2 Nifae 26

Vaai, Alofa, ma Taulima Isi e pei ona Faia e le Atua

O Iesu Keriso o loo siomia e tagata

O aso uma lava tatou te feagai ai ma savali ma faamatalaga na fuafua ia faatosina ai o tatou lagona ma vaaiga. I le 2 Nifae 26, na aoao mai ai Nifae e uiga i le vaaiga a le Atua. O lenei lesona ua faamoemoe e fesoasoani ia te oe e vaai, alofa, ma taulima ai isi e pei ona faia e le Atua.

Fesoasoani i tagata aoga ia lagona o a latou saofaga e faatauaina. Faaali atu i tagata aoga e te faatauaina a latou fesili ma manatu faaalia e ala i le faalogo ma le toto’a ma faia se taumafaiga faamaoni ia malamalama. Faailoa atu lou fiafia i ai e ala i le taulai atu i mea e fai mai ai tagata aoga ae le o mea o le a e fai atu ai.

Sauniuniga a le tagata aoga: Valaaulia tagata aoga e fesili i o latou matua po o se uo faatuatuaina pe faapefea ona latou taumafai e vaai atu i isi e pei ona faia e le Faaola.

Gaoioiga e Ono Mafai Ona Aoao Ai

O la tatou vaaiga

Nai lo le faaali atu o ata nei, e mafai ona e aumaia ituaiga o matatioata eseese mo tagata aoga e faataitai ona talanoaina lea pe faapefea ona suia e matatioata taitasi a latou vaai ma vaaiga. Mafaufau e valaaulia tagata aoga e faasoa mai a latou aafiaga patino i le faia o matatioata eseese po o ni vaaiga ma le eseesega latou te faia.

Iloilo ata nei ma mafaufau pe faapefea e matatioata eseese ona aafia ai la tatou vaai.

teineitiiti o loo faia se matatioata 3D

tamaitai talavou o loo faia se matapogisa

alii talavou o loo faia se matafagota

tamaitai talavou o loo faia se mata VR

• E mafai faapefea e nei matatioata eseese ona aafia ai se vaaiga a se tasi?

• O a nisi o mea e aafia ai le ala tatou te vaai ma taulima ai isi?

Faaalu sina taimi e manatunatu ai i lau vaaiga i isi. Mafaufau po o le a se mea o loo ono mamanuina lau vaaiga ma pe mafai faapefea e lenei mea ona aafia ai ou lagona e uiga i le taulimaina o isi. A o e suesue, saili mo musumusuga ia iloa ai mea e mafai ona e faia e vaai ma taulima ai isi e pei ona faia e le Faaola.

O lenei lesona ua faamoemoe e fesoasoani ia te oe e vaai, alofa, ma taulima ai isi e pei ona faia e le Atua.

O uiga o le Atua

I le 2 Nifae 26, na vaai ai Nifae i le galuega a le Faaola i sa Nifaē, faapea foi le amioleaga ma le faatafunaga mulimuli o lona nuu. Sa ia vaai foi i le amioleaga o Nuuese i aso amulī. I se faatusatusaga, sa ia faamamafaina ai loa le tausiga a le Atua mo Ana fanau uma.

Mafaufau i fesili nei e tolu a o e faitauina le 2 Nifae 26:12–13, 23–33:

Tuu atu i tagata aoga le tele o le taimi e suesue ai le 2 Nifae 26:12–13, 23–33, ma mafaufau e valaaulia i latou e faailoga upu ma fasifuaitau e tali ai fesili nei. Fatu se siosiomaga migao lea e mafai ona aoao atu ai le Agaga. E mafai ona e taina ni musika mālū a o e savalivali solo i le potu, ma fesili lemu atu i tagata aoga po o a mea o loo latou aoaoina, lagonaina, po o faailogaina a o latou suesue.

E ono fesoasoani le faaali atu o fesili a o faitau tagata aoga.

• O le a se silasila ma ni lagona o le Atua e uiga i Lana fanau?

• E faapefea ona Ia faatinoa lenei mea?

• O a auala e finagalo o Ia tatou te vaai ma taulima ai isi?

A uma ona suesue e tagata aoga ia aoaoga a Nifae e faatatau i uiga o le Atua, valaaulia i latou e faasoa mai mea na latou aoaoina. O fesili nei, faatasi ai ma ni fesili tulitatao faaopoopo, e ono fesoasoani e uunaia ai le fefaasoaai. I se isi itu, e mafai e tagata aoga ona lisi i luga o le laupapa upumoni e uiga i le Atua sa latou aoaoina ona talanoaina lea o le uiga ma le taua o nei mea.

• O a upu, fasifuaitau, po o upumoni na e faailogaina e mafai ona tali ai fesili? Aisea?

• O le a se mea na e aoaoina pe lagonaina e faatatau i uiga o le Atua?

• E mafai faapefea e le manatuaina o nei upumoni e uiga i le Atua ona aafia ai lou sootaga ma Ia? E mafai faapefea ona aafia ai le ala e te taulima ai isi?

Atonu na maitauina e tagata aoga ni upumoni eseese e faatatau i uiga o le Atua. Mafaufau e fesili i tagata aoga pe aisea e anoa ai upumoni na latou mauaina ma faamalo ia i latou mo a latou malamalamaaga. O le isi vaega o lenei lesona o le a taulai atu i le upumoni i le fuaiupu 33 e faapea “ua tutusa tagata uma i le Atua.” O le a fesoasoani lenei mea i tagata aoga e saunia ai e faaaoga lenei fuaitau i le faataitaiga o le faaaogaina o le atamai i aoaoga faavae i le lesona e sosoo ai.

Ia maitau o le 2 Nifae 26:33, na faapupula mai ai e Nifae le tele o ituaiga eseese o tagata taitoatasi e ala i le faatulagaina o i latou i vaega tuufaafeagai. O faauigaga nei e mafai ona fesoasoani e te malamalama atili ai i nei mea. Atonu e te mafaufau e tusi nei faauigaga i au tusitusiga paia i tafatafa o le fuaiupu lenei.

• Pologa: O se pologa.

• Le ua faapaupau: O se tasi e le talitonu i le Atua.

• Iutaia ma le Nuuese: O se fasifuaitau e faatatau i tagata uma o le aiga o Isaraelu ma i latou e le o ni aiga o Isaraelu.

O le2 Nifae 26:33 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e maua gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• O le a se eseesega e ono i ai pe afai e talia ma faaaoga e le lalolagi ia aoaoga o loo i le fuaiupu 33?

Faaalu sina taimi e manatunatu ai i lau vaaiga, e aofia ai le auala e te lagona ai ma taulima ai isi, pe a faatusatusa i le vaaiga a le Atua ma le auala o loo Ia lagona ma taulima ai isi.

O se tasi auala e fesoasoani ai i tagata aoga e faatusatusa le ala latou te taulima ai isi i le ala e faia ai e le Atua o le tuu atu lea i tagata aoga e toe faaupu fesili ua faasoa mai e Nifae i le 2 Nifae 26:25–28 e faatatau ia i latou lava. Mo se faataitaiga, “Pe ou te faia ea ia lagona e tagata ou te manao latou te o ese atu mai ia te au? pe aua le tapuai faatasi ma au? Pe ou te manatu ea e le tatau ona latou taumamafa i le agalelei o Iesu Keriso?”

Atonu e te manao e matamata le vitio “We Don’t Need to Be the Same to Be One” (1:00), o loo maua i le ChurchofJesusChrist.org, manatunatu i mea atonu e finagalo le Alii e te faaleleia.

O fesili ma parakalafa nei e mafai ona fesoasoani i tagata aoga e iloilo ai o latou lagona ma faatinoga agai i isi ona faaaoga lea o mea ua latou aoaoina. E mafai e tagata aoga ona tusifaamaumau i a latou api talaaga pe talanoaina a latou tali i fesili.

• E mafai faapefea ona aafia ai oe i le manatuaina o le vaaiga ma lagona o le Atua i tagata uma?

• O a ni auala o loo lelei ai lau vaai ma le taulimaina o isi e pei ona vaai ma taulimaina i latou e le Tama Faalelagi ma Iesu?

• E mafai faapefea e le manatuaina o aoaoga e uiga i le Alii i le 2 Nifae 26:33 ona fesoasoani ia te oe e vaai, alofa, ma taulima ai isi e pei ona faia e le Atua?

I nai aso e sosoo ai, taumafai e maitau pe faapefea ona e vaai, lagona agai, ma taulima isi. Faalogo mo uunaiga mai le Agaga Paia ma saili le fesoasoani a le Alii e faia soo se suiga talafeagai e alofa ma taulima lelei atili ai isi e pei ona faia e le Atua.

Manatu ma Talaaga o Faamatalaga

E mafai faapefea ona ou avea atili e faapei o le Atua i le vaai ma le alofa atu i isi?

Na aoao mai e Peresitene Russell M. Nelson le auala e mafai ai e Iesu Keriso ona fesoasoani ia i tatou i a tatou taumafaiga e faaleleia atili:

Peresitene Russell M. Nelson

Tatou te lei ausia lava le lotogatasi ma le va fealoaloai lea o le a mafai ai e alii ma tamaitai uma ma tama ma teine uma ona avea ma ituaiga sili ona lelei o i latou lava.

O le vaifofō mo le mea o faafatiatamai ia i tatou sa faatonuina mai e le Fomai Sili, o Iesu le Keriso. Ina ua luiina o Ia e se Faresaio taufaifai e faailoa mai le poloaiga silisili i le tulafono, o le tali a le Faaola sa sili ona manatua pea ma puupuu. Sa faatumulia i le upumoni lea e taitai atu ai i se olaga fiafia. O Lana faatonuga o le alofa muamua lea i le Atua ma o tatou loto atoa, ma, ia alofa atu i o tatou tuaoi e pei o i tatou lava ia i tatou (tagai Mataio 22:35–39). …

Tatou te fesootai uma lava, ma ua ia i tatou se tiutetauave na tuuina mai e le Atua e fesoasoani e faaleleia atili ai le olaga mo i latou o loo siomia ai i tatou. E le faapea e tatau ona tatou tutusa pe foliga tutusa ina ia maua ai le alofa o le tasi mo le isi. Tatou te le tau malilie faatasi foi ina ia alofa ai le tasi i le isi. Afai e i ai so tatou faamoemoe e toe maua le agalelei ma lagona fetausia’i faaletagata o loo tatou moomoo i ai, e tatau ona amata ia i tatou taitoatasi, e taitoatasi i le taimi. (Russell M. Nelson, “NAACP Convention Remarks” [lauga i le tauaofiaga faaletausaga a le National Association for the Advancement of Colored People in Detroit, Michigan, Iulai 21, 2019], newsroom.ChurchofJesusChrist.org)

Na faasoa mai e Elder Dale G. Renlund o le Korama Aposetolo e Toasefululua le mea lenei:

Elder Dale G. Renlund

O le lotogatasi e manaomia ai le taumafaiga. E atia’eina pe a tatou faafaileleina le alofa o le Atua i o tatou loto ma tatou taulai atu i lo tatou taunuuga e faavavau. Tatou te lotogatasi e ala i lo tatoui faasinomaga autu lautele o ni fanau a le Atua ma lo tatou tuuto atu i upumoni o le talalelei toefuataiina. Ona o lena mea, o lo tatou alolofa i le Atua ma le avea o i tatou ma soo o Iesu Keriso, e faaosofia ai le popole moni mo isi. Tatou te faatauaina le felanulanua’i o uiga o isi, o vaaiga mamao, ma taleni. Afai e le mafai ona tatou faamuamuaina lo tatou avea ma soo o Iesu Keriso i luga atu o mea tatou te fiafia i ai ma o tatou manatu faaletagata lava ia, e tatau la ona tatou toe su’esu’e a tatou faamuamua ma suia. (Dale G. Renlund, “O Le Filemu o Keriso e Faaumatia ai le Feitaga’i,” Liahona, Nov. 2021, 84)

Na aoao mai Sister Michelle D. Craig, Fesoasoani Muamua i le Au Peresitene Aoao o Tamaitai Talavou, mea nei:

E mafai faapefea e aoaoga o loo i le 2 Nifae 26:33 ona fesoasoani i tagata ia o mai i le Faaola?

Sa sailiili Calyann i le Ekalesia ae sa i ai ni ona atugaluga. Matamata le vitio o loo i lalo e vaai ai pe na faapefea ona fesoasoani le 2 Nifae 26:33 ia te ia.

• Manatua o le vitio talu ai ua fautuaina foi o se vitio faataitai i le lesona e sosoo ai.

Pe o le lotogatasi ea ia Keriso o lona uiga e tatau ona tutusa uma i tatou?

Na aoao mai Elder Quentin L. Cook ma Elder Jeffrey R. Holland o le Korama a Aposetolo e Toasefululua i auala e faataga ai e le aganuu a Keriso ia eseesega o tagata taitoatasi:

Elder Quentin L. Cook

I o tatou aso, … mo le toatele o tagata o le faamamafa ua i le taaituaiga, ua tele ina faavae i luga o tulaga, itupa, lanu, ma le tamaoaiga. I le tele o atunuu, pe afai e le o le toatele lava, ua matua fetotoai lava tagata e uiga i le ala e ola ai. I le Ekalesia a le Alii, na pau le aganuu tatou te mulimuli ai ma aoao atu o le aganuu o le talalelei a Iesu Keriso. O le lotogatasi tatou te sailia o le autasi lea ma le Faaola ma Ana aoaoga. …

O le faataunuuina o tiutetauave e atofa mai le lagi, e faavae i luga o le amiotonu, lotogatasi, ma le tutusa i luma o le Atua, e aumaia ai le fiafia ma le filemu patino i lenei lalolagi ma saunia ai i tatou mo le ola e faavavau i le lalolagi a sau. (Quentin L. Cook, “Saunia e Feiloai ma le Atua,” Ensign po o le Liahona, Me 2018, 116)

Elder Jeffrey R. Holland

O loo i ai le avanoa mo i latou e tautatala i gagana eseese, faamanatu aganuu eseese, ma nonofo i le anoa’i o nofoaga. O loo i ai le avanoa mo e nofofua, mo e ua faaipoipoina, i latou e toatele aiga, ma e e leai ni fanau. O loo i ai le avanoa mo i latou na i ai ni fesili e faatatau i lo latou faatuatua ma le avanoa mo i latou o loo i ai pea ni fesili. O loo i ai se avanoa mo i latou e eseese tosinaga faalefeusuaiga. I se faapuupuuga, o loo i ai se nofoaga mo tagata uma e alolofa i le Atua ma faamamalu i Ana poloaiga ua o se fua faatonutonu e le masolia mo amioga patino faaletagata. (Jeffrey R. Holland, “O Pese e Usuina ma Lē Usuina,” Ensign po o le Liahona, Me 2017, 51)

Matamata i le vitio lenei, lea o loo tuuina mai ai e Elder Holland le fautuaga ia i latou o e lagona le lotovaivai pe tuuesea mai le malo o le Alii ona latou te manatu e matuai ese lava i latou nai lo isi tagata uma.

Gaoioiga Faaopoopo e Aoao Ai

Faatusatusaga o le Atua ma Satani

Mafaufau e faatusatusa le ala e taulima ai e le Atua Ana fanau i le ala e uunaia ai e Satani le fefinauai ma le fevaevaeai. Valaaulia tagata aoga e lisi auala a le Atua mai a latou suesuega o le 2 Nifae 26:23–28, 33 ma auala a Satani o loo maua i le 2 Nifae 26:20–22, 29, 32. Valaaulia tagata aoga e faasoa mai mea na latou aoaoina e uiga i lagona o le Tama Faalelagi mo i tatou ma pe mafai faapefea e lenei fuaitau ona fesoasoani ia i latou a o latou taumafai ia avea atili e faapei o Ia.

2 Nifae 26:29–31. Faafaitaulaga Pepelo

Mafaufau e faauiga le faafaitaulaga pepelo (fuaiupu 29) ma talanoaina pe aisea o le a poloaiina ai e le Atua ia leai se faafaitaulaga pepelo. E mafai e tagata aoga ona talanoaina pe mafai faapefea e tagata taitoatasi ona pauu atu i le mailei o le faafaitaulaga pepelo ma pe mafai faapefea e le alofa mama ona fesoasoani e faatoilalo le faafaitaulaga pepelo. Atonu e fesoasoani le ta’u atu e faapea, o i latou o loo faia le faafaitaulaga pepelo ua faia mo lo latou lava manuia faaletagata, ma ua liliu ese ai mai le Malamalama o le Lalolagi, o Iesu Keriso lea. E mafai ona tatou faatoilaloina le faafaitaulaga pepelo e ala i le taulai atu i le Faaola.

Punaoa faaopoopo

Mafaufau e faaalu sina taimi i le vasega e fesoasoani ai i tagata aoga e aoao atili e uiga i mea ua aoao mai e le Alii e uiga i ituaiga, lē faaituau, ma le tutusa mo tagata uma, e faaaoga ai punaoa o loo maua i le Gospel Library ma luga o uepisaite aloaia a le Ekalesia. O nei punaoa e ono aofia ai mea nei:

• Ia Tasi—O Se Faamanatuina o le Faaaliga i le Perisitua (ChurchofJesusChrist.org)

• Autu o le Talalelei, “Racial and Cultural Prejudice,” topics.ChurchofJesusChrist.org

• Autu o le Talalelei, “Priesthood and Race,” topics.ChurchofJesusChrist.org

• “Same-Sex Attraction: Kindness, Inclusion, and Respect for All of God’s Children” (ChurchofJesusChrist.org)