2 Նեփի 31.14–21

«Դուք պետք է առաջ մղվեք»

երիտասարդները արշավի են գնում

Ճամփորդությունը դեպի հավերժական կյանք երբեմն կարող է դժվարին լինել: Մեր Երկնային Հայրը և Նրա Որդին՝ Հիսուս Քրիստոսը, մեզ մենակ չեն թողել այդ ճամփորդության ընթացքում. Նրանք ցանկանում են օգնել մեզ ամբողջ ճանապարհին: Այս դասը կօգնի ձեզ մեծացնել առաջ մղվելու ձեր ցանկությունը և համբերել մինչև վերջ, որպեսզի մի օր հասնեք ձեր նպատակակետին՝ ձեր Երկնային Հոր հետ հավերժական կյանքին:

Տեսնել ուսանողներին այնպես, ինչպես Տերն է նրանց տեսնում: Երբ ուսուցիչները ձգտում են սիրել այնպես, ինչպես Փրկիչն է սիրում, նրանք սկսում են ուրիշներին տեսնել այնպես, ինչպես Նա է նրանց տեսնում: Քրիստոսանման սերը ոգեշնչում է ուսուցիչներին հաստատակամորեն օգնել յուրաքանչյուր ուսանողի իսկապես դարձի գալ: Սուրբ Հոգին կարող է օգնել ձեզ ճանաչել յուրաքանչյուր ուսանողի աստվածային արժեքը և օգնել նրան իրացնել իր ներուժը:

Ուսանողի նախապատրաստում. ուսանողներին առաջարկեք պատրաստվել և դասի ընթացքում կիսվել, թե ինչպես կարող են օգնել մեկին, որը դժվարությամբ է ցանկանում շարունակել արդարությամբ առաջ շարժվել Երկնային Հոր մոտ վերադառնալու իր ճամփորդության մեջ:

Հնարավոր ուսումնական վարժություններ

Մեր հեռավոր ճամփորդությունը

Կարող եք վազորդի կամ մրցավազքի նկար ցուցադրել, ինչպես դասի սկզբի նկարն է: Հարցրեք, թե արդյոք ուսանողների մեջ կան այնպիսիք, որոնք երբևէ մասնակցել են երկար տարածությամբ մրցավազքի և խնդրեք նրանց նկարագրել իրենց փորձառությունը:

Օգտակար լինելու դեպքում այս օրինակը հարմարեցրեք որևէ այլ գործունեության, որը կարող է տոկունություն պահանջել և կարող է առնչվել ձեր ուսանողներին:

• Երկար տարածությամբ մրցավազքում ի՞նչը կարող է ստիպել վազորդին դադարեցնել վազքը:

• Ի՞նչը կարող է դրդել վազորդին ավարտել մրցավազքը, երբ դժվար լինի:

Հնարավորության դեպքում դիտեք «Դու երբեք մենակ չես», տեսանյութի 0:00-1:25 հատվածը, որը հասանելի է այստեղ՝ ChurchofJesusChrist.org: Այս տեսանյութում նախագահ Էլեյն Ս. Դալտոնը (Երիտասարդ կանանց նախկին գերագույն նախագահը) պատմում է երկար տարածությամբ մրցավազքում իր ունեցած դժվարությունների մասին:

Դեպի Երկնային Հայրը ձեր վերադարձի ճամփորդությունը համեմատեք երկար տարածությամբ մրցավազքի հետ: Խորհեք հետևյալի շուրջ.

Կարող եք ցուցադրել ստորև ներկայացվող հարցերը և առաջարկել ուսանողներին իրենց օրագրերում գրել պատասխանները:

• Ի՞նչն է մղում կամ կարող է մղել ձեզ առաջ ընթանալ Երկնային Հոր մոտ վերադառնալու ձեր ճանապարհին:

• Ի՞նչ դժվարությունների եք բախվում:

Այս դասն ուսումնասիրելիս փնտրեք ճշմարտություններ կամ գաղափարներ, որոնք կարող են օգնել ձեզ հաղթահարել ձեր դժվարությունները և ձգտել վերադառնալ ձեր Երկնային Հոր մոտ:

Աստվածային հրավեր

Նեփին ուսուցանում է մի խմբի

Երբ Նեփին ուսուցանում էր մկրտության և Սուրբ Հոգին ստանալու մասին, նա ուսուցանեց Քրիստոսի վարդապետության մեկ այլ կարևոր կողմ՝ մեջբերելով Երկնային Հոր ուղղակի խոսքը: Կարդացեք 2 Նեփի 31.15 հատվածը և գտեք, թե Երկնային Հայրն ինչ էր ուսուցանել:

• Ըստ ձեզ՝ ի՞նչ է նշանակում համբերել մինչև վերջ:

• Ըստ ձեզ՝ ո՞րն է ուղղակի համբերելու և Փրկչի օրինակին հետևելով համբերելու տարբերությունը:

Նեփին օգտագործեց նկարներ, որպեսզի օգնի մեզ պատկերացնել մեր վերադարձը Երկնային Հոր մոտ: Կարդացեք 2 Նեփի 31.17–20 հատվածը և նկարեք Նեփիի նկարագրած ճանապարհի մի պարզ նկար: Նշեք, թե ինչ են ներկայացնում ճանապարհի տարբեր կողմերը:

• Ինչպե՞ս կամփոփեք ձեր սովորածը:

Այս հատվածներից մենք սովորում ենք, որ երբ հետևենք Փրկչի օրինակին ու մինչև վերջ համբերենք, կստանանք հավերժական կյանք մեր Երկնային Հոր հետ:

• Ինչո՞ւ եք կամենում ստանալ հավերժական կյանք ձեր Երկնային Հոր հետ:

Առաջ մղվել

Հատվածներ 19–20-ում Նեփին թվարկել է տարբեր մոտեցումներ ու գործողություններ, որոնք պահանջվում են դեպի հավերժական կյանք տանող ճանապարհով առաջ մղվելու համար: Ուսումնասիրեք այս հատվածները և ձեր նկարած ճանապարհի վրա նշեք ձեր գտած մոտեցումներն ու գործողությունները: Եթե ցանկանում եք դիտել մի տեսանյութ, որում Նեփին տալիս է այս ուսմունքները, դիտեք «Նեփին ուսուցանում է Քրիստոսի վարդապետությունը» տեսանյութի 2:55-3:47 հատվածը ChurchofJesusChrist.orgև հետևեք ձեր սուրբ գրություններին:

1–5 միավոր սանդղակով (որտեղ 1-ը ցածր, իսկ 5-ը բարձր գնահատականն է) գնահատեք ինքներդ ձեզ, թե որքան լավ եք հասկանում և ձգտում ապրել այդ մոտեցումներով ու գործողություններով:

Ընտրեք այն արտահայտություններից մեկը, որը ցանկանում եք հասկանալ կամ ավելի լավ ապրել: Գտեք մի սուրբ գրություն կամ մեջբերում, որն օգնում է ընդլայնել ձեր հասկացողությունը: Կարող եք օգտվել Թեմաների ուղեցույցից, Սուրբ գրքերի ուղեցույցից, Gospel Library հավելվածից, գերագույն համաժողովի ելույթներից կամ այլ հուսալի աղբյուրներից:

Ուսանողներին կարող եք թույլ տալ փոքր խմբերով կամ զույգերով դասարանի հետ կիսվել վարժությունից սովորածով: Կարող եք տալ ստորև ներկայացվող հարցերից մի քանիսը կամ բոլորը, որպեսզի ընդլայնեք ուսանողների հասկացողությունը և ցանկությունը՝ կիրառելու այն, ինչ սովորել են:

Որպես այլընտրանք՝ կարող եք ցուցադրել հարցերից մի քանիսը կամ բոլորը և ուսանողներին առաջարկել ուսումնասիրելու ընթացքում պատասխանել դրանց: Ապա մի քանի ուսանողի առաջարկեք կիսվել:

Նշում. հաջորդ դասը ավելի շատ կկենտրոնանա Քրիստոսի խոսքով սնվելու վրա:

• Ինչ սովորեցիք ձեր ընտրած մոտեցման կամ գործողության մասին:

• Ինչպե՞ս կարող է դրսևորվել ձեր ընտրած մոտեցումը կամ գործողությունը:

• Ե՞րբ եք զգացել, որ այդ մոտեցումներից կամ գործողություններից մեկի շնորհիվ Երկնային Հայրն օրհնել է ձեզ կամ ձեզ ծանոթ մեկին:

Ձեր անհատական ճամփորդությունը

Կարող եք դիտել «Դու երբեք մենակ չես» տեսանյութի մնացած 1:25–2:54 հատվածը, որպեսզի տեսնեք, թե Տերն ինչպես է օգնել նախագահ Դալտոնին համբերել մինչև վերջ:

Մտածեք ձեր կյանքի մասին և դեպի Երկնային Հայրը ձեր ներկայիս ճամփորդության մասին: Խորհեք, թե ինչ եք զգում մինչև վերջ համբերելու ընթացքում:

Ուսանողներին կարող եք առաջարկել ստորև ներկայացվող հարցերից մեկի պատասխանը գրել իրենց նկարած նկարի վրա կամ կողքին: Հետո նրանք կարող են դա տուն տանել և դնել մի տեսանելի տեղում:

• Ի՞նչ սովորեցիք այսօր, որն օգնում է ձեզ ցանկանալ առաջ մղվել դեպի Երկնային Հայրը:

• Ինչպե՞ս եք ցանկանում կիրառել այն, ինչ սովորեցիք այսօր: (Ձեր ուսումնասիրած արտահայտություններից մեկով ապրելն ավելի լավ օրինակ կլիներ:)

Կարդացեք Տասներկու Առաքյալների Քվորումից երեց Ջեֆրի Ռ. Հոլլանդի հետևյալ խոսքերը՝ խորհելով ձեր գրածի շուրջ. Կարող եք նրա «Վաղը Տերը հրաշքներ կգործի ձեր մեջ» ելույթից մի հոլովակ դիտել (15:12-16:20), որը հասանելի է այստեղ՝ ChurchofJesusChrist.org:

Երեց Ջեֆրի Ռ. Հոլլանդ

Եթե մեր սիրտը նվիրենք Աստծուն, եթե սիրենք մեր Տեր Հիսուս Քրիստոսին, եթե անենք ամեն ինչ՝ ավետարանով ապրելու համար, ապա ի վերջո վաղվա և մնացած այլ օրերը կլինեն փառահեղ, նույնիսկ, եթե ոչ միշտ հասկանանք դա: Ինչո՞ւ։ Որովհետև մեր Երկնային Հայրը ցանկանում է, որ դա այդպես լինի: Նա կամենում է օրհնել մեզ: Արժանավոր, լիառատ և հավերժական կյանքն Իր զավակների համար Նրա ողորմած ծրագրի նպատակն է: Այն մի ծրագիր է, որը հիմնված է հետևյալ ճշմարտության վրա` «Որ Աստծուն սիրողներին ամեն բաները գործակից են լինում դէպի բարին նորանց»: Այսպիսով, շարունակեք սիրել: Շարունակեք փորձել։ Շարունակեք վստահել։ Շարունակեք հավատալ։ Շարունակեք աճել։ Երկինքը ողջունում է ձեզ՝ այսօր, վաղը, հավիտյան (Ջեֆրի Ռ. Հոլլանդ, «Վաղը Տերը հրաշքներ կգործի ձեր մեջ», Ensign կամ Լիահոնա, մայիս 2016թ., 127):

Կարող եք կիսվել ձեր վկայությամբ: Կարող եք նաև առաջարկել, որ ուսանողները կիսվեն իրենց վկայություններով կամ մտքերով:

Բացատրական և պատմական տեղեկություններ

Ի՞նչ է նշանակում համբերել մինչև վերջ:

Տասներկու Առաքյալների Քվորումից երեց Ջոզեֆ Բ. Վիրթլինը (1917-2009) ուսուցանել է.

Երեց Ջոզեֆ Բ. Վիրթլին

Մինչև վերջ համբերել նշանակում է, որ մենք մեր կյանքն ամուր հաստատել ենք ավետարանի հողի վրա՝ մնալով Եկեղեցու հիմնական ուղղության վրա, խոնարհաբար ծառայելով մեր մերձավորներին, ապրելով Քրիստոսանման կյանքով և պահելով մեր ուխտերը: Նրանք, ովքեր համբերում են, հավասարակշռված են, կայուն, խոնարհ, շարունակաբար կատարելագործվում են և անմեղ են: Նրանց վկայությունը աշխարհիկ հիմնավորում չունի. այն հիմնված է ճշմարտության, գիտելիքի, փորձառության և Հոգու վրա (Ջոզեֆ Բ. Վիրթլին, «Առաջ մղվել», Ensign կամ Լիահոնա, նոյեմբեր 2004թ., 101):

Տասներկու Առաքյալների Քվորումից երեց Դիտեր Ֆ. Ուխդորֆն ուսուցանել է.

Երեց Դիտեր Ֆ. Ուխդորֆ

Մինչև վերջ համբերելը մի գործընթաց է, որը լցնում է մեր կյանքի ամեն րոպեն, ամեն ժամը, ամեն օրը՝ արևածագից մինչև մայրամուտ: Այն իրականանում է անձնական կարգապահությամբ՝ հետևելով Աստծո պատվիրաններին:

Հիսուս Քրիստոսի վերականգնված ավետարանը կյանքի ճանապարհ է: Այն միայն կիրակի օրվա համար չէ: Այն մի այնպիսի բան չէ, որը կարող ենք անել միայն որպես սովորություն կամ ավանդույթ, եթե ակնկալում ենք ստանալ դրա խոստացված օրհնություններից բոլորը: «Մի խաբուիք. Աստուած չի ծաղրուիլ. որովհետեւ ինչ որ մարդ սերմէ, այն էլ կհնձէ» (Գաղատացիս 6.7): (Դիտեր Ֆ. Ուխդորֆ, «Մի՞թե մենք պատճառ չունենք ուրախանալու», Ensign կամ Լիահոնա, նոյեմբեր 2007թ., 20)

Ի՞նչ անել, եթե զգում եմ, որ դեպի հավերժական կյանք տանող ճանապարհին չեմ:

Նախագահ Ռասսել Մ. Նելսոնն ուսուցանել է․

Նախագահ Ռասսել Մ. Նելսոն

Եթե շեղվել եք, կամ եթե կան բաներ, որոնք պետք է բաց թողնեք, որպեսզի ձեր միտքն ու սիրտն ավելի մաքուր լինեն, այսօր փոխվելու կատարյալ ժամանակն է:

Եթե չգիտեք ինչպես ապաշխարել, խոսեք ձեր եպիսկոպոսի կամ ձեր ծնողների կամ երկուսի հետ: Նրանք կօգնեն ձեզ հասկանալ Հիսուս Քրիստոսի Քավությունը: Նրանք կօգնեն ձեզ զգալ այն ուրախությունը, որն իրական ապաշխարությունն է մշտապես բերում:

Ոչ մի րոպե հետ մի կանգնեք ուխտի ճանապարհից: Իրական ապաշխարությամբ դարձի եկեք հիմա։ (Ռասսել Մ. Նելսոն, «Իսրայելի հույսը», Երիտասարդների համաշխարհային հոգևոր հավաք, հունիս, 2018թ.)

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Երեց Ջեֆրի Ռ. Հոլլանդ

Աստված այնքան չի մտածում այն մասին, թե որտեղ եք դուք եղել, որքան այն մասին, թե որտեղ եք դուք հիմա, և որտեղ եք ցանկանում լինել Նրա օգնությամբ: (Ջեֆրի Ռ. Հոլլանդ, «Լավագույնը դեռ պիտի լինի», Ensign, հունվար 2010, 27)

Օժանդակ ուսումնական վարժություններ

Դասը սկսելու այլընտրանքային եղանակ

Ուսանողներին առաջարկեք մի քիչ ցատկել, ձգումներ անել, կքանստել: Ուսանողներին հարցրեք. «Եթե ստիպված լինեիք սրանցից յուրաքանչյուրն անել մի քանի րոպե, ինչպե՞ս կփոխվեր ձեր փորձառությունը: Ինչո՞ւ է դժվար ժամանակի ընթացքում շարունակել կատարել օգտակար գործողություններ: Ի՞նչ օգուտներ ենք ստանում»:

Երաժշտական տեսանյութ

Որպեսզի օգնեք ուսանողներին զգալ «երբ առաջ մղվենք ուխտի ճաապարհով և համբերենք մինչև վերջ, կստանանք հավերժական կյանք մեր Երկնային Հոր հետ» սկզբունքի ճշմարտությունն ու կարևորությունը, կարող եք ցուցադրել «2016 Ընդհանուր թեմա. Առաջ մղվեք» տեսանյութը (4:12) , որը հասանելի է այստեղ՝ ChurchofJesusChrist.org: