2 Nifae 27

“O se Galuega Ofoofogia ma le Mea e Ofo Ai”

o kopi o le Tusi a Mamona i gagana eseese

Mafaufau i mea na tutupu e te manatu e ofoofogia ma pe na faapefea e nei mea na tutupu ona aafia ai oe ma i latou o siomia oe. Na folafola mai e Iesu Keriso o le a faia le galuega ofoofogia o le toefuataiina o Lana talalelei, e aofia ai le Tusi a Mamona, i le lalolagi i aso e gata ai. O lenei lesona e mafai ona fesoasoani ia te oe e lagona ai le talisapaia sili atu o le Alii mo le toefuataiina mai o le Tusi a Mamona i le lalolagi.

Aoao atu e ala i le Agaga. E leai se faiaoga faaletino, e tusa lava po o le a le tele o le tomai po o le poto masani, e mafai ona suitulaga i le Agaga. Ae e mafai ona avea i tatou o ni meafaigaluega i aao o le Atua e fesoasoani i Lana fanau e aoao e ala i le Agaga. Na aoao mai Peresitene Henry B. Eyring, “E le mafai e a tatou tagata aoga ona iloa le Atua, ma ia alolofa e pei ona tatau ai ona latou alolofa, sei vagana ua aoaoina i latou e le Agaga Paia” (“O Le Taua o le Agaga Paia,” Anomea a le Faiaoga Seminare o le Feagaiga Tuai [2018], ChurchofJesusChrist.org).

Sauniuniga a le tagata aoga: Valaaulia tagata aoga e o mai saunia e faasoa mai e uiga i se tagata sa faia se mea ofoofogia mo i latou po o se tasi latou te iloa. Mo se faataitaiga, atonu na laveaiina i latou e se tasi mai se tulaga matautia pe tuu atu ia i latou se meaalofa limafoai.

Gaoioiga e Ono Mafai Ona Aoao Ai

O se mea ofoofogia

Ina ia saunia tagata aoga e faasoa mai mea nei, mafaufau e faasoa atu e uiga i se tagata na faia se mea mo oe e te manatu e ofoofogia pe taua.

Mafaufau i se tagata na faia se mea ofoofogia mo oe pe mo se tasi e te iloa.

• O le a le mea na faia e lenei tagata?

• O le a sou lagona i le tagata na faia lenei mea? Aisea?

I le 2 Nifae 27, sa molimau mai ai le Alii i se mea ofoofogia o le a Ia faia e fesoasoani ai ia i tatou i le amioleaga ma le liliuese o aso e gata ai. A o e suesue, mafaufau loloto pe faapefea e mea ua e aoaoina ona aafia ai ou lagona e uiga i le Alii.

Faitau le 2 Nifae 27:25–26, ma vaavaai mo mea na folafola mai e le Alii o le a Ia faia.

Valaaulia tagata aoga e faasoa mai o latou manatu i le mea o loo faatatau i ai le “galuega ofoofogia ma le mea e ofo ai”. Afai e manaomia, faasoa atu le faamalamalamaga lenei mai ia Peresitene Russell M. Nelson.

Sa ta’ua e Peresitene Russell M. Nelson e faapea o lenei “galuega ofoofogia o le a aofia ai le oo mai o le Tusi a Mamona ma le Toefuataiga o le talalelei” (“Molimau Faatusi Paia,” Ensign po o le Liahona, Nov. 2007, 46).

O se upumoni e tasi e mafai ona tatou aoao mai lenei valoaga o le, sa faatinoina e le Alii se galuega ofoofogia ma se mea e ofo ai e ala i le oo mai o le Tusi a Mamona ma le Toefuataiga o Lana talalelei.

• O le a se mea ua e iloa e uiga i le Tusi a Mamona ma le talalelei toefuataiina e ono mafua ai ona e faasino atu i ai e faapea e ”ofoofogia”?

O Le Tusi a Mamona: O se galuega ofoofogia ma se mea e ofo ai

O le tele o le 2 Nifae 27 o loo taulai atu i le oo mai o le Tusi a Mamona. A o lei suesue atili mai lenei mataupu, faaalu sina taimi e manatunatu ai i ou lava lagona e uiga i le Tusi a Mamona. Pe e ofoofogia ea ia te oe lava ia? Aisea pe aisea foi e leai ai? O a ni au fesili o i ai? A o e suesue, vaavaai mo aoaoga e mafai ona fesoasoani ia te oe e vaai manino atili ai i le Tusi a Mamona o se “galuega ofoofogia ma se mea e ofo ai.”

Atonu e aoga le faitau faatasi o se vasega ia fuaiupu o loo lisi atu i le aotelega lenei.

Na valoia e Nifae o le a oo mai le Tusi a Mamona e fesoasoani i faafitauli o aso e gata ai (tagai i le 2 Nifae 27:6). Sa ia tusia foi o le a faatagaina e le Atua ni nai molimau e vaai i papatusi na faaliliuina mai ai le Tusi a Mamona ma molimau atu i le moni o le tusi i le lalolagi (tagai i le 2 Nifae 27:12–14). Ona faasoa mai lea e Nifae se valoaga e uiga i nisi o faamatalaga auiliili e fesootai i le faaliliuina o le Tusi a Mamona.

Mafaufau e tuu atu pe faaali atu i tagata aoga le siata lenei. E mafai e tagata aoga ona suesue fuaiupu ma faatumu le siata i ni paga po o ni vaega toalaiti.

	Valoaga o le mea o le a faia e le tagata (2 Nifae 27:15–19)	O le igoa o le tagata na faataunuuina le valoaga (Iosefa Samita—Talafaasolopito 1:63–65)
Tagata muamua (“lei aoaoina”)
Tagata lona lua (“i se tasi”)
Tagata lona tolu (“le ua aoaoina”)

A uma ua lava se taimi o tagata aoga e suesue ai, valaaulia ni nai volenitia e faasoa mai mea sa latou aoaoina. Mafaufau e fai atu le fesili lenei o se vaega o lenei talanoaga.

• Aisea e te manatu na faaaoga ai e le Alii ia Iosefa Samita, o se tagata e lei aoaoina, e aumaia le Tusi a Mamona?

Faitau le 2 Nifae 27:20–23, ma vaavaai mo mafuaaga na filifilia ai e le Atua se tasi e lei aoaoina e faaliliu le Tusi a Mamona.

• O a ni mea ua e aoaoina e uiga i le Alii mai nei fuaiupu? E mafai faapefea e le iloaina o nei mea e uiga ia te Ia ona aafia ai oe?

• E faapefea ona avea le oo mai o le Tusi a Mamona ma faamaoniga o le fetalaiga a le Alii “Ou te mafai ona faia o laʼu lava galuega”? (fuaiupu 21).

E faaopoopo atu i le faamatalaga lenei, mafaufau e faasoa atu le saunoaga a Peresitene Russell M. Nelson i le vaega o “Manatu ma Talaaga o Faamatalaga”.

Na molimau mai Ema Samita (1804–1879), le faletua o le Perofeta, e uiga i le fesoasoaniga paia na maua e Iosefa i lona faaliliuina o le Tusi a Mamona:

Emma Samita

Sa le mafai e Iosefa Samita ona tusi pe faalau atu se tusi e fetaui lelei ma faaupuina lelei, aemaise le faalauina atu o se tusi e pei o le Tusi a Mamona. Ma, e ui ina sa avea a’u ma se tagata auai malosi i mea na tutupu, … e ofoofogia ia te a’u, “o se mea e ofoofogia ma maofa.” …

O lo’u talitonuga e faapea o le Tusi a Mamona e moni a’ia’i lona paia—e leai ma sina o’u masalosalo i ai. … Semanu e le mafai e se tagata ua aoaoina ona faia lenei mea; ma, mo se tasi e vaivai ma e lei aoaoina e pei o ia, sa matua ono le mafai lava. (Emma Smith, i le “Last Testimony of Sister Emma,” Saints’ Herald, Oke. 1, 1879, 290.)

• E faavae i mea ua e aoaoina i le asō, e faapefea e le oo mai o le Tusi a Mamona ona avea ma se “galuega ofoofogia ma le mea e ofo ai”?

• E faapefea e le iloaina ua tuuina mai e le Alii ia i tatou lenei faamanuiaga ona aafia ai ou lagona e uiga ia te Ia?

• O a ni aafiaga na oo ia te oe po o isi na faapupula mai ai le ofoofogia o le Tusi a Mamona?

Mafaufau e faasoa atu se aafiaga patino po o se tasi o vitio nei o se vaega o la outou talanoaga o fesili na muamua atu.

Ina ia vaai i faataitaiga o le ofoofogia o le Tusi a Mamona, e mafai ona e matamata i le “Solving Life’s Problems with the Book of Mormon” (1:00) po o le “O Le Tusi a Mamona: Faamata e Faape’i Lou Olaga e aunoa ma Ia?” mai le faailotaimi 5:38 i le 11:26. E mafai ona maua uma vitio e lua i le ChurchofJesusChrist.org.

I le amataga o le lesona, sa talosagaina oe e mafaufau i ou lagona e uiga i le Tusi a Mamona. Mafaufau pe i ai se upumoni na e suesueina i le asō ua aafia ai lau molimau i lenei tusi paia. I lau api faamaumau mo suesuega, tusifaamaumau soo se manatu po o uunaiga ua e mauaina, faapea foi ma faatinoga i le lumanai ua uunaia oe e fai.

Mafaufau e valaaulia ni nai volenitia e faasoa mai ni manatu anoa po o ni malamalamaaga na latou maua i le taimi o le lesona. Molimau atu e uiga i upumoni na outou talanoaina i le asō.

Manatu ma Talaaga o Faamatalaga

E faapefea e le oo mai o le Tusi a Mamona ona avea o se galuega ofoofogia ma le mea e ofo ai?

Na aoao mai Peresitene Russell M. Nelson:

Peresitene Russell M. Nelson

Mafaufau i le taimi puupuu na faaaluina e Iosefa e faaliliuina ai le Tusi a Mamona. I le galue ai mai ia Aperila ia Iuni o le 1828, na faaliliuina ai e Iosefa le 116 itulau ia na leiloloa ia Matini Harisi. Na amata ona toe faaliliuina e Iosefa i le Aso Lua, Aperila 7, 1829, faatasi ai ma Oliva Kaotui o se tusiupu. Na faamaeaina le tusi i le valusefulu-lima aso mulimuli ane, ia Iuni 30 o lena lava tausaga. O le mea moni, e lei faaalu uma lena taimi i le galue ai i le faaliliuga. Sa faaalu foi e le Perofeta ma ana tusiupu le taimi e aai ai, e momoe, e saili galuega, ia maua le perisitua Arona ma le Mekisateko, e faia ia le itiiti ifo ma le tasi (ma atonu e lua) ni malaga i Kolesavile i le tolusefulu maila le mamao, ina ia maua ma faamaumau faaaliga e sefulutolu lea ua avea nei ma vaega o le Mataupu Faavae ma Feagaiga, e siitia atu mai Haramoni i Feiete, ina ia maua le puletaofia o le Tusi a Mamona, ma amata ona faia fuafuaga mo le lolomiina o le Tusi a Mamona. I le fuafuaina ma le faaeteete, na totoe ai le onosefulu-lima pe itiiti ifo foi o aso faigaluega na faaliliu ai e le perofeta ma ana tusiupu lenei tusi, lea e aofia ai itulau e 531 i lona lomiga o loo i ai nei. (Tagai i le John W. Welch, Ensign, Ian. 1988, itu. 46–47.) E tusa lena o se averesi o le valu itulau i le aso. Mafaufau i lenei mea pe a e faaliliuina se tusi, po o le fuafuaina o lau lava faitauga o le Tusi a Mamona. (Russell M. Nelson, “A Treasured Testament,” Ensign, Iul 1993, 61–62)

Na molimau mai Elder Ulisses Soares o le Korama a Aposetolo e Toasefululua:

Elder Ulisses Soares

O le faagasologa o le faaliliuga o le Tusi a Mamona sa … o se vavega [lava]. O lenei faamaumauga paia anamua sa le’i “faaliliuina” i se auala masani lea e faaliliuina ai e tagata popoto tusitusiga anamua i le aoaoina o se gagana o anamua. E ao ona tatou tagai atu i le faagasologa e sili atu o se “faaaliga” faatasi ma le fesoasoani o meafaigaluega faaletino na aumai e le Alii nai lo se “faaliliuga” e se tasi ua i ai le malamalama o gagana. O le fesoasoani a le Alii i le faaliliuga o papatusi— po o faaaliga, i se isi faaupuga—e faamaonia foi pe a mafaufau i le taimi puupuu faavavega na faaaluina e Iosefa Samita e faaliliu ai. (Ulisses Soares, “O Le Oo Mai o le Tusi a Mamona,” Ensign po o le Liahona, Me 2020, 33)

Matamata i le “Molimau Mamana” (7:46) e vaai ai i faataitaiga faaopoopo i le ala na avea ai le oo mai o le Tusi a Mamona o se galuega ofoofogia ma se mea e ofo ai.

O le a se mea ofoofogia e uiga i le Toefuataiga o le Ekalesia ma le talalelei a Keriso?

Matamata i le “O Se Folafolaga o le Faamanatuina o le Lua Seneturi i le Lalolagi” mai le faailotaimi 2:41 i le 9:13 pe faitau le “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi” (ChurchofJesusChrist.org), vaavaai mo le mea ofoofogia e uiga i le Toefuataiga o le Ekalesia ma le talalelei a Keriso.

Gaoioiga Faaopoopo e Aoao Ai

Gaoioiga o le faamatalaina

Mafaufau e valaaulia tagata aoga e faatusatusa tulaga o loo faamatalaina i le 2 Nifae 27:1–5 ma folafolaga a le Alii i le 2 Nifae 27:29–31, 35. Ina ia fesoasoani i tagata aoga e mafaufau e uiga i aafiaga o le Tusi a Mamona ma le talalelei toefuataiina i le lalolagi, valaaulia i latou e filifili se tasi pe sili atu o tulaga nei (sii mai le 2 Nifae 27:1–5). Mo tulaga taitasi latou te filifilia, e mafai ona latou maua se upumoni o loo aoaoina i se fuaitau o le Tusi a Mamona latou te lagona e mafai ona fesoasoani.

• O se tasi e le o mautu pe o i ai ni vaisu

• O se tasi e manaomia se malutaga mai afā o le olaga

• O se tasi e manaomia le faamalieina o le fiaai po o le fiainu faaleagaga

• O se tasi e manaomia ona manino atili le vaai

Mo se faataitaiga, o se tasi e i ai vaisu e mafai ona fesoasoani i ai le upumoni o loo aoao mai i le Alema 7:11–13 e faapea e malamalama le Faaola ma e mafai ona fesoasoani i soo se faaosoosoga.

Valaaulia tagata aoga e faasoa mai mea na latou maua.

2 Nifae 27:15–19. Faataunuuina o le valoaga e uiga i le tagata e lei aoaoina

Ina ia fesoasoani i tagata aoga e aoao atili e uiga i le faataunuuina o le valoaga o loo maua i le 2 Nifae 27:15–19, mafaufau e faaali atu le “O Se Galuega Ofoofogia ma le Mea e Ofo Ai” (5:46). E mafai foi ona outou faitau faatasi i ai i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 (2018), 44–48.