3 Nīfai 17

“ʻOku ou ʻOfa Mamahi kiate Kimoutolu”

ko hono fakamoʻui ʻe Kalaisi ha fefine

Kuo māʻuloloa ʻa e ʻahó ki he kakai Nīfaí ʻi he taimi naʻe fakahā ai ʻe he Fakamoʻuí kuo taimi ke Ne mavahé. Ka neongo ia, naʻe ongo ki Hono lotó ʻa e loʻimata mo e fakaʻamu ʻa e kakaí ke Ne toe kiʻi nofo ke fuofuoloa angé. ʻI ha fakahaaʻi fakaofo ʻo e manavaʻofá, naʻá Ne fakamoʻui kinautolu, lotu fakataha mo kinautolu, mo tāpuakiʻi taha taha ʻenau fānaú. ʻE lava ke tokoniʻi koe ʻe he lēsoni ko ʻení ke ke ongoʻi ʻa e ʻofa ʻoku maʻu ʻe Sīsū Kalaisi maʻaú.

Ko e ongo ʻa e Fakamoʻuí

Fakakaukau kuó ke feohi ʻi ha ʻaho mo e Fakamoʻuí pea kuó Ne fakahā atu kuo taimi ke Ne mavahe.

Fakakaukau ke ke mamata ʻi he “ʻOku Ngāue Tokoni ʻa Sīsū Kalaisi mo e Kau ʻĀngeló ʻi he Manavaʻofa” mei he taimi 0:12 ki he 1:30, ʻoku maʻu ʻi he ChurchofJesusChrist.org.

• Te ke ongoʻi fēfē nai ʻi he tūkunga ko ʻení?

ʻI he uike ʻe ua kuo ʻosí, naʻá ke ako ai ki he ngaahi ngāue mo e ngaahi akonaki ʻa e Fakamoʻuí ʻi he lotolotonga ʻo e kau Nīfaí ʻi Heʻene fuofua hā kiate kinautolu ʻi he 3 Nīfai 11–16. Fakakaukau ki he meʻa naʻe fai ʻe Sīsū Kalaisi ʻi he lotolotonga ʻo e kau Nīfaí ke fakahaaʻi ʻEne ʻofá. ʻE ala tokoni haʻo toe vakaiʻi ʻa e meʻa naʻá ke tohi ʻi hoʻo tohinoa akó ʻi he “Ako kau kia Sīsū Kalaisi ʻi he 3 Nīfaí” ke ke manatuʻi.

• Naʻe fakahaaʻi fēfē ʻe he ngaahi ngāue ʻa e Fakamoʻuí ‘Ene ‘ofa ki he kakai Nīfaí?

Te ke laukonga lahi ange he ʻahó ni fekauʻaki mo e founga naʻe fakahaaʻi ai ʻe he Fakamoʻuí ʻEne manavaʻofá ʻi he lotolotonga ʻo e kau Nīfaí. ʻI hoʻo akó, fakakaukau ki he meʻa ʻoku akoʻi ʻe Heʻene ngaahi tōʻongá fekauʻaki mo Hono ʻulungāngá. Tokanga ki he ongo ʻokú ke maʻu kiate Iá.

Mahalo ʻe tokoni ke ʻiloʻi naʻe hoko ʻa e ngaahi meʻa kotoa ʻoku lekooti ʻi he 3 Nīfai 11–17 ʻi ha ʻaho pē ʻe taha.

Lau ʻa e 3 Nīfai 17:1–6, ʻo kumi ʻa e meʻa te ke lava ʻo ako fekauʻaki mo Sīsū Kalaisi mei Heʻene ngaahi folofolá mo e ngāué.

• Ko e hā naʻá ke maʻu ʻi he ngaahi veesi ko ʻení?

Mahalo kuó ke ʻiloʻi ha moʻoni hangē ko ʻení: ʻOku fonu ʻa e loto ʻo Sīsū Kalaisí ʻi he ʻofa mamahi kiate au. Fakakaukau ke lekooti ʻa e moʻoni ko ʻení ʻi he tafaʻaki ʻo e veesi 6.

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Ulisses Soares

ʻOku ʻuhingamālie ke vakai ko e ngaahi tōʻonga ʻofa mamahi ʻa Sīsuú naʻe ʻikai ko ha meʻa ia ne tātātaha mo fakakounaʻi ʻo fakatefito ʻi ha lisi ʻo ha ngaahi ngāue ke fakakakato, ka ko hano fakahaaʻi ia he ʻaho kotoa pē ʻa e moʻoni ʻo ʻEne ʻofa haohaoa ki he ʻOtuá mo ʻEne fānaú pea mo ʻEne loto-holi ʻi he faʻa kātaki ke tokoniʻi kinautolú. (Ulisses Soares, “Ko e Manavaʻofa Tuʻuloa ʻa e Fakamoʻuí,” Liahona, Nōvema 2021, 14)

• ʻI he lea pē ʻaʻau, ko e hā ʻa e akonaki ʻa ʻEletā Soālesi fekauʻaki mo e manavaʻofa ʻa e Fakamoʻuí?

Ko e manavaʻofa ʻa e Fakamoʻuí

ʻOku fakahaaʻi ʻe he toenga ʻo e 3 Nīfai 17 ʻa e natula manavaʻofa ʻa e Fakamoʻuí. Manatuʻi ko e meʻa naʻe fakahoko ʻe Sīsū Kalaisi ʻi he 3 Nīfai 17 naʻe hoko ia koeʻuhí he naʻá Ne ʻafioʻi ʻa e ngaahi holi māʻoniʻoni ʻa e kau Nīfaí pea naʻá Ne finangalo moʻoni ke Ne ʻiate kinautolu mo tāpuakiʻi kinautolu.

Ako fakalelei ʻa e ngaahi potufolofola ko ʻení pea fakakaukauloto pe naʻe mei fēfē nai kapau naʻá ke ʻi ai. Fakaafeʻi ʻa e Laumālie Māʻoniʻoní ke ne akoʻi koe ʻi hoʻo laukonga mo fakalaulaulotó. Hiki hoʻo ngaahi fakakaukaú mo e ongó ʻi hoʻo tohinoa akó ʻi lalo ʻi he “Ako kau kia Sīsū Kalaisi ʻi he 3 Nīfaí.”

• 3 Nīfai 17:7–10: Fakamoʻui honau kau mahakí mo e faingataʻaʻiá

• 3 Nīfai 17:13–20: Lotu fakataha mo kinautolu pea maʻanautolu

• 3 Nīfai 17:11–12, 21–25: Tāpuakiʻi ʻo e fānaú

Ke tokoni ki he kau akó ke fakakaukauloto mo ongoʻi ʻa e fakamoʻoni ʻa e Laumālie Māʻoniʻoní ki he meʻa ne nau ako ʻi he 3 Nīfai 17, fakakaukau ke huluʻi ʻa e vitiō “ʻOku Ngāue Tokoni ʻa Sīsū Kalaisi mo e Kau ʻĀngeló ʻi he Manavaʻofa” mei he taimi 1:30 ki he 11:45.

Ke tokoni ke ke fakakaukauloto ki he meʻa naʻá ke ako ʻi he 3 Nīfai 17, mahalo te ke fie sio ʻi he “ʻOku Ngāue Tokoni ʻa Sīsū Kalaisi mo e Kau ʻĀngeló ʻi he Manavaʻofa” mei he taimi 1:30 ki he 11:45.

fakaʻilonga, lekooti

1. Tali ha fehuʻi ʻe ua pe lahi ange mei he ngaahi fehuʻi ko ʻení:

   • Kapau naʻá ke ʻi ai, ʻe liliu fēfē ʻe he aʻusia ko ʻení hoʻo vā fetuʻutaki mo hoʻo Fakamoʻui ko Sīsū Kalaisí?

   • ʻOkú ke pehē ʻoku fakahaaʻi fēfē ʻe Sīsū Kalaisi ʻa e manavaʻofá kiate kitautolu he ʻaho ní?

   • Ko e hā ʻokú ke ongoʻi ʻoku ueʻi koe ke ke fakahoko ke ke fakahaaʻi ai hoʻo ʻofa kia Sīsū Kalaisí?

Fili Pē: Fie Ako Lahi Ange?

Ko e hā ʻa e faʻahinga faingataʻaʻia naʻe fakamoʻui ʻe Sīsū ʻa e kakaí mei aí?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Palesiteni Dallin H. Oaks

ʻI he taimi naʻe hā ai ʻa e Fakamoʻuí ki he kau angatonu ʻi he Maama Foʻoú, naʻá Ne ui ʻa e kakai naʻe ketu pe kui pe fokoutua ʻi ha ngaahi mahaki fakaesino kehé ke nau omi. Naʻá Ne fai ʻa e fakaafe tatau kiate kinautolu naʻe “puke ‘i ha mahaki ʻe taha” (3 Nīfai 17:7). Naʻá Ne folofola ʻo pehē, “ʻOmi ʻa kinautolu ki heni pea te u fakamoʻui ʻa kinautolu” (veesi 7). ʻOku talanoa ʻa e Tohi ʻa Molomoná fekauʻaki mo e ōmai ʻa e fuʻu kakaí mo “kinautolu kotoa pē naʻa nau puke ʻi ha faʻahinga mahakí” (veesi 9). ʻOku pau pē naʻe kau heni ʻa e kakai naʻe fekuki mo ha faʻahinga mahaki fakaesino pe fakaeloto pe fakaeʻatamai kehekehe, pea ʻoku fakamoʻoni ʻa e folofolá na‘e “fakamoʻui [ʻe Sīsū] ‘a kinautolu kotoa pē” (veesi 9). (Dallin H. Oaks, “He Heals the Heavy Laden,” Ensign pe Liahona, Nov. 2006, 6)

Naʻe akoʻi foki ʻe Sisitā Poni H. Kōtoni, Palesiteni Lahi ʻo e Kau Finemuí ʻi he vitiō ko ʻení fekauʻaki mo e malava mo e hōifua ʻa e Fakamoʻuí ke Ne fakahoko ʻa e ngāue faifakamoʻuí.

Te u tupulaki fēfē ʻi he manavaʻofa faka-Kalaisí?

Naʻe vahevahe ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Ulisses Soares

ʻOku fakatefito e ʻulungaanga ʻofa ʻa Sīsuú ʻi he manavaʻofá, ʻa ʻEne ʻofa haohaoá, ʻa ia ko e uho ʻo ʻEne feilaulau fakaleleí. Ko e manavaʻofá ko ha tefitoʻi ʻulungaanga ia ʻo kinautolu ʻoku faifeinga ke fakamāʻoniʻoniʻi kinautolú pea ʻoku tuifio e ʻulungaanga fakalangi ko ʻení mo ha ngaahi ʻulungaanga kehe faka-Kalisitiane hangē ko e tangi fakataha mo kinautolu ʻoku tangí pea mo hono maʻu ha kaungāongoʻi, ʻaloʻofa mo e angaʻofá. Ko hono moʻoní, ko hono fakahaaʻi ko ia ʻa e manavaʻofá ki he niʻihi kehé, ko e uho ia ʻo e ongoongolelei ʻo Sīsū Kalaisí pea mo ha fakamoʻoni mahino ia ʻo ʻetau ofi fakalaumālie mo fakaeloto ki he Fakamoʻuí. ʻIkai ke ngata aí, ʻokú ne fakahaaʻi ʻa e tūkunga ʻo e ivi tākiekina ʻokú Ne maʻu ʻi heʻetau tōʻonga moʻuí mo fakahaaʻi ʻa e ivi malava ʻoku maʻu ʻe hotau laumālié. (Ulisses Soares, “Ko e Manavaʻofa Tuʻuloa ʻa e Fakamoʻuí,” Liahona, Nōvema 2021, 13-14)