Sēkope 5–7

Vakai Fakalūkufuá

Naʻe vahevahe ʻe Sēkope ʻa e talanoa fakatātā ʻa Seinosi ʻo e ʻakau ʻōlivé, ʻa ia ʻokú ne fakatātaaʻi ʻa hono fakamoveteveteʻi ʻo ʻIsilelí pea mo e ngaahi ngāue taʻetūkua ʻa e ʻEikí ke tānaki kotoa e fānau ʻa e Tamai Hēvaní kiate Iá. ʻOku fakataipe ʻe he konga fakaʻosi ʻo e talanoa fakatātā ko ʻení ʻa e ngāue ʻa e ʻEikí ʻi he kuonga fakaʻosí, ʻo kau ai e ngaahi ngāue ʻokú Ne fai mo ʻEne kau tamaioʻeikí ke tānaki e ngaahi laumālié kiate Ia ko hono fakaʻosí. Hili ha ngaahi taʻu mei hono vahevahe ʻe Sēkope e ngaahi akonaki ko ʻení, naʻe haʻu ha tangata ko hono hingoá ko Seialemi ki he kau Nīfaí ʻo ne “ngāue faivelenga koeʻuhí ke ne kākaaʻi ʻa e loto ʻo e kakaí” (Sēkope 7:3). ʻE lava ke tokoni e ngaahi lēsoni ko ʻení ki he kau akó ke nau fehangahangai mo e ngaahi pole ʻo ʻenau tuí pea teuteu ke ngāue ʻi he ngoue vaine ʻa e ʻEikí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Sēkope 5:1–53

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e ʻofa ʻa Sīsū Kalaisi kiate kinautolu pea mo e kakai kotoa pē.

• Teuteu ʻa e tokotaha akó: Fakakaukau ke ʻoange ki he kau akó ʻa e fakatātā “Ko e Talanoa Fakatātā ʻo e ʻAkau ʻŌlivé (Sēkope 5)” ʻoku maʻu ʻi he konga ki he “Fakamatala Fakamahinó mo e Puipuituʻá.” Fakaafeʻi e kau akó ke nau fakaʻaongaʻi e fakatātaá ke tokoni ki heʻenau ako e talanoa fakatātā ʻi he Sēkope 5 pea maheni ange mo hono pōpoakí fakakātoa.

• Meʻa ke fakaʻaliʻalí: Ko e saati ʻokú ne fakamatalaʻi e ngaahi fakataipe mei he talanoa fakatātaá

• Laʻipepa Tufá: Ko e fakatātā “Ko e Talanoa Fakatātā ʻo e ʻAkau ʻŌlivé (Sēkope 5)” ʻi he konga “Fakamatala Fakamahinó mo e Puipuituʻá” (Fakakaukau ke ʻoange ha tatau maʻá e tokotaha ako takitaha.)

•  

• Fokotuʻu ki hono akoʻi he konifelenisi vitioó: Fakakaukau ke fakaʻaongaʻi e polokalama palakipoé ke fakaʻatā e kau akó ke lekooti ʻenau ngaahi tali ki he ʻekitivitī “Ko e meʻa ʻoku ou ako fekauʻaki mo Sīsū Kalaisi mei he Sēkope 5”.

Sēkope 5:54–77; 6:1–13

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ongoʻi ha holi lahi ange ke ngāue mo e ʻEikí ʻi hono tokoniʻi e fānau ʻa e Tamai Hēvaní ke haʻu kiate Iá.

• Teuteu ʻa e tokotaha akó: Fakakaukau ke fakaafeʻi e kau akó ke fai e ʻekitivitī ako ʻi he “Sēkope 5:61–75: ʻOku fakaafeʻi au ʻe he ʻEikí ke u ngāue mo Ia ʻi Heʻene ngoue vainé” ʻi he fokotuʻutuʻu ako ʻo e “8–14 ʻEpelelí. Sēkope 5–7: ‘‘Oku Ngāue ʻa e ʻEikí mo Kitautolu’” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2024.

• Vitiō: “ʻAmanakiʻanga ʻo ʻIsilelí” (1:01:34; mamata mei he taimi 31:24 ki he 33:42).

Sēkope–7

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau teuteu ke ikunaʻi e ngaahi pole ki heʻenau tui kia Sīsū Kalaisi mo ʻEne ongoongoleleí.

• Teuteu ʻa e tokotaha akó: Fakaafeʻi e kau akó ke nau omi mateuteu ki he kalasí ke vahevahe ha sīpinga ʻo ha taha ʻoku tuʻu maʻu ʻi heʻene tuí ʻi ha taimi naʻe fakafepakiʻi ai ia ʻe ha niʻihi kehe.

• Vitiō: “ʻOku Fakaʻikaiʻi ‘e Seialemi ʻa Kalaisi” (7:16); “Ngaahi Manatu Melie Fakalaumālie Fakangalongataʻá” (16:43; mamata mei he taimi 13:40 ki he 14:46)

• Fokotuʻu ki hono akoʻi he konifelenisi vitioó: ʻE lava ke hanga ʻe he fakafaivaʻí ʻo teuteu e kau akó ke fakahoko ha tali ki he ngaahi tūkunga ʻoku ʻahiʻahiʻi ai ʻenau tuí. Fakakaukau ke ke fili ha faingataʻa pehē ʻe taha pe ua ʻe ala fehangahangai mo e kau ako ʻi homou feituʻú. Hangē ko ʻení, kapau ʻoku angamaheni ʻaki e faʻahinga fakamatala pehení ʻi homou feituʻú, te ke lava ʻo fili ʻa e “ʻOku ʻikai ko ha kau Kalisitiane ʻa e Kāingalotu ʻo e Siasi ʻMamongá’” pe “He ʻikai lava ke moʻoni ʻa e Tohi ʻa Molomoná he ko e Tohi Tapú pē ʻa e tohi folofola moʻoní.” Te ke lava ʻo vahevahe e kau akó ki ha fanga kiʻi kulupu iiki ʻi he ngaahi loki fetalanoaʻakí ke nau fakafaivaʻi hono tali faivelenga e ngaahi pole ko ʻení.

Siviʻi Hono 3 Hoʻo Akó

Taumuʻa ʻo e lēsoní: ʻOku fakataumuʻa e lēsoni ko ʻení ke tokoniʻi e kau akó ke nau ʻiloʻi ʻa e founga kuo nau tupulaki pe liliu ai lolotonga ʻenau ako ʻa e 2 Nīfai 26–Sēkope 7.

• Teuteu ʻa e tokotaha akó: Fakakaukau ke fakaafeʻi e kau akó ke fakakaukau ki he founga kuo nau tupulaki fakalaumālie ai ʻi heʻenau ako e Tohi ʻa Molomoná ʻi he uike ʻe fā kuo ʻosí. Te ke lava ʻo fakaafeʻi kinautolu ke feinga ke ʻiloʻi ha ngaahi akonaki pau kuo nau fakaʻaongaʻi pe ngaahi veesi kuo fuʻu mahuʻingamālie kiate kinautolu.

• Fokotuʻu ki hono akoʻi he konifelenisi vitioó: ʻE lava ke fili e kau akó ke fakahoko ʻa e ʻekitivitī A pe ʻekitivitī E. Tuku ʻa kinautolu ʻoku fili ʻa e ʻekitivitī A ki ha loki fetalanoaʻaki ʻe taha pea mo kinautolu ʻoku fili ʻa e ʻekitivitī E ki ha loki ʻe taha. ʻI he taimi ʻe ʻosi ai e ngāue ʻa e kulupu takitaha ki heʻenau ʻekitivitií, te nau lava ʻo fili ha fakafofonga ke vahevahe ʻenau fakamatalá mo e toenga ʻo e kalasí.

Toe Vakaiʻi Hono 5 ʻo e Fakataukei Fakatokāteliné

Taumuʻa ʻo e lēsoní: ʻE tokoni e lēsoni ko ʻení ke ako maʻuloto ʻe he kau akó e ngaahi potufolofolá mo e ngaahi kupuʻi lea folofola mahuʻinga ki he ngaahi potufolofola fakataukei fakatokāteline ʻi he Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe e ngaahi founga ʻoku nau manatuʻi ai ʻa Sīsū Kalaisi ʻi he ʻaho takitaha.

• Meʻa ke fakaʻaliʻalí: Ko e saati ʻo e ngaahi potufolofola fakataukei fakatokāteliné mo ʻenau ngaahi kupuʻi lea mahuʻingá

• Naunaú: Pepa mo e helekosi ke fakaʻaongaʻi ʻe he kau akó ke faʻu ʻaki ʻenau ngaahi foʻi leá

• Fokotuʻu ki hono akoʻi he konifelenisi vitioó: Mahalo ʻe faingataʻa ʻa e ʻekitivitī ako maʻuloto ʻi he lēsoni ko ʻení ʻi ha kalasi konifelenisi vitiō. Fakakaukau ke fakaafeʻi e kau akó ke fai ha ʻekitivitī tatau ʻi he polokalama Fakataukei Fakatokāteliné.