Moroni 4–5

Ang Sakramento

pan ug tubig sa sakramento

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, gidapit kita sa pag-apil sa sagradong mga ordinansa ug paghimo og mga pakigsaad uban sa atong Langitnong Amahan. Kon kita maningkamot sa pagtuman sa atong mga pakigsaad, ang Langitnong Amahan mopanalangin kanato. Ang ordinansa nga kanunay natong giapilan mao ang sakramento. Kini nga leksiyon makatabang kanimo sa pagtuman sa pakigsaad nga imong gihimo kon moambit ka sa sakramento aron makabaton ka sa Espiritu sa Ginoo uban kanimo.

Nganong mosimba man ka?

Si Sister Cheryl A. Esplin, kanhi magtatambag sa Kinatibuk-ang Kapangulohan sa Primary, mipakigbahin og pangutana nga gipangutana sa usa ka anak nga lalaki sa iyang 96-anyos nga amahan: “Pa, nganong mosimba man ka? Dili ka makakita, dili makadungog, ug maglisod sa paglihok-lihok. Nganong mosimba man ka?” (“Ang Sakramento—Pagbag-o sa Kalag,” Liahona, Nob. 2014, 14).

• Unsa kaha sa imong hunahuna ang tubag sa amahan niini nga pangutana?

“Ang amahan mitubag, ‘Tungod sa sakramento. Moadto ko aron moambit sa sakramento’” (Cheryl A. Esplin, “Ang Sakramento,” 14).

• Unsa ang imong nahibaloan mahitungod sa sakramento nga mahimong hinungdan nga ang amahan mitubag niini nga paagi?

• Unsa ka importante ang sakramento diha kanimo? Ngano man?

• Unsa nga mga paningkamot ang imong gihimo aron makabaton og makahuloganon nga kasinatian sa sakramento?

Isip kabahin sa iyang rekord, gilakip ni Moroni ang mga pag-ampo nga gihatag ni Jesukristo kaniadto sa mga Nephite alang sa pagpangalagad sa sakramento (tan-awa sa Moroni 4:1–2). Samtang magtuon ka niini nga mga pag-ampo sa Moroni 4–5, paminaw sa mga pag-aghat aron makahibalo unsay imong mahimo sa pagtuman sa mga pakigsaad nga imong gihimo kon moambit sa sakramento.

Ang sakramento

Kon kita moambit sa sakramento, kita mohimo og pakigsaad uban sa Langitnong Amahan ug mobag-o sa mga pakigsaad nga atong gihimo atol sa bunyag (tan-awa sa Mosiah 18:8–10; Doktrina ug mga Pakigsaad 20:37). “Ang usa ka pakigsaad usa ka sagradong kauyonan tali sa Dios ug sa tawo o usa ka pundok sa katawhan. Ang Dios naghan-ay og piho nga mga kasabotan, ug Siya misaad sa pagpanalangin kanato kon atong tumanon kadtong mga kasabotan” (Gospel Topics, “Covenant,” ChurchofJesusChrist.org).

Kopyaha ang mosunod nga tsart diha sa imong journal sa pagtuon. Pun-a ang unang kolum gamit ang Moroni 4:3.

Ang Pakigsaad sa Sakramento

Ang akong gisaad nga buhaton	Mga paagi sa pagtuman sa akong mga saad

• Unsaon nimo pagpamubo ang atong gisaad kon kita moambit sa pan?

Usa ka paagi sa pagpamubo sa atong bahin sa pakigsaad sa sakramento mao ang samtang kita moambit sa sakramento, kita mosaad nga andam sa pagdala sa atong kaugalingon sa ngalan sa Manluluwas, sa kanunay mohinumdom Kaniya, ug motuman sa Iyang mga sugo.

• Unsa sa inyong hunahuna ang gipasabot sa pagkaandam sa pagdala nganha kanila sa ngalan sa Manluluwas ngari kanato?

Si Presidente Henry B. Eyring sa Unang Kapangulohan mipasabot:

Presidente Henry B. Eyring

Misaad kita sa pagdala sa Iyang ngalan ngari kanato. Nagpasabot kana nga kita kinahanglan gayod nga makakita sa atong kaugalingon nga sama Kaniya. Himoon nato Siya nga labing importante sa atong mga kinabuhi. Kita gusto sa unsay Iyang gusto kay sa unsay atong gusto o unsay gitudlo sa kalibotan nga atong gustohon. (Henry B. Eyring, “That We May Be One,” Ensign, Mayo 1998, 67)

• Sa unsang paagi mas maayo nimo nga dad-on ang ngalan sa Manluluwas diha kanimo?

• Sa unsa nga mga paagi ang pagdala sa ngalan sa Manluluwas ngari kanato makatabang kanato nga mahimong mahisama Kaniya?

Pun-a ang ikaduhang kolum sa tsart og mga ideya kon unsaon nato sa pagpaningkamot sa pagtuman sa matag usa sa atong mga saad.

Kanunayng magbaton sa Iyang Espiritu uban kanato

batan-ong babaye nga nag-ambit sa sakramento

Basaha ang Moroni 4:3 ug 5:2, mangita alang sa pagkaparehas ug kalainan tali sa pag-ampo sa pan ug sa pag-ampo sa bino (tubig).

• Unsa nga mga pagkapareho ang imong nakaplagan?

• Unsa ang buhaton sa Langitnong Amahan kon kita motuman sa pakigsaad nga atong gihimo atol sa sakramento?

Usa ka baroganan nga atong makat-onan mao nga samtang atong tumanon ang pakigsaad nga atong gihimo atol sa sakramento, kanunay natong maangkon ang Espiritu sa Ginoo nga mag-uban kanato.

• Ikonsiderar kon sa unsang paagi ang imong kaandam sa pagtuman sa mosunod nga mga saad makatabang kanimo nga mahimong kanunay nga makabaton sa Espiritu sa Ginoo uban kanimo:

  • Dad-a ang ngalan sa Manluluwas diha kanimo.

  • Kanunay nga mohinumdom Kaniya.

  • Maghupot sa Iyang mga sugo.

• Sa unsang paagi ka makabenepisyo sa kanunay nga pagbaton sa Espiritu Santo uban kanimo?

Si Presidente Dallin H. Oaks sa Unang Kapangulohan mitudlo kon sa unsang paagi kita makaduol sa sakramento ug mapanalanginan pinaagi sa pagtuman sa mga pakigsaad niini. Basaha ang mosunod nga pamahayag o tan-awa ang bidyo nga “The Aaronic Priesthood and the Sacrament” gikan sa time code 6:48 hangtod sa 7:22 sa ChurchofJesusChrist.org.

Presidente Dallin H. Oaks

Gisugo kita sa paghinulsol sa atong mga sala ug sa pagduol ngadto sa Ginoo uban sa masulub-on nga kasingkasing ug mahinulsolon nga espiritu ug moambit sa sakramento agig pagtuman sa mga pakigsaad niini. Kon bag-ohon nato ang atong mga pakigsaad sa bunyag niining paagiha, ang Ginoo mobag-o sa epekto sa paglimpyo sa atong bunyag. Niining paagiha gihimo kitang limpyo ug makabaton kanunay sa Iyang Espiritu uban kanato. Ang kamahinungdanon niini klaro kaayo diha sa mga sugo sa Ginoo nga kita moambit sa sakramento matag semana (tan-awa sa Doktrina ug mga Pakigsaad 59:8–9). (Dallin H. Oaks, “The Aaronic Priesthood and the Sacrament,” Ensign, Nob. 1998, 38)

Pagtuman sa pakigsaad sa sakramento

Hunahunaa ang imong mga paningkamot sa pagtuman sa mga saad nga imong gihimo kon moambit ka sa sakramento. Unsa ang maayong gidangatan? Unsa pa ang mapalambo?

Pagpili og usa o daghang mga saad nga gusto nimong pagatutokan. Isulat ang usa ka piho nga imong mahimo. Mahimo nimong pamalandongon kini sa sunod higayon nga moambit ka sa sakramento.

Hatagi og pagtagad kon sa unsang paagi ang pagtuman sa imong mga pakigsaad makatabang kanimo nga makabaton sa Espiritu Santo uban kanimo ug sa kalainan nga imong nakita sa imong kinabuhi.

1. Aron matabangan ka nga mapamubo ang imong nakat-onan, pagsulat og mubo nga parapo nga naghulagway sa pakigsaad nga imong gihimo sa dihang moambit ka sa sakramento ug mga paagi nga makatuman ka niini. Ilakip sa unsa nga paagi nga ang kanunay nga pagbaton sa Espiritu Santo uban kanimo mahimong usa ka panalangin sa imong kinabuhi.

Opsiyonal: Gustong Makakat-on Pa og Dugang?

Unsa ang relasyon tali sa bunyag ug sa sakramento?

Si Presidente Russell M. Nelson mitudlo:

Presidente Russell M. Nelson

Kita mosulod sa dalan sa pakigsaad pinaagi sa pagpabunyag ug paghimo sa atong una nga pakigsaad ngadto sa Dios. Matag higayon nga kita moambit sa sakramento, kita mosaad pag-usab sa pagdala sa ngalan sa Manluluwas ngari kanato, mohinumdom Kaniya, ug maghupot sa Iyang mga sugo. Agig balos, mopaniguro ang Dios kanato nga kita sa kanunay makabaton sa Espiritu sa Ginoo uban kanato. (Russell M. Nelson, “Ang Gahom sa Kadasig sa Espirituhanong Paglambom,” Liahona, Mayo 2022, 98)

Unsaon nako sa paghinumdom kanunay sa Manluluwas?

Si Presidente Henry B. Eyring sa Unang Kapangulohan mitudlo:

Presidente Henry B. Eyring

Kining mga pulong nga gikan sa mga pag-ampo sa sakramento kinahanglan nga maghulagway sa atong inadlaw nga kinabuhi: “Kanunay mohinumdom kaniya.” Ang “Kaniya” nagpasabot kang Jesukristo. Ang sunod nga mga pulong, “ug mohupot sa iyang mga sugo,” nagsugyot unsay ipasabot sa paghinumdom Kaniya [Doktrina ug mga Pakigsaad 20:77]. Kon kanunay kitang mohinumdom ni Jesukristo kanunay, tingali mangutana kita sa hilom nga pag-ampo, “Unsa ang gusto Niya nga akong buhaton?” (Henry B. Eyring, “Mga Pag-ampo uban sa Hugot nga Pagtuo,” Liahona, Mayo 2020, 28)

Si Elder Gerrit W. Gong sa Korum sa Napulog Duha ka Apostoles mipakigbahin og unom ka mga paagi nga kanunay natong mahinumdoman ang Manluluwas:

Elder Gerrit W. Gong

Matag semana, sa pag-ambit sa sakramento, makigsaad kita nga kanunayng mohinumdom Kaniya. Migamit sa dul-an sa 400 ka mga scripture reference [pakisayran sa kasulatan] sa pulong nga mohinumdom, aniay unom ka paagi nga kita kanunayng makahinumdom Kaniya.

Una, kanunay kitang makahinumdom Kaniya pinaagi sa pagkamasaligon sa Iyang mga pakigsaad, mga saad, ug mga kasiguroan. …

Ikaduha, kanunay kitang makahinumdom Kaniya pinaagi sa mapasalamatong pag-ila sa Iyang impluwensya sa tibuok natong kinabuhi. …

Ikatulo, kanunay kitang makahinumdom Kaniya pinaagi sa pagsalig kon ang Ginoo mopaniguro kanato nga “Siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila” [Doktrina ug mga Pakigsaad 58:42; tan-awa usab sa Isaias 43:25]. …

Ikaupat, Iya kitang gidapit sa paghinumdom nga Siya kanunayng moabi-abi kanato sa pagpauli. …

Ikalima, kanunay kitang makahinumdom Kaniya sa adlawng Igpapahulay pinaagi sa sakramento. …

Sa kataposan, ang ikaunom, nagdapit kanato ang Manluluwas sa kanunay nga paghinumdom Kaniya sama sa Iyang kanunay nga paghinumdom kanato. (Gerrit W. Gong, “Kanunay nga Mohinumdom Kaniya,” Liahona, Mayo 2016, 108–10)

Si Presidente Dallin H. Oaks sa Unang Kapangulohan mitudlo:

Presidente Dallin H. Oaks

Panahon sa miting sa sakramento—ug ilabi na atol sa pagpahigayon sa sakramento—kinahanglan nga kita maghunahuna og maayo sa pagsimba ug molikay gikan sa tanang lain nga mga kalihokan, ilabi na sa pamatasan nga makabalda sa pagsimba sa uban. Bisan gani ang usa ka tawo kinsa nahinanok og maayo dili makapanghilabot sa uban. Ang miting sa sakramento dili panahon alang sa pagbasa sa mga libro o mga magasin. Mga batan-on, dili kini panahon alang sa mga paghinunghonganay og sulti diha sa mga cell phone o sa pag-text og mensahe sa mga tawo didto sa laing mga dapit. Kon moambit kita sa sakramento, naghimo kita og sagrado nga pakigsaad nga kita kanunay nga mahinumdom sa Manluluwas. Unsa ka subo nga tan-awon sa mga tawo nga klarong naglapas nianang pakigsaad diha gayod sa miting diin sila mihimo niini. (Dallin H. Oaks, “Ang Miting sa Sakrament ug ang Sakrament,” Liahona, Nob. 2008, 18–19)

Sa unsang paagi ang pag-ambit sa sakramento makaangkla kanako ngadto sa Manluluwas?

Si Elder Dale G. Renlund sa Korum sa Napulog Duha ka Apostoles mitudlo:

Elder Dale G. Renlund

Matag semana moambit kita sa sakramento ug mohimo og pakigsaad sa atong Langitnong Amahan. Mosaad kita nga atong isumpay ngadto sa Manluluwas ang atong pagkalahi pinaagi sa pagpanumpa sa atong kaandam nga modala diha kanato sa Iyang ngalan, kanunay nga mohinumdom Kaniya, ug mohupot sa Iyang mga sugo. Ang makugihong pagpangandam ug ang katakos sa paghimo niining mga pakigsaad matag semana mo-angkla kanato ngadto sa Manluluwas, motabang nga atong mapahaom ang atong pasalig, ug pinaagi sa gahom abagan kita subay sa dalan sa pakigsaad. (Dale G. Renlund, “Walay Pagkapaling nga Pasalig ngadto kang Jesukristo,” Liahona, Nob. 2019, 24)