Sa tibuok kasaysayan, ang mga anghel mibisita sa yuta aron sa pagpamatuod ni Jesukristo ug sa pagpadayag sa “malipayon nga mga balita sa dako nga kalipay” (Mosiah 3:3; Alma 13:22; Helaman 16:14). Si Hari Benjamin nakadawat sa ingon nga pagbisita. Iyang gipaambit sa iyang katawhan ang pagpamatuod sa anghel kang Jesukristo, ang mga butang nga masinati sa Manluluwas, ug ang kamatuoran nga ang kaluwasan moabot lamang pinaagi sa ngalan ni Kristo. Kini nga leksiyon makatabang kanimo nga makasabot sa kamahinungdanon sa unsay gibuhat ni Jesukristo aron ikaw maluwas.
Pagtabang sa mga estudyante nga makat-on sa pagpamalandong.Ang “pagpamalandong” nagpasabot sa paghinuktok o paghunahuna og maayo sa usa ka butang, ug kini kasagaran naglakip sa pag-ampo. Samtang magkat-on ang mga estudyante sa pagpamalandong atol sa ilang personal nga pagtuon sa kasulatan, ang Espiritu mopadayag sa kamatuoran ngadto kanila ug motabang nila nga mahibalo kon unsaon nila nga mahimong mas mahisama ni Jesukristo.
Pagpangandam sa estudyante: Mahimo nimong dapiton ang mga estudyante sa paghisgot uban sa usa ka sakop sa pamilya, higala, o lider sa Simbahan sa mga panalangin nga posible lamang tungod ni Jesukristo.
Posibleng Kalihokan sa Pagkat-on
Malipayon nga mga balita sa dako nga kalipay
Ikonsiderar ang pagpakita og hulagway sa mga anghel nga nagpahibalo sa pagkatawo sa Manluluwas.
Makahunahuna ka ba sa mga panahon sa dihang ang mga anghel mianhi sa yuta aron sa pagpamatuod ni Jesukristo?
Usa ka ehemplo anaa sa Lucas 2:10–12. ChurchofJesusChrist.org
Ang usa ka anghel mipakita usab kang Hari Benjamin. Basaha ang Mosiah 3:3–4, mangita sa pagkaparehas tali sa gisulti sa anghel ngadto sa mga magbalantay ug sa gisulti sa anghel ngadto kang Hari Benjamin.
Unsa ang imong nahibaloan mahitungod ni Jesukristo nga makonsiderar nga “malipayon nga mga balita sa dako nga kalipay”?
Sa iyang pakigpulong ngadto sa iyang mga katawhan nga gilakip sa Mosiah 3:1–17, si Hari Benjamin mipaambit sa pipila ka mensahe sa anghel. Kini nga mensahe naghisgot sa kinabuhi ug misyon ni Jesukristo, sa unsang paagi sila makadawat og kalipay, ug unsay gitanyag ni Jesus nga dili mahimo sa uban.
Ang bugtong ngalan diin moabot ang kaluwasan
Basaha ang Mosiah 3:17, mangita sa unsay gitanyag ni Jesukristo.
Unsa nga kamatuoran ang imong matino gikan sa bersikulo 17?
Ang mga estudyante mahimong makaila og lain-laing mga kamatuoran—sama pananglitan, ang kaluwasan moabot lamang pinaagi ni Jesukristo. Pasalamati ang mga estudyante sa pagpaambit sa mga kamatuoran nga ilang nakaplagan, ug ikonsiderar ang pagsulat og usa o daghan pa diha sa pisara.
Basaha ang mosunod nga pamahayag gikan ni Elder Neil L. Andersen sa Korum sa Napulog Duha ka Apostoles nga mangita kon unsay giluwas ni Jesukristo kanato gikan sa:
Imahe
Elder Neil L. Andersen
Ang atong Ginoo ug Manluluwas, si Jesukristo, pinaagi sa dili masukod nga gasa sa Pag-ula, wala lamang moluwas kanato gikan sa kamatayon ug mitanyag kanato, pinaagi sa paghinulsol, kapasayloan sa atong mga sala, apan Siya mibarog usab nga andam sa pagluwas kanato gikan sa mga kasubo ug mga kasakit sa nasamdan natong mga kalag. (Neil L. Andersen, “Nasamdan,” Liahona, Nob. 2018, 84)
Ang mosunod nga mga pangutana gituyo aron sa pagtabang sa mga estudyante nga mobati sa ilang panginahanglan sa Manluluwas. Dapita ang mga estudyante sa pagpamalandong sa hilom sa ilang mga tubag. Pagtinguha og giya gikan sa Espiritu aron makahibalo sa ubang mga paagi nga makatabang ka sa mga estudyante nga mabati ang ilang indibidwal nga panginahanglan kang Jesukristo.
Hunahunaa kon sa asa ka gikinahanglan nga maluwas. Aduna bay mga sala nga imong gipaningkamotan nga mabuntog? Aduna ka bay mga kasubo o mga kasakit nga imong nasinati? Samtang magtuon ka sa Mosiah 3, tinguhaa ang inspirasyon pinaagi sa Espiritu Santo aron matabangan ka nga makahibalo kon unsaon nimo nga makadawat sa kaluwasan nga gitanyag ni Jesukristo.
Basaha ang Mosiah 3:5–10, mangita sa unsay gibuhat ni Jesukristo aron ikaw maluwas. Paggahin og panahon sa hinay-hinay nga pagbasa ug sa pagpamalandong. Ang pagpamalandong maoy usa ka paagi sa pagdapit sa Espiritu Santo sa pagtudlo kanimo. Mahimo nimong isulat ang mga ideya ug mga hunahuna diha sa imong mga kasulatan o sa journal sa pagtuon.
Seguroha nga ang mga estudyante adunay igong panahon sa pagbasa ug sa pagpamalandong sa mga kasulatan. Samtang ang ubang mga estudyante makahuman sa pagbasa og una sa uban, ikonsiderar ang pagdapit kanila sa pagbasa og usab sa piho nga mga bersikulo, pagpangita og mga footnote, o paggahin og dugang nga panahon sa pagpamalandong.
Human sa igong panahon, dasiga ang mga estudyante sa pagpaambit kon unsay nakapadani nila diha sa ilang pagtuon. Ikonsiderar ang paggamit sa pipila o sa tanan sa mosunod nga mga pangutana. Mahimo usab nimong dapiton ang mga estudyante sa pagpangutana mahitungod sa mga bersikulo.
Unsa nga mga impresyon ang imong nabatonan samtang imong gitun-an kini nga mga bersikulo?
Unsa ang pipila ka hugpong sa mga pulong niini nga mga bersikulo ang mipatigbabaw diha kanimo?
Unsay imong napalgan nga nakapalipay nimo?
ChurchofJesusChrist.org
Ikonsiderar ang pagpaambit og personal nga kasinatian o pagpamatuod sa Manluluwas ug sa kaluwasan nga Iyang gitanyag. Dapita usab ang mga estudyante nga buot mopaambit og mga kasinatian ug mga pagpamatuod.
Basaha ang Mosiah 3:11–13, mangita sa unsay kinahanglan nimong buhaton aron makadawat og kalipay ug kaluwasan pinaagi ni Jesukristo. Basaha sa hinay-hinay ug pamalandongi kini nga mga bersikulo. Ang mosunod nga mga pangutana makatabang kanimo sa pagpamalandong.
Gamita ang pipila sa mga pangutana sa ubos, o ubang mga pangutana nga gibati nimong nadasig nga ipangutana, aron matabangan ang mga estudyante sa paghisgot sa kalipay nga mahimong moabot pinaagi sa paghinulsol. Mahimo usab nimong ipaambit ang pamahayag ni Elder Dale G. Renlund bahin sa kalipay ug paghinulsol diha sa seksiyon nga “Komentaryo ug Background nga Impormasyon”.
Mahimong makaayo sa mga estudyante ang pag-ila sa mosunod nga baroganan: Kon kita magpakita og hugot nga pagtuo kang Jesukristo ug maghinulsol, kita mahimong maluwas gikan sa atong mga sala ug magmaya uban sa hilabihan nga kalipay.
Unsa ang imong nakat-onan o gibati mahitungod ni Jesukristo nga nagdasig kanimo sa paghinulsol?
Ngano sa imong hunahuna nga ang kapasayloan sa mga sala nagdala og kalipay?
Hinumdomi kon sa asa ikaw gikinahanglan nga maluwas. Hunahunaa ang imong gitun-an sa Mosiah 3 ug ang mga impresyon nga imong nadawat gikan sa Espiritu. Paningkamot sa pagpakita og hugot nga pagtuo, sa paghinulsol, ug sa pagtuo kang Kristo aron ikaw makadawat sa tabang sa Manluluwas ug sa kalipay nga moabot gumikan kay napasaylo.
