mga estudyante sa pagpamalandong kon hain sa mga tahas ug mga titulo ni Jesukristo ang labing makahuluganon ngadto kanila ug ngano.
Mga Posibleng Kalihokan sa Pagkat-on
Mga tahas ug mga titulo ni Jesukristo
Ang matag usa sa daghang mga tahas ug mga titulo ni Jesukristo mahimong adunay espesyal nga kahulogan ngari kanato sa piho nga mga higayon sa atong mga kinabuhi. Sama pananglit, mahimo natong makita og maayo si Jesukristo isip “ang Ginoo ang labing Makagagahom nga Dios” (Mosiah 11:23) kon kita nagkinahanglan og tabang nga Siya lamang ang makahatag.
Paggahin og usa ka minuto sa paghimo og lista sa mga titulo ni Jesukristo gikan sa mga kasulatan nga nagtudlo kanato mahitungod Kaniya.
Sa daghang mga titulo ni Jesus, unsa sa imong hunahuna ang makatabang nga mas mahibaloan pa? Ngano man?
Dapita ang mga estudyante sa pagbasa sa Mosiah 13:33 ug 16:15 aron mahibaloan ang dugang nga mga titulo ni Jesukristo ug unsa ang Siya lamang ang makahimo.
Jesukristo, atong Manunubos
Ang mensahe ni Abinadi ngadto ni Hari Noah ug sa mga pari nakasentro diha kang Jesukristo. Siya mitudlo sa kamatuoran nga maluwas lang kita pinaagi sa katubsanan ni Jesukristo (tan-awa sa Mosiah 13:33; 16:15). Samtang magtuon ka sa mga pulong ni Abinadi, pangitaa unsay imong makat-onan mahitungod ni Jesukristo gikan sa Iyang tahas isip atong Manunubos.
Si Elder D. Todd Christofferson sa Korum sa Napulog Duha ka Apostoles mitudlo:
Imahe
Elder D. Todd Christofferson
Uban sa labing importanteng titulo ni Jesukristo mao ang Manunubos. … Ang pulong tubos nagpasabot sa pagbayad og obligasyon o utang. Ang pagtubos nagpasabot usab sa pagluwas o paghatag og kagawasan pinaagi sa pagbayad. Kon ang usa ka tawo masayop ug dayon mokorihir niini o magtarong, moingon ta nga iyang gitubos ang iyang kaugalingon. Ang kada usa sa mga kahulogan nagpakita og lain-laing bahin sa mahinungdanong Katubsanan nga nahimo ni Jesukristo pinaagi sa Iyang Pag-ula, nga naglakip, sa mga pulong sa diksyonaryo, “sa pagluwas gikan sa sala ug sa mga silot niini, nga dunay sakripisyo nga gihimo alang sa makasasala.” (D. Todd Christofferson, “Katubsanan,” Liahona, Mayo 2013, 109)
Unsa ang imong makat-onan mahitungod ni Jesukristo gikan sa Iyang titulo nga Manunubos?
Mahimo nimong dapiton ang mga estudyante sa pagmarka sa pulong tubos diha sa Mosiah 16:15 ug mohimo og mubo nga sulat sa kahulogan niini.
Kanus-a nimo gibati nga kini nga pagsabot mahimong labing makatabang sa imong kinabuhi? Ngano man?
Ang mga estudyante mahimong mobuhat sa mosunod nga pagtuon nga magtinagsa, sa gagmay nga mga grupo, o isip usa ka klase. Ikonsiderar ang mga panginahanglan sa imong mga estudyante samtang magdesisyon ka kon ipabuhat ba nila ang tanang tulo ka aghat sa pagtuon, o usa o duha lang niini. Kon ang mga estudyante nagtuon sa ilang kaugalingon o isip mga grupo, mahimong makatabang ang pagpakita sa mga aghat sa pagtuon ug content alang sa mga estudyante aron ang mga estudyante makalihok sa ilang kaugalingong kapaspason. Mahimo gani ka nga magpatukar og hinay nga mga himno sa background. Kon imong hangyoon ang mga estudyante sa pagpaambit ngadto sa klase, ang paghangyo kanila og sayo makatabang sa pagpakunhod sa kabalaka ug mahimong makatabang sa mga estudyante sa paghimo sa ilang labing maayo nga mga paningkamot.
Ang mga estudyante mahimong adunay mga pangutana mahitungod sa mga bersikulo nga ilang gibasa. Ikonsiderar ang daklit nga pagbisita sa indibidwal nga mga estudyante aron matabangan sila nga makasabot sa mga kasulatan samtang sila magtuon.
Paghunahuna og usa ka tawo sa imong kinabuhi nga imong gibati nga makabenepisyo gikan sa pagsabot nga si Jesukristo mao ang iyang Manunubos.
Tun-i ang mosunod nga mga pag-aghat nga may katuyoan sa pagtabang kanimo sa pagtudlo sa tawo nga imong gihunahuna.
Aghat sa pagtuon 1: Unsa ang gibuhat ni Jesukristo aron sa pagtubos kanako?
Si Abinadi mihisgot bahin ni Isaias isip usa ka ehemplo sa usa sa daghang mga propeta kinsa mipamatuod ni Kristo. Iyang gibasa ang mga pagtulun-an ni Isaias aron ipakita nga ang Dios Mismo moanhi sa yuta aron “daug-daugon ug sakiton” (Mosiah 13:35) aron sa pagtubos kanato gikan sa pagkapukan ug pagkawala.
Basaha ang Mosiah 14, mangita sa mga pulong ug sa hugpong sa mga pulong nga makatabang nimo nga masabtan ang bili nga andam ibayad ni Jesukristo aron sa pagpalingkawas kanimo gikan sa sala ug kamatayon.
Mahimo nimong ipaambit ang mosunod nga mga pagpasabot ngadto sa mga estudyante:
“Ang pagpanton sa atong kalinaw diha kaniya” (bersikulo 5): Sa matag sala nga atong mabuhat, adunay sangpotanan, lakip ang pagkasad-an, kasakit, kaalaotan, ug pagkahimulag gikan sa Dios. Si Jesukristo nag-antos sa sangpotanan sa atong mga sala aron kita makasinati og kapasayloan ug kalinaw.
“Uban sa iyang mga labod kita giluwas.” (bersikulo 5): Pinaagi sa Iyang pag-antos, si Jesukristo makaayo kanato gikan sa mga samad sa atong mga sala ug sa mga sangpotanan sa Pagkapukan ni Adan ug Eva, lakip ang espiritwal ug pisikal nga kamatayon.
“Kini gikahimuot sa Ginoo ang pagbun-og kaniya” (bersikulo 10): Nahimuot ang Langitnong Amahan nga si Jesukristo andam nga mihalad sa Iyang kaugalingon isip sakripisyo alang sa mga sala sa uban (tan-awa sa 3 Nephi 11:7, 11; Juan 3:16).
Unsa nga mga pulong o mga hugpong sa mga pulong gikan niini nga mga bersikulo ang imong ipaambit sa tawo nga imong gihunahuna?
Aghat sa pagtuon 2: Sa unsang paagi ako mapanalanginan pinaagi sa Katubsanan ni Jesukristo?
Mahanduraw ba nimo kon unsa kaha ang kinabuhi kon wala pa tumana ni Jesukristo ang Iyang tahas isip atong Manunubos? Paggahin og kadiyot sa paghunahuna kon unsa kaha ang imong kinabuhi kon wala si Jesukristo.
Basaha ang Mosiah 15:19; 16:4–7, mangita sa paghulagway ni Abinadi sa kinabuhi nga wala ang katubsanan ni Kristo.
Basaha ang Mosiah 15:20–25; 16:8–10 aron makita kon unsa nga mga panalangin ang atong matagamtam tungod sa atong Manunubos.
Unsa ang gusto nimo nga mahibaloan sa tawo nga imong gihunahuna bahin ni Jesukristo gikan niini nga mga bersikulo?
Aghat sa pagtuon 3: Ngano nga si Jesukristo usahay gitawag og Amahan diha sa mga kasulatan?
Si Abinadi mitudlo mahitungod sa mga tahas ni Jesukristo isip Anak sa Dios ug isip Amahan. Ang amahan mao si kinsa nga naghatag og kinabuhi. Si Jesukristo sama sa usa ka amahan kanato tungod kay Siya makahatag kanato og pagka-imortal ug kinabuhing dayon. Wala kini magpasabot nga Siya ug ang Langitnong Amahan managsama nga tawo. Basaha ang Mosiah 15:1–9, mangita og mga rason nganong si Jesukristo mahimong tawgon nga atong Amahan sa Kahangtoran.
Mahimong makatabang ang pagbasa niini nga mga bersikulo isip usa ka klase. Hunong human sa piho nga mga bersikulo aron itudlo ang mga pulong o mga hugpong sa mga pulong nga makatabang sa mga estudyante nga mamatikdan ug mahatagan og kahigayonan ang mga estudyante sa pagpangutana.
Si Elder Jeffrey R. Holland sa Korum sa Napulog Duha ka Apostoles mipasabot:
Imahe
Elder Jeffrey R. Holland
Sama sa gitudlo ni Abinadi, si Kristo “gipanamkon pinaagi sa gahom sa Dios” (Mosiah 15:3] ug busa adunay mga gahom sa Amahan diha sulod kaniya. Agi og dugang nianang balaan nga direktang relasyon, si Kristo naglihok usab isip ang Amahan diha nga siya ang Tiglalang sa langit ug yuta (tan-awa sa Mosiah 15:4), ang amahan sa atong espirituhanong pagkatawo pag-usab ug kaluwasan, ug matinud-anon sa pagtahod—ug busa nag-angkon sa gahom—sa kabubut-on sa iyang Amahan labaw pa kay sa iyang kaugalingong kabubut-on. (Jeffrey R. Holland, Christ and the New Covenant: The Messianic Message of the Book of Mormon [1997], 183–84)
Sa unsa nga mga paagi nga si Jesukristo parehong Amahan ug Anak?
Ngano kaha nga makatabang alang sa tawo nga imong gihunahuna nga makahibalo niini mahitungod ni Jesukristo?
Ang mga estudyante mahimong dapiton sa pagpresentar sa unsay ilang nakat-onan diha sa klase o sa gagmay nga mga grupo. Ang mga estudyante mahimo usab nga awhagon sa pagpaambit sa mensahe diha sa balay o sa tawo nga ilang gihunahuna.