Iakopo 7

Faatuatua Lē Maluelue ia Iesu Keriso

suitulaga

Afai e te lagona e pei o loo taumafai ma le loto i ai nisi o tagata i aso nei e luluina le faatuatua o tagata o le Ekalesia a le Faaola, e sa’o oe. E le o se mea fou lenei. I totonu o sa Nifae, o se tagata e igoa ia Serema “sa galue [o ia] ma le filiga ina ia mafai ona ia taitai ese loto o tagata” (Iakopo 7:3). O lenei lesona e mafai ona fesoasoani ia te oe e saunia ai e faatoilalo luitau i lou faatuatua ia Iesu Keriso ma Lana talalelei.

Fesoasoani i tagata aoao ia malamalama i le anotusi o tusitusiga paia. O le anotusi o tusitusiga paia o faamatalaga auiliili, tagata, mea na tutupu, lauga, ma faamalamalamaga. O le malamalama i nei elemene e mafai ona fesoasoani ai i tagata aoga e fesootai ai ma tagata taitoatasi i tusitusiga paia ma ia faagaeetiaina ai e ala i lauga musuia ua faamaumauina.

Sauniuniga a le tagata aoga: Valaaulia tagata aoga e o mai saunia i le vasega e faasoa mai se faataitaiga o se tasi o tu mausali i lo latou faatuatua ina ua luitauina i latou e isi.

Gaoioiga e Ono Mafai Ona Aoao Ai

Saunia mo luitau i le lumanai

A o lei faasoaina atu le faamatalaga lenei, mafaufau e fesili atu, “I se fua faatatau o le tasi i le sefulu, o le a sou manatu pe o le a le faigata o le avea ai ma se soo lototoa o Iesu Keriso i aso nei?” E mafai ona e fai i tagata aoga e sii i luga le aofai o tamailima e faatusa i a latou tali ona fai atu lea i nisi o i latou e faasoa mai pe aisea na latou tali atu ai i le ala na latou faia ai.

Sa faasoa mai e Peresitene Russell M. Nelson le mea lenei e uiga i se luitau faigata o le a tatou feagai:

Peresitene Russell M. Nelson

O loo i luma atu aso faigata. I le lumanai, o le a seasea lava ona faigofie pe lauiloa le avea ma se tagata faatuatua o le Au Paia o Aso e Gata Ai. O le a tofotofoina i tatou uma taitoatasi. Na lapatai mai le Aposetolo o Paulo e faapea, o aso e gata ai, o i latou o e mulimuli ma le filiga i le Alii “e sauaina i latou.” [2 Timoteo 3:12]. O lena lava sauaga e mafai ona olopala ai oe seia e matua vaivai ai lava, pe faaosofia ai foi oe ia e avea ma faataitaiga lelei ma lototele atili i lou olaga i aso uma. (Russell M. Nelson, “Faasaga Atu ma le Faatuatua i le Lumanai,” Ensign po o le Liahona, Me 2011, 35–36)

• Na tuuina mai e Peresitene Nelson lenei saunoaga i le 2011. O a ni auala ua e aafia ai pe vaaia ai mea sa ia faamatalaina?

• Aisea e ono faaitiitia ai le lauiloa i le lumanai o le tumau faamaoni i le talalelei toefuataiina a Iesu Keriso? Aisea e te manatu ai e aoga pea?

• Aisea e te manatu ai o le a ta’u mai e le Alii ia i tatou nei faigata a o lei oo i le taimi e taunuu ai?

Mafaufau mo se minute i le malosiaga o i ai nei o lau molimau i le talalelei a Iesu Keriso ma le ala na e saunia ai e tumau faamaoni ia te Ia i aso faigata o i luma atu. A o e suesueina le Iakopo 7, vaavaai pe na faapefea ona saunia e Iakopo o ia lava e tumau faamaoni ina ua taumafai se tagata amioleaga e igoa ia Serema e luluina lona faatuatua.

Ua talai atu Serema e faasaga ia Keriso

Faitau le Iakopo 7:1–7, pe matamata le vitio “Ua Faafitia e Serema ia Keriso” mai le faailotaimi 0:33 i le 2:21. O loo maua lenei vitio i le ChurchofJesusChrist.org. Vaavaai mo mea na aoao atu e Serema e taumafai ai e luluina le faatuatua o sa Nifae ia Keriso.

• O le a le mea na aoao atu e Serema e taumafai ai e luluina le faatuatua o sa Nifae?

• O a nisi o auala e ono luitauina ai e tagata le faatuatua o soo o Keriso i aso nei?

Valaaulia tagata aoga e mafaufau loloto i fesili nei:

Mafaufau loloto pe na e vaai i se tasi o siomia oe ua amata ona le mautoanu i lo latou faatuatua ia Iesu Keriso ma Lana talalelei toefuataiina ona o faatosinaga a isi. Na e matauina se tasi o luitauina lou faatuatua ia te Ia?

E le mafai ona luluina le faatuatua o Iakopo

Mafaufau e valaaulia tagata aoga e faitau fuaiupu nei ma se vaega toalaiti. Ona valaaulia lea o vaega taitasi e tofi se sui e tusi i luga o le laupapa mea na latou aoaoina mai le faataitaiga a Iakopo. O nisi nei o upumoni e ono maua e tagata aoga: e mafai e le Agaga ona fesoasoani ia tatou iloa le mea e fai ma tautatala ai pe a luitauina lo tatou faatuatua, ma e mafai ona tatou faalagolago i aoaoga a perofeta e faamalosia ai lo tatou faatuatua ia Keriso.

A o faasoa mai tagata aoga, mafaufau e faamanatu atu ia i latou o le suesueina o fuaitau o le atamai i aoaoga faavae ma mataupu faavae o le mauaina o le malamalama faaleagaga e mafai ona saunia ai i latou e tetee atu i luitau i lo latou faatuatua ia Iesu Keriso.

Faitau le Iakopo 7:5, 8–12, ma vaavaai mo mea na fesoasoani ia Iakopo e tetee atu ai i aoaoga a Serema.

O se mataupu faavae e tasi e mafai ona tatou aoao mai le fuaiupu 5 e faapea, e mafai ona tatou faatoilaloina luitau i lo tatou faatuatua ia Iesu Keriso e ala i le manatuaina o aafiaga faaleagaga ua mavae na faamalosia ai lo tatou faatuatua.

• O a ni mea patino na manatua e Iakopo i le taimi o lenei feteenaiga na fesoasoani ia te ia?

• Aisea e mafai ai e le manatuaina o o tatou aafiaga faaleagaga ua tuanai ona faamalosia i tatou pe a tatou feagai ma luitau i lo tatou faatuatua?

Ua aoao mai Elder Neil L. Andersen o le Korama a Aposetolo e Toasefululua:

Elder Neil L. Andersen

Faatasi ai ma le taitaiga toafilemu ua tatou maua mai le Agaga Paia, mai lea taimi i lea taimi, ua faamautinoa mamana ma patino mai e le Atua ia i tatou taitoatasi e faapea na te silafia i tatou ma e alofa ia i tatou ma o loo Ia faamanuiaina patino ma le manino i tatou. Ona oo lea i taimi o o tatou faigata, e toe aumaia e le Faaola i o tatou mafaufau nei aafiaga. …

Opo mau ou manatuaga paia. Talitonu i ai. Tusi i lalo. … Ou te folafola atu a e aloaia ma le naunautai ma faapelepele ma le faaeteete ia mea tutupu musuia faaleagaga i lou olaga, o le a tele atu isi mea e oo mai ia te oe. E silafia e le Tama Faalelagi oe ma e alofa ia te oe! (Neil L. Andersen, “O Manatuaga Musuia Faaleagaga,” Ensign po o le Liahona, Me 2020, 19, 21–22)

Afai e te faaaogaina le manatu lenei, tuu atu ia lava se taimi mo tagata aoga e mafaufau loloto ai, tatalo, ma faamaumau o latou lagona ma aafiaga. Ona valaaulia lea o volenitia e faasoa mai ni aafiaga e le paia tele. Mafaufau e faasoa atu se faataitaiga patino e le paia tele pe tulaga ese ina ia mafai ona fesootai tagata aoga i lou aafiaga.

Faaalu sina taimi e manatua ai lagona ma aafiaga ua tuuina mai e le Atua ia te oe e faamautinoa atu ai ia te oe e silafia ma alofa o Ia ia te oe. Faamaumau nisi o na mea i lau api talaaga mo suesuega po o au tusitusiga paia. Afai e te manaomia se fesoasoani i le manatuaina o na aafiaga, ole atu i le Tama Faalelagi i le tatalo e fesoasoani ia te oe ia iloa pe manatua nisi a o agai i luma. O le a Ia faia i Lona lava taimi ma Lana lava ala.

Atonu foi e te manao e matamata le vitio “O Manatuaga Musuia Faaleagaga” mai le faailotaimi 13:40 i le 14:46. Vaavaai pe faapefea e le ata a Elder Andersen ona faaalia ai le mafai e o tatou manatuaga faaleagaga ona faamalamalama le ala mo i tatou ma mo isi i taimi faigata. O loo maua lenei vitio i le ChurchofJesusChrist.org.

E mafai ona e faaaogaina fautuaga nei ma tuu atu i tagata aoga ni nai minute e tesi ai pe imeli i sē tasi e pele. Atonu e fesoasoani le faamanatu atu ia i latou o nisi o aafiaga paia e tatau ona tausia e le tagata lava ia.

Mafaufau loloto po o ai e te iloa e mafai ona faamalosia e ala i le faalogo i se tasi o ou aafiaga. Mafaufau e sue se auala e faasoa atu ai ia i latou.

Mafaufau foi e uiga i e pele ma taitai o le Ekalesia e mafai e o latou faatuatua ma aafiaga ona faamalosia ai oe lava ia. Mafaufau e aapa atu ia i latou mo se fesoasoani.

O se faailoga mai le Atua

Faitau le Iakopo 7:13–23, pe matamata le vitio “Ua Faafitia e Serema Keriso” mai le faailotaimi 2:22 i le 7:16, e aoao ai i le mea na tupu ia Serema.

Mafaufau e faaali atu fesili nei ma tuu atu i tagata aoga se taimi e mafaufau loloto ai. Ona valaaulia lea o volenitia e faasoa mai a latou tali.

• Aisea e te manatu ai o le a faamaumau e Iakopo lenei tala mo tagata i o tatou aso?

• O le a sou manatu e faapefea ona finagalo le Tama Faalelagi e te faaaogaina mea sa e aoaoina i le aso i se tulaga o loo feagai ma oe?

Manatu ma Talaaga o Faamatalaga

E mafai faapefea ona sili atu ona ou iloa ma manatua aafiaga faaleagaga?

Sa faasoa mai Peresitene Henry B. Eyring o le Au Peresitene Sili e uiga i se taimi na uunaia ai o ia e faamaumau i lana api talaaga le auala na ia vaai ai i le aao o le Alii:

Peresitene Henry B. Eyring

Sa ou tusia ni nai laina i aso taitasi mo le tele o tausaga. … Ae ou te lei tusia se mea, ou te mafaufau lava i le fesili lenei: “Pe na ou vaaia le aao o le Atua o aapa mai e pai mai ia i maua po o le ma fanau po o le matou aiga i le asō?” A o faaauau pea ona ou faia lenei mea, sa amata ona tupu se mea. Pe a ou mafaufau i mea na tutupu i le aso, ou te vaaia faamaoniga o mea sa faia e le Atua mo se tasi o i matou ae ou te lei iloaina i taimi pisi o le aso. A o tupu lena mea, ma e tele lava taimi e tupu ai, sa ou iloaina ai o le taumafai e manatua, na mafai ai e le Atua ona faasino mai ia te au le mea sa Ia faia. (Henry B. Eyring, “E! Ia Manatua, Ia Manatua Lava,” Ensign po o le Liahona, Nov. 2007, 67)

E mafai faapefea ona ou iloa aoaoga a i latou o e saili e faaumatia le faatuatua ia Keriso i o tatou aso?

Na saunoa mai Elder D. Todd Christofferson o le Korama a Aposetolo e Toasefululua:

Elder D. Todd Christofferson

O ala o le lalolagi, e pei ona outou silafia, e tetee ia Keriso, po o le “soo se mea lava sei vagana ai Keriso.” O o tatou taimi, e talitutusa lava ma le talafaasolopito o le Tusi a Mamona, lea e tulimatai ai e tagata faatosinaloto le pulega amiolētonu i isi; tuusaoloto faiga feusua’i, ma faalauiloa le faateleina o le tamaoaiga e avea ma sini o lo tatou olaga. O o latou filosofia e ta’uamiotonuina ai le faia o sina agasala itiiti” [2 Nifae 28:8] po o ni agasala foi se tele, ae e leai se tasi e mafai ona ofo maia le togiola. Lea e na o le toto o le Tamai Mamoe e auala mai ai. O le mea sili e mafai ona ofoina mai e tagata ia e fai mai “soo se mea lava se’i vagana ai Keriso” po o “soo se mea lava se’i vagana ai le salamo” o le mau lē faavaea e faapea e le i ai se agasala, pe afai foi e i ai, o le i’uga lava e leai ni taunuuga. Ou te le o mafai ona vaai i se aoga o lena manatu i le Faamasinoga Mulimuli. (D. Todd Christofferson, “O Le Alofa o le Atua,” Liahona, Nov. 2021, 17)

Mafaufau e suesue le parakalafa 12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).

Ae faapefea pe afai ou te le iloa pe faapefea ona tali atu pe a fesiligia e se tasi lo’u faatuatuaga?

Na saunoa mai Elder Jörg Klebingat o le Fitugafulu:

Elder Jörg Klebingat

Ia manatua e oo lava foi i se tamaitiiti, e mafai ona avea o se puipui o Keriso i le malaetaalo, e ala i le tuuina atu o se molimau faatauvaa; e le faapea e tatau lava ona e atamai i le talalelei ia avea ai ma se molimau o le upumoni; e le faapea e tatau lava ona e iloa tali uma; e le afaina le faapea atu i nisi o taimi, “ou te le iloa.” (Jorg Klebingat, “Puipuia o le Faatuatuaga,” Ensign, Sete. 2017, 53)

Gaoioiga Faaopoopo e Aoao Ai

Taulimaina o feteenaiga e aunoa ma finauga

E mafai ona faigata le lē tali atu ma le lē alofa pe a fesiligia pe osofaia ou talitonuga. O le vitio “Faataitaiga o Aso Uma: Pe a Fesiligia Talitonuga” mai le faailotaimi 3:13 i le 7:07 e mafai ona fesoasoani i tagata aoga ia malamalama ai pe faapefea ona taulimaina lelei nei tulaga. O loo faaalia ai se tamaitai talavou o ona talitonuga na osofaia e se tasi o lana vasega i le aoga. Na te sailia se fautuaga mai lona epikopo i le auala e taulima lelei ai le tulaga.

Mafaufau e talanoaina ni tulaga e ono fesiligia faalilolilo ai talitonuga o tagata aoga faaletagata lava ia pe i luga o le initoneti. Ona valaaulia lea o tagata aoga e faasoa mai ni manatu i le ala e tutumau mausali ai i lo latou faatuatua ae le o le faatupuina pe faateleina o lagona fefinauai ma isi.

Faalolotoina o le malamalama e ala i mau fefaasinoa’i

Valaaulia tagata aoga e fefaasinoa’i pe faafesootai le Iakopo 7:5 ma le Helamana 5:12 ma le Iosefa Samita—Talafaasolopito 1:22–26. Ona valaaulia lea o i latou e suesue faatasi ma se paga nei mau faasino e malamalama ai pe faapefea ona tutumau atili i lo latou faatuatua.

Suesueina o tusitusiga paia pe a feagai ma le masalosalo

Mafaufau e faaali le vitio “Mulimuli i le Mataupu Faavae ma le Talalelei a Keriso” mai le faailotaimi 7:34 i le 9:41. I lea vaega, ua faasoa mai ai e Peresitene M. Russell Ballard o le Korama a Aposetolo e Toasefululua le ala na fesoasoani ai le suesueina o tusitusiga paia i se faifeautalai e faatoilalo ai fesili ma le le mautonu.