2 Nīfai 11–19

Vakai Fakalūkufuá

Naʻe saiʻia lahi ʻa Nīfai ʻi he ngaahi fakamoʻoni ʻo hono tokoua ko Sēkopé mo e palōfita ko ʻĪsaiá peá ne lekooti fakataha ai kinautolu mo ʻene fakamoʻoni kia Sīsū Kalaisí. Naʻá ne lea ʻo kau kia ʻĪsaia ʻo pehē, “ʻOku fiefia hoku laumālié ʻi heʻene ngaahi leá” (2 Nīfai 11:2). Naʻe fakaʻaongaʻi ʻe ʻĪsaia ha ngaahi lea fakatātā ke fakamatalaʻi ʻaki e mālohi mo e māʻoniʻoni ʻa e ʻEikí. Naʻá ne toe kikiteʻi foki ʻa e Fakamoʻuí, ʻo lisi ha niʻihi ʻo Hono ngaahi huafá mo e ngaahi ʻulungāngá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ʻo e meʻa ʻe ala fiemaʻu ke teuteuʻi kimuʻa ‘i he lēsoni takitaha.

2 Nīfai 11

Taumuʻa ʻo e lēsoní: ʻE lava ke tokoni e lēsoni ko ʻení ke fakamālohia e fakamoʻoni ʻa e kau akó ki he moʻoni ʻo Sīsū Kalaisí.

• Teuteu ʻa e tokotaha akó: Fakaafeʻi e kau akó ke kole ki ha kaungāmeʻa pe ʻofaʻanga ke vahevahe e founga ne nau maʻu ai ʻenau fakamoʻoni kia Sīsū Kalaisí.

• Ngaahi Vitioó: “Kau Fakamoʻoni Makehe ʻo Kalaisí—Palesiteni Russell M. Nelson” (5:47; mamata mei he taimi 4:32 ki he 5:47); “Kau Fakamoʻoni Makehe ʻo Kalaisí—Palesiteni M. Russell Ballard” (3:45; mamata mei he taimi 2:22 ki he 3:45); “Kau Fakamoʻoni Makehe ʻo Kalaisí—ʻEletā Quentin L. Cook” (4:57; mamata mei he taimi 3:53 ki he 4:57); “Kau Fakamoʻoni Makehe ʻo Kalaisí—ʻEletā Neil L. Andersen” (5:24; mamata mei he taimi 4:20 ki he 5:24); “Kau Fakamoʻoni Makehe ʻo Kalaisí—ʻEletā D. Todd Christofferson” (5:51; mamata mei he taimi 4:30 ki he 5:51)

• Fokotuʻu ki hono akoʻi ʻi he konifelenisi vitioó: Fakakaukau ke tuku ha fehokotakiʻanga ʻi he polokalama fetalanoaʻakí ki he “Ko e Kalaisi Moʻuí: Ko e Fakamooni ʻa e Kau ʻAposetoló” ʻi he ChurchofJesusChrist.org. Fakaafeʻi e kau akó ke fakaʻaongaʻi ha ngaahi miniti siʻi ke ako ia pea vahevahe mo e kalasí e meʻa ne nau ako pe ongoʻí.

2 Nīfai 12–15

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó e ngaahi kikite fakataipe ʻa ʻĪsaiá mo fakalaulauloto ki he founga ʻe lava ke tokoniʻi ai kinautolu ʻe he ngaahi kikite ko ʻení ʻi heʻenau moʻuí.

• Teuteu ʻa e tokotaha akó: Fakamahinoʻi ki he kau akó naʻe hiki ʻe Nīfai ha ngaahi vahe lahi ʻo e ngaahi kikite ʻa ʻĪsaiá ki heʻene lekooti pē ʻaʻaná pea naʻe fakaʻaongaʻi ʻe ʻĪsaia ha ngaahi fakataipe lahi. Lau ʻa e 2 Nīfai 12:1–3 pe 2 Nīfai 14:5–6 pea fakalaulauloto ki he ʻuhinga ʻo e ngaahi veesi ko ʻení.

• Meʻa ke fakaʻaliʻalí: ʻI he tafaʻaki ʻe taha ʻo e palakipoé, ko ha fakatātā ʻo ha moʻunga, ʻoku fakahingoa ʻaki e potufolofola 2 Nīfai 12:1–3; ʻi he tafaʻaki ʻe taha ʻo e palakipoé, ko ha fakatātā ʻo ha konga ʻao mo ha pou afi, ʻoku fakahingoa ʻaki e potufolofola 2 Nīfai 14:5–6

• Fokotuʻu ki hono akoʻi ʻi he konifelenisi vitioó: ʻI hono ako ʻe he kau akó e fakataipe ʻo e moʻungá, ʻaó, mo e pou afí, te ke lava ʻe koe pe ko ha tokotaha ako ʻo fakatātaaʻi e ngaahi fakataipe ko ʻení ʻo fakaʻaongaʻi e polokalama palakipoé. ʻI hono aleaʻi ʻe he kau akó e ʻuhinga ʻo e ngaahi fakataipe ko ʻení, ʻe lava ke tānaki atu ha ngaahi fakamatala ʻi he tafaʻaki ʻo e fakatātaá.

2 Nīfai 16

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke fakatokangaʻi ʻa e malava ʻe he ʻEikí ke fakamolemoleʻi mo fakamaʻa kinautolú.

• Teuteu ʻa e tokotaha akó: Fakaafeʻi e kau akó ke fakalaulauloto ki he fehuʻi ko ʻení: Ko e hā ʻoku finangalo ha ʻOtua ʻofa ke mahino kiate kitautolu ʻi he taimi ʻoku tau ongoʻi ai ʻoku ʻikai ke tau lelei feʻungá?

• Ngaahi ʻīmisi ke fakaʻaliʻalí: Ngaahi ʻīmisi kehekehe ʻo e hā ʻa e Fakamoʻuí ki he kakai ʻi he māmaní

2 Nīfai 17–19

Taumuʻa ʻo e lēsoní: ʻOku fakataumuʻa e lēsoni ko ʻení ke tokoniʻi e kau akó ke nau falala kia Sīsū Kalaisi ʻaki ʻenau ako Hono ngaahi ʻulungāngá mo e ngaahi huafá.

• Teuteu ʻa e tokotaha akó: ʻI he ako folofola fakaʻaho ʻa e kau akó, fakaafeʻi ke nau feinga ke ʻiloʻi ha faʻahinga huafa pē ʻo e Fakamoʻuí pea fakalaulauloto ki he ʻuhinga ʻo e ngaahi huafa ko iá pea mo e founga ʻe ala tokoni ai ke nau falala mo ʻofa lahi ange ki he Fakamoʻuí.

• Fokotuʻu ki hono akoʻi ʻi he konifelenisi vitioó: Ke tokoni ke mahino ki he kau akó e puipuituʻa ʻo e ngaahi vahe ko ʻení, fakakaukau ke fakaafeʻi hanau niʻihi ke fakafofongaʻi ʻa e Tuʻi ko ʻĀhasi ʻo Siutá; ko hono ʻalo ko e Tuʻi ko Hesekaiá; Tuʻi ko Lēsini ʻo Sīliá; Tuʻi ko Peka ʻo ʻIsilelí; mo e tuʻi ʻo ʻAsīliá. ʻE lava ke teuteuʻi ʻe he kau akó ha ngaahi pine hingoa kimuʻa he kalasí pe liliu fakataimi honau hingoa fakafoʻituituí ki he tokotaha ʻoku nau fakafofongaʻí. Fakakaukau ke fakaafeʻi ʻa e tokotaha ako ʻokú ne fakafofongaʻi ʻa e Tuʻi ko ʻĀhasí ke lau e folofola ʻa e ʻEikí kiate ia ʻi he 2 Nīfai 17:3–4, 7 pea lau ʻe he tokotaha ako ʻokú ne fakafofongaʻi e Tuʻi ko Hesekaiá ʻa e 2 Nīfai 18:11–13, 17.

Toe Vakaiʻi Hono 4 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke fakaʻaongaʻi ʻa e tokāteline ʻoku akoʻi ʻi he ngaahi potufolofola fakataukei fakatokāteline kehekehe ʻo e Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke teuteu ke vahevahe ʻenau potufolofola manakó pea fakamatalaʻi e ʻuhinga ʻoku hoko ai ia ko ha ʻo ʻenau ngaahi potufolofola manakó. Te ke lava ʻo kole ange ke fakakau e founga ʻoku fakaʻaongaʻi ai ia ki heʻenau moʻuí. Mahalo ʻe ala tokoni ke kole ki ha kau ako ʻe niʻihi ke nau omi mateuteu ke vahevahe.

•  

• Laʻipepa tufa: Ko e saati ʻo e ngaahi fakamoʻoni fakafolofola ʻo e fakataukei fakatokāteliné mo e ngaahi kupuʻi lea folofola mahuʻingá.