Te ke fehangahangai mo ha ngaahi fili ʻi he kotoa hoʻo moʻuí. Ko e niʻihi ʻo e ngaahi fili ʻokú ke faí ʻe tuʻuloa, pea aʻu he taimi ʻe niʻihi ʻo taʻengata hono ngaahi nunuʻá. Naʻe akoʻi ʻe Līhai, koeʻuhí ko Sīsū Kalaisi, ko e tokotaha kotoa pē ʻoku “tauʻatāina ke fili ʻa e tauʻatāiná mo e moʻui taʻengatá” pe “pōpulá mo e maté” (2 Nīfai 2:27). ʻE lava ke tokoni e lēsoni ko ʻení ke ke fakaʻaongaʻi hoʻo tauʻatāina ke fili ke muimui kia Sīsū Kalaisí.
ʻIloʻi e tūkunga ʻo e tokotaha ako takitaha. ʻOku maʻu ʻe he tokotaha ako kotoa pē ha ngaahi aʻusia mo ha ngaahi vā fetuʻutaki kehekehe ʻoku nau tākiekina e anga ʻo ʻenau fakakaukaú mo e ongó fekauʻaki mo e ngaahi moʻoni ʻo e ongoongoleleí. Feinga ke mahino kiate koe ʻa e tokotaha ako takitaha mo honau puipuituʻá. ʻI hoʻo teuteu mo akoʻi e ngaahi lēsoní, fakakaukau ki he ngaahi meʻa kehekehe ʻe ala uesia ai e tali ʻa e kau akó.
Teuteu ʻa e tokotaha akó: Fakaafeʻi e kau akó ke lau e 2 Nīfai 2:27 pea fakakaukau ʻi he faʻa lotu pe ko e fē ngaahi fili ʻi heʻenau moʻuí ʻoku nau tokoniʻi kinautolu ke nau ofi ange ai ki he Fakamoʻuí mo maʻu e ngaahi tāpuaki ʻokú Ne foaki maí. Fakaafeʻi foki kinautolu ke nau fakakaukau ki ha ngaahi fili te nau ala fie liliu.
Ngaahi ʻEkitivitī Ako ʻOku Ala Fakahokó
Ko hono fakahoko ha ngaahi filí
Hiki e lisi ko ʻení ʻi he palakipoé. Fakaafeʻi e kau akó ke nau aleaʻi tauhoa, ʻi ha fanga kiʻi kulupu iiki, pe fakakalasi.
Fakakaukau ki he ʻuhinga ʻe lava ke fili ai ha kakai kehekehe ke fakahoko pe ʻikai fakahoko ʻa e ngaahi meʻá ni:
lotu maʻu pē
maʻu-lotu
fakatomala
talangofua ki he Lea ʻo e Potó
fakamolemoleʻi e niʻihi kehé
Fakakaukauʻi hoʻo ngaahi ʻuhinga ki he fili ke fakahoko pe ʻikai fakahoko e ngaahi meʻa ko ʻení. Fakakaukau foki ki ha ngaahi fekau kehe ʻoku kau ʻi he ongoongolelei ʻo Sīsū Kalaisí. ʻI hoʻo ako e lēsoni ko ʻení, fekumi ki ha tokoni mei he Laumālie Māʻoniʻoní ke mahino kiate koe ʻa e founga ʻokú ke fakaʻaongaʻi ai hoʻo tauʻatāina ke filí ʻi he ngaahi founga ʻoku finangalo ki ai ʻa e ʻEikí mo e founga te ke fie fakalakalaka aí.
Tauʻatāina ke filí
ʻI he ofi ke ngata e moʻui ʻa e palōfita ko Līhaí, naʻá ne akoʻi hono fāmilí fekauʻaki mo e ngaahi konga mahuʻinga ʻo e palani ʻo e fakamoʻui ʻa e Tamai Hēvaní. Naʻe kau ʻi Heʻene ngaahi akonakí ʻa e Hingá, Fakalelei ʻa e Fakamoʻuí, mo e tauʻatāina ke filí.
Lau ʻa e 2 Nīfai 2:26, ʻo kumi ki he meʻa naʻe akoʻi ʻe Līhai kau ki he konga ʻe tolu ko ʻení.
Ko e hā e meʻa naʻá ke akó?
ʻI he vahevahe ʻa e kau akó, mahalo ʻe ʻaonga ke fakamahinoʻi ange ʻa e kupuʻi lea “kuo huhuʻi ʻa kinautolu mei he hingá” pea fehuʻi ange pe ko e hā ʻoku nau manatuʻi fekauʻaki mo e Hingá.
ʻOku fakaʻatā fēfē nai ʻe he Hingá mo e Fakalelei ʻa e Fakamoʻuí ke tau lava ʻo maʻu ʻa e tauʻatāina ke filí?
Lau ʻa e 2 Nīfai 2:27. Tā ha fakatātā faingofua ke fakahaaʻi e meʻa ʻoku akoʻi ʻe he vēsí, pe fakamatalaʻi fakanounou ia ʻi hoʻo lea pē ʻaʻau.
Fakaafeʻi e kau akó ke vahevahe e meʻa ne nau taá pe ko e founga ne nau fakamatalaʻi fakanounou ʻaki e vēsí. ʻE lava ke ngāue tauhoa e kau akó pe ʻi ha fanga kiʻi kulupu iiki, pe ko ha kalasi.
Ko e2 Nīfai 2:27 ko ha potufolofola fakataukei fakatokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
Fakakaukau ke tā ha fakatātā ʻi he palakipoé ʻo hangē ko ia ʻoku hā atu ʻi laló, pe fakaʻaongaʻi ha tatau naʻe faʻu ʻe he kau akó. Vakai ki he fakatātaá ʻi hono tali ʻe he kau akó e ngaahi fehuʻi ko ʻení. Te ke lava ʻo fakaʻaliʻali fakaʻangataha ʻa e fakatātā kakató, pe te ke ʻuluaki fakaʻaliʻali ʻa e konga vaeua ki ʻolungá pea toki tānaki atu ʻa e konga vaeua ki laló ʻi he taimi ʻoku aleaʻi ai ʻa e fehuʻi hono tolú mo e faá.
Ko e founga ko ʻení ko ha founga ia ʻe taha ke fakahoko ai e veesi ko ʻení.
Ko e founga ʻe taha te ke lava ʻo fakamatalaʻi fakanounou ai e akonaki ʻa e Fakamoʻuí ʻi he veesi 27 ko ʻetau tauʻatāina ke fili ʻa e tauʻatāiná mo e moʻui taʻengatá ʻo fakafou ʻia Sīsū Kalaisi pe fili ʻa e pōpulá mo e maté.
Fakatokangaʻi ange ʻi ʻolunga ʻi he puha ʻoku ui ko e “Tauʻatāina ke Filí,” ʻoku kamata ke vāvāofi ʻa e ngaahi foʻi taó. Mahalo ʻe ongoʻi ʻe ha kakai ʻe niʻihi ʻi heʻetau fakaʻaongaʻi ʻetau tauʻatāina ke filí ke muimui ʻia Sīsū Kalaisí, ʻoku fakangatangata ai ʻetau ngaahi filí pea toʻo ʻetau tauʻatāiná.
Ko e hā ʻe ongoʻi ai ʻe ha kakai ʻe niʻihi ʻoku fakangatangata ʻe he muimui kia Sīsū Kalaisí ʻetau tauʻatāiná?
Fakatokangaʻi ange ʻa e founga ʻoku fakahaaʻi ai ʻe he fakatātā ko ʻení ko e taimi ʻoku tau muimui ai ʻia Sīsū Kalaisí, ʻoku ʻasi lahi ange ʻa e ngaahi ngahaú. Ko hono moʻoní, ʻoku ʻomi ʻe he muimui kia Sīsū Kalaisí ha ngaahi fili lahi ange mo ha tauʻatāina lahi ange.
Ko e hā ha ngaahi founga ʻoku iku ai ʻa e muimui ʻia Sīsū Kalaisí ki he tauʻatāiná?
Fakatokangaʻi ange ʻi he tafaʻaki ʻe taha ʻo e fakatātaá, ʻoku kamata vāmamaʻo ʻaupito e ngaahi foʻi taó pea nau toki vāvāofi angé.
Ko e hā nai ʻe ongoʻi ai ʻe ha kakai ʻe niʻihi ʻoku fakaiku ʻa e talangataʻa kia Sīsū Kalaisí ki he tauʻatāiná?
ʻOku fakaiku fēfē nai ʻa e fili ke talangataʻa kia Sīsū Kalaisí ki he nofo pōpulá?
Naʻe fakamatalaʻi ʻe ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ʻoku fakaiku ai ʻa e talangataʻa ki he ʻEikí ke siʻisiʻi ange ʻa e tauʻatāiná:
ʻĪmisi
ʻEletā D. Todd Christofferson
ʻOku … poupouʻi ʻe Sētane ʻa e ʻulungaanga mo e ngaahi fili ʻoku nau fakangatangata ʻetau tauʻatāina ke filí ʻaki hono fetongi e ivi tākiekina ʻo e Laumālie Māʻoniʻoní ʻaki ʻene fakaaoaó (vakai, T&F 29:40;93:38–39). Ko e fakavaivai ki he ngaahi ʻahiʻahi [ʻa Sētané] ʻoku iku ke siʻisiʻi ange ai ʻa e ngaahi fili ke tau fili mei aí kae ʻoua kuo aʻu ki ha tuʻunga ʻoku ʻikai toe ʻi ai haʻatau fili, pea ko e maʻunimaá ʻoku mole ai hotau mālohí pea ʻikai ke toe lava ʻo taʻofi. (D. Todd Christofferson, “Moral Agency,” Ensign, June 2009, 49)
Fakakaukau ke fakaafeʻi e kau akó ke nau vahevahe ʻa e founga ʻoku fakatātaaʻi ai ʻe he talanoa ko ʻení ʻa e tefitoʻi moʻoni naʻa nau maʻú.
Lau ʻa e 2 Nīfai 2:28–30, pea fakaʻaongaʻi ha ngaahi miniti siʻi ke fakalaulauloto ki he founga ʻokú ke fili ai ke fakaʻaongaʻi hoʻo tauʻatāina ke filí.
Fakalaulauloto ki hoʻo tali ki he ngaahi fehuʻi ko ‘ení:
ʻOku tataki fēfē nai koe ʻe he ngaahi fili ʻokú ke fai ke muimui ʻia Sīsū Kalaisí ki he tauʻatāiná mo e moʻui taʻengatá? Kuo tāpuekina fēfē nai koe ʻe he ʻEikí ʻi hoʻo ngaahi feingá?
ʻE tataki fēfē nai koe ʻe ha niʻihi ʻo hoʻo ngaahi filí ki he nofo pōpulá? Ko e hā ʻe lava ke hoko ko hoʻo ʻuluaki sitepu ki he liliú? Ko e hā ha founga naʻe tokoniʻi ai koe ʻe he ʻEikí?
Fakapapauʻi ki he kau akó ʻe lava ke ikunaʻi ha faʻahinga fili hala ne nau fakahoko ʻi he tui kia Sīsū Kalaisí mo e fakatomalá. Fakamoʻoni ki he Fakamoʻuí, ʻEne Fakaleleí, pea mo ʻEne malava ke fakamālohia kitautolu ʻi heʻetau fai ha ngaahi fili ʻoku fakatau ki he fiefiá mo e moʻui taʻengatá. Kapau ʻe ueʻi fakalaumālie koe, ʻe ala tokoni ke fakamanatu ki he kau akó ʻoku maʻu ʻe heʻenau pīsopé pe palesiteni fakakoló e ngaahi kī ʻo e lakanga fakataulaʻeikí ke tokoniʻi ha taha ke foki ki he hala ʻo e fuakavá.
