3 Nīfai 18:15–39; 19:19–29

“Lotu Maʻu Ai Pē”

ko e lotu ʻa Sīsū Kalaisi ʻi he Ongo ʻAmeliká

ʻOku tokolahi ha kakai ʻoku nau lotu ʻi he ʻaho kotoa pē. ʻE lava ke mahuʻingamālie ange ha ngaahi lotu ʻe niʻihi ʻi ha ngaahi lotu ʻe niʻihi. Naʻe ʻikai ngata pē ʻi hono akoʻi ʻe Sīsū Kalaisi ʻEne kau muimuí ke nau “lotu maʻu ai pē ki he Tamaí” (3 Nīfai 18:19), ka naʻá Ne fakahā foki kiate kinautolu ʻa e founga ʻo e lotú. ʻE lava ke tokoniʻi koe ʻe he lēsoni ko ʻení ke ke muimui ki he ngaahi akonaki mo e sīpinga ʻa Sīsū Kalaisí ke ke lotu maʻu pē mo fakahoko ha ngaahi lotu ʻoku mahuʻingamālie angé.

Ngaahi Sīpingá

Fakakaukau ki ha talēniti, taukei, pe ʻulungaanga te ke saiʻia ke fakatupulaki. Fakakaukau ki he kakai ʻokú ke ʻilo ʻoku nau maʻu ʻa e talēniti, taukei, pe ʻulungaanga ko iá. ʻI hono fakaʻaongaʻi ʻo e ngaahi fakakaukau ko ʻení, fakafonu ʻa e ngaahi konga ko ʻeni ʻoku fakaʻatā atú ʻi ha ngaahi founga kehekehe:

• Kapau naʻá ku fie ako fekauʻaki mo e , te u muimui ʻi he sīpinga ʻa koeʻuhí .

Toe fai pē ʻa e ngāué ʻaki hano fakafonu ʻa e ʻuluaki konga ‘atā ʻo e sētesi ko ʻení ʻaki ha meʻa ʻokú ke fie ako mei he Fakamoʻuí pea tali ʻa e ʻuhingá ʻi he konga ʻatā fakaʻosí.

• Kapau naʻá ku fie ako fekauʻaki mo e , te u muimui ʻi he sīpinga ʻa Sīsū Kalaisí koeʻuhí .

Lolotonga ʻa e ngāue fakafaifekau ʻa e Fakamoʻuí ʻi he ongo ʻAmeliká, naʻá Ne akoʻi ʻa e kakaí ʻi he lea mo e tā sīpinga.

Lau ʻa e 3 Nīfai 18:16, 24, ʻo kumi ki ha tā sīpinga ʻa Sīsū.

• Ko e hā naʻe finangalo ʻa e Fakamoʻuí ke ako ʻe he kakaí mei Heʻene tā sīpingá?

Kimuʻa peá ke vakai ki he ngaahi akonaki mo e sīpinga ʻa e Fakamoʻuí, vakavakaiʻi hoʻo ngaahi lotu fakatāutahá.

Fakamaaka ʻa e ngaahi meʻa ko ʻení ʻi ha meʻafua mei he 1 ki he 5, pea ko e māʻolunga tahá ʻa e 5:

• ʻOku ou lotu ʻi he ʻaho kotoa pē.

• ʻOku ou fetuʻutaki mo ongoʻi ofi ki he Tamai Hēvaní ʻi he taimi ʻoku ou lotu aí.

• ʻOku ou ongoʻi ha loto-holi ke fakaleleiʻi ʻeku ngaahi lotu fakatāutahá.

ʻI he hokohoko atu hoʻo ako ʻa e 3 Nīfai 18, fekumi ki he ueʻi ʻa e Laumālie Māʻoniʻoní ke tokoniʻi koe ke ke ʻilo ʻa e meʻa te ke lava ʻo fai ke fakaleleiʻi ai hoʻo ngaahi lotu fakatāutahá. Muimui ʻi he ngaahi akonaki mo e sīpinga ʻa Sīsū Kalaisí ʻi hoʻo feinga ke fakalakalaká.

Ko e ngaahi akonaki ʻa e Fakamoʻuí fekauʻaki mo e lotú

Lau ʻa e 3 Nīfai 18:15, 18–23, ʻo kumi ʻa e meʻa ne akoʻi ʻe he Fakamoʻuí fekauʻaki mo e lotú. Te ke lava foki ʻo lau ʻa e fakahinohino ʻa e Fakamoʻuí fekauʻaki mo e lotú mei Heʻene malanga ʻi he temipalé ʻi he 3 Nīfai 13:5–13.

fakaʻilonga, lekooti

1. Tali ʻa e ngaahi fehuʻi ko ‘ení:

   • Ko e fē ʻi he ngaahi akonaki ʻa Sīsū fekauʻaki mo e lotú ʻokú ke pehē ʻe tokoni lahi taha kiate koé? Ko e hā hono ʻuhingá?

Ko e sīpinga lotu ʻa e Fakamoʻuí

Fakakaukauloto pe ‘e fēfē haʻo fanongo ʻoku lotua koe ʻe Sīsū Kalaisi. ʻOkú ke pehē ko e hā ha meʻa te Ne lotua maʻaú? Fakakaukau ki he ngaahi ongo te ke ala maʻú pea mo e founga te nau liliu ai hoʻo ngaahi lotú.

Lau ʻa e ongo potufolofola ko ʻení mei he 3 Nīfai 19 mo ha potufolofola kehe te ke fili. Kumi pe ko e hā ha mea te ke lava ʻo ako mei he sīpinga lotu ʻa e Fakamoʻuí.

Te ke lava foki ʻo mamata ʻi he foʻi vitiō “ʻOku Ngāue Fakaetauhi ʻa e Kau Ākongá pea Lotua ʻe Sīsū Kalaisi ʻa e Kakaí” mei he taimi 3:05 ki he 7:18, ʻoku maʻu ʻi he ChurchofJesusChrist.org, pea muimui ki he ngaahi veesi ʻi he 3 Nīfai 19.

• 3 Nīfai 17:14–17

• 3 Nīfai 19:19–23

• 3 Nīfai 19:27–29

• Mātiu 26:39–42

• Sione 17:1, 4, 8–9

• Tokāteline mo e Ngaahi Fuakava 45:3–5

fakaʻilonga, lekooti

2. Tali ʻa e ngaahi fehuʻi ko ‘ení:

   • Ko e hā naʻá ke ako fekauʻaki mo e lotú mei he sīpinga ʻa e Fakamoʻuí?

   • Ko e hā naʻá ke ako fekauʻaki mo e ongo ʻa e Fakamoʻuí kiate koé?

   • ‘Okú ke pehē ʻe liliu fēfē ʻe he muimui ʻi Heʻene sīpingá ʻa hoʻo ngaahi lotú?

Ko ʻetau ngaahi lotu fakatāutahá

Fili ha taha ʻo e ngaahi akonaki ʻa e Fakamoʻuí pe ko ha meʻa naʻá Ne fakafōtunga ʻi he lotú te ke lava ʻo fakahoko ʻi hoʻo ngaahi lotu fakatāutahá. Faʻu ha fakamanatu pea kamata ngāueʻi ia he ʻahó ni. ʻI hoʻo fai iá, fakatokangaʻi ʻa e founga ʻoku tokoni ai ke toe mahuʻingamālie ange hoʻo ngaahi lotú mo e founga ʻokú ne tākiekina ai ho vā fetuʻutaki mo e Tamai Hēvaní.

Mahalo te ke fie tānaki atu ha niʻihi ʻo e ngaahi meʻa naʻá ke ako he ʻaho ní ki hoʻo tohinoa “Ako kau kia Sīsū Kalaisi ʻi he 3 Nīfaí.”

Fili Pē: Fie Ako Lahi Ange?

ʻOku tāpuekina fēfē ʻe he lotú ʻa e ngaahi fāmilí?

Naʻe vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Palesiteni Henry B. Eyring

ʻI hoʻo lotu fakataha pea maʻá e kau mēmipa ʻo e fāmilí, te ke ongoʻi hoʻo ʻofa mo e ʻofa ʻa e Fakamoʻuí kiate kinautolú. ʻE hoko ia ʻo lahi ange ko hoʻo meʻafoaki fakalaumālie ʻi hoʻo fekumi ki aí. ʻE ongoʻi ia ʻe he kau mēmipa ʻo e fāmilí ʻi hoʻo lotu mo e tui lahi angé. (Henry B. Eyring, “Kakai Fefiné mo hono Ako ʻo e Ongoongoleleí ʻi ʻApí,” Ensign pe Liahona, Nōvema 2018, 60)

Ko e hā ha meʻa te u lava ʻo lotua?

Naʻe akonaki ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Palesiteni M. Russell Ballard

ʻOku ou fakaafeʻi ke mou lotu maʻu pē. Lotua ho fāmilí. Lotua e kau taki fakapuleʻangá. Lotua ʻa e kakai loto-toʻa ʻoku nau laine muʻa ʻi hono tauʻi e ngaahi tau fakafepaki ki he fakasōsialé, fakaeʻātakaí, fakapolitikalé, mo fakatuʻasino ʻokú ne lolotonga uesia ʻa e kakai kotoa pē ʻi he funga ʻo e māmaní, ʻa e koloaʻiá mo e masivá, ʻa e talavoú mo e toulekeleká.

Naʻe akoʻi mai ʻe he Fakamoʻuí, ke ʻoua naʻa fakangatangata ʻa e kakai ʻoku tau lotuá. Naʻá Ne folofola, “ʻOfa ki homou ngaahi filí, tāpuakiʻi ʻa kinautolu ʻoku kapeʻi ʻa kimoutolú, fai lelei kiate kinautolu ʻoku fehiʻa kiate kimoutolú, pea hūfia ʻa kinautolu ʻoku fai kovi mo fakatanga kiate kimoutolú” [Mātiu 5:44]. (M. Russell Ballard, “Ko Ia Mou Leʻo, pea Lotu Maʻu Ai Pē,” Ensign pe Liahona, Nōvema 2020, 78)

Naʻe pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā David A. Bednar

ʻOku lelei ʻaupito pea totonu ke tau kole ki he Tamai Hēvaní ʻa e ngaahi tāpuaki ʻoku tau fiemaʻú. ʻOku hoko ʻetau lotu fakamātoato maʻá e niʻihi kehé ko ha konga mahuʻinga ʻo e lotu ʻoku mahuʻingamālié, ʻo tatau ai pē ʻa e niʻihi ʻoku tau ʻofa aí mo kinautolu ʻoku faihala kiate kitautolú. Hangē ko hono fakalahi ʻa e malava ko ia ke maʻu fakahaá ʻi heʻetau fakahā ha loto houngaʻia lahi angé, ʻoku pehē pē hono fakalahi ʻa ʻetau malava ke fakafanongo pea fai ki he leʻo ʻo e ʻEikí ʻi heʻetau lotua ʻa e niʻihi kehé ʻaki ʻa e kotoa hotau lotó. (David A. Bednar, “Lotu Maʻu Ai Pē,” Ensign pe Liahona, Nōvema 2008, 43)

Ko e hā ʻa e ʻuhinga ʻoku tau lotu ai ki he Tamai Hēvaní?

ʻOku fakahinohinoʻi kitautolu ke tau lotu ki he Tamai Hēvaní. ʻOku ʻikai ke tau lotu kia Sīsū Kalaisi pe ko ha toe taha fakafoʻituitui. Ke ongoʻi ofi ki heʻetau mātuʻa fakalangí, ʻe ongoʻi ʻe ha niʻihi fakafoʻituitui ha holi ke lotu ki he Faʻē Fakalangí. Kuo lea ʻaki ʻeni ʻe he kau taki ʻo e Siasí ʻaki ʻenau fakamahinoʻi ʻa e sīpinga ʻo Sīsū Kalaisí.

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Dale G. Renlund

Naʻe akoʻi ʻe he Fakamoʻuí ʻa ʻEne kau ākongá, “Lotu maʻu ai pē ki he Tamaí ʻi hoku hingoá” [3 Nīfai 18:19]. ʻOku tau muimui ʻi he sīpinga ko ʻení mo fakataumuʻa ʻetau moihuú ki heʻetau Tamai Hēvaní ʻi he huafa ʻo Kalaisí pea ʻikai lotu ki he Faʻē Fakalangí. (Dale G. Renlund, “Ko Ho Natula Faka-ʻOtuá mo e Ikuʻanga Taʻengatá,” Liahona, Mē 2022, 70)

3 Nīfai 19:18, 22. Ko e hā naʻe lotu ai ʻa e kau ākongá kia Sīsuú?

Naʻe fakamatala ʻa ʻEletā Pulusi R. Makongikī (1915–1985) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē:

ʻEletā Bruce R. McConkie

Naʻe ʻi ai ha ʻuhinga makehe naʻe fai ai ʻení pea naʻe tuʻo taha pē. Naʻe ʻosi akoʻi kinautolu ʻe Sīsū ke lotu ʻi Hono huafá ki he Tamaí, pea naʻa nau tomuʻa fai ia. … Naʻe ʻi honau lotolotongá ʻa Sīsū ko ha fakataipe ʻo e Tamaí. … ʻI heʻenau mamata kiate Iá, naʻe hangē ia naʻa nau mamata ki he Tamaí; naʻe hangē pē ʻenau lotu kiate Iá haʻanau lotu ki he Tamaí. Ko ha tūkunga makehe mo hāhāmolofia ia. (Bruce R. McConkie, The Promised Messiah: The First Coming of Christ [1978], 560–61)