Doktrinal nga Kahanas: Ether 12:6

“Kamo Dili Makadawat og Saksi hangtod human sa Pagsulay sa Inyong Hugot nga Pagtuo”

duha ka batan-ong babaye nga nagdiskusyon

Sa imong pagtuon sa Ether 12:1–22, ikaw nakakat-on kon unsaon paggamit sa hugot nga pagtuo kang Jesukristo ug sa Iyang ebanghelyo sa dili pa makadawat og usa ka espirituhanong saksi sa kamatuoran (tan-awa sa Ether 12:6). Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Ether 12:6, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Ipasabot ug isag-ulo

Sa miaging leksiyon, imong nakat-onan ang mosunod nga kamatuoran gikan sa Ether 12:6: Kon kita magtinguha og espirituhanong saksi, nan kinahanglan una kitang mopakita og hugot nga pagtuo kang Jesukristo ug sa Iyang ebanghelyo.

icon, rekord

1.  Aron matabangan ka sa pagpasabot sa mga pagtulun-an sa Ether 12:6, gamita ang mga hugpong sa mga pulong gikan sa bersikulo ug ang imong kaugalingon nga mga pulong sa pagtubag sa mosunod nga pangutana:

   • Unsa nga tambag ang gihatag sa Ether 12:6 niadtong adunay wala matubag nga mga pangutana o wala pa “makasabot” sa kamatuoran?

Gamita ang imong kaugalingong pamaagi sa pagsag-ulo o ang mosunod nga ideya aron sa pagtabang kanimo sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan.

Si Presidente Ezra Taft Benson (1899–1994) mitudlo nga ang matag tawo dili makalikay nga moatubang sa paril sa hugot nga pagtuo ug dinha niana kinahanglan gayod mohimo og mga paghukom (tan-awa sa “The Book of Mormon Is the Word of God [Ang Basahon ni Mormon Mao ang Pulong sa Dios],” Ensign, Mayo 1975, 65). Sa laing pagkasulti, ang tanan kinahanglang mohukom sa ilang kaugalingon diha sa hugot nga pagtuo aron motuo, ug masayod, sa kamatuoran.

Pagdrowing og hulagway sa usa ka dako nga paril nga adunay stick figure sa imong kaugalingon nga nagbarog sa atubangan niini. Gamita ang “paril sa hugot nga pagtuo” sa pagtabang kanimo sa pagsag-ulo sa pakisayran sa Ether 12:6 ug sa mahinungdanon nga hugpong sa mga pulong sa kasulatan. Adornohi ang imong paril pinaagi sa pagsulat og “Ether 12:6” sa ibabaw, dayon isulat ang “kamo dili makadawat og saksi hangtod human sa pagsulay sa inyong hugot nga pagtuo” diha sa paril sa makadaghang mga higayon. Kon ang tanang luna sa imong paril napuno na sa mahinungdanon nga hugpong sa mga pulong sa kasulatan, sulayi sa pagsulti niini sa makusog sa pipila ka higayon nga dili motan-aw.

Pagpraktis sa paggamit

Rebyoha ang mga parapo 5–12 sa “Pag-angkon og Espirituhanong Kahibalo” nga seksiyon diha sa Mahinungdanon nga Dokumento sa Doktrinal nga Kahanas (2023) aron sa pagtabang kanimo sa pagpangandam sa pagtubag sa mosunod nga senaryo.

Si Christiana ug Niceta suod nga managhigala. Si Christiana miyembro sa Ang Simbahan ni Jesukristo sa mga Santos sa Ulahing mga Adlaw. Naningkamot siya pag-ayo nga mahimong maayong ehemplo ngadto ni Niceta, kinsa dili motuo sa organisadong relihiyon. Si Niceta sagad mokwestiyon sa mga pagtuo ni Christiana ug matingala kon nganong siya mosimba sa Dominggo, mobayad sa ikapulo, mosunod sa Pulong sa Kaalam, ug mopili nga magsinina og tarong o desente.

Si Christiana mipasabot ngadto kang Niceta nga iyang gibati nga ang mga sugo ug mga sumbanan nga iyang gipuy-an tinuod ug gipadala gikan sa Dios. Si Niceta mabinationg mitubag, “Nganong nakaingon man ka nga nahibalo ka nga kining mga butanga tinuod? Giunsa nimo pagkahibalo nga ang bisan unsang butang nga dili nimo makita tinuod?”

Gamita ang mga baroganan sa pag-angkon og espirituhanong kahibalo ug ang doktrina nga gitudlo sa Ether 12:6 aron matabangan si Niceta sa iyang mga pangutana.

2. Tubaga ang bisan usa lamang ka pangutana ubos sa matag usa sa mosunod nga mga ulohan:

Susihon ang mga konsepto ug mga pangutana inubanan sa mahangtorong panglantaw

• Unsa nga mga konsepto o mga kamatuoran ang gusto nimo nga matabangan si Niceta nga mas makasabot? Ngano man?

• Unsa ang mahimo nimong ipakigbahin kang Niceta mahitungod sa Ginoo ug sa unsang paagi Siya molihok uban kanato?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa nga mga pagtulun-an gikan sa Ether 12:6 ang tingali makatabang niini nga sitwasyon? Ngano man?

• Unsa ang pipila ka dugang nga mga tudling sa kasulatan o mga pamahayag gikan sa mga lider sa Simbahan ang makahatag og tabang ug giya alang kang Niceta?

Lihokon inubanan sa hugot nga pagtuo

• Unsa nga mga kasinatian ang imong nasinati o nasinati sa uban sa pagpakita og hugot nga pagtuo kang Jesukristo? Sa unsang paagi nga ang pagpakigbahin niini kang Niceta makatabang sa pagdasig kaniya sa paglihok diha sa hugot nga pagtuo?

• Unsa nga matinud-anon nga mga buhat ang imong irekomendar kang Niceta nga sugdan sa pagbuhat?