2 Nīfai 4

Saame ʻa Nīfaí

Nīfai ʻoku Lotu

ʻOku fehangahangai ʻa e tokotaha kotoa pē mo e ʻahiʻahí pea ongoʻi loto maʻulalo pe loto-foʻi he taimi ʻe niʻihi. Naʻe ongoʻi pehē foki mo e palōfita ko Nīfaí. Hili e aʻusia ʻe Nīfai ʻa e pekia ʻa ʻene tamai ko Līhaí pea mo ʻene fehangahangai mo hono ongo taʻokete ʻitá, naʻá ne tohi ʻo kau ki he niʻihi ʻo ʻene ngaahi ongo loloto tahá. Naʻá ne fakahaaʻi ʻene fiefiá pea pehē ki heʻene mamahí. ʻOku fakahaaʻi mai ʻe Heʻene sīpingá ʻa e founga te tau lava ai ʻo tafoki ki he ʻEikí ʻi he taimi ʻoku tau aʻusia ai e ngaahi ʻahiʻahi ʻo e moʻui fakamatelié. ʻE lava ke tokoniʻi koe ʻe he lēsoni ko ʻení ke ke tali faivelenga ki he ʻahiʻahí mo e loto-foʻí ʻaki haʻo tafoki ki he ʻEikí.

Fakaafeʻi e kau akó ke nau vahevahe ʻenau ngaahi ongó, ngaahi aʻusiá mo e ngaahi fakamoʻoní. ʻE lava ke kau ʻa e tokotaha kotoa pē ʻi hoʻo kalasí ʻi he lukuluku [fakamatalá]. ʻI hoʻo tokoniʻi e kau akó ke vahevahe ʻenau ngaahi ongó, aʻusiá, mo e fakamoʻoní, te nau lava ʻo faitāpuekina e ngaahi moʻui ʻa kinautolu ʻoku ʻi honau tafaʻaki. ʻE lava ke fakamāmaʻi ʻa e tokotaha kotoa pē ʻi he kalasí ʻe he Laumālie Māʻoniʻoní.

Teuteu ʻa e tokotaha akó: Fakakaukau ke fakaafeʻi e kau akó ke nau kole tokoni ki he ʻOtuá ʻi ha ʻahiʻahi pe faingataʻa ʻoku nau fehangahangai mo ia.

Ngaahi ʻEkitivitī Ako ʻOku Ala Fakahokó

Ngaahi faingataʻa ʻo e moʻui fakamatelié

Ko e founga ʻe taha ke kamata ʻaki e lēsoní ko hono aleaʻi e ngaahi faingataʻa ʻo e moʻuí ʻoku angamaheni ki ai ʻa e taha kotoa. Hangē ko ʻení, ʻoku tau fehangahangai kotoa pē mo e ʻahiʻahí pea tau ongoʻi loto mamahi pe loto-foʻi he taimi ʻe niʻihi. Fakakaukau ke fakaafeʻi e kau akó ke nau fakalaulauloto fakalongolongo pē ki he ngaahi fehuʻi ko ʻení. ʻE lava foki ke hiki ʻe he kau akó ʻi heʻenau tohinoá ha ʻahiʻahi pe ʻuhinga pau te nau ongoʻi loto-foʻi ai.

• ʻOkú ke pehē ko e hā ʻoku ʻahiʻahiʻi ai e tokotaha kotoa pē pea ongoʻi lotofoʻi he taimi ʻe niʻihi?

• Mei he 1 ki he 10, ko e hā e tuʻunga ʻokú ke ongoʻi ʻoku aʻu ki ai ʻa hoʻo mapuleʻi e ngaahi faingataʻa ko ʻení?

• ʻE tāpuekina fēfē nai hoʻo moʻuí kapau te ke lava lelei ange ʻo ikunaʻi ʻa e ʻahiʻahí mo e loto-foʻí?

Saame ʻa Nifai

Lau ʻa e 2 Nīfai 4:12–13, 18, ʻo kumi ai ki he niʻihi ʻo e ngaahi faingataʻa naʻe fehangahangai mo Nīfaí.

• ʻOkú ke pehē ko e hā naʻe fakatupu ʻe he ngaahi faingataʻa ko ʻení ʻi he ongo ʻa Nīfaí?

Ko e ngaahi veesi 2 Nīfai 4:16–35 ʻoku faʻa taku ko e saame ʻa Nīfaí. Ko e saame “ko ha foʻi maau pe himi naʻe ueʻi fakalaumālie” (Fakahinohino ki he Ngaahi Folofolá, “Saame,” scriptures.ChurchofJesusChrist.org). Naʻe tohi ʻe Nīfai ʻi he ngaahi veesi ko ʻení kau ki he niʻihi ʻo ʻene ngaahi ongo loloto tahá. Naʻá ne vahevahe hono ngaahi faingataʻá mo e founga naʻá ne tali ʻaki e ʻahiʻahí mo e loto-foʻí. ʻI hoʻo ako e ngaahi veesi ko ʻení, fekumi ki ha ueʻi fakalaumālie ʻi he Laumālie Māʻoniʻoní ke ke ʻiloʻi e meʻa te ke lava ʻo fai ʻi he ngaahi faingataʻa pau ʻokú ke fehangahangai mo iá.

Mahalo te ke manatuʻi ha sitepu ʻe fā ke tokoni atu ke ke fakatatau ʻa e folofolá ki hoʻo moʻuí:

1. Kumi ha ngaahi fakamatala fakaikiiki mahuʻinga.

2. Fai ha ngaahi fakafehoanaki ki hoʻo moʻuí.

3. ʻIloʻi ha ngaahi lēsoni mahuʻinga.

4. Fakapapauʻi hono fakaʻaongaʻi fakatāutahá.

ʻOange ki he kau akó ha tatau ʻo e laʻipepa tufá ke fakafonu fakafoʻituitui. Ko e fili ʻe tahá ke fakakakato fakakalasi ʻa e ʻuluaki ʻotu ʻe uá pea vahevahe leva ʻa e ʻotu ʻe tolu fakaʻosí ʻi he ngaahi kulupú pea ʻai ke lipooti ʻe he kulupu takitaha ʻa e meʻa naʻa nau akó.

ʻE lava ke fakaʻaiʻai e kau akó ke nau hiki e ngaahi fakakaukau mo e ngaahi ongo fakataautaha fekauʻaki mo e ngaahi veesi ko ʻení ʻi heʻenau folofolá.

© 2023 by Intellectual Reserve, Inc. All rights reserved. 2 Nīfai 4:16–35. Fakakaukau ke ʻeke ange ha niʻihi ʻo e ngaahi fehuʻi ko ʻení.

ʻE lava ʻe ha niʻihi ʻo e ngaahi fakamatala ʻi he konga “Fakamatala Fakamahinó mo e Puipuituʻá” ʻo fakatupulekina ʻa e fealēleaʻakí.

Saame ʻa Nifaí mo Au (2 Nīfai 4:16–35)

Tohi ʻa Molomoná – Tohi Lēsoni ʻa e Faiakó (2024)—“2 Nīfai 4: Saame ʻa Nīfaí”

	Aʻusia ʻa Nifaí	Ko ʻEku Aʻusiá
2 Nīfai 4:16	Aʻusia ʻa Nifaí Naʻe ongoʻi fēfē nai ʻa Nīfai?	Ko ʻEku Aʻusiá Ko e fē nai ha taimi naʻa ku maʻu ai ʻa e ngaahi ongo tatau?
2 Nīfai 4:17–19	Aʻusia ʻa Nifaí Naʻe ongoʻi fēfē nai ʻa Nīfai?	Ko ʻEku Aʻusiá Ko e fē nai ha taimi naʻá ku maʻu ai ha ngaahi ongo tatau?
2 Nīfai 4:20–25	Aʻusia ʻa Nifaí Ko e hā ha ngaahi aʻusia mo e ʻOtuá naʻe tokoniʻi ai ʻa Nīfai ke ne tali faivelenga hono ngaahi ʻahiʻahí mo e ongoʻi loto-foʻí?	Ko ʻEku Aʻusiá Ko e hā ha niʻihi ʻo e ngaahi aʻusia fakalaumālie te u lava ʻo manatuʻi ʻi he taimi ʻoku ʻahiʻahiʻi ai aú pe te u loto-foʻi aí?
2 Nīfai 4:26–29	Aʻusia ʻa Nifaí Ko e hā e faʻahinga fakakaukau naʻá ne tokoniʻi ʻa Nīfai ke mālohi ʻi he taimi naʻá ne ongoʻi ai hono ʻahiʻahiʻí pe fakaloto-foʻí?	Ko ʻEku Aʻusiá Ko e hā ha faʻahinga fakakaukau te ne lava ʻo tokoniʻi au ke u mālohi ʻi he taimi ʻoku ʻahiʻahiʻi pe fakaloto-foʻi kiate aú?
2 Nīfai 4:30–35	Aʻusia ʻa Nifaí Ko e hā e meʻa ʻokú ne langaki ʻeku ongó mei he lotu ʻa Nīfaí?	Ko ʻEku Aʻusiá Te u fakaʻaongaʻi fēfē nai ʻa e sīpinga ʻa Nīfaí ki heʻeku ngaahi lotú?

• Ko e hā e ngaahi veesi pe ngaahi kupuʻi lea ʻi he 2 Nīfai 4 ʻoku makehe ange kiate koé? Ko e hā hono ʻuhingá?

• Ko e hā e meʻa naʻá ke ako fekauʻaki mo e Fakamoʻuí mei he 2 Nīfai 4?

• Naʻe tākiekina fēfē nai ʻe hono fakatatau e ngaahi folofolá ki hoʻo moʻuí ʻa hoʻo ako ʻa e 2 Nifai 4?

• Ko e hā ha ngaahi tefitoʻi moʻoni naʻá ke ʻiloʻi?

  Tokoniʻi e kau akó ke nau ʻiloʻi ha ngaahi tefitoʻi moʻoni kehekehe, ko ha konga ia ʻo e fealēleaʻakí. Hangē ko ʻení:

  • ʻE lava ke tokoniʻi au ʻe he falala ki he ʻEikí mo manatuʻi e ngaahi aʻusia fakalaumālie ʻo e kuohilí ke u lava ʻo tali faivelenga ki he ʻahiʻahí mo e fakaloto-foʻí.

  • Kapau te u lotu moʻoni ki he ʻOtuá, te u lava ʻo maʻu ʻEne tokoní ʻi he taimi ʻoku ʻahiʻahiʻi mo fakaloto-foʻi ai kiate aú.

• ʻOkú ke pehē ʻe lava fēfē nai ʻe he ngaahi tefitoʻi moʻoni ko ʻení ʻo tokoniʻi koe ke ke tafoki ki he ʻEikí ʻi he taimi ʻoku ʻahiʻahiʻi pe te ke ongoʻi loto-foʻi aí?

Ko ʻeku palaní ke ikunaʻi ʻa e ʻahiʻahí mo e fakaloto-foʻí

 

Ke tokoni ke ʻilo ʻe he kau akó ʻa e founga kuo tafoki ai ha niʻihi kehe ki he ʻEikí ʻi he ngaahi taimi ʻo e ʻahiʻahí, fakakaukau ke huluʻi ha taha ʻo e ngaahi vitiō ʻoku fokotuʻu atu ʻi he konga ki he “Ngaahi ʻEkitivitī Ako ʻOku Tānaki Atú.”

Fakakaukau ke fakaafeʻi e kau akó ke nau talanoa fekauʻaki mo ha taimi ne nau tafoki ai ki he ʻEikí ʻi ha taimi faingataʻa.

Muimui ʻi he sīpinga ʻa Nīfaí pea ke hiki ha saame pē ʻaʻau. ʻE lava ke tokoni ha niʻihi ʻo e ngaahi fehuʻi ko ʻení:

• Ko e hā ha tefitoʻi moʻoni, akonaki, pe (ngaahi) veesi mei he 2 Nifai 4 te ke ala fakaʻaongaʻi ki hoʻo moʻuí?

• Te ke lava fēfē nai ʻo fakaʻaongaʻi ia ki hoʻo moʻuí?

• ʻOkú ke pehē ʻe tokoni fēfē nai hoʻo fakahoko ʻení ke ke tafoki ai ki he Fakamoʻuí?

• ʻI he taimi ʻoku faingataʻa ai ʻa e moʻuí, te ke lava fēfē nai ʻo tali ʻaki e tui ki he Fakamoʻuí?

Fakaafeʻi ʻe kau ako ʻoku nau loto fiemālie ke vahevahe ʻenau sāmé mo e kalasí. Fakakaukau ke vahevahe hoʻo fakamoʻoni kau ki he Fakamoʻuí. ʻE ala tokoni ke fakamanatu ki he kau akó te nau fehangahangai mo ha ngaahi fakafeʻātungia pea ʻe fie maʻu ke nau toutou feinga ke ikunaʻi kinautolu. Ka neongo ia, te nau lava ʻo maʻu ʻa e mālohi ke ikunaʻi pe kātakiʻi ʻa e meʻa kotoa pē ʻo fakafou ʻi he ʻaloʻofa ʻa Sīsū Kalaisí.

Fakamatala Fakamahinó mo e Puipuituʻá

ʻE lava fēfē nai ʻe he manatu melie ki he ngaahi aʻusia fakalaumālie ʻo e kuohilí ʻo tokoniʻi aú?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Neil L. Andersen

ʻOku hanga ʻe he ʻOtuá, fakataha mo e fakahinohino fakanonga ʻoku tau maʻu he taimi ki he taimi mei he Laumālie Māʻoniʻoní, ʻo fakapapauʻi mālohi mo fakataautaha mai ʻokú Ne ʻafioʻi mo ʻofaʻi kitautolu pea ʻokú Ne tāpuekina pau mo tauʻatāina kitautolu. Pea ʻi he ngaahi taimi ʻo ʻetau faingataʻaʻiá, ʻoku fakamanatu mai ʻe he Fakamoʻuí ʻa e ngaahi aʻusiá ni.

Te ke lava ʻo fakakaukau ki hoʻo ngaahi manatu melie fakalaumālié ʻi he foungá ni. ʻOku tau fononga atu ʻi he moʻuí ʻo lotu maʻu ai pē, mo loto-fakapapau ke tauhi ʻetau ngaahi fuakavá, pea mo e meʻafoaki ʻo e Laumālie Māʻoniʻoní. ʻI he taimi ʻoku fakafeʻātungiaʻi ai hotau hala fonongá ʻe he faingataʻa fakatāutahá, veiveiuá, pe loto-foʻí, pe taimi ʻoku fakatupu ai ʻe he ngaahi tūkunga ʻo e māmaní ʻoku ʻikai ke tau pule ki aí, ke tau fifili ki he kahaʻú, ʻoku hoko e ngaahi manatu melie fakalaumālie fakangalongataʻa ʻi heʻetau moʻuí ko ha ngaahi maka ulo ʻokú ne fakamaama e halá, ʻo fakapapauʻi mai ʻoku ʻafioʻi mo ʻofaʻi kitautolu ʻe he ʻOtuá, pea kuó Ne tuku mai Hono ʻAlo ko Sīsū Kalaisí ke tokoniʻi kitautolu ke tau foki ki ʻapi. (Neil L. Andersen, “Ngaahi Manatu Melie Fakalaumālie Fakangalongataʻá ,”Ensign pe Liahona, Mē 2020, 19, 21)

Naʻe akoʻi ʻe ʻEletā Lōnolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā Ronald A. Rasband

ʻOku ou poupouʻi kimoutolu he taimí ni ke mou fakamanatuʻi, tautautefito ki he taimi ʻo e palopalemá, ha taimi ne [mou] ongoʻi ai e Laumālié mo mālohi ai hoʻo fakamoʻoní; manatuʻi ʻa e fakavaʻe fakalaumālie kuó ke langa aí. (Ronald A. Rasband, “Telia Naʻa Ngalo ʻIate Koe,”Ensign pe Liahona, Nōvema 2016, 114)

Te u lava fēfē nai ʻo ikunaʻi ʻa e ʻahiʻahí mo e fakaloto-foʻí?

Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Jeffrey R. Holland

ʻI he taimi ʻoku tau fehangahangai ai mo ha … ngaahi ʻahiʻahi [ʻi hotau taimí], kuo pau ke tau lea, ʻo hangē ko ia ne fai ʻe he talavou ko Nīfaí ʻi hono ʻahiʻahiʻí, “[He ʻikai te u] toe tuku ki he fili ʻo hoku laumālié ke ne ʻahiʻahiʻi au” [2 Nifai 4:28]. ʻE lava ke taʻofi ʻa e tokotaha angakoví. Kapau te tau fie maʻu lahi mo moʻoni ke fakahoko ia, ʻoku lava pea ʻe lava ke valokiʻi [ʻa e fili ko iá] ʻe he mālohi ʻo e huhuʻi ʻa e ʻEiki ko Sīsū Kalaisí. (Jeffrey R. Holland, “(ʻIkai ha Feituʻu moʻó e Fili ʻo Hoku Laumālié),” Ensign pe Liahona, Mē 2010, 46)

Naʻe akoʻi ʻe ʻEletā ʻAlani D. Haini ʻo e Kau Fitungofulú ʻo pehē:

ʻEletā Allen D. Haynie

Kāinga, kapau ʻokú ke ongoʻi loto-foʻi pe faʻa fakakaukau pe ʻe lava fēfē nai ke ke hao mei he luo fakalaumālie ʻa ia kuó ke kelí, kātaki ʻo manatuʻi e taha ʻoku tuʻu ʻi “hotau “vahaʻa mo e fakamaau totonú,” ʻokú Ne “fonu ʻi he ʻofa mamahi ki he fānau ʻa e tangatá”, pea kuó Ne toʻo kiate Ia ʻetau ngaahi angahalá mo e ngaahi maumau fonó, ʻo Ne “totongi ʻa e ngaahi fiemaʻu ʻa e fakamaau totonú” [Mōsaia 15:9]. ʻI hono fakalea ʻe tahá, hangē ko Nīfaí ʻi he taimi ʻo e loto-veiveiuá, manatuʻi “ʻa ia ʻoku [mou] falala ki aí” [2 Nīfai 4:19], ko Sīsū Kalaisi, pea fakatomala leva mo toe aʻusia ha “ʻamanaki ʻoku mālohi haohaoa” [2 Nīfai 31:20]. (Allen D. Haynie, “Ko e Manatu Kiate Ia ʻOku Tau Falalaʻiá,” Ensign pe Liahona, Nov. 2015, 123)

Ngaahi ʻEkitivitī Fakalahi ki he Akó

Ngaahi Vitioó

 

 

  Kapau te ke fakaʻaongaʻi ʻa e vitiō ko ʻení, fakakaukau ke fakaʻaliʻali ʻa e fakaleá maʻá e kau akó.

2 Nīfai 4:17, 19. “Pea neongo”

Taki e tokanga ʻa e kau akó ki he foʻi lea “ka neongo ia” ʻi he 2 Nīfai 4:17, 19. Fakatokangaʻi ʻa e liliu ʻi he ngaahi ongo naʻe fakahaaʻi fakahangatonu ʻe Nīfai kimuʻá mo e hili e foʻi leá ni. Aleaʻi ʻa e meʻa ʻoku lava ke ako ʻe he kau akó mei he ngaahi aʻusia mo e sīpinga ʻo e moʻui ʻa Nīfaí.

2 Nīfai 4:17. “ʻOiauē ko e tangata loto-mamahi ko au”

Mahalo ʻe ʻaonga ki he kau akó hono fakafehoanaki ʻo Nīfai mo e ʻAposetolo ko Paulá. Vakai, 2 Nīfai 4:17–19; Loma 7:22–25; 2 Kolinitō 12:7–10. Aleaʻi ʻa e founga ʻe lava ai ʻe Sīsū Kalaisi ʻo tokoniʻi kitautolu kotoa ke tau ikunaʻi hotau ngaahi vaivaiʻangá. Mahalo ʻe tokoni ke fakamahinoʻi ange ko ʻetau ofi ange ko ia ki he Tamai Hēvaní, ko e lahi ange ia ʻetau ongoʻingofua ʻa e mavahe mei he māʻoniʻoní (vakai, Bruce C. Hafen, “The Atonement: All for All,” Ensign pe Liahona, May 2004, 97–99).

2 Nīfai 4:15. “He ʻoku fiefia ʻa hoku laumālié ʻi he ngaahi folofolá”

Fakaafeʻi e kau akó ke vahevahe e ngaahi potufolofola ʻoku nau fiefia aí. ʻE lava ke hiki ʻe he kau akó ʻa e ngaahi fakamoʻoni fakafolofolá ʻi he palakipoé pea aleaʻi ʻa e ʻuhinga ʻoku mahuʻingamālie ai kiate kinautolu ʻa e ngaahi potufolofola ko iá. ʻIkai ngata aí, ka ʻe lava ke fakaafeʻi e kau akó ke vahevahe ha veesi kuo fili mo e fāmilí pe ngaahi kaungāmeʻá ʻi ha efiafi ʻi ʻapi, ʻi ha pōpoaki text, pe ʻi he mītia fakasōsialé.

2 Nīfai 4:15–16. “Ngaahi meʻa ʻa hoku laumālié”

Fakakaukau ke fakaafeʻi e kau akó ke nau fakakaukau fakalelei pea tohi e ngaahi meʻa fekauʻaki mo honau laumālié. Ke kamata ʻa e ʻekitivitī ko ʻení, ʻe lava ke ke vahevahe ʻa e lea ko ʻeni ʻa ʻEletā Ronald A. Rasband ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa ia naʻá ne fakalea ai ʻa e lau ʻa Nīfai:

“ʻVakai, ʻoku fiefia hoku laumālié ʻi he ngaahi meʻa ʻa e ʻEikí; pea ʻoku fakalaulauloto maʻu pē ʻa hoku lotó ki he ngaahi meʻa kuó u mamata mo fanongo ki aí“ [2 Nīfai 4:16; naʻe tanaki atu hono fakamamafaʻí].

“ʻOku fokotuʻu mai ʻe he ngaahi lea ʻa Nīfaí ha ngaahi fehuʻi ʻKo e hā e ngaahi meʻa ʻokú ke fakalaulauloto ki aí?’ ʻKo e hā e ngaahi meʻa ʻoku mahuʻinga moʻoni kiate koé?’ ʻKo e hā e ngaahi meʻa ʻo ho laumālié?’” (“Ko e Ngaahi Meʻa ʻo Hoku Laumālié,” Liahona, Nōvema 2021, 39).

Saame ʻa Nīfaí ʻi he hivá

Kuo ʻosi fokotuʻutuʻu e ngaahi lea ʻo e saame ʻa Nīfaí ki he mūsiká mo hivaʻi ʻi he konifelenisi lahí. Fakakaukau ke tā ʻa e foʻi hivá ʻi he kalasí pea fakaafeʻi e kau akó ke nau fakafehoanaki e ngaahi lea ʻo e himí mo e ngaahi ongo mo e ngaahi fakakaukau ʻoku fakahaaʻi ʻi he 2 Nīfai 4:16–35. Ke fakahoko iá, mamata ʻi he fakataha lakanga fakataulaʻeiki ʻo e konifelenisi lahi ʻo ʻEpeleli 2007 mei he taimi 1:46:17 ki he 1:51:18.

Nephi’s Psalm and me handout