Jesukristo: “Ang Tubod sa Tanan nga Pagkamatarong”
Imahe
usa ka painting ni Kristo
Depende sa unsay atong gitinguha, kita makakita og daghan nga maayo o daghan nga daotan sa kalibotan. Human makahibalo sa kalaglagan sa mga Jaredite ug makasaksi sa kalaglagan sa mga Nephite, si Moroni nangamuyo sa tanan niyang mga magbabasa sa pagtinguha kang Jesukristo ug sa mga panalangin nga Iyang ikatanyag. Kini nga leksiyon makatabang kanimo nga mobati og mas dakong tinguha sa pagpangita ni Jesukristo sa imong kaugalingong kinabuhi.
Mga tubod
Ang usa ka tubod gihubit isip “ang tinubdan diin ang usa ka butang nagagikan o gisuplay”—pananglitan, “usa ka tuboran sa tubig nga naggikan sa yuta” (Merriam-Webster.com Dictionary, “tubod”).
Imahe
Usa ka tubod sa tubig
Kon ikaw adunay access sa usa ka milagroso nga tubod nga naghatag og padayon nga pagdagayday sa bisan unsa nga imong gipili, unsay gusto nimo nga mahimo niini?
Pagdrowing og usa ka dali nga hulagway sa usa ka tubod nga naghimo sa unsay imong gipili, ug sa daklit ipasabot nganong gusto nimo kana.
Basaha ang Ether 12:28, mangita sa tubod nga gipasabot sa Ginoo human sa pagtudlo kang Moroni mahitungod sa Iyang abilidad sa paghimo sa atong mga kahuyang ngadto sa mga kalig-on.
Unsa ang tubod nga gipasabot sa Ginoo?
Unsa ang gitudlo niini nga bersikulo kon sa unsang paagi kita moduol ngadto kang Kristo?
Usa ka kamatuoran nga gitudlo niini nga bersikulo mao nga ang hugot nga pagtuo, paglaom, ug gugma nga putli modala kanato ngadto kang Jesukristo, ang Tubod sa Tanan nga Pagkamatarong.
Imahe
icon, rekord
Tubaga ang mosunod nga mga pangutana:
Ngano nga “ang Tubod sa Tanan nga Pagkamatarong” usa ka maayong titulo alang kang Jesukristo?
Unsa sa imong hunahuna o gibati ang kanunay nga gikan Kaniya?
Sa imong hunahuna sa unsang paagi ang pagpalambo sa hugot nga pagtuo, paglaom, ug gugma nga putli modala kanato ngadto kang Jesus?
Paglista og pipila ka mga ehemplo nga naghulagway kon sa unsang paagi nga ang Manluluwas mao ang Tubod sa Tanan nga Pagkamatarong. Kini nga mga ehemplo mahimong magagikan sa mga kasulatan, gikan sa imong kinabuhi, o gikan sa kinabuhi sa mga tawo nga imong nailhan. Kon nagkinahanglan ka og tabang sa paghunahuna og usa ka ehemplo, mahimo nimong basahon ang asoy sa Manluluwas diha sa Marcos 2:1–12 o tan-awa ang “Gipasaylo ni Jesus ang mga Sala ug Giayo ang Tawo nga Paralitiko” (2:57).
Pamalandongi kon sa unsang paagi kini nga mga ehemplo makaimpluwensya sa imong mga pagbati ngadto kang Jesukristo. Hunahunaa ang imong kasamtangan nga tinguha nga moduol ngadto kang Jesukristo ug mopakigbahin sa pagkamatarong nga gikan Kaniya. Ang imoha bang tinguha ingon ka lig-on sama sa imong gusto? Ngano o nganong dili?
Samtang magpadayon ka sa pagtuon, tinguhaa ang mga kamatuoran mahitungod ni Jesukristo nga positibong makaimpluwensya sa imong tinguha ug abilidad sa pagduol ngadto Kaniya ug pag-ambit sa pagkamatarong nga Iyang gitanyag.
Mga gasa nga gikan kang Kristo
Basaha ang Ether 12:29–37, nga mangita sa mga panalangin nga gitanyag ni Jesukristo niadtong moduol Kaniya uban ang hugot nga pagtuo, paglaom, ug gugma nga putli.
Imahe
icon, rekord
Tubaga ang mosunod nga mga pangutana:
Unsa nga mga panalangin ang gisulti ni Moroni nga moabot gikan sa pagtinguha kang Jesus?
Hain niini nga mga panalangin ang imong nasinati o ang nasinati uban samtang nangita kamo sa Manluluwas?
Hain niini nga mga panalangin ang labing gipaabot nimo nga madawat sa umaabot? Ngano man?
Tinguhaa si Jesus
Sa kataposan sa Ether 12, mipakigbahin si Moroni og usa ka sagrado nga kasinatian nga iyang nasinati. Basaha ang bersikulo 39, ug sulayi sa paghanduraw kon unsa kaha kadto nga kasinatian alang kang Moroni.
Basaha ug ikonsiderar ang pagmarka sa pagdapit ni Moroni sa bersikulo 41.
Human makabaton sa kasinatian nga iyang gihulagway sa bersikulo 39, ngano kaha nga si Moroni motanyag kanato niini nga pagdapit?
Sama ni Moroni, si Elder Melvin J. Ballard (1873–1939) sa Korum sa Napulog Duha ka Apostoles adunay sagrado nga kasinatian uban sa Manluluwas. Basaha ang iyang paghulagway niini nga kasinatian, ug sulayi pag-usab ang paghanduraw kon unsa kaha kini.
Imahe
Elder Melvin J. Ballard
Nakaplagan nako ang akong kaugalingon usa ka gabii diha sa mga damgo sa kagabhion nianang sagrado nga bilding, ang templo. Human sa usa ka panahon sa pag-ampo ug pagmaya ako gipahibalo nga ako kinahanglan nga adunay pribilihiyo sa pagsulod ngadto sa usa niadto nga mga lawak, sa pagsugat sa usa ka mahimayaon nga pagkatawo, ug, sa akong pagsulod sa pultahan, akong nakita, nga naglingkod sa usa ka taas nga plataporma, ang labing mahimayaon ingon nga ang akong mga mata nakakita sukad o nga ako sukad nanamkon anaa sa tanan nga walay kataposan nga mga kalibotan.
Sa akong pagduol aron ipaila, Siya mitindog ug mipaduol kanako uban sa gituy-od nga mga bukton, ug Siya mipahiyom samtang Siya hinay nga misulti sa akong ngalan. Kon mabuhi pa ko nga usa ka milyon ka tuig ang edad, dili gyod nako makalimtan kana nga pahiyom. Iya akong gigakos ug gihagkan, gigakos ako sa Iyang sabakan, ug gipanalanginan ako, hangtod nga ang uyok sa akong mga bukog daw natunaw! Sa dihang nahuman na Siya, mihapa ako sa Iyang tiilan, ug, samtang giligo ko kini sa akong mga luha ug mga halok, akong nakita ang mga agi sa mga lansang sa tiil sa Manunubos sa kalibotan. Ang pagbati nga akong nabatonan diha sa presensya Niya kinsa anaa ang tanang butang diha sa Iyang mga kamot, nga makabaton sa Iyang gugma, Iyang pagmahal, ug Iyang panalangin mao nga kon ako makadawat niana nga akong nabatonan usa lamang ka pagtilaw, akong ihatag ang tanan nakong pagka-ako, ang tanan nga akong gilaoman nga mahimo, aron mabati kung unsa ang akong gibati kaniadto!
… Nakita ko si Jesus dili diha sa krus. Wala nako makita ang Iyang agtang nga natusok sa mga tunok ni ang Iyang mga kamot gikunis-kunis sa mga lansang, apan akong nakita Siya nga nagpahiyom, uban sa gituyhad nga mga bukton, nag-ingon kanatong tanan: “Duol ngari kanako!” (Melvin J. Ballard, “Nasayod Ako nga Siya Buhi,” Liahona, Dis. 2014, 80)
Imahe
icon, rekord
Tubaga ang mosunod nga mga pangutana:
Unsa ang mipatigbabaw diha nimo gikan sa kasinatian ni Elder Ballard? Ngano man?
Unsa nga mga hunahuna o mga pagbati mahitungod sa Manluluwas ang nadala sa imong hunahuna sa mga kasinatian ni Elder Ballard ug Moroni?
Pamalandongi kon unsa ang imong nakat-onan ug gibati karong adlawa. Unsa ang labing nakaimpluwensya sa imong tinguha sa pagtinguha kang Jesus diha sa imong kinabuhi? Ipasalig ang pagbuhat sa bisan unsa nga mga pag-aghat o mga impresyon nga imong naangkon.
