2 Nifae 11

O Molimau a Keriso

Iesu Keriso o se leoleo mamoe

O ai e oo mai i le mafaufau pe a e mafaufau i molimau a Iesu Keriso? Sa fiafia tele Nifae i molimau a lona uso o Iakopo ma le perofeta o Isaia lea na ia faamaumauina ai i latou faatasi ai ma lana lava molimau ia Iesu Keriso. O lenei lesona e mafai ona fesoasoani e faamalosia ai lau molimau i le moni o Iesu Keriso.

Valaaulia tagata aoga e molimau ia Iesu Keriso. A o faamasani atili le vasega ia iloa ma alolofa ia Iesu Keriso, valaaulia i latou e faasoa mai o latou lagona e uiga ia te Ia. O le faia o lena mea, latou te valaaulia ai le Agaga e molimau atu e moni mea na latou fai mai ai. Na faamamafa mai e Peresitene M. Russell Ballard o le Korama a Aposetolo e Toasefululua e faapea “e le mafai ona taofia le Agaga pe a tuuina mai se molimau mama a’ia’i ia Keriso” (“Molimau Mama A’ia’i,” Ensign po o le Liahona, Nov. 2004, 41).

Sauniuniga a le tagata aoga: Valaaulia tagata aoga e fai i se uo po o se e pele e faasoa mai pe na faapefea ona latou maua a latou molimau ia Iesu Keriso.

Gaoioiga E Ono Mafai Ona Aoao Ai

O le taua o molimau

Mafaufau e faaaoga le tulaga faataitai faigofie lenei e fesoasoani ai i tagata aoga ia iloa le taua o molimau. Ina ia fesoasoani e faateleina lo latou fiafia, e mafai ona e faaopoopo i ai faamatalaga auiliili i le tulaga faataitai. Mo se faataitaiga, e mafai e se uo ona fia iloa po o fea o i ai tagata aoga. Po o se solitulafono semanu e faia i lena taimi, ma atonu e manaomia e tagata aoga ona tuuina atu se faamaoniga.

O le isi filifiliga o le fesili atu lea i tagata aoga pe na i ai se taimi na manaomia ai ona latou faalagolago i molimau e faamautu ai e moni mea sa latou fai atu ai.

Vaai faalemafaufau e tatau ona e tali atu po o fea sa e i ai anapo mai le 6:00 i le 7:00 i le afiafi.

• E mafai faapefea ona e faamaonia mea sa e faia i lena taimi?

• Pe i ai ni molimau e mafai ona faamaonia le mea sa e i ai?

• Aisea e taua ai molimau pe a tatou saili mo le upumoni?

Faitau le 2 Nifae 11:2–3, ma vaavaai mo molimau na taua e Nifae ma pe o le a le aafiaga na latou maua.

Valaaulia tagata aoga e faasoa mai mea na latou maua ma o latou manatu e uiga i ai. Afai e aoga, mafaufau e fai atu fesili nei:

• Aisea o le a avea ai nei tagata e toatolu ma molimau mamana?

• O le a se mea ua e manao e aoao mai ia i latou?

• O a upumoni ua e aoaoina e uiga i le Atua i le fuaiupu 3?

A o tali mai tagata aoga, mafaufau e tusi le fuaiupu lea i luga o le laupapa: E auina mai e le Tama Faalelagi molimau ia … E mafai ona e faaumaina le fuaiupu i mea e fai mai ai tagata aoga.

Faitau le 2 Nifae 11:4, 6, ma vaavaai mo mea na manao patino Nifae i lona nuu ia iloa.

Afai e lei uma ona faamaea e tagata aoga le faamatalaga o i luga o le laupapa ma se mea e talitutusa ma le mataupu faavae o loo i lalo, mafaufau e faaopoopo i ai.

O se tasi o upumoni e mafai ona tatou aoao mai le 2 Nifae 11 e faapea, e auina mai e le Tama Faalelagi molimau e molimau i le moni o Lona Alo.

• Aisea e te manatu ai e faaaoga e le Tama Faalelagi molimau e molimau atu ai i Lona Alo?

Faaalu sina taimi e mafaufau loloto ai i ou lava talitonuga ma lagona e uiga i le Faaola o Iesu Keriso. Mafaufau i molimau a le Faaola ma pe na faapefea ona aafia ai oe ma ou talitonuga e uiga ia te Ia. A o e faaauauina lenei lesona, vaavaai mo auala e mafai ai e molimau ona fesoasoani ma faamalosia oe i lou olaga.

A o lei oo i le 2 Nifae 11, sa faaaofia ai e Nifae ia aoaoga ma molimau a lona uso laitiiti o Iakopo. Ina ua mavae le 2 Nifae 11, sa faaaofia ai e Nifae ia aoaoga ma molimau a le perofeta o Isaia. Atonu e te manao e tusi le “2 Nifae 9–10 o le molimau a Iakopo” i autafa o le igoa o Iakopo i le fuaiupu 3 ma le “2 Nifae 12–24 o le molimau a Isaia” i autafa o le suafa o Isaia i le fuaiupu 2.

Molimau a Iesu Keriso

O Aposetolo o loo siomia le faatusa o Keriso i Roma

O lenei lesona e mafai ona fesoasoani ia te oe e faaloloto ai lau molimau patino ia Iesu Keriso. Pe ua uma ona e iloa mo oe lava o loo soifua o Ia pe o loo e taumanatunatu pea pe moni o Ia, e mafai e le Agaga Paia ona fesoasoani ia te oe ia iloa atili o Ia e ala i molimau filifilia a le Atua. O le loloto o lau molimau ia te Ia i le taimi nei e le taua tele e pei o lou manao ia iloa atili o Ia o agai i luma.

Mo le fautuaga lenei mo suesuega, mafaufau e tuu tagata aoga i ni vaega taitoatolu faatasi ma tamaiti aoga taitasi o loo suesue i se molimau e ese mai. A uma ua lava se taimi, valaaulia tagata aoga e lipoti mai mea ua latou aoaoina i la latou vaega.

1. Iakopo—Saili se aoaoga po o se molimau ia Keriso e taua ia te oe lea na faasoa atu e Iakopo i le 2 Nifae 9–10. (O fuaiupu e mafai ona i ai e aofia ai le 2 Nifae 9:10–12, 20–23, 41; 10:25.)

2. Isaia—Saili se aoaoga po o se molimau ia Keriso e taua ia te oe lea na faasoa mai e Isaia i le 2 Nifae 12–24. (O fuaiupu e mafai ona i ai e aofia ai le 2 Nifae 16:1–3; 17:14; 19:6–7; 22:2; 24:3.)

3. Nifae—Saili se aoaoga po o se molimau ia Keriso e taua ia te oe mai tusitusiga patino a Nifae. (O fuaiupu e mafai ona i ai e aofia ai le 1 Nifae 11:31–33; 19:8–10; 2 Nifae 4:18–21; 25:26, 29.

O Molimau Faapitoa a Keriso

Manatua na molimau mai Nifae e faapea “e auina mai e le Atua ni isi molimau” (2 Nifae 11:3). O nisi o nei molimau o Ana Aposetolo o aso e gata ai. Matamata i molimau ia le itiiti ifo ma le toalua o molimau nei a Iesu Keriso. Faalogologo mo mafaufauga ma lagona atonu e te maua mai le Agaga Paia a o e faitau pe faalogologo i ai. O loo maua vitio uma i le ChurchofJesusChrist.org.

Mafaufau e tuu atu i tagata aoga e filifili po o fea o vitio latou te mananao e matamata i ai pe afai e leai se taimi mo vitio uma e lima. Atonu e te tuuina atu ia i latou se taimi i le va o vitio taitasi e tusifaamaumau ai mea sa latou aoaoina pe lagonaina e uiga ia Iesu Keriso i a latou api talaaga mo suesuega.

“O Molimau Faapitoa a Keriso—Peresitene Russell M. Nelson” (matamata mai le faailotaimi 4:32 i le 5:47)

“O Molimau Faapitoa a Keriso—Peresitene M. Russell Ballard” (matamata mai le faailotaimi 2:22 i le 3:45)

“O Molimau Faapitoa a Keriso—Elder Quentin L. Cook” (matamata mai le faailotaimi 3:53 i le 4:57)

“O Molimau Faapitoa a Keriso—Elder Neil L. Andersen” (matamata mai le faailotaimi 4:20 i le 5:24)

“O Molimau Faapitoa a Keriso—Elder D. Todd Christofferson” (matamata mai le faailotaimi 4:30 i le 5:51)

O lau molimau ia Iesu Keriso

Matau e faapea na filifilia e Nifae se perofeta sa ia faamemelo i ai (Isaia), o se tasi sa ia iloaina patino (lona uso o Iakopo), ma lana lava molimau o ni molimau e toatolu e molimau i le moni o Iesu Keriso.

Mafaufau e valaaulia tagata aoga e tusi a latou tali i fesili nei i a latou api faamaumau mo suesuega. Atonu e aoga le faaali atu o faamatalaga taua nei ao tusitusi tagata aoga. A o lei amataina, mafaufau e faamanatu atu ia i latou e manatua mea na latou aoaoina i le taimi o sauniuniga a tagata aoga.

• Tusifaamaumau se aoaoga e uiga i le Faaola e taua ia te oe mai ia Nifae, Iakopo, Isaia, po o se perofeta o aso nei.

• Tusifaamaumau le suafa o se tasi e te iloa patino e te manatu o se molimau a Iesu Keriso. Tusifaamaumau mea ua e aoaoina mai ia i latou. (Atonu e te manao e talanoa pe tesi i lena tagata e fesili pe na faapefea ona ia maua se molimau ia Keriso.)

• Tusi ou lagona e uiga i lau lava molimau ia Iesu Keriso. Atonu e aofia ai aafiaga na e maua po o mea na e aoaoina e uiga ia te Ia. Pe atonu foi e te filifili e tusifaamaumau lou manao e maua se molimau ia Iesu Keriso ma mea ua e naunau e fai e fesoasoani ai ia tuputupu ae lena molimau.

Valaaulia nisi o volenitia e faasoa mai i le vasega mea sa latou tusia.

Mafaufau e usu pe faalogologo i se viiga e uiga ia Iesu Keriso e faauma ai le lesona.

Manatu ma Talaaga o Faamatalaga

O fea e mafai ona ou aoao atili ai e uiga ia Iesu Keriso mai Ana molimau i ona po nei?

Faitau le “O Le Keriso Soifua: O Le Molimau a le Au Aposetolo,” pe matamata le vitio “O vaega mai le ‘O Le Keriso Soifua: O Le Molimau a le Au Aposetolo’” (2:45), o loo maua uma i le ChurchofJesusChrist.org.

E mafai faapefea ona ou faamalosia lau molimau ia Iesu Keriso?

Sa aoao mai Peresitene Dieter F. Uchtdorf, o le sa avea ma uso o le Au Peresitene Sili:

Peresitene Dieter F. Uchtdorf

Tatou te mauaina lenei molimau pe a saunoa mai le Agaga Paia i le agaga o i totonu ia i tatou. O le a tatou maua se mautinoa toafilemu ma le lē fetotoa’i, o le a avea ma faapogai o a tatou molimau ma talitonuga maumaututū, tusa lava pe o ā o tatou aganuu, lanu, gagana, ma tulaga o le tamaoaiga. O na uunaiga a le Agaga, ae lē na o le faautautaga faaletagata, o le faavae moni lea o le a fausia ai a tatou molimau.

O le autu o lenei molimau o le faatuatua lea e lē aunoa, ma le malamalama ia Iesu Keriso ma Lana misiona paia, lea o loo ta’ua i le mau e faatatau ia te Ia lava, “O au nei le ala, le upumoni, ma le ola” (Ioane 14:6).

E faapefea la ona tatou maua se molimau patino ua mauaa i le molimau a le Agaga Paia? …

Muamua: Manao ia talitonu. …

Lona lua: Suesue i tusitusiga paia. …

Lona Tolu: Fai le finagalo o le Atua, tausi i poloaiga. …

Lona Fa: Mafaufau loloto, anapogi ma tatalo. (Dieter F. Uchtdorf, “O Le Mana o se Molimau Patino,” Ensign po o le Liahona, Nov. 2006, 38–39)

Gaoioiga Faaopoopo e Aoao Ai

Lesona faatino i molimau

Mafaufau e aumai se mea e seasea maua i le vasega i totonu o se atigipusa po o se ato. Valaaulia se tagata aoga se toatasi e tilotilo i totonu ma faamatala i le vasega mea ua latou vaaia. Fai atu i le vasega e filifili lemu pe latou te talitonu i le mea na fai mai ai lena tagata aoga. Ona valaaulia lea o nisi tagata aoga se toalua e tilotilo i totonu ina ia mafai ona latou faamaonia le molimau a le tagata aoga muamua. Valaaulia tagata aoga e mafaufau i le mana o le i ai o ni molimau e sili atu ma le tasi o mea taua a o latou suesue i le aso.

Fiafiaga o Nifae

Valaaulia tagata aoga e faitau faatopetope le 2 Nifae 11:4–6, ma vaavaai mo mea na fai mai ai Nifae e uiga i ona lagona i fuaiupu taitasi.

O le a le uiga o le “fiafia i” se mea? (Atonu e mafai ona e faamalamalama atu e faapea o le upu fiafia (delight) ua fautua atu ai se lagona lea e loloto atu nai lo le tau na ona manao pe naunau i se mea. E faaalia ai le olioli ma le faamalieina.)

Valaaulia tagata aoga e faitau le leoa le 2 Nifae 11:2–7 , ma vaavaai mo mea na fiafia i ai Nifae. Ona fai atu lea ia i latou e faasoa mai po o fea o nei mea e fiafia foi i ai ma pe aisea.

“Ma o mea uma na tuu mai e le Atua … o ni faatusatusaga o ia” (2 Nifae 11:4)

Valaaulia le vasega e galulue faatasi e mafaufau ia le itiiti ifo ma le lima ni mea i le natura e mafai ona aoao ai i tatou i se mea e uiga i le Tama Faalelagi po o Iesu Keriso. Mo se faataitaiga, e mafai e le la ona faamanatu mai ia i tatou ia Iesu Keriso ona o le malamalama o le lalolagi.

Ona valaaulia lea o tagata aoga e sue le upumoni o loo i le 2 Nifae 11:4 e faatatau i le mea na faatoa latou faia. (Tagai foi i le Mose 6:63.) Faamalosiau atu i tagata aoga e mafaufau soo e uiga i le Tama Faalelagi ma Iesu Keriso ma vaavaai mo mea e mafai ona manatua ai i Laua i o latou olaga atoa.

“Lo’u Togiola” (2 Nifae 11:2)

Valaaulia tagata aoga e faailoga le faalaniga o loo faaaoga e Nifae mo Iesu Keriso i le 2 Nifae 11:2. Ona fesoasoani lea i tagata aoga e mafaufau loloto atili i lenei faalaniga e ala i le fai atu o fesili e pei o nei:

• O le a se mea o aoao mai e lefaalaniga “Togiola” ia i tatou e uiga ia Iesu Keriso?

• Aisea e te manatu ai na faasino Nifae ia te Ia o “lo’u Togiola” nai lo “le Togiola”?

• O anafea na e maua ai se aafiaga na fesoasoani e te iloa ai o Iesu Keriso o lou Togiola?