3 Nīfai 23

Fekumi Fakamātoato ʻi he Folofolá

ko Kalaisi mo ha kakai ʻi he ongo ʻAmeliká ʻoku nau mamata ki ha ʻū lauʻi peleti koula

ʻOku fēfē ʻa e tuʻunga hoʻo ako fakataautaha ʻa e folofolá? Ko e hā ha liliu kuó ne fakahoko ʻi hoʻo moʻuí? Naʻe fakamamafaʻi ʻe Sīsū ʻi he 3 Nīfai 23 ʻa e mahuʻinga ʻo hono tauhi mo ako ʻa e folofolá pea mo e ngaahi lea ʻa e kau palōfitá. ʻOku fakataumuʻa ʻa e lēsoni ko ʻení ke tokoni ke ke ako fakamātoato ange ʻa e ngaahi folofola ʻa e ʻEikí.

Ko hoʻo ako folofola fakatāutahá

ʻI he miniti hono hokó, vakai pe ko e meʻa ʻe fiha ʻi he ngaahi meʻa ko ʻení te ke lava ʻo kumi mo maʻu ʻi ho lokí pe falé: ko ha telefoni, tohi, fakatātā, ipu, pilo, mo ha sū.

• ʻOku ʻuhinga ki he hā ke fekumí?

• Ko e hā ʻoku makehe pe fakafiefia ʻi he fekumí?

• Ko e hā ʻe lava ke faingataʻa pe fakaloto-foʻi fekauʻaki mo e fekumí?

Ko e fakaafe ʻa e Fakamoʻuí

Lau ʻa e 3 Nīfai 23:1–5, ʻo kumi ʻa e meʻa naʻe fekau ʻe he Fakamoʻuí ke tau fekumi ki aí pea ko e hā hono ʻuhingá.

ʻI he ngaahi vahe kimuʻá, naʻe fakaʻaongaʻi ʻe he Fakamoʻuí ha konga lahi ʻo e ngaahi lea ʻa ʻĪsaiá ke tokoniʻi mo tāpuakiʻi ʻa e kau Nīfaí. (Vakai, 3 Nīfai 16:18–20; 20:32, 34–45; 21:8; 22:1–17.)

• Ko e hā ha ngaahi ʻuhinga naʻe ʻomi ʻe he ʻEikí ke tau fekumi ki ai ʻi he ngaahi lea ʻa ʻĪsaiá? (vakai, 3 Nīfai 23:1–3).

• Fakatatau ki he 3 Nīfai 23:5, ko e hā ʻoku totonu ke tau tokanga ai ki he ngaahi folofola ʻa e ʻEikí mo e ngaahi lea ʻa e kau palōfitá?

Ko e taha ʻo e ngaahi tefitoʻi moʻoni mahuʻinga ʻoku tau ako ʻi he lēsoni ko ʻení ko hono fekauʻi kitautolu ʻe he Fakamoʻuí ke tau tokanga ki Heʻene folofolá pea fekumi fakamātoato ʻi he ngaahi lea ʻa e kau palōfitá.

• ʻOkú ke pehē ʻoku ʻuhinga ki he hā ke fekumi fakamātoato ʻi he folofolá?

Fakaʻaongaʻi ha taimi ke fakalaulauloto ai ki hoʻo ako folofolá. ʻE lava ke kau heni ʻa e ako fakatāutahá mo fakafāmilí pea pehē foki ki he ako ʻi he lotú mo e seminelí. ʻOkú ke ongoʻi nai ʻokú ke fekumi fakamātoato ʻi he folofolá? Ko e hā hono ʻuhinga?

fakaʻilonga, lekooti

1. Tali ʻa e ongo fehuʻi ko ‘ení:

   • Ko e hā ha ngaahi ʻuhinga ʻe ala faingataʻa ai ke fekumi fakamātoato ʻi he folofolá?

   • Neongo ʻa e ngaahi faingataʻa ko ʻení, ko e hā ha ngaahi meʻa kuó ke fai, pe te ke lava ʻo fai, ke ke maʻu ai ha aʻusia mahuʻingamālie ʻi he ako folofolá?

Ko ha ngaahi sīpinga ʻeni ʻe niʻihi:

• Lotu kimuʻa peá ke akó.

• Fakaʻilongaʻi ha ngaahi lea mo ha ngaahi kupuʻi lea mahuʻinga, tautautefito ki he ngaahi lea mo e kupuʻi lea ʻoku tokoni atu ke ke ʻiloʻi lelei ange ʻa e Fakamoʻuí.

• Kumi ha ngaahi lea pe kupuʻi lea ʻoku faingataʻa ke mahino.

• Kiʻi taʻofi siʻi pea fakamatalaʻi fakanounou ʻa e meʻa kuó ke laú.

• Fakaʻaongaʻi ʻa e ngaahi potufolofola fakafekauʻakí ke mahino lelei ange ha tefito pe tokāteline.

Kalaisi ʻoku folofola kia Nīfai fekauʻaki mo e ngaahi lekōtí

Ke akoako ha taukei ʻe ua mei he ngaahi taukei ko ʻení, lau ʻa e 3 Nīfai 23:6–14 pea fakahoko ʻa e ngaahi meʻá ni:

• Fakamatalaʻi fakanounou ʻi he lea pē ʻaʻau ʻa e meʻa naʻá ke laú.

• Fakaʻilongaʻi ha ngaahi foʻi lea pe kupuʻi lea ʻoku tokoni ke mahino lelei ange kiate koe ʻa e Fakamoʻuí.

• Ko e hā ha ngaahi lea ʻokú ne fakamahinoʻi mai ʻoku tokanga ʻa e Fakamoʻuí ki he meʻa ʻoku lekooti ʻi he folofolá?

• ʻE liliu fēfē nai ʻe he ʻilo ʻeni fekauʻaki mo e Fakamoʻuí ʻa e founga hoʻo ako ʻa e folofolá?

Ko hono fakahoko ʻa e founga ako folofola ʻoku leleí

Fakaʻaongaʻi ha ngaahi miniti siʻi ke akoako fekumi fakamātoato ai ʻi he folofolá. Mahalo te ke fili ke ako ha vahe pe fekumi ʻi ha ngaahi veesi fekauʻaki mo ha tefito ʻokú ke fie ʻilo lahi ange ki ai. Fakaʻaongaʻi ha taukei fakafolofola ʻe taha pe lahi ange naʻá ke fakakaukau ki ai pe ʻiloʻi ʻi he lisi ʻi ʻolungá.

fakaʻilonga, lekooti

2. Tali ʻa e ngaahi fehuʻi ko ‘ení:

   • Ko e hā ʻa e founga ako naʻá ke fakaʻaongaʻí? Ko e hā ʻe ala tokoni ai ʻeni ke ke ako fakamātoato angé?

   • Ko e hā ha meʻa naʻá ke ako fekauʻaki mo e Fakamoʻuí naʻe teʻeki ke mahino kiate koe kimuʻa?

   • Ko e fē ʻi he ngaahi taukei ko ʻení te ke lava ʻo fakaʻaongaʻi ʻi hoʻo ako folofola ʻi he kahaʻú? Te ke fakahoko fēfē nai ia?

ʻI he uike ka hoko maí, fakakaukau ki he meʻa kuó ke ako he ʻaho ní. Fili ha founga ʻe taha te ke lava ai ʻo feinga ke fekumi fakamātoato ange ʻi he folofolá. Fakakaukau pe ʻe tokoniʻi fēfē nai ʻe he founga ko ʻení hoʻo moʻuí.

Fili Pē: Fie Ako Lahi Ange?

Ko e hā ha ngaahi tāpuaki ʻe lava ke maʻu mei hono ako ʻo e folofolá?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Richard G. Scott

ʻE lava ke hoko ʻa e fakalaulauloto ki ha potufolofolá ko ha kī ke ne fakaava mai ʻa e fakahaá pea mo e tataki mo e ueʻi ʻa e Laumālie Māʻoniʻoní. ʻE lava ke fakafiemālieʻi ʻe he folofolá ʻa e laumālie taʻemanongá, ʻo ʻomai ʻa e melinó, ʻamanaki leleí, mo toe fakafoki ʻa e loto-falalá ke malava ai ʻe ha taha ʻo ikunaʻi e ngaahi faingataʻa ʻo e moʻuí. ʻOkú na maʻu ʻa e ivi mālohi ke fakaleleiʻi e ngaahi faingataʻaʻia fakaelotó ʻi he taimi ʻoku tau tui ai ki he Fakamoʻuí. Te nau lava ʻo fakamoʻui leva e sinó. (Richard G. Scott, “Ko e Mālohi ʻo e Folofolá,” Ensign pe Liahona, Nōvema 2011, 6)

ʻE tokoni fēfē hono lau ʻo e Tohi ʻa Molomoná ki hoku fāmilí?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Palesiteni Henry B. Eyring

ʻE lava foki ke akoʻi kitautolu ʻe he ʻEikí ʻo fakafou ʻi he Tohi ʻa Molomoná fekauʻaki mo e feohi mo tokoni ki he kakaí. ʻOku fakahā ʻe he tohí ni ʻa e finangalo ʻo e ʻEikí ki he moʻui fakafāmilí ʻi ha founga ʻoku ʻikai fakahoko ia ʻe he ngaahi folofola kehé. ʻOku ou tui ʻoku tupu ia mei hono faʻunga leleí. ʻOku fekauʻaki ia mo e ngaahi fāmilí; ʻoku fekauʻaki ia mo e vā fetuʻutaki ʻo e kakaí. ʻOku kamata ia ʻi he ngaahi fāmilí, ʻoku fakaʻosi ia ʻi he ngaahi fāmilí, pea ʻoku tau ʻofa ʻi he ngaahi fāmili ko ʻení. (Henry B. Eyring, “A Discussion on Scripture Study,” Ensign pe Liahona, July 2005, 22)

Te u lava fēfē ʻo fakatupulaki ʻeku ako folofolá?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā David A. Bednar

Ko e taha ʻo e ngaahi founga lelei taha ke ʻunuʻunu ofi ai kiate Ia pea ke fakatou ako pea hoko ʻo tatau ange mo e ʻEiki ko Sīsū Kalaisí ko hono ako maʻu pē ʻa e ngaahi folofola māʻoniʻoní—ke “keinanga [fakaʻaho] ʻi he ngaahi folofola ʻa Kalaisí” (2 Nīfai 32:3).

Kātaki ʻo fakatokangaʻi ange naʻá ku fakaʻaongaʻi ʻa e foʻi lea akó kae ʻikai ko e foʻi lea laú. ʻOku fokotuʻu mai ʻe he akó mo e keinangá ha tokanga mo ha mālohi ʻoku ope atu ʻi he laukonga fakafiefiemālié pe vakai vave ki aí. ʻI hono ako mo e keinanga, pea hoko atu ai ha lotu fakamātoato mo hono fakaʻaongaʻi taʻeueʻia ʻo e ngaahi moʻoni mo e ngaahi tefitoʻi moʻoni ʻoku tau akó, ʻokú ne ʻomi ai ha fakamoʻoni fakataautaha, tukupā fakalaumālie, pea mo ha fakamoʻoni mālohi. Ko hono ako, ʻilo, lotua, mo fakaʻaongaʻi totonu ʻa e ngaahi moʻoni ʻo e ongoongoleleí, ko ha ngaahi meʻa mahuʻinga kotoa ia ʻi he founga ʻo e haʻu ki he Fakamoʻuí. (David A. Bednar, “Because We Have Them before Our Eyes,” New Era, Apr. 2006, 4)