2 Nephi 9:27–49

“Ang Pagka-Espirituhanon Sa Hunahuna Mao Ang Kinabuhing Dayon”

batan-ong mga babaye nga nagpahiyom ug naglakaw

Unsa ka sagad kang maghunahuna kon asa ka dad-on sa imong mga binuhatan ug kinaiya? Human sa pagpahayag nga si Jesukristo adunay gahom sa pagluwas sa tanang katawhan gikan sa mga epekto sa Pagkapukan, si Jacob mipasidaan batok sa mga binuhatan ug mga kinaiya nga makapahilayo kanato gikan sa Ginoo. Siya mipamatuod ni Jesukristo ug unsay atong mahimo aron moduol ngadto Kaniya ug maluwas. Kini nga leksiyon makatabang kanimo sa paglikay sa mga kinaiya nga mosangpot sa kasubo ug makapahimulag kanimo gikan ni Jesukristo.

Pagpangutana sa mga pangutana nga nagdapit sa lawom nga paghinuktok [introspection]. Ang lawom nga paghinuktok ug pagtimbang-timbang sa kaugalingon makadapit sa Espiritu Santo sa pagtabang sa matag estudyante nga makakita sa mga butang “ingon nga sila gayod mao, ug … gayod mahimo” (Jacob 4:13). Ang epektibo nga pagtimbang-timbang sa kaugalingon makatabang sa mga estudyante sa pagkonsiderar sa ilang kasamtangang pagsabot sa mga kamatuoran sa ebanghelyo ug sa ilang mga tinguha o motibo.

Pagpangandam sa estudyante: Dapita ang mga estudyante sa paghatag og pagtagad kon hain sa ilang mga binuhatan tali karon ug sa sunod nga klase ang nakatabang kanila nga mobati nga mas duol sa Dios ug hain ang nakapabati kanila nga mas nalayo gikan Kaniya.

Mga Posibleng Kalihokan sa Pagkat-on

Layo gikan sa Dios

Sa dili pa ang klase, ikonsiderar ang pagtago og usa o daghang piraso sa kendi (o laing butang nga malingaw sa pagpangita ang mga estudyante) bisan asa sa kwarto. Dapita ang pipila ka mga estudyante sa pagpangita sa mga butang. Pagtanyag og tabang pinaagi sa mga pulong sama sa duol ug mas duol samtang ang mga estudyante nagkaduol sa diin ang mga butang gitago ug gamit sa mga pulong sama sa layo ug layo ra na samtang sila nagkalayo. Human makit-an sa mga estudyante ang kendi o ubang mga butang, ikonsiderar ang pagpangutana sama sa mosunod:

• Sa unsang paagi ang mga aghat nakatabang nimo sa pagpangita sa mga butang?

• Ngano kaha nga ang usa ka tawo dili mosunod sa mga aghat nga gihimo aron sa pagtabang kanila nga makabaton og usa ka butang nga magantihon?

Dapita ang mga estudyante sa hilom nga pagpamalandong sa mosunod nga parapo:

Paghunahuna og mga panahon sa imong kinabuhi nga gibati nimo nga labi ka duol sa Dios ug mga panahon nga gibati nimo nga layo gikan Kaniya. Unsa ang pipila ka mga binuhatan nga mahimong hinungdan niini nga mga sangputanan?

• Unsay imong nakit-an?

• Unsa sa imong hunahuna ang nakatabang ni Jacob nga mobati sa paagi nga iyang gihulagway sa 2 Nephi 9:49?

Hunahunaa ang imong kaugalingon nga kinabuhi ug unsa ka suod ang imong gibati karon sa Dios. Samtang magtuon ka pa sa sermon ni Jacob sa 2 Nephi 9, pangita og mga pagtulun-an nga makatabang nimo nga mas maduol sa Langitnong Amahan ug ni Jesukristo.

“Pamati sa akong mga pulong”

Human sa pagtudlo mahitungod sa tahas ni Jesukristo sa pagtabang kanato sa pagbuntog sa sala ug kamatayon (tan-awa sa 2 Nephi 9:1–26), gipasidan-an ni Jacob ang mga Nephite batok sa mga kinaiya ug pamatasan nga makapahilayo kanila gikan sa Manluluwas.

Ikonsiderar ang pagtunga sa klase ug ibulag ang mosunod nga buluhaton sa pagbasa. (Katunga sa klase mahimong magbasa sa 2 Nephi 9:27–30, ug ang laing katunga mahimong magbasa sa 2 Nephi 9:31–38.)

Basaha ang 2 Nephi 9:27–38, nga mangita sa mga kinaiya ug mga binuhatan nga gipasidaan ni Jacob. Mahimo nimong ikonsiderar ang paghimo og lista niini samtang magbasa ka.

Hunahunaa kon sa unsang paagi ang matag usa sa mga kinaiya nga gipasidaan ni Jacob batok sa magamit sa mga tin-edyer karon. Pananglitan, samtang kadaghanan sa mga tin-edyer wala moapil sa pagpatay, ang bersikulo 35 makatabang kanimo sa paghinumdom sa paglikay sa bayolenteng mga hunahuna, mga pagbati, ug pamatasan (tan-awa sa Mateo 5:21–22, 38–42).

Usa ka paagi sa pagtabang sa mga estudyante nga makakita kon sa unsang paagi ang mga pagtulun-an ni Jacob adunay kalabotan sa ilang kinabuhi mao ang pagdapit kanila sa pag-ila sa mga pagtulun-an gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022) nga may kalabotan sa 2 Nephi 9. Mahimo nimong hangyoon ang mga estudyante sa pagtuon og sa pagpakigbahin sa klase sa pipila sa tambag nga ilang makit-an. Ang mga sanglitanan niini nga mga pagtulun-an naglakip sa mahangtoron nga mga kamatuoran, mga pagdapit, ug gipanaad nga mga panalangin diha sa mga pahina 31–32 (may kalabotan sa mga bersikulo 28–29, 34) ug mga pagtulun-an bahin sa balaod sa kaputli diha sa mga opahina 23–28 (may kalabotan sa bersikulo 36).

• Unsa ang pipila ka mga ehemplo kon sa unsang paagi ang mga pagtulun-an ni Jacob adunay kalabotan sa mga tin-edyer karon?

• Sa unsang paagi nga ang mga kinaiya ug pamatasan nga gilista ni Jacob makaapekto sa atong relasyon sa Dios?

Ang usa ka tawo nga nagpakita sa mga pamatasan ug mga kinaiya nga gipasidaan ni Jacob mahimong gihulagway nga “pagkakalibotanon sa hunahuna” (2 Nephi 9:39).

Basaha ang 2 Nephi 9:39, nga mangita sa unsay gitudlo ni Jacob mahitungod sa mga epekto sa pagkakalibutanon sa hunahuna ug sa pagka-espirituhanon sa hunahuna.

Aron matabangan ang mga estudyante nga masilsil sa alimpatakan ang mga pagtulun-an ni Jacob sa 2 Nephi 9:39, ikonsiderar ang pagdapit kanila sa paghimo og drowing o meme nga naghulagway sa hugpong sa mga pulong “ang pagka-espirituhanon sa hunahuna mao ang kinabuhing dayon.”

• Unsay imong nadiskobrehan?

• Unsa sa imong hunahuna ang gipasabot sa pagka-espirituhanon sa hunahuna?

Gikan niini nga bersikulo, atong makat-onan nga ang pagkakalibutanon sa hunahuna mosangpot sa espirituhanong kamatayon. Ang pagka-espirituhanon sa hunahuna motultol sa kinabuhing dayon.

• Unsa ang pipila sa inadlaw-adlaw nga mga binuhatan ang imong mahimo aron mapadayon ang imong hunahuna nga espirituhanong nakatutok kang Jesukristo?

• Unsa nga mga hunahuna o mga pagbati ang aduna ka mahitungod sa pamahayag ni Presidente Nelson?

Duol ngadto sa Usa nga Balaan sa Israel

Dapita ang mga estudyante sa hilom nga pagpamalandong kon sa unsang paagi magamit sa ilang kaugalingon ang unsay ilang nakat-onan. Mahimo kang mangutana og pipila ka mga pangutana sama niadtong gilista sa mosunod nga parapo, apan ayaw hangyoa ang mga estudyante sa pagpaambit.

Hunahunaa pag-usab ang pagkakalibotanon sa hunahuna nga mga pamatasan nga gilista ni Jacob sa 2 Nephi 9:27–38. Hain niini nga mga pasidaan ang imong nakita nga labing mahagiton? Aduna bay mga kausaban nga mahimo nimong mabuhat nga makatabang nimo nga mas mapaduol sa Langitnong Amahan ug ni Jesukristo? Ikonsiderar kon unsa nga mga lakang ang mahimo nimong buhaton.

Samtang maghunahuna ka bahin sa imong kaugalingon nga mga kahimtang, basaha ang mga pulong ni Jacob sa 2 Nephi 9:40–45. Pangitaa ang iyang mga pagtulun-an, ilabi na kadtong mahitungod sa Manluluwas, nga mahimong makatabang nimo sa imong sitwasyon karon.

• Unsa nga mga pulong ug hugpong sa mga pulong ang imong nakita nga labing makahuluganon? Ngano man?

• Sa unsang paagi kaha ang paghinumdom sa “ang pagkawalay kataposan nianang Usa nga Balaan sa Israel” (bersikulo 40) mas makatabang kanimo nga mahimong pagka-espirituhanon sa hunahuna?

Hatagi og panahon ang mga estudyante sa pagpamalandong sa unsay ilang nakat-onan ug gibati sa leksiyon karon. Dapita sila sa pagrekord sa ilang mga hunahuna ug mga impresyon diha sa ilang journal sa pagtuon. Kon mahuman na sila, ikonsiderar ang pagdapit og pipila ka mga boluntaryo sa pagpaambit sa pipila sa ilang gisulat kon kini dili kaayo personal. Pagpamatuod sa mga kamatuoran nga inyong nahisgotan.

Komentaryo ug Background nga Impormasyon

2 Nephi 9:28–29. Ngano nga importante nga unahon ang espirituhanong pagkat-on kay sa sekular nga pagkat-on?

Si Presidente Henry B. Eyring sa Unang Kapangulohan mitudlo:

Presidente Henry B. Eyring

Klaro nga ang pag-una sa espirituhanong pagkat-on dili mopalingkawas kanato gikan sa pagkat-on sa sekular nga mga butang. Hinoon, kini naghatag og katuyoan sa atong sekular nga pagkat-on ug modasig kanato sa pagpaningkamot og maayo niini.

Kon atong mahatagan og prayoridad ang espirituhanong pagkat-on, kinahanglang mohimo kita og lisod nga mga pagpili kon unsaon nato paggamit ang atong panahon. Apan kinahanglan gayod nga dili mahimong ikaduha lamang ang espirituhanong mga butang isip sumbanan sa atong kinabuhi. Dili gayod. Kana mosangpot ngadto sa trahedya. Ang trahedya mahimong dili klaro sa sinugdanan, ni kini mahimong klaro sa mortal nga kinabuhi. Apan hinumdomi, kamo interesado sa edukasyon, dili lamang alang sa mortal nga kinabuhi kondili alang sa kinabuhing dayon. Kon klaro ninyong makita kana nga kamatuoran uban sa espirituhanon nga salabotan, inyong ibutang pag-una ang espirituhanon nga pagkat-on ug sa gihapon dili ibaliwala ang sekular nga pagkat-on. Gani, mas maningkamot pa mo og maayo sa inyong sekular nga pagkat-on kay sa wala kanang espirituhanong panglantaw. (Henry B. Eyring, “Education for Real Life,” Ensign, Okt. 2002, 18)

Tan-awa ang “Ang Sinsero nga Tinguha sa Kalag” aron sa pagkat-on og dugang mahitungod sa kamahinungdanon sa pag-apil sa Dios sa imong mga tumong sa edukasyon ug mga kalihokan.

2 Nephi 9:39. Sa unsang paagi ang pagpaningkamot nga mahimong pagka-espirituhanon sa hunahuna makatabang kanako nga makakita sa mga butang sa lahi nga paagi?

Si Presidente Dallin H. Oaks sa Unang Kapangulohan mitudlo:

Presidente Dallin H. Oaks

Samtang kita magkalayo gikan sa pagkakalibotanon, kita mobati nga mas duol sa atong Amahan sa Langit ug mas makahimo nga magiyahan sa iyang Espiritu. Gitawag nato kini nga kalidad sa kinabuhi nga pagka-espirituhanon.

Para sa mga matinud-anon, ang pagka-espirituhanon maoy usa ka lente diin atong makita ang kinabuhi ug usa ka sukdanan diin kita magtimbangtimbang niini. …

Ang pagka-espirituhanon sa hunahuna mao ang pagtan-aw ug pagtimbang-timbang sa atong mga kasinatian bahin sa gipadako nga panglantaw sa kahangtoran.

… Pinaagi sa lente sa pagka-espirituhanon, atong makita ang tanang mga sugo sa Dios isip mga pagdapit sa mga panalangin. (Dallin H. Oaks, “Spirituality,” Ensign, Nob. 1985, 61, 63)

2 Nephi 9:40. Sa unsang paagi nga ang paghinumdom sa “ang pagkawalay kataposan nianang Usa nga Balaan sa Israel” makatabang kanako nga mapabilin ang pagka-espirituhanon sa hunahuna?

Si Elder Dale G. Renlund sa Korum sa Napulog Duha ka Apostoles mideklarar:

Elder Dale G. Renlund

Ang atong Langitnong Amahan gusto nga kita mahinumdom sa Iyang pagkamaayo ug sa Iyang Hinigugmang Anak, dili alang sa Ilang kaugalingon nga katagbawan apan sa impluwensiya niana nga paghinumdom diri kanato. Pinaagi sa pagkonsiderar sa Ilang pagkamabination, milapad ang atong panglantaw ug panabot. Pinaagi sa pagpamalandong sa Ilang kamanggiloy-on, mas mapaubsanon na kita, mainampuon, ug makanunayon. …

Ako modapit kaninyo sa paghinumdom matag adlaw sa pagkahalangdon sa Langitnong Amahan ug ni Jesukristo ug sa unsay Ilang nabuhat alang kaninyo. Himoa nga ang inyong paghunahuna sa Ilang kamaayo mas lig-ong nakahigot sa natipas ninyong kasingkasing ngadto Kanila. Pamalandongi ang Ilang kamanggiloy-on, ug ikaw mapanalanginan og dugang nga espiritwal nga pagbati ug mas mahisama kang Kristo. (Dale G. Renlund, “Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41, 44)

Dugang nga mga Kalihokan sa Pagkat-on

2 Nephi 9:27. Alternatibo nga pagsugod

Isip alternatibong paagi sa pagsugod sa leksiyon, dapita ang mga estudyante sa pagpaambit og pipila ka mga butang nga gihangyo nga dili nila usikan. Hisgoti ang mga kaayohan sa dili pagkausikan. Basaha ang 2 Nephi 9:27 ug dapita ang mga estudyante sa pag-ila sa tambag ni Jacob ug hisgoti kon unsay gipasabot sa pag-usik-usik “sa mga adlaw sa [atong] pagsulay.” Dasiga ang mga estudyante sa pag-ila sa tibuok leksiyon sa mausikon nga mga kinaiya ug mga batasan nga gipasidaan ni Jacob.

Tabangi ang mga estudyante nga makasabot nga bisan kon sila nakahimo sa bisan unsa nga kinaiya nga gihisgotan, ang ilang mga kinabuhi wala mausik, ug samtang sila “[mo]duol … sa Ginoo” (2 Nephi 9:41) mahimo silang magpakabuhi nga mas malipayon ug mas mabungahon nga kinabuhi.

2 Nephi 9:28–29. “Ang pagkamakinaadmanon maayo”

Kon makabenepisyo ang mga estudyante gikan sa paghisgot og dugang mahitungod sa pagkat-on ug unsaon paglikay sa mga lit-ag nga gihulagway ni Jacob, ikonsiderar ang pagpangutana sama sa mosunod human sa pagbasa sa 2 Nephi 9:28–29:

• Sa unsang paagi nga ang pagbutang sa imong pagsalig diha sa kaalam sa kalibotan makapahilayo kanimo gikan ni Jesukristo?

• Unsa ang atong mahimo aron maseguro nga kini dili mahitabo?

Mahimo usab nimong tun-an uban sa mga estudyante ang pipila ka mga ideya nga gipresentar diha sa “Edukasyon” nga seksiyon sa Alang sa Kalig-on sa mga Kabatan-onan (booklet, 2011), 9–10.