2 Nifae 29

Mauaina Atili o le Afioga a le Atua

talavou o loo faitauina tusitusiga paia

E toatele tagata e talitonu o le Tusi Paia o le afioga ia a le Atua. Peitai, e le o i latou uma e naunau e maua atili le afioga a le Atua nai lo le mea ua uma ona latou maua. Na valoia e Nifae e faapea i aso e gata ai, e toatele tagata o le a teena le Tusi a Mamona ona ua uma ona latou maua le Tusi Paia. E finagalo le Alii ia tatou iloa o Lana talalelei e mo tagata uma ma o Lana afioga e le faatapulaaina i le Tusi Paia. O lenei lesona ua faamoemoe e fesoasoani ia te oe ia naunau atili e maua le afioga a le Alii i lou olaga.

Aoao mai le Tusi Paia ma le Tusi a Mamona. O le Tusi Paia ma le Tusi a Mamona o ni soa faaletusitusiga paia ma e lagolago e le tasi le isi i le aoaoina atu o aoaoga faavae a Iesu Keriso. E le gata i lea, ua toefuatai mai e le Tusi a Mamona upumoni manino ma taua lea na leiloloa mai le Tusi Paia. Fesoasoani i tagata aoga ia malamalama a tatou te suesue i le Tusi a Mamona, e mafai ona faamanino ai lo tatou malamalama i le aoaoga faavae i le Tusi Paia.

Sauniuniga a le tagata aoga: Valaaulia tagata aoga e mafaufau e uiga i mea o loo latou faia e talia ai fesootaiga mai le Atua.

Gaoioiga e Ono Mafai Ona Aoao Ai

Ia naunau e maua le malamalama sili atu

Vaai faalemafaufau e faapea, o Oliva, i le 15 o ona tausaga, na tonu ia te ia o faamatalaga uma ma tekinolosi o loo avanoa ia te ia i lena taimi o le a na o le pau lava lena o le mea na te manaomia.

Afai e manaomia, mafaufau e fetuunai le tausaga i le fesili lenei ina ia atili talafeagai ai i au tagata aoga.

• O le a le mea semanu e misi e Oliva pe ana fai na te filifilia lenei mea i le tausaga e 1950? O a faamatalaga po o tekinolosi ua maua talu mai lena taimi?

• E mafai faapefea ona fesootai lenei tulaga i le aoaoina o upumoni faaleagaga?

Valaaulia tagata aoga e mafaufau po o a faamanuiaga e maua mai i le naunau po o le manao e aoao mai le Atua.

A o e faitau i le saunoaga lenei mai ia Peresitene Russell M. Nelson, mafaufau po o le a le uiga ia te oe.

Peresitene Russell M. Nelson

Oi, e matua anoanoai mea e finagalo lou Tama o i le Lagi ia e iloa. E pei ona aoao mai Elder Neal A. Maxwell, “Ia i latou e i ai mata e vaai ai ma taliga e faalogo ai, ua manino lava o loo tufa fua mai e le Tama ma le Alo ia mealilo o le atulaulau!” [“Agamalu ma le Maulalo” (Faigalotu a le Iunivesite o Polika Iaga, Oke. 21, 1986), 9, speeches.byu.edu]. (Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95)

Ina ia fesoasoani i tagata aoga e iloilo lo latou taliaina o le afioga a le Atua i o latou olaga, mafaufau e tufa atu pepa nei ma valaaulia tagata aoga e faamae’a uma taitoatasi.

O Lo’u Manao e Aoao Upumoni Faaleagaga mai le Atua

Tusi Lesona a le Faiaoga o le Tusi a Mamona—2 Nifae 29: Mauaina Atili o le Afioga a le Atua

Faaalu sina taimi e manatunatu ai i ou uiga faaalia e uiga i le mauaina o upumoni faaleagaga mai le Atua. Taumafai e vaai po o a mea o loo lelei ona e faia ma po o a mea e mafai ona e faaleleia atili.

• E seasea: 1

• O nisi taimi: 2

• E masani lava: 3

• I taimi uma: 4

Ou te faatauaina ma suesue i le Tusi Paia ma le Tusi a Mamona.

Ou te vaavaai mo tali i a’u fesili e ala i le suesueina o tusitusiga paia.

Ou te saili e aoao mai le Atua ma e uiga ia te Ia e ala i tusitusiga paia.

Ou te saili ma mulimuli i faaaliga patino mai le Agaga Paia.

Ou te suesue i upu na tautalagia i le konafesi aoao e a’oa’o ai i mea e finagalo le Atua ou te iloa.

© 2024 Puletaofia e le Intellectual Reserve, Inc. Ua taofia aia tatau uma.

A o e suesue i le asō, vaavaai mo mea e mafai ona e faia e faaauau ai le aoaoina o mea uma e finagalo le Atua e aoao atu ia te oe.

Uiga faaalia eseese i le mauaina o le afioga a le Atua

I le 2 Nifae 28–29, na valoia ai e Nifae uiga faaalia o le a i ai i nisi o tagata i aso e gata ai e uiga i le mauaina atili o le afioga a le Atua. Faitau le 2 Nifae 28:29 ma le 2 Nifae 29:3, ma vaavaai mo mea na aoao mai e Nifae ma le Alii e uiga i le auala o le a tali atu ai nisi o tagata i le mauaina o tusitusiga paia faaopoopo i aso e gata ai.

• O le a se mea sa e mauaina?

• O a ni mafuaaga e ono maua ai e tagata lenei vaaiga?

Mafaufau e faataitai le mea lenei o se lesona faatino. Talanoa po o le a se mea e le mafai ona faia e se ipu o loo faafaō, ma fesoasoani i tagata aoga e faatusatusa lenei mea ia i latou o e teena le Tusi a Mamona.

Ave se ipu e le o iai se mea i totonu ma mafaufau po o le a le mea e mafai ona faaaoga i ai. Ona fuli faafaō lea. O mafai lava ona faaaogaina i le auala sa tatau ona faaaoga ai? Faatusatusa lenei mea i le Tusi a Mamona ma ona aafiaga faamoemoeina i le olaga o se tagata.

• O le a le malamalama ma faamanuiaga e te manatu e finagalo le Atua ia tatou maua e ala i le Tusi a Mamona?

I le taimi o le lesona faitino o loo i luga, fuli i luga le itu sa’o o le ipu e faatusa i le saunia e talia. E mafai ona e tufaina atu ni fasipepa laiti i tagata aoga taitasi. Valaaulia tagata aoga taitasi e tusi i lalo se mea se tasi e finagalo le Atua tatou te iloa pe mauaina e ala i le Tusi a Mamona. E mafai e tagata aoga ona faatumu le ipu i a latou tali. Mafaufau e faitau leotele nei mea e fesoasoani ai i tagata aoga ia iloa po o a faamanuiaga silisili o loo avanoa mo i latou e naunau e taliaina.

Faitau le 2 Nifae 29:7–11, ma vaavaai mo mea e finagalo Iesu Keriso i tagata o e teena le Tusi a Mamona ia iloa.

Atonu e maua atili e nisi tagata aoga nisi mea pe afai latou te faitau faatasi ma isi i se vaega toalaiti. Mafaufau e vaevae tagata aoga i ni vaega e faitau fuaiupu 7–11 pe afai e sili atu ona fetaui ma o latou manaoga.

• O le a se upumoni na e aoaoina e uiga ia Iesu Keriso mai nei fuaiupu?

Tuu atu i tagata aoga se avanoa e faasoa mai ai ni upumoni eseese, ma valaaulia tagata aoga e faamatala mai po o le a le aafiaga e mafai ona i ai i nei upumoni.

O le upumoni e tasi e mafai ona tatou aoaoina o le, e manatua e le Atua tagata uma ma fetalai mai ia i latou i atunuu uma.

• O a nisi o auala eseese e fetalai mai ai le Atua i Ana fanau i atunuu uma?

• O a ni aafiaga ua fesoasoani ia te oe e iloa ai e manatua oe e le Atua ma fetalai mai ia te oe?

Matamata le “O Se Tala o le Tusi a Mamona” (5:15), o loo maua i le ChurchofJesusChrist.org, e vaai ai pe na faapefea ona faamanuiaina se tagata e toatasi e ala i le taliaina o le afioga a le Atua.

Mafaufau e faaiu le lesona i le valaaulia o tagata aoga e mafaufau pe mafai faapefea ona latou talia atili le afioga a le Atua. O se tasi auala e faia ai lenei mea o le valaaulia lea o tagata aoga e faamae’a laasaga nei i a latou api talaaga mo suesuega. A uma ua lava se taimi o tagata aoga e faauma ai laasaga, molimau atu i upumoni sa outou talanoaina.

1. Fai se lisi o auala uma ua faaavanoaina ai e le Atua Lana afioga ia te oe.

2. Mafaufau po o faapefea lou naunau e talia le afioga a le Atua e ala i nei auala taitasi. (E mafai ona e tusia se ipu faigofie i tafatafa o auala taitasi e te lagona le talia gofie atili ai o le faalogo atu i le Alii.)

3. Tusi i lalo se suiga se tasi pe sili atu e mafai ona e faia ina ia saunia atili ai e talia le afioga a le Atua i le tele o nei auala.

Manatu ma Talaaga o Faamatalaga

O le a se mea e mafai ona ou faia e faalogo ai i mea e finagalo le Atua ou te faalogo i ai?

Matamata le “#Faalogo Ia te Ia: Ua Valaaulia i Tatou e Peresitene Nelson e Faalogo i le Siufofoga o le Alii” (2:32) e aoao ai i fautuaga taua mai ia Peresitene Russell M. Nelson.

Na aoao mai foi Peresitene Nelson:

Peresitene Russell M. Nelson

E leai se mea na te tatalaina le lagi e pei o le tuufaatasiga o le mama a’ia’i, usiusitai sa’olele, sailiga ma le naunautai, taumafa i aso taitasi i le afioga a Keriso i le Tusi a Mamona, ma taimi faisoo e tuuto atu i le galuega o malumalu ma talafaasolopito o aiga.

Ina ia mautinoa, atonu e i ai taimi e te lagonaina ai e peisea’i o loo tapunia le lagi. Ae ou te folafola atu a e faaauau pea ona usiusitai, faaalia le lotofaafetai mo faamanuiaga uma ua foai atu e le Alii ia te oe, ma afai e te faamamaluina ma le onosai le taimi a le Alii, o le a foai atu ia te oe le poto ma le malamalama o loo e sailia. (Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95–96)

E faapefea ona fetalai mai le Atua ia i tatou e ala i le Tusi a Mamona?

O vitio nei o loo faapupula mai ai le ala na maua ai e tagata le taitaiga a le Atua e ala i le suesueina o le Tusi a Mamona.

“Principles of Peace: God’s Word #PrinceofPeace” (2:02)

“Tala a Iareto e uiga i le Tusi a Mamona” (1:37)

“Tala a Shaquille e uiga i le Tusi a Mamona” (1:28)

Mata o le a i ai nisi tusi o tusitusiga paia i le lumanai?

Na saunoa mai Peresitene Dallin H. Oaks o le Au Peresitene Sili:

Peresitene Dallin H. Oaks

O le a oo mai le taimi e aumaia ai e le Alii nei aoaoga musuia ua Ia tuuina atu i Ana fanau i atunuu eseese mo le faamanuiaina o tagata uma. O le a aofia ai tala o le asiasiga a le Alii toetu ia i latou ua tatou faaigoaina o ituaiga ua leiloloa o Isaraelu, ma Ana faaaliga i fanau uma a Aperaamo. …

Afai e oo ina oo mai tusitusiga fou—ma e tusa ai ma le valoaga o le a oo mai lava—tatou te faamoemoe o le a le faia e pei ona teena ai e nisi le Tusi a Mamona ona ua i ai ia i latou se Tusi Paia. (Tagai Dallin H. Oaks, “O Tagata Uma i Nofoaga Uma,” Ensign po o le Liahona, Me 2006, 80)

Gaoioiga Faaopoopo e Aoao Ai

2 Nifae 29:7, 11. O le afioga a le Alii i atunuu uma

faafanua o le lalolagi

O se tasi o auala e fesoasoani ai i tagata aoga ia malamalama e fetalai atu Iesu Keriso i tagata i atunuu uma o le faaali atu lea o se faafanua o le lalolagi ma valaaulia tagata aoga e faailoa mai nisi o le tele o atunuu o le lalolagi.

Fesoasoani i tagata aoga ia malamalama o Iesu Keriso o le faaao o lenei Ekalesia i le lalolagi atoa ma e fetalai atu i tagata i atunuu uma. Mo se faataitaiga, e mafai ona e faailoa atu o taitai o le Ekalesia i aso nei e o mai mai le tele o vaega o le lalolagi. Na saunoa Peresitene Russell M. Nelson i mea nei i le taimi o le sauniga o le taeao o le Aso Sa o le konafesi aoao ia Aperila 2021:

Peresitene Russell M. Nelson

O lenei taeao, ua tatou faalogo atu mai taitai o le Ekalesia o ē e o mai mai konetineta uma ua ainā o le lalolagi. O le mea moni, o faamanuiaga o le talalelei e mo ituaiga, gagana, ma tagata uma. O le Ekalesia a Iesu Keriso o se ekalesia mo le lalolagi atoa . O Iesu Keriso o lo tatou taitai. (Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 101–2)

Atonu e malie mo tagata aoga le sueina po o ai taitai o le Ekalesia na saunoa i le konafesi aoao aupito lata mai ma ta’u atu po o fea atunuu latou te o mai ai.

O se malamalama ia Iesu Keriso e ala i le Tusi a Mamona

Fesoasoani i tagata aoga ia iloa o le Tusi a Mamona e mafai ona fesoasoani ia i tatou ia iloa Iesu Keriso ma Lana talalelei. E mafai e tagata aoga ona faitau le 2 Nifae 30:3–8, ma vaavaai mo faamanuiaga na fai mai Nifae o le a oo mai ona o le toatele o tagata i aso e gata ai o e o le a talitonu i le Tusi a Mamona. E mafai foi ona e faasoa atu ni faamatalaga eseese mai le toatele o tamaitai ma alii o e na faasoa atu a latou molimau o le Tusi a Mamona i le konafesi aoao. I le ma le isi, mafaufau e faasoa atu lau molimau patino ma valaaulia tagata aoga e faasoa mai pe na faapefea ona latou iloa lo latou Faaola e ala i le suesueina o le Tusi a Mamona.

handout of my desire to learn spiritual truths from God