Fakataukei Fakatokāteliné: 3 Nīfai 12:48

“Ke Mou Haohaoa ʻo Hangē Pē Ko Aú, Pe hangē Ko e Haohaoa Hoʻomou Tamai ʻa ia ʻOku ʻi he Langí”

finemui ʻoku fakakaukauloto

ʻI hoʻo ako ʻa e 3 Nīfai 12, naʻa ke ako ai fekauʻaki mo e hoko ʻo haohaoa hangē ko Sīsū Kalaisi mo e Tamai Hēvaní. ʻE lava ke tokoni e lēsoni ko ʻení ke ke ako maʻuloto ʻa e potufolofola mo e kupuʻi lea folofola mahuʻinga ki he 3 Nīfai 12:48, fakamatalaʻi ʻa e tokāteline ʻoku akoʻi ʻi he potufolofolá ni, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Fakamatalaʻí mo e ako maʻulotó

ʻI he lēsoni kimuʻá, naʻá ke ako ai ʻa e moʻoni ko ʻení: ʻOku finangalo ʻa Sīsū Kalaisi ke tau hoko ʻo haohaoa ʻo hangē ko Iá pea mo ʻetau Tamai ʻi Hēvaní.

Fakakaukauloto ʻoku ʻi ai haʻo kaungāmeʻa ʻokú ne tui ʻoku ʻikai finangalo ʻa e ʻOtuá ia ke tau angalelei mo fakaʻapaʻapaʻi ʻa e niʻihi kehé.

• Te ke fakamatalaʻi fēfē ʻa e 3 Nīfai 12:48 ʻi ha founga ʻe lava ke tokoni ki he mahino ʻa ho kaungāmeʻá?

Ko e kupuʻi lea folofola mahuʻinga ki he 3 Nīfai 12:48 ko e “Ke mou haohaoa ʻo hangē pē ko Aú, pe hangē ko e haohaoa hoʻomou Tamai ʻa ia ʻoku ʻi he langí.” Fakaʻaongaʻi ʻa e founga ko ʻení, pe ko ha founga ʻe taha te ke fili, ke tokoni atu ke ke ako maʻuloto ʻa e potufolofolá mo e kupuʻi lea mahuʻinga ʻo e folofolá.

Tohiʻi ʻa e “3 Nīfai 12:48” ʻi loto-mālie ʻi ha laʻipepa. Tohiʻi ʻi ha tuliki ʻe taha ʻo e pēsí ʻa e ongo foʻi lea “Ke mou haohaoa.” Tohiʻi ʻi ha tuliki ʻe taha ʻa e “ʻo hangē pē ko Aú.” Tohiʻi ʻi ha tuliki ʻe taha ʻa e “pe hangē ko e haohaoa hoʻomou Tamai.” Tohiʻi ʻi he tuliki fakaʻosí ʻa e “ʻa ia ʻoku ʻi he langí.” Feinga ke ako maʻuloto ʻa e potufolofolá mo e kupuʻi lea mahuʻinga he folofolá ʻaki hoʻo tuhu ʻaki hoʻo penivahevahé pe foʻi tuhú ki he kupuʻi lea takitaha ʻi hono hokohokó, ʻo kamata ʻaki e potufolofolá. ʻE ala tokoni ke ke lea leʻolahi ʻaki e ngaahi foʻi leá ʻi hoʻo tuhu kiate kinautolú. Hili hoʻo toutou fai ʻení, feinga ke toe lau maʻuloto ʻa e potufolofolá mo e kupuʻi leá kotoa.

Akoako hono fakaʻaongaʻí

Tuku ha ngaahi miniti siʻi ke toe vakaiʻi ‘a e ngaahi tefitoʻi moʻoni ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023). Fili ha taha ʻo e ngaahi tefitoʻi moʻoní ke ke ako lahi ange ki ai.

• Te ke fakamatalaʻi fēfē ʻa e tefitoʻi moʻoni naʻá ke filí ki ha taha ʻoku ʻikai ke ne maheni mo ia?

Fakaʻaongaʻi ʻa e tūkunga ko ʻení ke tokoni atu ke ke fakaʻaongaʻi ʻa e ngaahi akonaki ʻa e Fakamoʻuí ʻi he 3 Nīfai 12:48 mo e ngaahi tefitoʻi moʻoni ki hono maʻu ʻo e ʻilo fakalaumālié.

Ko Sioné ko ha talavou ʻoku tui ki he ʻOtuá. Ka neongo ia, ʻoku ʻi ai ha ngaahi tafaʻaki ʻo e ongoongoleleí ʻoku ʻikai ke ne fie fakakaukau ki ai. Ko e taha ʻo kinautolu ko e naʻinaʻi ʻa e Fakamoʻuí ke hoko ʻo haohaoá. Kuó ne feinga ke fai ha ngaahi liliu pea hoko ʻo anga faka-Kalaisi ange kae kei tōnounou pē. ʻOkú ne ongoʻi hangē kuo ʻikai ke ne lava ha meʻá, ko ia ai ʻoku taʻemalava ke ne fakahaohaoaʻi ia.

Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

ʻOku akoʻi ʻi he Fakamatala ki he ʻElito ʻo e Fakataukei Fakatokāteliné ko e taimi ʻoku tau fehangahangai ai mo ha palopalema faingataʻá, te tau lava ʻo “liliu ʻa e fehuʻí (ke kehe ʻa e vakai ki he fehuʻí) pea vakai ki he ngaahi fakakaukaú ʻo makatuʻunga ʻi he ngaahi tuʻunga moʻui ʻo e moʻoni ʻa e ʻEikí kae ʻikai ko hono tali e ngaahi fakakaukau pe mahalo ʻa e māmaní” (peesi 3). ʻE lava ke tokoni e ngaahi fehuʻi ko ʻení ʻi he meʻá ni.

fakaʻilonga, lekooti

1. Tali ʻa e ngaahi fehuʻi ko ‘ení:

• ʻOkú ke pehē ʻoku kehe fēfē e vakai ʻa e ʻEikí ki he haohaoá mei he tokolahi ʻi he māmaní?

• ʻOku tokoniʻi fēfē kitautolu ʻe heʻetau ʻilo ki he palani ʻo e fakamoʻuí mo e Fakalelei ʻa Sīsū Kalaisí ke mahino lelei ange ʻa e meʻa ʻoku akoʻi ʻe he Fakamoʻuí ʻi he 3 Nīfai 12:48?

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

• Te ke fakaʻaongaʻi fēfē ʻa e meʻa kuó ke ako ʻi he 3 Nīfai 12:48 kau ki he haohaoá ke tali ʻa e hohaʻa ʻoku maʻu ʻe Sioné?

Lau ha potufolofola ʻe tolu pe lahi ange, ʻo kumi ki ha toe ngaahi fakakaukau fekauʻaki mo e hoko ʻo haohaoa ʻi he founga naʻe akoʻi ʻe Sīsuú.

• ʻEta 12:27

• Molonai 10:32

• Tokāteline mo e Ngaahi Fuakava 67:13

• Tokāteline mo e Ngaahi Fuakava 76:69

• ʻEfesō 4:11–13

fakaʻilonga, lekooti

2. Tali ‘a e fehuʻi ko ‘ení:

• ʻE tokoni fēfē nai e ngaahi fakakaukau naʻá ke maʻú kia Sione ʻi heʻene hohaʻá?

Ngāue ʻi he tuí

Lau ʻa e palakalafi 5–7 ‘i he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné, ʻo kumi ʻa e meʻa ʻe ala fai ʻe Sione ke ngāue ai ‘i he tuí.

fakaʻilonga, lekooti

3. Tali ha fehuʻi ʻe tolu mei he ngaahi fehuʻi ko ʻení:

• ʻOkú ke pehē ko e fē ʻi he ngaahi akonaki ko ʻení ʻe lava ʻo tokoni kia Sioné? Ko e hā hono ʻuhingá?

• Ko e hā ʻe lava ke lotua ʻe Sione ke tokoni ki hono tūkungá?

• Ko e hā te ke ala fokotuʻu ange ke fai ʻe Sione ke “moʻui ʻi he tui” kae ʻoua kuó ne maʻu ha mahino lahi ange fekauʻaki mo hono tuʻunga malava ke hoko ʻo haohaoá?

• ʻE tākiekina fēfē ʻe he meʻa kuó ke ako ʻi he 3 Nīfai 12:48 fekauʻaki mo e haohaoá hoʻo ngaahi ongó mo e tōʻongá?