1 Նեփի 17–18

«Ես նայում էի իմ Աստծուն»

Երիտասարդ աղջիկ, որը ծաղրանքի էր ենթարկվել

Մեր բոլորի կյանքում փորձություններ և տառապանքներ են լինելու: Դրանցից մի քանիսը կգան որպես մեր սեփական սխալների հետևանքներ կամ պարզապես կլինեն այն պատճառով, որ ապրում ենք մեղսավոր ու անկատար աշխարհում: Ինչպես Նեփին դեպի ավետյաց երկիր կատարած իր ճամփորդության ընթացքում զգաց, որ փորձությունների և տառապանքների մի մասն այն պատճառով են, որ մեզ շրջապատողները չարաշահում են իրենց կամքի ազատությունը: Անկախ մեր տառապանքի աղբյուրից՝ Հիսուս Քրիստոսն ուժ և բժշկում է առաջարկում նրանց, ովքեր Իրեն են փնտրում: Այս դասը կօգնի ձեզ սեր ու երախտագիտություն զգալ Տիրոջ հանդեպ՝ անկախ հանգամանքներից, որոնցում գտնվում եք:

Հասկանալ ուսանողների ուսումնական կարիքները Փորձեք հասկանալ ձեր դասարանի անդամների ուսումնական կարիքները: Դա կօգնի այնպիսի ուսումնական գործընթաց ապահովել, որը կհամապատասխանի նրանց կարիքներին և թույլ կտա սովորել տարբեր եղանակներով: Օրինակ՝ ուսուցողական նյութերի օգտագործմամբ, խմբային աշխատանքով կամ անհատական ուսուցմամբ: Ուշադիր եղեք ուսումնառության հետ կապված առանձնահատուկ դժվարություններ ունեցող ուսանողների նկատմամբ:

Ուսանողի նախապատրաստում. ուսանողներին առաջարկեք պատրաստվել և կիսվել իրենց ունեցած փորձառություններով, որոնք նրանց օգնել են ավելի մեծ սեր ու երախտագիտություն զգալ Աստծո հանդեպ:

Հնարավոր ուսումնական վարժություններ

Ինչպե՞ս կարձագանքեիք

Երբևէ նկատե՞լ եք, թե մարդիկ ինչ տարբեր ձևերով են արձագանքում նմանատիպ իրավիճակներին: Կարդացեք ստորև ներկայացվող սցենարները և մտածեք, թե սցենարների հերոսներն ինչ տարբեր եղանակներով կարող էին արձագանքել:

Օգտագործեք ստորև ներկայացված սցենարները կամ այլ սցենարներ, որոնք կօգնեն ուսանողներին քննարկել դժվարություններին կամ փորձություններին արձագանքելու տարբեր եղանակները:

Գիլերմոն այցելել էր ակնաբույժի, քանի որ տեսողությունը մշուշվել էր: Բժիշկը նրան ասել էր, որ հազվադեպ հանդիպող հիվանդություն ունի, որի պատճառով նա մեկ տարվա ընթացքում ամբողջովին կկուրանա:

Լեյլայի եղբայրը բարկացավ և հրեց նրան, ինչի արդյունքում Լեյլան վնասեց ոտքի կոճը: Նա խաղալու էր իր թիմի առաջնության խաղում, բայց այժմ վազել չի կարողանում:

• Այս սցենարների մարդիկ ի՞նչ տարբեր եղանակներով կարող էին արձագանքել իրենց դժվար իրավիճակին:

• Նշեք մի քանի պատճառ, թե ինչու են մարդիկ, ըստ ձեզ, դրական կամ բացասական արձագանքում իրենց փորձություններին:

Նեփիի տեսանկյունը

Մորմոնի Գիրքն ուսումնասիրելիս գուցե նկատած լինեք, թե ինչ տարբերություն կար Նեփիի և Լամանի ու Լեմուելի գործողությունների և մոտեցման միջև, թեև նրանք նույն չարչարանքներից շատերի միջով էին անցնում: Ստորև ներկայացվող հատվածներն ուսումնասիրելիս ուշադրություն դարձրեք այդ տարբերությանը:

Ստորև ներկայացվող ուսումնական վարժության համար ուսանողները կարող են որևէ դասընկերոջ հետ կարդալ առաջին համեմատությունը, ապա անցնել այլ հատվածը քննարկող խումբ: Նույն կերպ, 1 Նեփի 18 գլուխն ուսումնասիրելիս ուսանողները կարող են զույգերով, փոքր խմբերով կամ դասարանով քննարկել ստորև ներկայացվող հարցերը:

Ճամփորդություն անապատով.1 Նեփի 17.1–3 հատվածի Նեփիի պատմությունը համեմատեք 1 Նեփի 17.20–22-ում ներկայացված Լամանի և Լեմուելի պատմության հետ:

Նավի կառուցումը.1 Նեփի 17.8–9, 15 հատվածի Նեփիի արձագանքը համեմատեք 1 Նեփի 17.17–18 հատվածում ներկայացված Լամանի և Լեմուելի արձագանքի հետ:

Որոշեք, թե ինչպես կարող եք ուսանողներին լավագույնս ներգրավել կարդացածը քննարկելու մեջ: Հետևյալ հարցերը կարող են օգնել այդ քննարկմանը:

• Ի՞նչ մտքեր կամ տպավորություններ եք ունենում՝ համեմատելով Նեփիի և Լամանի ու Լեմուելի խոսքերն ու գործողությունները:

• Ի՞նչ նկատեցիք Աստծո հետ ունեցած այս անձանցից յուրաքանչյուրի հարաբերության մեջ:

Բոլորիս կյանքում եղել են ժամանակներ, երբ դժվար իրավիճակներին լավ կամ ոչ այդքան լավ ենք արձագանքել: Մտածեք, թե դուք ինչպես եք վարվում հիմնականում՝ ավելի շատ Նեփիի, թե՞ ավելի շատ Լամանի ու Լեմուելի նման, երբ դժվար իրավիճակներում եք հայտնվում: Ուսումնասիրությունը շարունակելիս փնտրեք ուսմունքներ, որոնք կարող են օգնել ձեզ դրականորեն արձագանքել դժվարությունների կամ փորձությունների բախվելիս:

Լեքին և նրա ընտանիքը ծովով ուղևորվում են ավետյաց երկիր

Երբ Նեփին և նրա եղբայրներն ավարտեցին նավի կառուցումը, Տերը Լեքիին և նրա ընտանիքին պատվիրեց ծովով ճանապարհ ընկնել դեպի ավետյաց երկիր (տե՛ս 1 Նեփի 18.1–8):

Կարդացեք 1 Նեփի 18.9–21 հատվածը և փնտրեք, թե որոնք են այն դժվարությունները, որոնց նրանք հանդիպեցին այս ճանապարհորդության ընթացքում: Ուսումնասիրելիս շարունակեք համեմատել Նեփիի և Լամանի ու Լեմուելի գործողություններն ու մոտեցումը: Կարող եք նաև դիտել «Լեքիի ընտանիքը ծովով ճանապարհ է ընկնում դեպի ավետյաց երկիր» տեսանյութը 3:13-11:31, որը հասանելի է ChurchofJesusChrist.org կայքում:

• Այս պատմության մեջ ի՞նչն է տպավորում ձեզ:

• Նկատեք, թե ինչ էր հիշատակել Նեփին հատված 16-ում: Եթե հնարավորություն ունենայիք նրան մի քանի հարց տալ այս հատվածում նկարագրված իր գործողությունների մասին, ի՞նչ կհարցնեիք:

• Ըստ ձեզ՝ նա ինչպե՞ս կպատասխաներ ձեր հարցերին:

Տասներկու Առաքյալների Քվորումից երեց Դեյլ Գ. Ռենլանդը մի պատճառ է բերել, որի համար Նեփին կարողացավ արձագանքել այնպես, ինչպես արձագանքեց իր դժվարությունների ժամանակ:

Երեց Դեյլ Գ. Ռենլանդ

Քանի որ նրանք հեռու էին Փրկչից, Լամանն ու Լեմուելը տրտնջացին, դարձան կռվարար ու անհավատ: Նրանք մտածում էին, որ կյանքն անարդար է, և իրենք արժանի էին Աստծո շնորհին: Ի տարբերություն նրանց՝ Աստծուն մոտենալու շնորհիվ Նեփին պետք է հասկանար, որ կյանքն առավել անարդար էր գտնվելու Հիսուս Քրիստոսի հանդեպ: Լինելով բացարձակ անմեղ՝ Փրկիչը բոլորից շատ պետք է տառապեր:

Մտքով և սրտով որքան ավելի շատ ենք մոտենում Հիսուս Քրիստոսին, այնքան ավելի շատ ենք գնահատում Նրա անմեղ տառապանքները, այնքան ավելի շատ ենք երախտապարտ լինում շնորհի ու ներման համար և ավելի շատ ենք ցանկանում ապաշխարել ու դառնալ Նրա նման (Դեյլ Գ. Ռենլանդ, «Որպեսզի ես կարողանայի բոլոր մարդկանց ձգել դեպի ինձ», Ensign կամ Լիահոնա, մայիս 2016թ., 40):

• Ի՞նչ ճշմարտություն իմացաք երեց Ռենլանդի խոսքերից, որ կարող է օգնել ձեզ ձեր փորձություններում:

Կարող եք կիսվել ստորև ներկայացվող ճշմարտությամբ, եթե ուսանողներն այն ինքուրույն չգտնեն:

Բացահայտված ճշմարտություններից մեկը կարող է լինել այն, որ երբ մենք մոտ ենք Հիսուս Քրիստոսին, կարող եք նույնիսկ դժվար ժամանակներում սեր և երախտագիտություն զգալ Նրա հանդեպ:

• Ըստ ձեզ՝ ինչո՞ւ է ավելի հավանական, որ սեր և երախտագիտություն կզգանք Հիսուս Քրիստոսի հանդեպ, երբ ավելի մոտ լինենք Նրան:

Եթե ուսանողները կարողացան օգտվել նախորդ հարցին պատասխանելու օգնությունից, կարող եք լրացուցիչ հարցեր տալ, օրինակ՝ «Ի՞նչ է արել Տերը ձեզ համար, որի համար երախտապարտ եք նրան» կամ «Ե՞րբ եք հատկապես երախտապարտ եղել Փրկչին»:

Կարող եք ցուցադրել ստորև ներկայացվող հարցերը և առաջարկել ուսանողներին իրենց օրագրերում պատասխանել դրանցից մեկին կամ մի քանիսին: Ապա կամավորներին առաջարկեք կիսվել իրենց մտքերով:

• Ինչպե՞ս կարող եք հասկանալ, որ հնարավոր է՝ հեռացել եք Տիրոջից: Ի՞նչ կարող եք անել այդ հեռավորությունը կրճատելու համար:

• Ի՞նչն է օգնել ձեզ ավելի մոտենալ Հիսուս Քրիստոսին:

Ուսանողներին ժամանակ տվեք, որպեսզի խորհեն այն մասին, թե որքան մոտ են իրենց զգում Երկնային Հորը և Հիսուս Քրիստոսին և լուռ աղոթեն, ապա իրենց օրագրերում գրի առնեն այս դասի ընթացքում ունեցած բոլոր մտքերը կամ ստացած տպավորությունները: Կարող եք դա անել հետևյալ պարբերության օգնությամբ:

Բացատրական և պատմական տեղեկություններ

1 Նեփի 18.11, 17–19 Ինչո՞ւ Աստված թույլ տվեց, որ Լամանն ու Լեմուելը նման տառապանք կրեին:

Առաջին Նախագահությունից նախագահ Դալլին Հ. Օուքսն ուսուցանել է.

Նախագահ Դալլին Հ. Օուքս

Հազվադեպ երևույթ է, որ Աստված սահմանափակի Իր զավակներից որևէ մեկի կամքի ազատությունը, որպեսզի ի սփոփանք մեկի՝ միջամտի մյուսի գործերին: Բայց Նա թեթևացնում է մեր չարչարանքների բեռը և ուժեղացնում է մեզ, որպեսզի կրենք դրանք: … Նա չի կանխում բոլոր աղետները, բայց Նա պատասխանում է դրանք հեռացնելու … կամ դրանց հետևանքները մեղմելու մեր աղոթքներին: …

Մահկանացու բոլոր հակադրությունների միջով անցնելիս մենք ունենք Աստծո հավաստիացումը, որ նա «կնվիրագործի [մեր] չարչարանքները [մեր] օգտի համար» (2 Նեփի 2.2) (Դալլին Հ. Օուքս, «Հակադրություն բոլոր բաներում», Ensign կամ Լիահոնա, մայիս 2016թ., 117):

Ոչ մի դեպքում դա չպետք է մեկնաբանվի այնպես, թե Երկնային Հայրն անտարբեր է մեր տառապանքի հանդեպ, հատկապես երբ խոսքը բռնության մասին է:

Տերն ակնկալում է, որ մենք անենք հնարավոր ամեն բան, որպեսզի կանխենք բռնությունը և պաշտպանենք ու օգնենք զոհերին: Ոչ ոքից չի ակնկալվում հանդուրժել բռնությունը:

Բռնության մասին հաղորդումը երբեք չպետք է անտեսվի: Յուրաքանչյուր ոք պետք է կարեկցանքով և զգայունությամբ արձագանքի զոհերին և նրանց ընտանիքներին: Բռնության զոհ դարձածներին պետք է լսել և աջակցել: (Ավետարանական թեմաներ, «Բռնություն», topics.ChurchofJesusChrist.org)

Արդյո՞ք Աստծո հանդեպ հավատքը նշանակում է, որ կարող եմ խուսափել դժվար հանգամանքներից:

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Երեց Ջեֆրի Ռ. Հոլլանդ

Հավատալ՝ նշանակում է վստահել Աստծուն լավ և վատ ժամանակներում, եթե նույնիսկ դա որոշ տառապանք պարունակի, մինչև որ կտեսնենք մեզ համար Նրա բացահայտվող բազուկը: Դա կարող է դժվար լինել մեր ժամանակակից աշխարհում, երբ շատերը սկսել են հավատալ, որ կյանքում ամենամեծ հաջողությունը բոլոր տառապանքներից խուսափելն է, որ ոչ ոք երբևէ չպիտի տառապի որևէ պատճառով: Սակայն այդ համոզմունքը երբեք չի հանգեցնի նրան, որ մենք «կատարեալ մարդ լինենք Քրիստոսի կատարեալ հասակի չափովը» [Եփեսացիս 4.13] (Ջեֆրի Ռ. Հոլլանդ, «Տիրոջը սպասելիս», Ensign կամ Լիահոնա, նոյեմբեր 2020թ., 116):

Կարո՞ղ եմ, այնուամենայնիվ, ուրախություն զգալ դժվարությունների միջով անցնելիս:

Նախագահ Ռասսել Մ. Նելսոնն ուսուցանել է․

Նախագահ Ռասսել Մ. Նելսոն

Սիրելի՛ եղբայրներ և քույրեր, ուրախությունը, որ մենք զգում ենք, շատ քիչ է կապված մեր կյանքի հանգամանքների հետ և մեծապես կապված է այն բանի հետ, թե ինչի վրա է կենտրոնացած մեր կյանքը:

Երբ մեր կյանքը կենտրոնացած է Աստծո փրկության ծրագրի վրա … և Հիսուս Քրիստոսի ու Նրա ավետարանի վրա, մենք ուրախություն ենք զգում, անկախ այն բանից` մեր կյանքում ինչ-որ բան տեղի է ունենում, թե ոչ (Ռասսել Մ. Նելսոն, «Ուրախություն և հոգևոր գոյատևում», Ensign կամ Լիահոնա, նոյեմբեր 2016թ., 82):

Օժանդակ ուսումնական վարժություններ

Դասը սկսելու այլ տարբերակ. լավ, թե՞ վատ

Կարող եք բերել առարկաներ/երևույթներ կամ ցուցադրել դրանց նկարները, որոնց մասին ուսանողները կարող են հակառակ կարծիքներ ունենալ, օրինակ՝ տեղական մրցակից սպորտային թիմերը, սնունդ, երաժշտություն և այլն: Ուսանողներին խնդրեք հարգալից լինել վիճաբանելիս՝ արդյոք այդ առարկաները/երևույթները լավն են, թե վատը, և ինչու: Դասարանին հարցրեք, թե մարդիկ ինչու նույն բաների մասին այդպիսի տարբեր կարծիքներ ունեն, և արդյո՞ք այդ զգացողությունները ճշմարիտ են: Այս քննարկոման առնչությամբ՝ ներկայացրեք Նեփիի և Լամանի ու Լեմուելի համեմատությունները:

1 Նեփի 18.9 «Նրանք սկսեցին պարել և երգել և խոսել շատ կոպիտ ձևով»

Բացատրեք, որ Եկեղեցու ղեկավարները նախազգուշացրել են մեզ, որ ուշադիր լինենք, թե ինչ ենք ասում, ինչ երաժշտություն ենք լսում և ինչպես ենք պարում: Կարող եք կարդալ 20–23 էջերի համապատասխան պարբերությունները՝ Երիտասարդներին զորացնելու համար գրքույկից (գրքույկ, 2011):

Դասարանի հետ քննարկեք, թե ոչ պատշաճ երաժշտությունը, պարը և խոսքը ինչպես կարող են բացասաբար ազդել մարդու կյանքի վրա:

1 Նեփի 18.8–23: Նեփին՝ որպես Քրիստոսի տեսակ

Ուսանողներին օգնեք այս պատմության մեջ տեսնել Փրկչին՝ առաջարկելով նրանց մտածել, թե ինչպես կարող է Նեփին ներկայացնել Փրկիչ Հիսուս Քրիստոսին: Դիտարկեք հետևյալը.

Նմանություններ	Նեփի	Հիսուս Քրիստոս
Նմանություններ Սիրելի որդի	Նեփի 1 Նեփի 3.6, 8	Հիսուս Քրիստոս Մատթեոս 3.17
Նմանություններ Ատելություն և մերժում եղբայրների կողմից	Նեփի 1 Նեփի 18.10	Հիսուս Քրիստոս Հովհաննես 7.5, 15.24–25
Նմանություններ Կապվեց ամբարիշտների կողմից	Նեփի 1 Նեփի 18.11	Հիսուս Քրիստոս Մատթեոս 27.2
Նմանություններ Մերժվեց որպես ճշմարիտ առաջնորդ	Նեփի 1 Նեփի 18.10	Հիսուս Քրիստոս Հովհաննես 19.15
Նմանություններ Կամավոր տառապեց	Նեփի 1 Նեփի 18.11, 16	Հիսուս Քրիստոս Ղուկաս 22.42
Նմանություններ Աստծուն փառաբանեց իր տառապանքներում	Նեփի 1 Նեփի 18.16	Հիսուս Քրիստոս Վարդապետություն և Ուխտեր 19.19
Նմանություններ Ընտանիքը սպասում էր, որ նա հաղթահարի	Նեփի 1 Նեփի 18.20–22	Հիսուս Քրիստոս 2 Նեփի 9.6–9
Նմանություններ Բոլորին փրկեց մահից	Նեփի 1 Նեփի 18.22–23	Հիսուս Քրիստոս Ա Կորնթացիս 15.22