« នីហ្វៃទី២ ៦; ១០ ៖ ការប្រមូលពួកសាសន៍អ៊ីស្រាអែល » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី២ ៦; ១០ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី២ ៦; ១០
ការប្រមូលពួកសាសន៍អ៊ីស្រាអែល
ការព្យាករណ៍ជាច្រើននៅក្នុងព្រះគម្ពីរទាក់ទងនឹងព្រឹត្តិការណ៍នៃថ្ងៃចុងក្រោយ ឬសម័យដែលយើងរស់នៅសព្វថ្ងៃនេះ ។ យ៉ាកុបប្អូនប្រុសរបស់នីហ្វៃ បានចែកចាយការព្យាករណ៍អំពីជំនាន់របស់យើង និងការប្រមូលពួកសាសន៍អ៊ីស្រាអែល ដែលអាចជួយយើងយល់ពីតួនាទីរបស់ខ្លួនក្នុងកិច្ចការរបស់ព្រះអម្ចាស់នៅថ្ងៃចុងក្រោយ ។ មេរៀននេះអាចជួយអ្នកមានបំណងប្រាថ្នាកាន់តែធំដើម្បីចូលរួមជាមួយព្រះអម្ចាស់នៅក្នុងការប្រមូលពួកសាសន៍អ៊ីស្រាអែល ។
ការបង្កើតបរិយាកាសរៀនសូត្រដ៏សកម្មជួនកាល វាប្រហែលជារឿងសមរម្យដើម្បីបង្កើនការចូលរួមរបស់សិស្ស និងការផ្តោតអារម្មណ៍តាមរយៈសកម្មភាពខាងរូបកាយ ។ សូមពិចារណាជួយសិស្សឲ្យចូលរួមចំណែកតាមរយៈការធ្វើចលនា ។ ឧទាហរណ៍ ៖ សិស្សអាចលើកកៅអី សរសេរនៅលើក្ដារខៀន ឈរអានបទគម្ពីរ ឬសម្តែងតាមដំណើររឿងក្នុងព្រះគម្ពីរ ។ល។
ការរៀបចំសិស្ស ៖ សូមអញ្ជើញសិស្សឲ្យមករៀនដោយរៀបចំខ្លួនដើម្បីចែកចាយបទពិសោធន៍ដែលពួកគេមានក្នុងការចូលរួមប្រមូលពួកសាសន៍អ៊ីស្រាអែល ។
សកម្មភាពរៀនសូត្រដែលអាចមាន
រឿងសំខាន់ៗកំពុងកើតឡើង
សូមពិចារណាបង្ហាញសេចក្តីថ្លែងការណ៍ខាងក្រោមដោយប្រធាន រ័សុល អិម ណិលសុន ម្តងមួយៗ ដោយផ្អាកមួយភ្លែតៗ ដើម្បីសិស្សអាចគិតអំពីសេចក្តីថ្លែងការណ៍នីមួយៗ មុនពេលបន្តទៅមុខទៀត ។
សម្រង់ខាងក្រោមនេះមកពីសារលិខិតដែល ប្រធាន រ័សុល អិម ណិលសុន បានចែកចាយ ។ នៅពេលអ្នកអានសេចក្តីថ្លែងការណ៍ទាំងនេះ សូមគិតអំពីប្រធានបទមួយចំនួនដែលប្រធាន ណិលសុន អាចសំដៅទៅលើ ។
-
« គ្មានអ្វី កើតឡើង នៅលើផែនដីនេះក្នុងពេលនេះ ដែលសំខាន់ជាងកិច្ចការនេះទេ ។… គ្មាន អ្វី ដែលមានសារៈសំខាន់ជាងនោះទេ ។ គ្មាន ទាល់តែសោះ » ( រ័សុល អិម. ណិលសុន និងវិនឌី ដបុលយូ ណិលសុន « សង្ឃឹមអ៊ីស្រាអែល » [ ការប្រជុំធម្មនិដ្ឋានទូទាំងពិភពលោក ថ្ងៃទី ៣ ខែ មិថុនា ឆ្នាំ ២០១៨ ] នៅលើគេហទំព័រ ChurchofJesusChrist.org ) ។
-
« ការប្រមូលផ្តុំនេះ… គួរមានអត្ថន័យទាំងស្រុងចំពោះប្អូនៗ » ( រ័សុល អិម ណិលសុន « សង្ឃឹមអ៊ីស្រាអែល » ) ។
-
« នេះ គឺជា បេសកកម្មដែលប្អូនៗត្រូវបានបញ្ជូនមកផែនដី » ( រ័សុល អិម ណិលសុន « សង្ឃឹមអ៊ីស្រាអែល » ) ។
-
តើប្រធានបទអ្វីខ្លះដែលអ្នកគិតថា ប្រធាន ណិលសុន អាចមានប្រសាសន៍សំដៅទៅលើ ជាមួយនឹងសេចក្តីថ្លែងការណ៍ទាំងនេះ ?
អ្នកប្រហែលជាបានដឹងហើយថា ប្រធាន ណិលសុន កំពុងមានប្រសាសន៍សំដៅទៅលើការប្រមូលសាសន៍អ៊ីស្រាអែល ។ « សង្ឃឹមអ៊ីស្រាអែល » ចាប់ពីនាទីទី ៣៩:៣៦–៤០:០៥ ដែលមាននៅលើគេហទំព័រ ChurchofJesusChrist.org ឬអានសេចក្តីថ្លែងការណ៍ទាំងស្រុងរបស់ប្រធាន ណិលសុន ដូចតទៅនេះ ។
យុវវ័យដ៏អស្ចារ្យជាទីស្រឡាញ់របស់ខ្ញុំអើយ—ប្អូនៗត្រូវបានបញ្ជូនមកកាន់ផែនដីនៅគ្រាដ៏ជាក់នេះ គ្រាដ៏សំខាន់ក្នុងប្រវត្តិសាស្ត្រនៃពិភពលោក ដើម្បីជួយប្រមូលវង្សអ៊ីស្រាអែល ! គ្មានអ្វី កើតឡើង នៅលើផែនដីនេះក្នុងពេលនេះដែលសំខាន់ជាងកិច្ចការនេះទេ ។ គ្មាន អ្វី ដែលមានសារៈសំខាន់ជាងនោះទេ ។ គ្មាន ទាល់តែសោះ ។
ការប្រមូលផ្តុំនេះគួរតែមានអត្ថន័យ ទាំងស្រុង ចំពោះប្អូនៗ ។ នេះ គឺជា បេសកកម្មដែលប្អូនៗត្រូវបានបញ្ជូនមកផែនដី ។ ( រ័សុល អិម ណិលសុន និង ស៊ីស្ទើរ វេនឌី ដ័បុលយូ ណិលសុន « សង្ឃឹមអ៊ីស្រអែល » [ ការប្រជុំធម្មនិដ្ឋានទូទាំងពិភពលោក ថ្ងៃទី ៣ ខែ មិថុនា ឆ្នាំ ២០១៨ ] នៅលើគេហទព័រ ChurchofJesusChrist.org )
-
តើអ្នកមានគំនិត ឬអារម្មណ៍ដូចម្ដេចខ្លះអំពីសេចក្តីថ្លែងការណ៍របស់ប្រធាន ណិលសុន ?
-
តើអ្នកមានសំណួរអ្វីខ្លះអំពីការប្រមូលពួកសាសន៍អ៊ីស្រាអែល ?
សូមពិចារណាអំពីគំនិត និងអារម្មណ៍របស់អ្នកអំពីការចូលរួមនៅក្នុងការប្រមូលពួកសាសន៍អ៊ីស្រាអែលដែលរួមមាន ផ្សព្វផ្សាយដំណឹងល្អដល់អស់អ្នកដែលនៅលើផែនដីឥឡូវនេះ និងការធ្វើពង្សប្រវត្តិ និងកិច្ចការព្រះវិហារបរិសុទ្ធសម្រាប់អ្នកដែលបានស្លាប់ទៅ ដើម្បីឲ្យមនុស្សទាំងអស់មានឱកាសមករកព្រះវរបិតាសួគ៌ និងព្រះយេស៊ូវគ្រីស្ទ ។ តើការងារនេះសំខាន់ប៉ុនណាចំពោះអ្នក ? កាលដែលអ្នកសិក្សានៅថ្ងៃនេះ សូមរកមើលការបង្រៀនដែលអាចជួយបង្កើនឆន្ទៈ និងសមត្ថភាពរបស់អ្នកដើម្បីចូលរួមជាមួយព្រះអម្ចាស់នៅក្នុងការប្រមូលពួកសាសន៍អ៊ីស្រាអែល ។
យ៉ាកុបបង្រៀនពីការប្រមូលពួកសាសន៍អ៊ីស្រាអែល
នីហ្វៃបានអញ្ជើញប្អូនប្រុសរបស់លោកគឺ យ៉ាកុប ឲ្យចែកចាយការព្យាករណ៍សំខាន់ៗមកពីព្យាការីអេសាយ ក្នុងព្រះគម្ពីរសញ្ញាចាស់ អំពីការប្រមូលពួកសាសន៍អ៊ីស្រាអែលនៅថ្ងៃចុងក្រោយ ( សូមមើល នីហ្វៃទី២ ៦:៤–៧ ) ។
ដើម្បីជួយរៀបចំសិស្សឲ្យយល់ខគម្ពីរដែលពួកគេនឹងអាន សូមពិចារណាបង្ហាញ និងអាននិយមន័យខាងក្រោម និងរូបភាពមួយ ឬច្រើនដែលពណ៌នាអំពីទង់ជ័យ ឬ ទង់ ។
-
សាសន៍ដទៃ ៖ ដូចដែលបានប្រើនៅក្នុងព្រះគម្ពីរ ពួកសាសន៍ដទៃមានអត្ថន័យជាច្រើន ។ នៅក្នុងការព្យាករណ៍របស់អេសាយ ( សូមមើល នីហ្វៃទី២ ៦:៥–៧ ) អត្ថន័យមួយនៃពាក្យសាសន៍ដទៃ អាចនិយាយសំដៅទៅលើប្រជាជនដែលពុំមែនជាពូជអំបូរនៃសាសន៍អ៊ីស្រាអែល ( សូមមើលសេចក្តីណែនាំដល់បទគម្ពីរទាំងឡាយ « ពួកសាសន៍ដទៃ » នៅលើគេហទំព័រ scriptures.ChurchofJesusChrist.org ) ។
-
ទង់ ៖ « បដា ឬទង់ជ័យមួយ ដែលប្រជាជនប្រមូលគ្នាមករួមជុំវិញជាក្រុម ចំពោះគោលបំណង ឬទីសម្គាល់មួយ » ( សេចក្តីណែនាំដល់បទគម្ពីរទាំងឡាយ « ទង់ » នៅលើគេហទំព័រ scriptures.ChurchofJesusChrist.org ) ។
ដោយមាននិយមន័យនេះនៅក្នុងគំនិត សូមអាន នីហ្វៃទី២ ៦:៥–៧ ។ សូមសរសេររៀបរាប់នៅក្នុងសៀវភៅកំណត់ហេតុការសិក្សារបស់អ្នកនូវព័ត៌មានលម្អិតពីការព្យាករណ៍របស់ អេសាយដែលហាក់ដូចជាសំខាន់ ។
ប្រសិនបើចាំបាច់ សូមជួយសិស្សឲ្យស្វែងរកព័ត៌មានលម្អិតសំខាន់ៗពីការព្យាករណ៍របស់ អេសាយ ដូចជា ៖
-
ព្រះនឹងបង្កើតទង់ជ័យមួយឡើង ។
-
សាសន៍ដទៃនឹងនាំកូនប្រុសកូនស្រីរបស់សាសន៍អ៊ីស្រាអែលក្នុងរង្វង់ដៃរបស់ពួកគេ ហើយលើកដាក់លើស្មារបស់ពួកគេ ។
-
ពួកមហាក្សត្រ និងពួកអគ្គមហេសីនៃសាសន៍ដទៃនឹងធ្វើជាមាតា និងបិតាចិញ្ចឹម ។
-
តើសេចក្ដីលម្អិតអ្វីខ្លះដែលអ្នកបានរកឃើញពីការព្យាករណ៍របស់អេសាយដែលហាក់ដូចជាសំខាន់ ?
-
តើអ្នកនៅតែមានសំណួរអ្វីខ្លះអំពីការព្យាករណ៍នេះ ?
ទាំងនីហ្វៃ និងយ៉ាកុប បានពន្យល់លម្អិតអំពីការព្យាករណ៍នេះនៅក្នុងសំណេររបស់ពួកគេ ។ សូមស្វែងយល់បន្ថែមទៀតអំពីការព្យាករណ៍របស់អេសាយ ដោយអានបណ្តុំខគម្ពីរខាងក្រោមនេះឲ្យបានយ៉ាងហោចណាស់មួយចប់ ។ វាក៏អាចនឹងមានប្រយោជន៍ផងដែរក្នុងការមើលសេចក្តីយោង ឬភ្ជាប់ខគម្ពីរទាំងនេះទៅ នីហ្វៃទី២ ៦:៥–៧ ។
សូមពិចារណាបំបែកសិស្សជាក្រុមតូចៗ ដោយសិស្សពាក់កណ្តាលក្រុមសិក្សាពាក្យសម្តីរបស់នីហ្វៃ និងពាក្យកណ្តាលទៀតសិក្សាពាក្យសម្តីរបស់យ៉ាកុប ។ បន្ទាប់មក សូមអញ្ជើញសិស្សឲ្យរាយការណ៍ពីអ្វីដែលពួកគេបានរៀនចេញពីខគម្ពីរទាំងឡាយដែលពួកគេបានសិក្សា ។
-
នីហ្វៃទី១ ២២:៦–១២ ( ពាក្យសម្តីរបស់នីហ្វៃ )
-
នីហ្វៃទី២ ១០:៣–១០ ( ពាក្យសម្តីរបស់យ៉ាកុប )
-
តើនីហ្វៃ ឬយ៉ាកុបបង្រៀនអ្វីខ្លះនៅក្នុងខគម្ពីរទាំងនេះដែលជួយអ្នកឲ្យយល់ នីហ្វៃទី២ ៦:៥–៧ កាន់តែច្បាស់ ? តើអ្នកបានទទួលការយល់ដឹងបន្ថែមទៀតអ្វីខ្លះ ?
សំណួរទាំងបីខាងក្រោមមានគោលបំណងជួយសិស្សឲ្យយល់កាន់តែច្បាស់អំពីខគម្ពីរដែលពួកគេអាន ។ ប្រសិនបើពួកគេយល់វគ្គបទគម្ពីរនេះច្បាស់ នោះអ្នកអាចរំលងទៅសំណួរទីបួន និងទីប្រាំខាងក្រោម ។
-
តើអ្នកគិតថាអ្វីជា « កិច្ចការដ៏អស្ចារ្យ » ដែលនឹងកើតឡើងនៅសម័យចុងក្រោយ « ជាការណ៍មានប្រយោជន៍ដ៏សំខាន់ » ដល់ប្រជាជនជាច្រើន ( នីហ្វៃទី១ ២២:៨ ) ? ប្រសិនបើសិស្សត្រូវការជំនួយដើម្បីយល់ពីអ្វីដែលជាកិច្ចការដ៏អស្ចារ្យ អ្នកអាចបង្ហាញពួកគេទៅកាន់លេខយោង ឬពន្យល់ថា វាសំដៅទៅលើការស្ដារឡើងវិញនៃដំណឹងល្អ ។
-
យោងទៅតាម នីហ្វៃទី១ ២២:១២ តើប្រជាជនអ៊ីស្រាអែលដែលខ្ចាត់ព្រាត់នឹងដឹងយ៉ាងណា ពេលដែលពួកគេត្រូវបានប្រមូលផ្តុំនោះ ?
-
តើប្រជាជាតិសាសន៍ដទៃនឹងមានតួនាទីអ្វីនៅក្នុងការប្រមូលពួកសាសន៍អ៊ីស្រាអែលនៅថ្ងៃចុងក្រោយ ( សូមមើល នីហ្វៃទី ១ ២២:៨–៩; នីហ្វៃទី២ ១០:៨–៩ ) ?
-
តើការបង្រៀនទាំងនេះជួយអ្នកយល់អ្វីខ្លះអំពីព្រះយេស៊ូវគ្រីស្ទ និងរបៀបដែលទ្រង់មានព្រះទ័យចំពោះមនុស្សទាំងអស់ ?
-
តើវាជួយអ្នកឲ្យយល់អ្វីខ្លះអំពីតួនាទីដែលអ្នកមានក្នុងការជួយប្រមូលពួកសាសន៍អ៊ីស្រាអែល ?
សេចក្តីពិតមួយដែលយើងអាចរៀនចេញពីការព្យាករណ៍របស់អេសាយ និងសេចក្តីថ្លែងការណ៍របស់ប្រធាន ណិលសុន នៅពីដើមមេរៀននេះនោះគឺថា ក្នុងនាមជាសមាជិកនៃសាសនាចក្រដែលបានស្ដារឡើងវិញរបស់ព្រះអង្គសង្គ្រោះ យើងមានការទទួលខុសត្រូវក្នុងការចូលរួមជាមួយនឹងព្រះអម្ចាស់នៅក្នុងការប្រមូលពួកសាសន៍អ៊ីស្រាអែលនៅថ្ងៃចុងក្រោយ ។
-
តើសេចក្ដីពិតនេះជួយអ្នកយល់អ្វីខ្លះអំពីព្រះទ័យរបស់ព្រះអម្ចាស់ចំពោះអ្នក ?
-
តើអ្នកដឹងអ្វីខ្លះអំពីព្រះអង្គសង្គ្រោះដែលបង្កើនបំណងប្រាថ្នារបស់អ្នកដើម្បីប្រមូលផ្ដុំទៅកាន់ទ្រង់ ? តើការចែកចាយដំណើររឿងនេះជាមួយអ្នកដទៃ អាចបង្កើនបំណងប្រាថ្នារបស់ពួកគេដើម្បីប្រមូលផ្ដុំ ទៅកាន់ព្រះអង្គសង្គ្រោះដោយយរបៀបណា ?
សូមដាក់ផែនការដើម្បីជួយព្រះអម្ចាស់ប្រមូលពួកសាសន៍អ៊ីស្រាអែល
ប្រធាន ណិលសុន បានពិពណ៌នាអំពីអ្វីដែលយើងអាចធ្វើបាន ដើម្បីជួយប្រមូលពួកសាសន៍អ៊ីស្រាអែល ៖
រាល់ពេលដែលយើងធ្វើអ្វីមួយដើម្បីជួយនរណាម្នាក់—ទោះនៅខាងណាក៏ដោយ—ដើម្បីចុះ និងរក្សាសេចក្តីសញ្ញារបស់ពួកគេជាមួយនឹងព្រះ នោះយើងកំពុងជួយប្រមូលពួកសាសន៍អ៊ីស្រាអែលហើយ ។ ( រ័សុល អិម ណិលសុន « ទុកឲ្យព្រះឈ្នះ » Ensign ឬ Liahona ខែ វិច្ឆិកា ឆ្នាំ ២០២០ ទំព័រ ៩២–៩៣ )
-
ដោយចងចាំសេចក្តីថ្លែងការណ៍របស់ប្រធាន ណិលសុន ក្នុងចិត្ត តើមានអ្វីជាក់លាក់ខ្លះដែលអ្នកអាចធ្វើដើម្បីចូលរួមជាមួយព្រះអម្ចាស់ក្នុងការជួយអ្នកដទៃឲ្យមករកទ្រង់ ?
-
តើអ្នកមានបទពិសោធន៍អ្វីខ្លះក្នុងការជួយអ្នកដទៃឲ្យប្រមូលផ្តុំ ឬចូលមកកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ?
សូមគិតអំពីរបៀបដែលអ្នកអាចចូលរួមកាន់តែពេញលេញជាមួយនឹងព្រះអម្ចាស់ក្នុងការប្រមូលពួកសាសន៍អ៊ីស្រាអែល ។
ប្រសិនបើមានពេល សូមពិចារណាចែកចាយធនធានមួយ ឬច្រើនខាងក្រោមនេះ ដើម្បីជួយសិស្សគិតអំពីយោបល់ជាក់លាក់នានា ។
-
ប្រធាន រ័សុល អិម ណិលសុន បានចែកចាយយោបល់ផ្សេងៗ ដែលបានស្នើដោយយុវជននៃសាសនាចក្រអំពីរបៀបដែលពួកគេអាចជួយប្រមូលពួកសាសន៍អ៊ីស្រាអែល ។ សូមមើល « សង្ឃឹមអ៊ីស្រាអែល » ពីនាទីទី ៤០:២៩–៤៣:៣៨ ដែលមាននៅលើគេហទំព័រ ChurchofJesusChrist.org ។
-
សូមចូលទៅ share.churchofjesuschrist.org ។
-
សូមមើលវីដេអូ « Families Gathering Families on Both Sides of the Veil » ( ៣:២២ ) នៅលើគេហទំព័រ ChurchofJesusChrist.org ។
សូមធ្វើផែនការសកម្មភាពសម្រាប់អ្វីដែលអ្នកអាចធ្វើបាន ដើម្បីអញ្ជើញអ្នកដទៃឲ្យប្រមូលផ្តុំមកកាន់ព្រះអង្គសង្គ្រោះ ឬនិយាយម្យ៉ាងទៀត ឲ្យមករកព្រះគ្រីស្ទ ដោយចុះ និងរក្សាសេចក្ដីសញ្ញាជាមួយទ្រង់ ។ សូមប្រាកដថា បានបញ្ចូលជំហានជាក់លាក់មួយចំនួន ។ ការណ៍នេះនឹងជួយអ្នកឲ្យធ្វើសកម្មភាពដោយសេចក្តីជំនឿ ។ របៀបមួយដែលអ្នកអាចធ្វើបានគឺតាមរយៈការបំពេញប្រយោគដូចខាងក្រោម ៖
-
នៅចុងបញ្ចប់នៃថ្ងៃនេះ ខ្ញុំនឹង
-
ពេញមួយសប្តាហ៍នេះខ្ញុំនឹង