“1 Nīfai 4–5: ʻNaʻe Tataki Au ʻe he Laumālié,’” Tohi ʻa Molomoná – Tohi Lēsoni ʻa e Faiakó (2024)
“1 Nīfai 4–5: ʻNaʻe Tataki Au ʻe he Laumālié,’” Tohi ʻa Molomoná – Tohi Lēsoni ʻa e Faiakó
1 Nīfai 4–5
“Naʻe Tataki Au ʻe he Laumālié”
Hili ha feinga tuʻo ua ʻa Nīfai ke maʻu mai e ʻū lauʻi peleti palasá meia Lēpani pea ʻikai ola lelei, naʻá ne hū fakafufū ki Selusalema he poʻulí ʻi he tui ki he ʻEikí. Ka neongo ia, naʻe ʻikai haʻane ʻilo ki he founga ke fakahoko ʻaki ʻene ngāué. Kuó ke ongoʻi mālohi nai hangē ko Nīfaí, fekauʻaki mo hano fai ha meʻa ka kuo teʻeki ke ke fakapapauʻi e founga ke fakahoko ai iá? ʻOku fakataumuʻa e lēsoni ko ʻení ke fakamālohia hoʻo falala ki he Tamai Hēvaní mo ʻEne finangalo ke tataki koé.
Ko hono tokoniʻi e kau akó ke nau teuteu ki he akó. ʻOku fakamatala e folofolá ki ha tuʻunga ʻo e mateuteú ʻi he loto mo e ʻatamai ʻo kinautolu ʻoku fekumi ki he ako fakalaumālié. Aleaʻi maʻu pē mo e kau akó hono mahuʻinga ʻo e teuteu ʻa e tokotaha akó pea poupouʻi kinautolu ke fakakakato ʻa e teuteu ʻa e tokotaha akó ʻi he ʻaho takitaha.
Teuteu ʻa e tokotaha akó: ʻOange ki he kau akó ha tatau ʻo e lea ʻa Palesiteni Nalesoní ʻoku ʻasi ʻi he kamataʻanga ʻo e lēsoní. Fakaafeʻi kinautolu ke nau omi mateuteu mo ha ngaahi fakakaukau ʻo e ngaahi tūkunga ʻe lava ke ʻaonga fakataautaha ai kiate kinautolu ʻenau maʻu e fakahinohino ʻa e ʻEikí.
Ngaahi ʻEkitivitī Ako ʻOku Ala Fakahokó
Ko hono maʻu ha fakahinohino mei he Tamai Hēvaní
Fakaʻaliʻali e fakamatala ko ʻeni ʻa Palesiteni Nalesoní pea fakakaukau ke fakaafeʻi e kau akó ke vahevahe ʻenau ngaahi fakakaukau mei he teuteu ʻa e tokotaha akó.
Naʻe vahevahe ʻe Palesiteni Lāsolo M. Nalesoni ha faleʻi mahuʻinga fekauʻaki mo hono maʻu ʻo e fakahā fakatāutahá. ʻI hoʻo ako ʻene fakamatalá, fakakaukauʻi pe ʻoku kaunga fēfē ia kiate koe.
Te tau kei lava ʻo lotu ki heʻetau Tamai Hēvaní pea maʻu ha tataki mo ha fakahinohino, pea maʻu ha fakatokanga fekauʻaki mo e ngaahi fakatuʻutāmakí mo e ngaahi meʻa te ne tohoakiʻi ʻetau tokangá, pea ke tau malava ʻa e ngaahi meʻa he ʻikai pē ke tau lava ʻo fai ʻiate kitautolú. Kapau te tau maʻu moʻoni ʻa e Laumālie Māʻoniʻoní mo ako ke fakafaikehekeheʻi mo mahino ʻEne ngaahi ueʻí, ʻe tataki kitautolu ʻi he meʻa siʻisiʻi pe lahi kotoa pē. (Russell M. Nelson, “Fakahā maʻá e Siasí, Fakahā ki Heʻetau Moʻuí,” Ensign pe Liahona, Mē 2018, 94)
-
Ko e hā ha ngaahi tūkunga ʻi hoʻo moʻuí, lahi pe siʻisiʻi, ʻe tokoni ai ke ke maʻu e fakahinohino ʻa e Tamai Hēvaní? (Fakakaukau ke hiki hoʻo ngaahi talí.)
Fakakaukau ke fakaʻaliʻali e ngaahi fehuʻi mo e ngaahi tali ko ʻení ʻi he palakipoé kimuʻa pea kamata e kalasí pe paaki ia maʻá e tokotaha ako takitaha. Tuku ha taimi ki he kau akó ke vakaiʻi fakalongolongo ʻenau ngaahi ongó pea lekooti ʻenau ngaahi talí.
Fili ʻa e tali ʻokú ne maʻu lelei taha hoʻo ngaahi ongo fekauʻaki mo e ngaahi fakamatala ko ʻení.
-
ʻOku ou fekumi fakamātoato ki he fakahinohino mo e tataki ʻa e Tamai Hēvaní ke tokoniʻi au ʻi hoku ngaahi faingataʻaʻiá, ngaahi fehuʻí, mo ʻeku ngaahi filí.
-
Tuʻo lahi
-
Taimi pē ʻe niʻihi
-
Tātātaha
-
-
ʻOku ou falala ki he tuʻunga malava mo e finangalo ʻa e Tamai Hēvaní ke tataki ʻeku moʻuí ʻaki e Laumālié.
-
Tuʻo lahi
-
Taimi pē ʻe niʻihi
-
Tātātaha
-
-
ʻOku ou laka atu ʻi he tui mo ngāue fakatatau ki he ngaahi ueʻi ʻa e Laumālie Māʻoniʻoní, naʻa mo e taimi ʻoku ʻikai mahino ai hoku halá.
-
Tuʻo lahi
-
Taimi pē ʻe niʻihi
-
Tātātaha
-
ʻI hoʻo ako ki ha taimi naʻe ʻikai fakapapauʻi ai ʻe Nīfai ʻa e meʻa ke faí, fekumi ki he ngaahi moʻoni ʻokú ne fakamālohia hoʻo falala ki he Tamai Hēvaní mo ʻEne finangalo ke tataki koé.
“Tau toe ō hake”
Manatuʻi naʻe feinga tuʻo ua e ngaahi foha ʻo Līhaí ke maʻu mai e ʻū lauʻi peleti palasá meia Lēpani pea ʻikai lava pea nau manavahē koeʻuhí ko ʻenau moʻuí (vakai, 1 Nīfai 3:11–27). Ko e hā naʻá ke mei ongoʻi kapau naʻá ke ʻi he tūkunga tatau? Ko e hā ha ngaahi meʻa naʻá ke mei hohaʻa ki ai? Neongo e fakamoʻoni ʻa Leimana mo Lēmiuela ki ha ʻāngeló, ka naʻá na ongoʻi hohaʻa mo maʻu ha ngaahi fehuʻi fekauʻaki mo e founga ke fakahoko ʻaki e meʻa naʻe kole ange ke na faí (vakai, 1 Nīfai 3:31).
Lau ‘a e 1 Nīfai 4:1–3, ʻo kumi e ngaahi tali ‘a Nīfai ki he ngaahi ongoʻi hohaʻa ‘a hono ongo taʻoketé.
-
Ko e hā naʻe makehe kiate koe mei he ngaahi veesi ko ʻení?
-
Ko e hā ha sīpinga mei he folofolá naʻe fakaʻaongaʻi ʻe Nīfai ke fakamoʻoniʻi ʻaki e mālohi ʻo e ʻEikí mo fakaʻaiʻai hono ngaahi tokouá? Ko e hā ha ngaahi fakamatala mei he folofolá kuó ne ʻoatu kiate koe ha loto-toʻa mo ha mālohi ʻi hoʻo moʻuí?
-
ʻE fakaʻaongaʻi fēfē ʻa e kupuʻi lea “Tau toe ō hake” ki he ngaahi tūkunga mo e faingataʻa ʻi hoʻo moʻuí? (Fakakaukau ke fakaʻilongaʻi e kupuʻi lea ko ʻení ʻi hoʻo folofolá ʻi he taimi kotoa pē ʻoku ʻasi ai ʻi he veesi 1–3.)
Fakakaukau ke huluʻi e vitiō ko ʻení ke tokoni ke mahino lelei ange ki he kau akó ʻa e talanoá. Mahalo ʻe ʻaonga ke kiʻi taʻofi fakataimi ʻa e vitioó ʻi ha ngaahi taimi pea mou vakai mo e kau akó ki he folofolá. Hangē ko ʻení, ʻe lava ke kiʻi taʻofi ʻa e vitioó ʻi he taimi 1:07 ke kumi ʻe he kau akó ʻa e meʻa ʻoku fai ʻe Nīfaí. ʻE lava leva ke fakaafeʻi e kau akó ke nau lau mo fakaʻilongaʻi ʻa e 1 Nīfai 4:6–7 ʻi heʻenau folofolá.
Lau ʻa e 1 Nīfai 4:4–8, ʻo kumi ki he meʻa naʻe fai ʻe Nīfai ʻi heʻene feinga hono tolu ke ʻomi e ʻū lauʻi peleti palasá. Mahalo te ke fie mamata foki ʻi he “Ko e Tataki ʻe he Laumālié ʻa Nīfai ke ne Tamateʻi ʻa Lēpaní” (3:26), ʻoku maʻu ʻi he ChurchofJesusChrist.org, ko ha konga ʻo hoʻomou akó.
-
Ko e hā naʻe ʻiloʻi ʻe Nīfaí pea ko e hā naʻe ʻikai ke ne ʻilo ʻi he kamata ʻene feinga hono tolu ko ʻení?
-
Ko e hā hano mahuʻinga ‘o e kupuʻi lea “Ka naʻá ku ‘alu atu pē” 1 Nīfai 4:7?
-
Ko e hā ha moʻoni te ke lava ʻo ako mei he ngaahi lea ʻa Nīfaí?
Ko ha tefitoʻi moʻoni ʻeni ʻe taha te ke ala fakakaukau ki ai: ʻi he ngaahi taimi ʻo e veiveiuá, te tau lava ʻo maʻu ha fakahinohino mei he Tamai Hēvaní ʻo fakafou ʻi he Laumālié ʻi heʻetau laka atu ʻi he tuí.
Fakakaukau ke lekooti e tefitoʻi moʻoni ko ʻení pe ko ha tefitoʻi moʻoni naʻá ke fakakaukau ki ai ʻi hoʻo folofolá.
Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí e mahuʻinga ʻo ʻetau ngaahi angafaí ʻi heʻetau fekumi ki ha fakahā mo ha fakahinohinó:
ʻOku ou fakatokangaʻi ʻi heʻeku ako e folofolá ko e lahi taha hono maʻu ʻe he fānau ʻa e ʻOtuá e fakahaá ʻa e taimi ʻoku nau fai ai ha ngāué, ʻo ʻikai ʻi he taimi ʻoku nau nofo noaʻia ai ʻi honau nofoʻangá ʻo tatali ki he ʻEikí ke Ne toki talaatu e fuofua meʻa ke faí. …
Ko ia tau fai e meʻa kotoa te tau lavá. Pea tau tatali leva ki he ʻEikí ki Heʻene fakahaá. (Dallin H. Oaks, “ʻI he Taimi pē ʻAʻana, ʻi he Founga pē ʻAʻana,” Liahona, ʻAokosi 2013, 24–26)
Fakakaukau ki he founga ʻoku fekauʻaki ai ʻa e foʻi moʻoni mo e lea ʻa Palesiteni ʻOakesí mo e ngaahi tūkunga naʻá ke ʻiloʻi kimuʻá.
-
ʻOkú ke pehē ko e hā ʻoku fie maʻu ai ʻe he ʻEikí ke ke laka ki muʻa ʻi he tui lolotonga e ngaahi taimi veiveiuá?
ʻOku teuteu ʻe he ʻEikí ha founga
Naʻe fekauʻi ʻe he ʻEikí ʻa Nīfai ke tāmateʻi ʻa Lēpani. Naʻá ne hohaʻa ʻi he fakakaukau ke toʻo ha moʻuí, ka naʻe hokohoko atu hono poupouʻi ia ʻe he Laumālié. Naʻe talangofua ʻa Nīfai ki he “leʻo ʻo e Laumālié” (1 Nīfai 4:18), ʻo ne fakapuli ʻaki ʻa e vala ʻo Lēpaní, peá ne fakalotoʻi ʻa Sōlami, ko e tamaioʻeiki ʻa Lēpaní, ke ne ʻomi ʻa e ʻū lauʻi peleti palasá mei he tukuʻanga koloá.
Fakakaukau ke lau ʻa e fakamatala ko ʻení ʻi he 1 Nīfai 4:9–24 pea fakaʻilongaʻi e ngaahi foʻi lea pe kupuʻi lea ʻoku ʻuhingamālie kiate koé. Te ke lava foki ʻo toe mamata ʻi he “Ko Hono Maʻu ʻe Nīfai e Ngaahi Lekooti Toputapú” (4:20), ʻoku maʻu ʻi he ChurchofJesusChrist.org.
ʻOku fekauʻaki fēfē ʻa e meʻa ne aʻusia ʻe Nīfai ʻi heʻene maʻu ʻa e ʻū lauʻi peletí mo e fakamoʻoni naʻá ne vahevahe ʻi he 1 Nīfai 3:7?
ʻOange ha taimi ki he kau akó ke nau fakakaukau ki honau ngaahi tūkunga ʻa ia ʻe ala fie maʻu ai ke nau laka ki muʻa ʻi he tuí. Poupouʻi kinautolu ke nau fakalaulauloto ki he meʻa kuo nau ako mei he aʻusia ʻa Nīfaí ʻi heʻenau lekooti fakalongolongo ʻenau ngaahi fakakaukaú mo e palani ke laka ki muʻá. Fakakaukau ke fakaafeʻi ha niʻihi ʻo e kau ngāue tokoní ke vahevahe ha niʻihi ʻo ʻenau ngaahi fakakaukaú mo e ʻiló hili ʻenau tohí.
-
Ko e hā kuó u ako he ʻahó ni ʻe lava ʻo tokoni kiate au ʻi hoku tūkungá?
-
Ko e hā kuó u ongoʻi he ʻahó ni te ne lava ʻo fakamālohia ʻeku falala ki he tuʻunga malava mo e finangalo ʻa e Tamai Hēvaní ke tataki aú?
-
Ko e hā te u lava ʻo fai ke muimui ʻi he sīpinga ʻa Nīfaí pea laka atu ʻi he tui neongo ʻoku ngali taʻemahino hoku halá?