“1 Nīfai 2: ʻKuó Ke Fekumi Faivelenga Kiate Au,’” Tohi ʻa Molomoná – Tohi Lēsoni ʻa e Faiakó (2024)
“1 Nīfai 2,” Tohi ʻa Molomoná – Tohi Lēsoni ʻa e Faiakó
1 Nīfai 2
“Kuó Ke Fekumi Faivelenga Kiate Au”
ʻOku faʻa fekauʻi kitautolu ʻe he ʻEikí he taimi ʻe niʻihi ke tau fai ha ngaahi meʻa ʻe ala faingataʻa ke mahino kiate kitautolu pe fakahoko. Hili hono ui ʻe Līhai e kakai ʻo Selusalemá ke nau fakatomalá, naʻá ne talangofua ki ha fakahā ke ʻave hono fāmilí ki he feituʻu maomaonganoá. Naʻe ʻikai lāunga ʻa Nīfai ʻo hangē ko Leimana mo Lēmiuelá, ka naʻá ne tafoki ki he ʻEikí ke maʻu ha mahino lahi ange pea fakamolū hono lotó. ʻOku fakataumuʻa ʻa e lēsoni ko ʻení ke tokoniʻi koe ke ke ongoʻi ha holi lahi ange ke tafoki ki he ʻEikí ʻi he taimi ʻokú Ne kole atu ai ke ke fakahoko ha ngaahi meʻa faingataʻá.
Ko e manatu ki he tokotaha foaki fonó. ʻI he taimi ʻoku akoʻi ai e ngaahi fono mo e ngaahi fekau ʻa e ʻOtuá, manatuʻi ke akoʻi foki fekauʻaki mo e tokotaha foaki fonó. Tokoniʻi e kau akó ke nau fakakaukau ki he meʻa ʻoku akoʻi mai ʻe he ngaahi fekau ʻa e ʻOtuá fekauʻaki mo Iá, ʻEne holi ke tataki mo tāpuakiʻi kinautolú, pea mo e ʻofa ʻokú Ne maʻu kiate kinautolú. Tokoni ke mahino ki he kau akó kuo foaki mai ʻe ha Tamai Hēvani ʻofa ha ngaahi fono ke tokoniʻi kinautolu ke nau hoko ʻo hangē ko Ia mo Hono ʻAlo ʻOfaʻangá.
Teuteu ʻa e tokotaha akó: Fehuʻi ki ha kaungāmeʻa pe mēmipa ʻo e fāmilí, “Ko e fē ha taimi kuó ke fekumi ai pea maʻu e tokoni ʻa e ʻEikí ke tui mo talangofua ki Heʻene ngaahi folofolá, naʻa mo e ngaahi taimi ne faingataʻa aí?”
Ngaahi ʻEkitivitī Ako ʻOku Ala Fakahokó
Ko e Tali ki he faleʻi ʻa e ʻEikí
Fakakaukau ke fakaʻaliʻali ange e ngaahi tūkunga mo e ngaahi fehuʻi ko ʻení. ʻOange ha taimi feʻunga ki he kau akó ke nau fakalaulauloto mo aleaʻi ai e founga te nau ala tali ʻaki e ngaahi fehuʻí.
Fakakaukauloto ʻokú ke fanongo ki he konifelenisi lahí pea ʻoku ʻomi ʻe he Palesiteni ʻo e Siasí ha faleʻi ʻokú ke pehē ʻe faingataʻa ke ke muimui ki ai. Hili e konifelenisí, ʻoku kamata ke ke fanongo ki he lāunga ʻa ha kāingalotu kehe ʻo e Siasí fekauʻaki mo ʻene faleʻí mo fehuʻia e ʻuhinga ʻe kole mai ai ʻe he palōfitá ke tau fai ʻa e meʻa ko ʻení. ʻI hoʻo fakafanongo ki he ngaahi fakakikihi ko ʻení, ʻoku kamata ke ke fifili pe ko e hā ʻoku totonu ke ke faí.
-
Ko e hā ha ngaahi founga kovi ke tali ʻaki e ngaahi lāunga mo e fakaanga ʻa e kāingalotú?
-
Ko e hā ha ngaahi founga lelei ki he tūkunga ko ʻení? Ko e hā ʻe fakahōifua ki he ʻEikí?
Te ke mamata ʻi he 1 Nīfai 2, ki he tali ʻa e fānau ʻa Līhaí ʻi ha ngaahi founga kehekehe ki ha fekau faingataʻa naʻe tuku ʻe he ʻOtuá kiate kinautolu ʻo fakafou ʻi Heʻene palōfitá. ʻI hoʻo akó, kumi ʻa e ngaahi tefitoʻi moʻoni ʻe lava ʻo tokoni atu ʻo kapau ʻe ʻi ai ha taimi ʻe ngali faingataʻa ai ke muimui ki he palōfitá.
Ko e fekauʻi ʻe he ʻEikí ʻa Līhai ke mavahe mei Selusalemá
Mahalo te ke manatuʻi naʻe fekau ʻe he ʻEikí ʻa Līhai ke fakatokanga ki he kakai ʻo Selusalemá ʻe fakaʻauha kinautolu kapau he ʻikai ke nau fakatomala. Lau ʻa e 1 Nīfai 2:1–5, ʻo kumi e faleʻi ʻa e ʻEikí kia Līhai hili ʻene malanga ʻaki ʻa e fakatomalá. ʻE lava foki ke ke mamata ʻi he “Lehi Counsels with His Family to Leave Jerusalem” (2:27), ʻoku maʻu ʻi he ChurchofJesusChrist.org.
Fakakaukau ke fakaʻaliʻali ʻa e mape ko ʻení. Ke tokoni ke fakakaukauloto e kau akó ki he mamaʻo ʻo e fononga ʻa e fāmili ʻo Līhaí, te ke ala ʻoange foki ha sīpinga ʻo ha feituʻu ʻoku meimei maile ʻe 200 (kilomita ʻe 320) mei he feituʻu ʻokú ke ʻi ai mo hoʻo kau akó.
Ko e mamaʻo ʻo e fononga ʻa e fāmili ʻo Līhaí mei Selusalema ki he ngaahi ngataʻanga ʻo e Tahi Kulokulá naʻe meimei maile ʻe 200 (kilomita ʻe 320). Pau pē naʻe ʻosi ha ngaahi ʻaho lahi heʻenau fonongá pea nau fou ʻi ha fonua vela mo pakukā ʻa ia naʻe ʻiloa ʻi he tatali ha kau kaihaʻa ke kaihaʻa mei he kau fononga ne teʻeki ke nau mateuteú.
-
Kapau na ko ha taha koe ʻo e fānau ʻa Līhaí, ʻokú ke pehē ko e hā naʻá ke mei fai ʻi he tūkunga ko ʻení? Ko e hā hono ʻuhingá?
-
Ko e hā nai ha ngaahi fehuʻi naʻá ke mei maʻu?
-
ʻOkú ke vakai fēfē ki hono fakahaaʻi e ʻaloʻofa ʻa e ʻEikí ʻi Heʻene fekau ke mavahe mei Selusalemá?
Ko e founga ʻe taha ke tokoniʻi ai e kau akó ke nau ako ʻa e vahe ko ʻení ko hono tokoniʻi kinautolu ke fakafehoanaki mo fakafaikehekeheʻi e ngaahi tali ʻa Leimana mo Lēmiuelá mei he ngaahi tali ʻa Nīfai mo Samú. Ko hono fakafehoanaki mo fakafaikehekeheʻi e niʻihi fakafoʻituitui ʻi he folofolá ko ha taukei ako folofola ia ʻe lava ʻo tokoni ki he kau akó ke nau fakakaukau ki heʻenau feinga ke muimui ki he ʻOtuá. Fakakaukau ke ʻai e kau akó ke nau akoako fakahoko e taukei ko ʻení ʻaki hono tā e tēpile ʻi laló ʻi he palakipoé. Fakaafeʻi e kau akó ke hiki e meʻa ʻoku nau ʻiló ʻi he palakipoé. ʻE ala tokoni foki ke fakamahinoʻi ʻeni ko ha taukei ako folofola te nau lava ʻo fakaʻaongaʻi ʻi he kotoa ʻo e folofolá ʻi heʻenau ako fakatāutahá.
|
Tali ʻa Leimana mo Lēmiuelá |
Tali ʻa Nīfai mo Samu |
|---|---|
Tali ʻa Leimana mo Lēmiuelá | Tali ʻa Nīfai mo Samu |
Mahalo te ke fie sio foki ʻi he “Ko e Lotua ʻe Nīfai ʻa Leimana mo Lēmiuelá” (6:02), ʻoku maʻu ʻi he ChurchofJesusChrist.org, ʻo kumi ha ngaahi fakakaukau kehe te ke lava ʻo tānaki atu ki hoʻo sātí.
-
Ko e hā naʻá ke fakatokangaʻi ʻi hoʻo fakafehoanaki e ngaahi angafai ʻa Leimana mo Lēmiuelá mo e ngaahi angafai ʻa Nīfai mo Samú?
ʻE lava ke hoko hono fakaafeʻi e kau akó ke nau fakamatalaʻi fakanounou e meʻa kuo nau akó ko ha founga lelei ke nau lava ai ʻo ʻiloʻi e ngaahi tefitoʻi moʻoni mei he folofolá. ʻE faʻa ʻilo ʻe he kau akó ha ngaahi tefitoʻi moʻoni ʻoku faitatau mo e ngaahi tefitoʻi moʻoni ʻi he tohi lēsoni ʻa e faiakó. Kapau ʻe vahevahe ʻe he kau akó ha ngaahi moʻoni ʻoku kehe mei he meʻa ʻoku ʻi he tohi lēsoní, mahalo ʻoku mahuʻingamālie ange kiate kinautolu ʻa e ngaahi meʻa naʻa nau maʻú. Fekumi ki ha fakahinohino mei he Laumālie Māʻoniʻoní ke fakapapauʻi ʻa e ngaahi tefitoʻi moʻoni ʻe ʻuhingamālie taha ke ke aleaʻi mo e kalasí.
-
Te ke fakamatalaʻi fakanounou fēfē ʻi ha sētesi ʻe taha ʻa e meʻa naʻá ke ako mei he ngaahi sīpinga ʻa Leimana mo Lēmiuelá? Te ke fakamatalaʻi fakanounou fēfē ʻa e meʻa naʻá ke ako mei he ngaahi sīpinga ʻa Nīfai mo Samú?
Fakaʻaongaʻi ha kiʻi taimi ke toe vakaiʻi ai e meʻa kuó ke tohí. Fakakaukau pe ko e ngaahi ngāue pe taumuʻa fē ʻoku faitatau taha mo hoʻo ngaahi ngāué pe taumuʻá. Ko e hā ha ngaahi holi, fakakaukau pe ngaahi ongo ʻokú ke maʻu ʻi hoʻo fai e fakafehoanaki ko ʻení?
Mahalo naʻá ke ʻilo meia Leimana mo Lēmiuela ʻoku lava ke fakatupu ʻe heʻetau taʻeʻilo ki he ngaahi ngāue ʻa e ʻEikí mo taʻetui ki Heʻene kau palōfitá ke tau lāunga ai. Mahalo naʻá ke ako meia Nīfai ʻi he taimi ʻoku tau fekumi faivelenga ai ke mahino e ngaahi fekau ʻa e ʻEikí, te Ne lava ʻo fakamolū hotau lotó ke tokoniʻi kitautolu ke tau tui mo talangofua.
ʻOku fakahaaʻi mai ʻe he fakamatala ʻa Nīfai “naʻe fakamolū [ʻe he ʻEikí] hono lotó” (1 Nīfai 2:16) naʻe ʻikai ko ha fekau faingofua ʻeni ke ne talangofua ki ai ʻo hangē pē ko Leimana mo Lēmiuelá. Fakakaukau ki he founga naʻe liliu ai e toenga e moʻui ʻa Nīfaí ʻi heʻene fili ke tafoki ki he ʻEikí ʻi he tūkunga ko ʻení. Fakakaukau ki he founga naʻe mei kehe ai e moʻui ʻa Leimana mo Lēmiuelá kapau naʻá na muimui ki he sīpinga ʻa Nīfaí.
-
Ko e hā ha ngaahi tūkunga ʻokú ke fehangahangai pe te ke fehangahangai mo ia ʻa ia ʻe ʻaonga kiate koe ʻi hoʻo muimui ki he sīpinga ʻa Nīfaí?
-
ʻE liliu fēfē hoʻo moʻuí ʻi he taimí ni mo e kahaʻú ʻi hoʻo fekumi ʻi he loto fakatōkilalo ki he ʻEikí ʻi he ngaahi tūkunga ko ʻení, kae ʻikai ko e taʻetuí mo e lāungá?
-
Ko e hā ʻoku mahino kiate koe fekauʻaki mo e ʻOtuá te ne lava ʻo taʻofi koe mei he lāungá ʻi Heʻene kole atu ke ke fai ha meʻa faingataʻá?
Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻa te tau lava ʻo fai ʻi he taimi ʻoku ʻikai ke tau tomuʻa maʻu ai ha mahino pe poupou ki he faleʻi mei he palōfita ʻa e ʻEikí.
ʻOua naʻá ke ofo kapau he ʻikai ʻuluaki fenāpasi kakato hoʻo ngaahi vakai fakatāutahá mo e ngaahi akonaki e palōfita ʻa e ʻEikí. Ko ha ngaahi faingamālie ʻeni ʻo e ako, mo e loto-fakatōkilalo, ʻi he taimi ʻoku tau lotu aí. ʻOku tau ʻaʻeva atu ʻi he tui, ʻo falala ki he ʻOtuá, mo tui te tau maʻu ha mahino fakalaumālie lahi ange mei heʻetau Tamai Hēvaní. Naʻe fakamatalaʻi ʻe ha palōfita ʻe taha e meʻafoaki taʻefakatataua ʻo e Fakamoʻuí, ʻo pehē, “pea folo hifo ʻa e finangalo ʻo e ʻAló ʻe he finangalo ʻo e Tamaí.” [Mōsaia 15:7]. Ko hono moʻoní, ko ʻetau tukulolo ko ia ki he finangalo ʻo e ʻOtuá, ʻoku ʻikai ko ha moʻulaloa ia ka ko e kamataʻanga ʻo ha ikuna nāunauʻia. (Neil L. Andersen, “Ko e Palōfita ʻa e ʻOtuá,,” Ensign pe Liahona, Mē 2018, 26)
-
Ko e hā ha ngaahi tāpuaki kuó ke maʻu ʻi hoʻo feinga ke tukulolo ki he Tamai Hēvaní, ʻo hangē ko ia ne fai ʻe Sīsū mo Nīfaí?
Fakaʻaongaʻi ha kiʻi taimi ke lekooti ai hoʻo ngaahi fakakaukaú mo e ngaahi ongo fakalaumālié. Ko e hā kuó ke ako ʻokú ke loto ke manatuʻí? Ko e hā ha ngaahi liliu ʻokú ke ongoʻi ʻoku ueʻi koe ke fai ʻi hoʻo moʻuí ʻo makatuʻunga ʻi he meʻa kuó ke ako he ʻaho ní?