“Ether 12:23–27: ‘Niana Ako Mohimo sa Mahuyang nga mga Butang nga Mahimo nga Malig-on ngadto Kanila,’” Manwal sa Magtutudlo sa Basahon ni Mormon (2024)
“Ether 12:23–27,” Manwal sa Magtutudlo sa Basahon ni Mormon
Ether 12:23–27
“Niana Ako Mohimo sa Mahuyang nga mga Butang nga Mahimo nga Malig-on ngadto Kanila”
Samtang si Moroni mipadayon sa pagpamubo sa basahon ni Ether, siya nahadlok nga ang mga Hentil mobiaybiay sa iyang buhat tungod sa iyang kahuyang sa pagsulat. Ang Ginoo mitubag nga samtang kita moduol ngadto Kaniya uban sa pagkamapainubsanon ug hugot nga pagtuo, Iyang mahimo ang atong mahuyang nga mga butang ngadto sa mga kalig-on (tan-awa sa Ether 12:27). Kini nga leksiyon gituyo aron sa pagtabang kanimo sa pagduol ngadto kang Jesukristo aron sa pagbuntog sa mga kahuyang pinaagi sa Iyang grasya.
Kahuyang ug kalig-on
-
Unsa ang usa ka butang nga labaw pa sa imong pisikal nga kusog nga buhaton karon? Unsa ang gikinahanglan nimong buhaton aron mahimong paigo ang kalig-on nga matuman ang buluhaton?
Sa mortalidad, kitang tanan nag-atubang og mga kahuyang. Usahay kini makapaluya. Niini nga leksiyon makakat-on ka mahitungod sa usa ka sumbanan nga gitudlo sa Ginoo ngadto kang Moroni nga makapahimo sa mga kahuyang ngadto sa mga kalig-on.
Ang mga kabalaka ni Moroni
Si Moroni gihatagan og buluhaton sa pagpamubo sa asoy sa mga Jaredite, ug siya nasayod nga kini nga asoy pagabasahon sa daghang mga tawo sa umaabot. Sa iyang pagtapos sa iyang pagpamubo, iyang girekord ang pipila sa iyang kataposang mga hunahuna ug gilakip ang iyang personal nga mga kabalaka ug mga nakapasamok kaniya mahitungod sa unsay gihangyo kaniya nga buhaton.
Basaha ang Ether 12:23–25, mangita sa unsay gikabalak-an ni Moroni.
-
Unsa ang piho nga gikabalak-an ni Moroni?
Ang tubag sa Ginoo ngadto ni Moroni
Basaha ang Ether 12:26–27, mangita kon giunsa pagtubag sa Ginoo ang mga kabalaka ni Moroni.
Ang Ether 12:27 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Bahina ang blangko nga papel o usa ka pahina sa imong journal sa pagtuon ngadto sa upat ka mga kwadro, ug isulat ang unang gipabaga nga hugpong sa mga pulong sa ubos diha sa usa sa mga kwadro. Dayon isulat ang ikaduha nga gipabaga nga hugpong sa mga pulong sa lain nga kwadro. Ipadayon hangtod maapil nimo ang tanang gipabaga nga mga hugpong sa mga pulong. Pagsulat og mga mubo nga sulat niini nga mga kwadro nga makatabang kanimo nga makasabot unsa ang gipasabot niini nga mga hugpong sa mga pulong.
“Kon ang mga tawo moduol ngari kanako, Ako mopakita ngadto kanila sa ilang kahuyang”
-
Unsa sa imong hunahuna ang gipasabot sa pagduol ngadto kang Kristo?
Timan-i nga ang Ginoo miingon nga Iyang ipakita kanato ang atong kahuyang kon kita moduol ngadto Kaniya.
-
Ngano nga kini usa ka panalangin alang kanato?
Ang pulong nga kahuyang niini nga hugpong sa mga pulong nagpasabot sa atong napukan nga kahimtang, nga naglakip sa indibidwal nga “mahuyang nga mga butang” ug ang atong kawalay katakos nga mahimong hingpit.
-
Unsa ang imong nakat-onan gikan sa Ether 12:27 mahitungod kon nganong gusto sa Manluluwas nga imong ilhon ang imong kahuyang?
Pamalandongi kon aduna ka bay kasinatian bag-o lang diin gipakita sa Dios kanimo ang imong kahuyang. O ikonsiderar ang pagtanyag og hilom nga pag-ampo alang Kaniya aron matabangan ka sa pagbuntog sa huyang nga butang sa imong kinabuhi.
“Ako mohatag ngadto sa mga tawo og kahuyang nga sila mahimo nga magpaubos”
Basaha ang pipila ka mga ehemplo sa mga indibidwal diha sa mga kasulatan kinsa miila sa ilang kahuyang:
-
Ether 3:2: Ang igsoon nga lalaki ni Jared
-
Mosiah 4:2: Ang katawhan ni Hari Benjamin
-
Sa unsang paagi nga ang pag-ila sa ilang kahuyang nakatabang sa mga indibidwal niini nga mga asoy nga mahimong magpaubos?
-
Ngano sa imong hunahuna nga gusto sa Ginoo nga kita magpaubos?
“Ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan”
-
Unsa sa imong hunahuna ang gipasabot nga ang grasya sa Manluluwas igo na alang sa tanan kinsa magpaubos sa ilang kaugalingon sa Iyang atubangan?
Si Elder Kevin S. Hamilton sa Seventy mipasabot:
Ang [Jesukristo] nga makalig-on, makaabag nga grasya makahatag og gahom sa pagbuntog sa tanan nga mga babag, sa tanan nga mga hagit, ug sa tanan nga mga kahuyang samtang kita magtinguha nga mag-usab.
Ang Manluluwas mihimo sa Iyang walay kinutoban ug mahangtoron nga Pag-ula aron nga kita sa tinuod mausab, maghinulsol, ug mahimong mas maayo. Kita sa pagkatinuod mahimong matawo pag-usab. Kita makabuntog og mga kinaiya, mga adiksyon, ug gani sa “hilig sa pagbuhat og daotan” [Mosiah 5:2]. (Kevin S. Hamilton, “Niana Ako Mohimo sa Mahuyang nga mga Butang nga Mahimo nga Malig-on,” Liahona, Mayo 2022, 51–52)
Pamatikdi kon sa unsang paagi ang mga tawo ni Hari Benjamin nakasinati sa grasya sa Ginoo diha sa Mosiah 4:3.
-
Kinsa pa diha sa mga kasulatan ang mipakita nga ang grasya sa Manluluwas igo na sa pagtabang kanato sa pagbuntog sa atong mga kahuyang?
“Kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila”
Gipasabot ni Elder Hamilton nga ang “mahuyang nga mga butang” niini nga bersikulo mahimong nagpasabot sa atong mga kinaiya nga mga kahuyang.
Ang atong napukan nga kinaiyahan, ang atong kahuyang, dayon kita makahimo sa pag-usab sa atong mga kinaiya, sa atong mga kahuyang. (Kevin S. Hamilton, “Niana Ako Mohimo sa Mahuyang nga mga Butang nga Mahimo nga Malig-on,” Liahona, Mayo 2022, 51)
-
Buhata ang usa sa mosunod:
-
Sa usa ka parapo nga dili moubos sa tulo ka mga kapahayag, irekord unsay imong nakat-onan ug gusto nimong hinumdoman gikan niini nga leksiyon.
-
Sa usa ka parapo nga dili moubos sa tulo ka mga kapahayag, ihulagway kon unsaon nimo paggamit ang imong nakat-onan karon.
-